TALA I VAIFANUA

Pago Pago - AMERIKA SAMOA

TOFIA LAULAUAFONO TUAI A LE KONEFERENISI A LE METOTISI 

O se tasi o Ekalesia tele i totonu o le atunuu, Ekalesia Metotisi, o le toe pau fo’i lea o le Ekalesia o lo’o fa’atautaia lua pea a latou Koneferenisi fa’atasi ma Samoa Tuto’atasi, ua fa’ailoa mai le fa’ai’uga o latou tofiga i lenei tausaga, ua toe tofia lava le latou Laulauafono tuai e toe tau’avea tiute mo le Koneferenisi o lenei tausaga 2023 se’ia oo i le 2024.

Sa tauaofia le Konekerenisi i Samoa ma ua tamau lenei fo’i i’ugafono i le aso Lua, Iulai 12, 2022 i le taimi a Samoa.

Ua faailoa mai o lo ua toe tumau nei le tofiga Failautusi o le susuga Rev. Dr Eteuati Tuioti, le Peresetene  ua toe tofia ai Rev. Faulalo Leti Pa’aga. O i la’ua fo’i nei ua fa’afa ai lenei ona toe tofia i le Laulauatofi a le Ekalesia Metotisi i Samoa na lua. Ole Teutupe ua toe filifilia nei o Rev. Elice Soliola ma ua vala’auina e toe fa’aauau lona tofi i le tausaga 2023-2024.

O le palota e toe tofia ai sui e tutulai i le Laulauatofi mo le faafoega o le Koneferenisi i tausaga ta’itasi o le mataupu muamua lava lea e fa’amatu’u ese mai lava ae le’i talanoaina le tele o isi mataupu a le Ekalesia i ana galuega atina’e ma poloketi o lo’o fa’atautaia i so’o se vaega o le Ekalesia i Samoa na lua. O isi mataupu uma e auga lava i le tupe fa’asoa a le Ekalesia, ma le pasiaina o nisi o poloketi o foufou mai ona fa’atuina i matagaluega eseese o le Ekalesia atoa.

O le aotelega o le Koneferenisi a le Ekalesia Metotisi e malaga mai ai ona sui usufono mai Ausetalia, Niu SIla, Hawaii, Amerika atoa Amerika Samoa, e usufono uma lava i Foga’a i Faleula, Samoa i le masina o Iulai i tausaga ta’itasi. O le mataupu mulimuli lava e fa’amautu, o le tofiga lea o Faife’au tausi Ekalesia i nuu ma afio’aga ua mae’a fa’atulaga mai e tautua ai. O le mataupu lea na fa’ato’a fa’amautu mai i le aso Sa mulimuli o le Koneferenisi. 

Ua iloga mai o nisi o Faife’au tausi Ekalesia ua siitia ae fa’ato’a tasi le tausaga o tautua ai i se ekalesia ae o nisi ua si’itia lava i le fa pe tolu tausaga talu ona tausia nisi o ekalesia o i ai.

Peita’i e mataituina lava e le Koneferenisi, e le tatau ona 8 tausaga o tautua pea se faife’au Metotisi i se ekalesia e tasi, e tatau lava ona si’itia pe a atoa le 7 tausaga i se ekalesia.

Na fa’ataunuu fo’i le fa’au’uga o faife’au fou ua lautogia mo le tofiga faife’au ina ua mae’a a’otauina mai le Aoga Fa’afaife’au i Piula i lenei fo’i Koneferenisi 2022.

TATALIA VA’A PAILATE A LE PORT ADMINISTRATION - “TOLOA MA LE TAVA’E”

I le malaga na autova’a atu ai le toatele o le Aufaigaluega ma se tasi o Ta’ita’i o le Port Adminisitration i Manu’a, sa fesiligia ai le faigamalaga o lo’o tu’uva’a ese atu ai le susuga le Fa’atonu o le Uafu ma Malaevaalele Christopher King i fafo. Peita’i ua fa’ailoa mai, “O se taumafaiga fo’i ina ia toe aumaia nisi va’a pailate a le Matagaluega aua ua toe tasi le va’a o totoe nei e fa’aofia maia vaa i totonu o le Uafu tele a le tatou malo.”

“O lo ua fa’amoemoe o le a toe taliu mai lea faigamalaga, ae ua mautu mai se taimi o lenei tausaga e to’ai mai ai i fanua va’a e lua o lo’o ua fa’atulaga e fa’atauina mai mo le tatou matagaluega. O va’a nei ua fa’aigoaina o le Toloa ma le Tava’e,” o se tala lea mai se tasi iloga o le matagaluega.

I le taimi na luluti ai le sou o le vasa ma ua si’isi’i le gataifale, e pau lea o le ituaiga va’a e mafaia ona fe’avea’ia nisi mai le Faleta’u i le Faleluanuu, ma o se ala lea na mafai ai ona maua le avanoa o le afioga le Sui Kovana ma nisi o ta’ita’i o le Malo, e malaga mai Ta’u i Ofu mo le fa’amoemoe e auai i le tatalaina aloa’ia o le tatou Malaeva’alele ua mae’a pasia lelei e le FAA e sesee ai vaalele i Ofu ma Olosega.

O lona uiga, e tatau lava ona lava va’a fa’apenei e fa’atautaia le tele o feoa’iga fita i le vasa pe a o’o ina tau louloua le atunuu, Lona lua o va’a fo’i nei e o atu e fa’aofi mai i totonu va’a oloa ma so’o se ituaiga va’a e fia ofi mai i le Uafu a le tatou teritori. O lenei se pulega ua mafaia ona fa’aopoopo mai ai le lua va’a pailate nei a le Matagaluega o Uafu ma Malaeva’alele a le tatou Malo.

I le taimi nei ua toe i ai nei le aumalaga a le ali’i fa’atonu i Honolulu e sauni toe taliu mai a se tala fiafia o lea fa’atauga.

FAIA TUI PUIPUIA O LE FANAUITI - O LE USITA’IA LEA O LE TULAFONO

E ese mai le usita’ia e faia tui puipuia o le Covid-19, o lo ua i ai ma isi tui puipuia uma lava ua fa’atulaga ina ia faia mo le fanauiti e soifua mai i Amerika Samoa, afai e le faia, ua le usita’ia fo’i le tulafono mo le tausiga lelei o fanauiti e soifua mai i le teritori.

Afai e le faia uma nei tui puipuia mai fa’ama’i eseese mo le fanau, e le mafai ona ulufale i latou e amata latou a’oa’oga i o latou soifuaga taumafai i le sailiga o le atamai.

O lo ua tatalaina pea falema’i fa’aitumalo a le Matagaluega o le Soifua Maloloina i le atunuu mo nei tautua faifai pea ia le motusia le avanoa o fanau e faia ai latou tui puipuia ma siakiga poo atoatoa lo latou soifua maloloina.

Ua tatalaina nei tautua mai le itula e 8:00 i le taeao se’ia oo i le 4:00i le afiafi mo aiga uma lava e le’i faia tui puipuia o fanauiti e mafai ai ona a’e i a’oga tulaga muamua.

Peita’i ua fa’atulaga fo’i isi itula mo nei tautua i Aso Lua ma Aso Lulu mai le 4:00 i le afiafi se’ia oo i le 7:00 i le afiafi, mo i latou ua le mafai ona maua avanoa i itula masani o aso ta’itasi.

O itula nei ua fa’aopoopo mai mo lea tautua, ua fuafua patino lea mo fanauiti e tolu tausaga ma fa’asolo aga’i i luga le matutua. O aiga e i ai fanau e le’i faia tui puipuia ae ititi mai le 3 tausaga le matutua e tatau lava ona o ane i taimi ua fa’atulagaina atu muamua e faia ai latou tui puipuia.

O mea e mo’omia e tatau ona taulimaina o latou: Pepa Tui; Kilia mai le ASDOE; ID o matua.

O le a i ai le aufaigaluega tofia a le Matagaluega o A’oga e latou va’aia toto’a nei mea uma ua fa’atulaga mo fanau ua a’e i le a’oga.

Ua faamamafa mai e le Matagaluega o le Soifua Maloloina, o le a le mafai ona ulufale lou alo i le aoga, pe afai o le a mautu mai fa’amaumauga nei ua moomia e le Matagaluega mo le lesitalaina o lona avanoa i le a’oga.

Pe afai e fia i ai nisi fa’afesili e vala’au mai i le laina telefoni 699-9329 - 8708 - 9328 poo le 219.

FA’AULU PILI PERESETENE SENATE - ASO MALOLO, ASO O PALOTA AMERIKA SAMOA

Ua faaulu nei le pili fou tau fa’aofi ina ia pasia ai le aso Palota o lenei tausaga e avea ma aso malolo ia Novema 08, 2022. O le pili lea sa aiaia mai e le afioga le Peresetene o le Senate Tuaollo Manaia E. Fruean.

Ua fa’ailoa mai e le afioga le Peresetene, e 11 isi setete ma teritori o le Iunaite Setete o Amerika ua latou fa’atulafonoina le avea o latou aso mo palotaga e avea ma aso malolo mo le mamalu lautele o latou tagatanuu.

O setete ma teritori ia e aofia ai Delaware, Hawaii, Illinois, Kentucky, Louisiana, Montana, New Jersey, New York, Virginia, ma teritori o NMI ma Puerto Rico.

Ua fa’ailoa mai e le senatoa mai le Ma’oputasi, “E tatau ona lava le taimi e tuuina aloa’ia i e uma e palota o le atunuu, ina ia o e faia a latou filifiliga toto’a i ta’ita’i ua manana’o i ai e avea ma o latou ta’ita’i mo le isi vaitausaga. E ese mai lea, e tatau ona lava ma totoe le taimi mo tagata palota i lea aso e taumafai ai ona faia fe’au masani ma toe faia latou filifiliga tatau. E le tatau ona fa’atopelauina latou filifiliga e ao ina faia toto’a.”

I le taimi nei, ua fa’atulafonoina i aso o le Palotaga, e ttau ona tuu le lua itula e Kamupani ma le Malo ina ia o ai tagata palota e faia latou palota ona toe fo’i mai lea e faigaluega ma fa’auma ai o latou aso.