TALA I VAIFANUA

Pago Pago - AMERIKA SAMOA

TATALA LE AVANOA - FAIA AI VISA MO AMERIKA I SAMOA

Ua fa’alauiloa ele Ofisa o le Emepasa o Amerika i Apia, Samoa ua mae’a ona fa’atulaga nisi e fia talosagaina o latou visa e malaga ai mo Amerika mai ia Aukuso 8 - 12, 2022.

Ua mae’a tatalaina nei fo’i le Kalena i ala tafa’ilagi mo le fa’atulagaina o i latou e fia tausagaina latou visa e amata mai ia Iulai 19, 2022 ma e mafai ona e fa’atulagaina ai lau malaga mo Samoa i aso ua mafai ona oo i ai lea tautua i tafa’ilagi ma fuafua i ai aso e te malaga ai i Samoa mo le talosagaina o lou visa malaga, mo i latou uma e alaala i Amerika Samoa nei.

Pe afai e uma aso ua lautogia mo le masina o Aukuso, ua fa’asolo atu fo’i isi avanoa mo le masina o Setema 2022.

Pe afai ua tatala mai sou avanoa mo lenei vaiaso o le masina o Aukuso 2022, ia manatua e i latou o talosaga, e le fa’apea ua i ai lou avanoa ua mautinoa ai le maua o sou visa e te malaga ai i Amerika.

Pe afai fo’i e le talia lou visa sa talosagaina, e le toe fa’afo’ia maia le tinoitupe sa talosagaina ai lou visa. Ona o i tatou lea e matele ina moomia le visa e tafafao ai ua fa’ailoa mai ai o i tatou e tatau ona talosagaina le ulufale ma toe taliu mai i o tatou atunuu e $160,US le tinoitupe o moomia mo le visa lea,  pe $420.ST.

Mai le lisi o lo ua fa’ailoa mai le totogi mai le Emepasa i Apia, ua sili lava ona taugata ai le visa o se tasi e talosaga, ae fa’amoemoe e alu atu e fa’afetauia lana manamea ua fa’amau i ai i Amerika lea e $265.US poo le $690.ST.

Ua i ai fo’i ma avanoa e talosagaina ai visa mo Faife’au e fia galulue fa’amisiona i Amerika ma visa fo’i mo nisi e fia galulue fa’avaitaimi i Amerika e $190.US poo le $490.ST

Ua i ai fo’i ma visa mo fanau e fia fa’aauau a’oa’oga maualuluga i Amerika ua mafai ona talosagaina sa’o lava i le totogi e $160.US poo le $420.ST 

Ia faamauina lau taimi atofa mo lau talosaga e fia fa’atalanoa lou visa mo le silafia e le Ofisa o oe sa fa’amauina lou taimi i le Ofisa o le Emepasa o Amerika i Apia.

Ua fa’ailoa mai, pe afai ua faato’a mae’a ona faafou lou tusi folau e i ai ma le pepa numera DS-160 e faatumu ma taua’aoina fa’atasi mai ma lou Tusi Folau, ia matua tutusa lelei lava fa’amaumauga o lo’o ua fa’amauinai lou tusi folau ma le pepa fa’atumu lea e DS-160.

Pe a mae’a le fa’atalanoaina o lou visa, o i latou ua pasia e maua o latou visa e mafai ona taofia e le Ofisa o le Emepasa o Amerika lou Tusi Folau ina ia fa’amauina i ai lou visa ona fa’ato’a e toe maua lea i se aso lata mai, o le a fa’amautu atu ia te oe, a’o e le’i tu’ua le ofisa i Apia mai le taimi o lau fa’atalanoaga ma sui ua ia pasia lou visa.

Mo nisi fa’amatalaga uma ma pepa fa’atumu faamolemole ulufale i le itulau i laina tafailagi -please visit travel.state.gov.

FA’ALAUILOA FAAMA’I FOU - “MONKEYPOX”  E LE MATAGALUEGA O LE SOIFUA MALOLOINA

O lo 

O le fonotaga a le COVID-19 Task Force i le aso Lua, sa faalauiloa ai e le Matagaluega o le Soifua Maloloina le fa’ama’i fou, “monkeypox”, e tali tutusa lava le foliga mai i le smallpox po’o le tanesusu.

E vave tele le pipisi o lea fa’ama’i ma e mafai ona a’afia oe mo le 2 i le 4 vaiaso.  E matele ina amata le Monkeypox i le fiva, pata mai ma fa’apepe po’u, ma’alili i isi taimi, e tiga le tua, fefete ma patupatua le tino ma e vaivai ma gagase tino o nisi.

“O le to’atele o nisi e amata mai i le pata vale o le tino ma oso mai ai ua fa’apepea ma a fa’apa fa’apepe na e sau ai le sua. O le sua lea e pesia ai nisi. E tatau ona faamamao ese mai le to’atele i se tasi ua maua i le Monkeypox ona o le vave ona pipisi.”

“E le tatau ona e moe fa’atasi ma se tasi ua maua i lea fa’ama’i, pe fa’aaoga se solo poo ieafu ma lavalava o lea sui ua maua i le Monkeypox,” o le tala lea a le tamaitai foma’i mo gasegase pipisi Dr Lauvao.

O le taimi nei, ua le tatau ona toe soso’o lou tino ma se tasi ua maua i lea fa’ama’i pipisi, e pesia lava le toatele pe afai e valatalata i latou ma le ua gasegase i le Monkeypox.

Ua fa’asaina ona fa’afeiloa’i feasogi ma se tasi ua maua ai, e le tatau fo’i ona toe fa’aaogaina fa’atasi ni sipuni ma ipu ma mea uma e fa’aaoga e le sui ua maua i le ma’i lea. Ua le toe momoe fa’atasi fo’i pe afai o le ulugali’i ua maua le tasi i lea gasegase. Ia fa’aaoga le tulafono o le fa’avava mamao ma le sui ua maua i le monkeypox. Fa’amama lima i taimi uma ma fa’amama lelei fo’i ma isi uma mea e fa’aaoga e le sui ua a’afia. O le a matua faigata lava ona sao mai se aiga atoa i lea fa’ama’i, pe afai o le a maua ai le fanauiti.

Ua i ai tui puipuia ua maua mo le tau togafitia o le mamalu lautele mai le pesia i lenei fa’ama’i pipisi ma ua fa’aigoaina lea tui  o le “Jynneos vaccine” ma ua tuuina muamua lava le avanoa mo i latou ua nonofo fa’atasi ma e ua maua i lenei fa’ama’i pipisi.

Ua vave lava ona faia tui puipuia nei ia i latou ua nonofo tulata i le vaega o le atunuu ua iloga ai le pepesi mai o le Monkeypox. Ua masani le atunuu i le misela ma le tanesusu, afai e maua muamua ai, e le toe maua fa’alua, ae a oo fo’i ona pipisi mai e to’atasi lava le tagata o le aiga e maua, e maua uma ai lava sui o lena aiga. E foliga mai o lea foi fa’ama’i fou, ua tali tutusa lelei lava, ae sili ai ona faia muamua tui puipuia ia le maua ai i tatou.

TALOSAGA MATUA MO PEPA MEA’AI A FANAU A’OGA: MATI 2022 - IUNI 10, 2022

O lo ua fa’ailoa nei e le Matagaluega o Tautua ma Alagamanuia Lautele mo matua uma lava sa ao’oga ma lesitala latou fanau mai le tausaga a’oga Mati 2022 se’ia oo ia Iuni 10, 2022 e afua mai le ECE se’ia oo i le vasega 12, mai a’oga uma a le Malo se’ia oo i a’oga  tumaoti, ina ia fa’aulu mai latou talosaga mo le P-EPT e afua mai ia Iulai 21, 2022.

O le fa’alua ai lenei ona maua o lenei alamanuia mo le aiga mai le tausiga o fanau o a’oga i le vaitau na maua ai le atunuu i le fa’ama’i Covid-19 ma ua le mafai ai ona auai atu le fanau i le a’oga.

Ua fa’ailoa mai e le ali’i fa’atonu Muavaefa’atasi John Suisala ua mae’a feutaga’i le Matagaluega o A’oga ma lana fo’i matagaluega ina ia fa’auia lea alamanuia mo aiga o fanau a’oga e ala i Pepa Mea’ai Talafua ai oloa tau mea’ai e pei ona faia i Food Stamps.

O lenei polokalama ua fa’atupea mai le $8.8miliona o le tupe toina mai le ASNAP mai le Matagaluega o Fa’ato’aga a le Malo tele poo le USDA.

Ua mae’a fo’i ona fa’ataga ma pasia lelei mai e le USDA le P-EPT Syaye Plan mo le tausaga Fa’aletupe 2021-2022, ae na fa’ato’a pasia mai le fa’atupega mo le aufaigaluega galulue ia Iuni 24, 2022.

O le fuafuaga la lea ua i ai ma pasia lelei ua mafai ona fa’atupe ai le 76 mai ia Fepuari 22, 2022 lea na tapunia ai aoga ma amata ai le fa’asa, se’ia oo mai ina tu’ua a’oga ia Iuni 10, 2022. 

O le vaitau fo’i lea i le atunuu na fa’ato’a toe tatala mai ia Me 02, 2022, o le vaitau mulimuli fo’i lea na mafai ai ona fa’aaoga le faiga o a’oga mo le fanau i nisi aso mai aiga a’o nisi aso ua i le fale aoga e fa’aaogaina ai upega tafa’ilagi.

O le aofai o le tupe mo le tamaititi a’oga na lesitala lelei ma auai i le a’oga i lea vaitaimi o le tausaga a’oga tuai, e $629. o lona uiga e $8.28 mo le ‘aiga i le aso a’oga e tasi.

Ua fa’aulaga lenei talosaga e ao ina fa’auia mai i luga o upega tafa’ilagi lava e le toe fa’aaogaina ai pepa talosaga fa’atumu ma auina atu i totonu o le Ofisa o le ASNAP.

O le fa’atumuga o nei pepa fa’amaumau uma lava e ao ina faia mai i luga o upega tafailagi e feso’ota’i ai, ma ia tutusa lelei ma le fa’amaumauga o lo’o maua mai i a’oga na a’oga ai lou alo.