TALA I VAIFANUA

Pago Pago - AMERIKA SAMOA

MAUA FA’AILOGA FANAU NA MALAGA TAUVA I LE HOSA

O lenei tausaga ua fa’aauau pea lava ona fa’amanuia mai taumafaiga a tatou fanau e auina atu e fa’atauva i tauvaga eseese fa’aleaoaoga i le Iunaite Setete.

O fanau sa le auai le to’atele i fa’au’uga ona o le latou avanoa e tauva ai i tauva

ga o Mataupu Fa’afoma’i poo le HOSA, ua fa’ailoa mai fo’i a latou taumafaiga ua maua ai tulaga mo Amerika Samoa i lenei tausaga 2021-2022.

O le tauvaga lenei a le HOSA sa fa’ataunuuina lea i Nashville, Tennessee, e lima vaega eseese sa tauva ai le fanau a’oga mai Amerika Samoa nei ma ua fa’ailoa mai ua lautogia ai i latou.

E toa 56 sui na tauva i lenei tausaga ma fa’aalia latou galuega fa’atino, ma sa auai ma sui mai Saina ma Korea i le tauvaga o lenei tausaga. Ua fa’ailoa mai le si’isi’i i luga o le taumafaiga a Amerika Samoa ma ua lautogia ai i le to’a 15 togi maualuluga, ma isi latou galuega fa’atino na aofia i le to’a 10 maualuluga i vaega e lima o le tauvaga o lenei tausaga.

O le susuga  Dorrin Tuisamatatele  mai Fagaitua High School na mafai ona ausia e lana galuega fa’atino le to’a 15 maualuluga togi i lea tauvaga, ma ua ia umia nei le fa’ailoga o le Execellence Award.

O le tamaitai fa’au’u mai Tafuna High o Marianive Tauave ma le tamaitai fa’au’u o Leilani Togi o Nuuuli VocTech High ua ausia fo’i e i la’ua le lona 15 maualuluga togi i le tauvaga sa auai ai ma ua tofu maua fo’i e i la’ua  fa’ailoga Execellence Award.

O Talalelei Roberts ma Princess Viesca o Faasao Marist High School na la’ua mauaina fo’i fa’ailoga o le Execellence Awards mai le vaega o fa’asalalauga mo le silafia e le mamalu lautele o le atunuu poo le Community Awareness.

O Francis Vaofanua, Anthony Leo ma Savannah Savali mai Tafuna High School, na latou mauaina le fa’ailoga o le to’a 10 maualuluga togi i le latou fa’atinoga o le Public Service Announcement ma ua latou mauaina le fa’ailoga fa’apitoa ma latou fa’ailoga o le Execellence Awards.

O le sui na malaga fa’apitoa ma le fanau lenei e to’avalu i le HOSA o le tama’ita’i o Mrs. Pearl Mendoza, Ms. Cassandra Garcia, fa’apea ma le faufautua fa’apitoa o Mrs. Alice Moeolo.

Ua fa’auia mai fo’i le fa’afetai fa’apitoa a le aumalaga i le Matagaluega o A’oga, aua ana le malaga i latou, e latou te le mafaia ona auai ma maua le avanoa e fa’alautele atili ala o le atamai faatasi ai ma le silafia atu ai o nisi ala e fa’atauva ai i le lumana’i.

FA’AAUAU ONA FA’ATELEINA AOFAI MAUA I LE COVID-19 

A’o le’i maua mai ni fa’amaumauga fou mai DOH i lenei vaiaso, ua fa’ailoa mai fa’amaumauga mo le vaiaso Iulai 04 ia Iuli 10, 2022 ua fa’aauau ona si’itia pea lava ma ua tula’i mai le faitauga fou lea e 344 ua fa’amaonia o nisi fou ua maua i le Covid-19 ina ua faia latou suega. I le taimi nei ua fa’aauau ai pea ona si’isi’i lea faitauga i le atunuu i le taimi nei. I le vaiaso i ona tua atu e na’o le 317 i latou na sueina ma maua ai i le Covid-19.

I le taimi o lea fa’amaumauga ua maua ai le to’a 531 ua i ai pea le verusi i le atunuu ma le aofai o e ua maliliu ona o le Covid-19 ua tamau mai le 32 i latou. Ua matauina fo’i le si’itia o le aotelega o sui mai le Manu’atele ua toe maua i le Covid-19 lea ua i ai nei le 53 i latou. Ua faamauina fo’i le aotelega o i latou uma ua maua i le Manu’atele i le 159, ae to’a 76 i latou o lo’o i ai pea lava le verusi i le taimi nei.

Ua fa’amauina i le lipoti lata mai a le DOH o ituaiga lea ua alia’i mai o le Omnicron Covid-19 ua fa’aigoaina o le BA 4 ma le BA 5.1 ma ua matele i le vaega o pasese e malaga mai Hawaii o malaga mai ma i latou na. O le ituaiga lea o lo’o maua mai i suega o lo’o auina atu i fafo ina ia fa’ailoa mai ituaiga o covid-19 lea ua maua i le atunuu.

Ua fa’ailoa e le sui o le CDC Rochelle Wallensky, “O le faigata o nei ituaiga o le Omnicron Covid 19, o le matua pipisi vave lava, ma e faigofie tele ona maua ai le to’atele e mafai ona ulufia e le verusi lea.”

TULAUELEELE MALAGA VA’ALELE HAWAIIAN AIR I LE ASO FARAILE

Ina ua mae’a kilia mai e le Matagaluega o le Puipuiga o le Saogalemu Fa’alotoifale a le Malo o Amerika Samoa le sese’e mai o le va’alele a le Hawaiian Air, lea sa tatau ona malaga mai i le aso Tofi, ae ua fa’ato’a fa’ataga mo le toai taunuu mai i le aso Faraile i lona taimi masani, ua avea ai le malaga o le aso Tofi ma malaga o le aso Faraile i le atunuu.

Ona o le malae sese’e o va’alele tetele 05-23, sa tele ina i ai ma’ama’a ma lapisi e le tatau ona i ai, o lea sa mua’i pasia lelei ai lea tulaga e le maatagaluega o le saogalemu fa’alotoifale ma le matagaluega o malaeva’alele ma uafu, ae le’i oo ina sese’e mai le va’alele lea ma lana aumalaga to’atele.

O le malaga masani lava lea e fa’atulaga mo le Hawaiian Air i le aso Tofi e sese’e mai poo le 9:30pm peita’i ua toe tolopo i le aso Faraile ina ua lutia le atunuu i galu maualuluga ma le malolosi  na fa’aleagaina ai se vaega o le malae sese’e e le tatau ai ona sese’e ai le va’alele.

Na fa’ato’a tu’uva’a ese atu le faigamalaga lea i le afiafi o le aso Faraile i le itula e 1:00am i le aso Toona’i.

Ua fa’ailoa mai fo’i e le lipoti mai le Pulega o Malaeva’alele, na toe sosoo lava le taimi e fa’asa ai ona tulaueleele mai se va’alele i le malae va’alele i Tafuna se’ia oo i le itula e 4:00pm ina ia mautinoa lava ua mae’a galuega fa’amama o ala sese’e uma o le malaeva’alele.

O le aso fo’i lea sa to’atele ai nisi iloga o le Malo sa auai atu i le sisigafu’a a le Manu’atele, ma e to’atele na tatalia le toe taliu mai i fanua e ala i va’alele. Ona o le aso Faraile ua susulu matagofie ai le La i le Faleta’u, o lea sa manuia ai fo’i lea  fa’amoemoe se’ia oo i lona fa’ai’uga ae le’i taina le 12:00 i le aoauli.

Sa tatala pea le isi alasese’e mo va’alele laiti.

SUI MATAALA I FATUMAFUTI - LE TAIMI TONU NA A’AFIA AI I GALU MALOLOSI & SIISII

O le tamaitai mataala o Desiree Washington sa mafai ona ia matauina le si’isi’i o le tai ma le malolosi o peau na amata lutia ai le tai ma oo lava ina lutia ma tetele afaina o Fatumafuti i le suiga tele o le tai i galu malolosi ma le maualuluga.

“O le aso Lulu , Iulai 13 na amata va’aia ai suiga o le tai, peita’i e le’i toe fa’aititia lava ae ua aga’i atu ina atili malolosi ma maualuluga e oo mai lava i le aso Tofi ma e la’ititi lava se suiga teisi i le aso Faraile, ae fa’afetai ua tau vaivai mai.”

“O le taeao loa o le aso Tofi, Iulai 14 ua amata ona lolovai le alatele i le tafega o le suasami mai galu maualuluga ma le malolosi, ua le toe fo’i i le tai ae ua to’a ai, e foliga mai ua punitia alavai e toe fo’i ai le suasami. Ua siisii pea le tai ma ua le toe mou atu le suasami mai le alatele, ae ua sofa’i mai pea galu malolosi ma le maualuluga e lei va’aia muamua.”

“Na tumutumu atu le to’atele o e nonofo i lea vaega o le atunuu ma latou taumafai e fa’atafe i tai le suasami, ma kilia atu le alatele, peita’i e vave mai le sofa’i a galu maualuluga ma le malolosi, ae le mafai ai ona fa’atino maeaea le taumafaiga a le to’atele o le afio’aga sa i ai, sa tauau ina tafea atu ai i galu nei.”

“E tele mea ua va’aia, ua sau galu ma la’u mai ai ma le tele o otaota i ma’a i luga o le alatele. Ua le gafatia ona fa’atino lelei se galuega e toe fa’amama ma fa’aalu ai le suasami aga’i i tai, ae se’ia uia le alatele e ta’avale. E i ai lava nisi sa pa’u’u i le malolosi o galu, ae fa’afetai e le’i mo’omia se ta’avale a le EMS e fa’asaoina ai i latou.”

“Na to’ai taunuu mai nisi o le aufaigaluega a le Paramount e tusa o le 8:00 i le taeao ma sa maua ai le to’omaga aua ua mafai ai ona kilia mea sa punitia ai le alavai e toe tatafe ese atu ai le suasami. E le’i leva ona galulue le aufaigaluega lea ma  tagata o Fatumafuti i le kiliaina o le alatele ma fa’aalu ese atu le suasami mai le alatele, ae amata loa ona to’a mai le tai. Ua va’aia fo’i le suiga i le sofa’i mai o galu malolosi ma le maualuluga.”

“Na va’aia le fa’aletonu ona ua poloka fa’asolo atoa le feoa’iga a le atunuu i le alatele. Na fa’ailoa mai e nisi ua oo le poloka o le laina o ta’avale i le Tutuila Store i Nuuuli. Na fa’ato’a sologa lelei feoa’iga ina ua mae’a kilia le alatele ma ua le toe poloka e tusa o le 10:00 i le taeao lava o le aso Tofi, ae fa’alogoina loa le fa’ai’uga a le afioga le Kovana Sili o le tatou Malo, o le a fa’amuta galuega a le Malo i le itula e 1:00 i le aoauli ae toe fo’i uma tagata i aiga, ona o le fa’aletonu ua tupu mai le atunuu ona o suiga tetele o le tau ma le tai.”

O se tasi o molimau na ia fa’ailoa mai, “O a’u na ou sau i la’u taavale i le taimi tonu o le malolosi o galu nei i Fatumafuti, na ou va’aia la’u ta’avale ua masi’i i luga ma ua fa’afa’asaga i le isi itu e le malolosi o galu.”

O le aso Faraile na taliu mai ai le to’atele o le Malo sa auai atu i le Manu’atele mo le fa’ailogaina o le latou Fu’a 2022 fa’apea ma le to’atele fo’i sa i Ofu i le tatalaina aloa’ia o le latou Malae Va’alele mo va’alele laiti. Na malaga mai lava lea Manu’atele lll m lana pasese to’atele ma to’ai taunuu mai ma le manuia, e le’i sousou fo’i le vasa mo lea malaga, peta’i o le malaga atu i le aso Lua, Iulai 12, 2022, sa matua tigaina ai le aumalaga i le vasa.