Amata vaiaso fou iloiloga a le Komiti Su’esu’e a le Maota Maualuga

Pago Pago - AMERIKA SAMOA

O le Aso Gafua, aso 25 o Iulai, ua fa’atulaga e amata ai galuega a le Komiti Su’esu’e a le Maota Maualuga, lea o lo’o taitai komiti ai le afioga i le senetoa ia Togiola T.A. Tulafono. 

O le amataga o le tausaga lenei sa fa’avaeina ai le komiti su’esu’e, lea e to’aiva totino, e aofia ai afioga i senetoa ia Magalei Logovi’i - o ia fo’i o le sui taitai komiti - Fai’ivae Iuli Godinet, Alo Paul Stevenson, Ma’o Fa’auma Gogo, Utu Sila Poasa, Uti Petelo, Fonoti Tafa’ifa Aufata and Poneafua Tapeni.

O le vaiaso lenei na fa’alauiloa ai mataupu tomua o le iloiloga muamua lea a amata i le itula e 1 i le aoauli o le Aso Gafua. Fa’ailoa e le komiti o le mataupu muamua e iloiloina, o le fanua lea ua fa’aigoina “Nu’u Fou”, e tusa ma le 400 eka i nisi o afioaga i le itu i matu o Tutuila.

O i latou o lo’o lesitalaina ai “Nu’u Fou”, e aofia ai Mauga Tasi Asuega, Laulii Alofa, Michael T. Fuiavai, ma Patolo Mageo.

O lo’o toatele afioga i senetoa ma faipule, ae fa’apea foi nisi o le mamalu lautele o le atunu’u o lo’o fesiligia lenei mataupu, ma ua tulai mai ai manaoaga o afioga i senetoa e tatau ona tuu atu “Nu’u Fou” i le Komiti Su’esu’e e su’esu’eina lenei mataupu, aua o lo’o i ai i le komiti le malosiaga e samania ai molimau fa’apea ma pepa o lenei tulaga. 

O le mataupu lona lua mo le Komiti Su’esu’e, e tagai lea i le fanua, e tusa ma le 65 eka i aai o Kunia i Hawaii, lea ua fa’atauina e le faigamalo a Amerika Samoa. Saunoa le afioga i le Peresitene o le Maota Maualuga, Tuaolo Manaia Fruean, o lo’o tele fesili i lenei mataupu ae tau le maua ni tali, ma e tatau i le Komiti Su’esu’e ona iloiloina lenei fanua fa’atau i Hawaii. 

Sa lipotia i le taimi ua fano, le saunoaga a Kovana Sili, Lemanu Peleti Mauga e fa’apea, e le’i ma’ea le fa’atauina o le fanua i Hawaii.

O le mataupu lona tolu ua fa’atulaga mo iloiloga a le Komiti Su’esu’e e fa’atatau lea i le “TalofaPass” - o le upega tafailagi lea o lo’o fa’aaoga e le faigamalo e lesitala ai tagata o lo’o fia ulufale mai i Amerika Samoa. 

E tusa i le $6.4 milion le tau aofa’i o lea poloketi, ae o lo’o toatele i latou o lo’o fa’atu’iese i ai ona o le tele o galuega e alu i le lesitala. 

E tele isi mataupu o lo’o fuafua le Komiti Su’esu’e e faia i ai a latou iloiloga ae o mataupu nei e tolu o le a muamua i ai. O le a i ai molimau e samania e o’o atu i luma o nei iloiloga e faia i le Fale Samoa o le Maota Maualuga i Fagatogo.