Talitonu nisi o Faipule ua tatau ona tapunia le auaunaga a le TALOFAPass

Pago Pago - AMERIKA SAMOA

Ua faaalia e nisi o afioga i Faipule o le Maota o Sui a le Fono Faitulafono, i le vaiaso na te’a nei, le tatau ona faamuta aloaia le tautua a le TALOFAPass, ona ua tele faasea a le atunu’u e tusa ai o lenei auaunaga.

I le taimi o folafolaga a le Maota o Sui i lana tauaofiaga i le vaiaso na te’a nei, na faaleo ai e nisi o afioga i Faipule mataupu e faatatau i le TalofaPass, atoa ai ma faafitauli o loo fetaia’i ma le atunu’u e mafua mai i lenei tautua.

Saunoa le afioga i le ali’i Faipule ia Lua’itaua Gene Pau e faapea, e le fesiligia le tulaga lelei atoa ai ma le mafua’aga taua na finagalo ai le malo e faatula’i le auaunaga a le TalofaPass i le ulua’i taimi, ina ia faata’ita’i i auala sa faaaoga a le Setete o Hawaii, mo le tuu faatasia o faamatalaga uma e faatatau i tagata e malaga mai i Amerika Samoa i le taimi a’o pesi malosi ai le faama’i o le KOVITI-19.

“O se auala lelei ma faigofie mo le malo i lea taimi, a o taumafai e puipuia le atunu’u mai le aafia i ‘auga o lenei faama’i oti,” o le sauomaga lea a Lua’itaua.

O le taimi nei e pei ona saunoa Lua’itaua, ua le toe manaomia le auaunaga a le TalofaPass i totonu o Hawaii. I lona talitonuga, ua tatau fo’i ona faamuta aloaia loa le auaunaga a le TalofaPass mo Amerika Samoa, e toe faafo’i loa tulaga o femalagaaiga a le atunu’u i le tulaga tuai sa i ai.

Na faamanino e le afioga i le ali’i Faipule e faapea, o Hawaii o le malo e sili atu ona tele ia Amerika Samoa, e to’atele foi tagata femalagaa’i i aso taitasi, peita’i ua latou filifili e faamuta le auaunaga a le latou TalofaPass.

Pe a faatusatusa Hawaii ma Amerika Samoa, e silia i le 100 malaga a vaalele e mafai ona faatino i totonu o le 7 aso, faatusatusa ia Amerika Samoa e na o le 2 lava malaga i totonu o le vaiaso e tasi. 

“Ua na o se talosaga ma le loto maualalo i le malo, faamolemole, faamuta nei le tautua a le TalofaPass ona ua tele faasea ua oo mai i le atunuu e tusa ai o tulaga faaletonu e tutupu mai ai. Faafetai mo le tautua sa faatinoina i masina ua mae’a atu, ae i lo’u taofi, ua tatau ona taofi le TalofaPass,” o le saunoaga lea a Lua’itaua na lagolagoina e nisi o Faipule o le maota. 

O le faafitauli numera tasi na taua e le afioga a Lua’itaua o loo fetaia’i ma le atunu’u, o le mae’a lea ona faamautuina o le avanoa o le tagata malaga i le kamupani va’alele ma ua mae’a fo’i ona totogi le pasese, ae oo atu i le aso e malaga ai le tagata ua leai sona igoa i luga o le lisi o le pasese a le va’alele, ua toe aveese ona e le’i talia e le TalofaPass.

Na lagolagoina e le afioga i le alii Faipule ia Ape Mike Asifoa le finagalo o Lua’itaua e faatatau i le TalofaPass. 

Saunoa le alii faipule ia Ape e faapea, o ia le isi tagata na aafia ai fo’i i le faaletonu lea, o le uma ona faamaonia o lona avanoa i le va’alele a le Hawaiian Airline ma ua mae’a fo’i ona totogi lona pasese, ae oo atu i le malaevaalele i le taimi o le a malaga ai, ae toe maua mulimuli ane, e le alu i le malaga a le va’alele ona e le o i ai lona igoa i luga o le lisi na tuuina atu e le TalofaPass.

Na faamanino e le alii faipule i lana saunoaga e faapea, a toe mafaufau i lana malaga e le’i mamao atu nei, e lagona ai le mafatia o le mafaufau. Sa ia usitaia uma manaoga e pei ona tuuina mai e le TalofaPass, e pei o le tuuina atu o faamaoniga ua mae’a ona faia ona tui o le KOVITI-19, ae faapea fo’i i pepa malaga ma faamaoniga ua mae’a ona totogi lona pasese.

“A e peita’i ou te usu atu i le taeao o le aso na sosoo ai ma le faamoemoe ou te malaga i le va’a o le 7:00 i le taeao, ae faailoa mai e le aufaigaluega a le Hawaiian Airline ia te a’u, e le o i ai so’u igoa i luga o le lisi o pasese e malaga,” o le saunoaga lea a Ape.

Na taua e le ali’i Faipule lona faailoa atu i le aufaigaluega faamaoniga ua mae’a ona totogi lona pasese ma ua faamaonia fo’i lona avanoa mo le malaga o lea aso, ae sau le tali, e le o i ai sona igoa i luga o le lisi na tuuina atu e le TalofaPass.

“O le faamatalaga a le aufaigaluega o le vaalele ia te a’ui le aso lea, o le lisi lea lava na tuuina atu e le TalofaPass ia te i latou, o le lisi lava lena latou te fa’aaogaina, tusa lava pe faapea mai ua mae’a ona totogi lou pasese ma faamaonia lou nofoa, ae a leai lou suafa i luga o le lisi a le TalofaPass, e te le malaga,” o le saunoaga lea a le alii Faipule.

O le faafitauli e pei ona maitauina, o le taimi lava e le alu atu ai le igoa o le tagata malaga i luga o le lisi a le TalofaPass, o le taimi lava fo’i lea e otomeki ai lava ona aveese lou suafa mai le lisi a le kamupani va’alele, tusa lava pe ua mae’a ona totogi lou nofoa ma faamaonia lou avanoa.

Na taua e Ape i luma o le maota le taua o le faaletonu na tula’i mai i lana malaga, ua ia faamaonia ai faafitauli o loo fetaia’i ma le mamalu o le atunu’u o loo malaga atu i Hawaii ma toe fo’i mai. 

O lana molimau, e lelei lava le tupu o le faafitauli lea i le tagata o loo lava lona tamaoaiga e mafai ai ona toe nofo i se faletalimalo mo nisi aso e toe faatali ai le isi avanoa mo le va’alele, poo le tagata fo’i o loo i ai ona aiga i Hawaii e mafai ona nofo ai mo nai aso e faatali ai le aso e toe maua ai le isi avanoa, ae a tula’i mai loa i nai o tatou tagata e vaivai le tamaoaiga toe leai ni aiga i Hawaii, o iina la lea e tula’i mai ai le popolega tele, ma mafua ai loa ona a’e se lagona e lagolago le fautuaga ina ia taofi loa le auaunaga a le TalofaPass.

E ui i le faafitauli na tula’i mai i lana malaga, ae na taua e le afioga i le ali’i Faipule ia Ape lona le manatu e faailoa i le aufaigaluega a le Hawaiian Airline o ia o se Faipule, ae sa manatu ina ia uia pea auala uma e pei fo’i ona uia e le atunuu lautele.

O lana silasila, e pei e foliga mai e pule lava le TalofaPass poo ai e sau i le va’alele ao ai fo’i e le sau. E le o manino i le taimi e pei ona saunoa Ape poo ai tonu tagata o le malo o loo latou pule ma faafoeina le TalofaPass, ae i lona taofi, e le taua le iloa poo ai o loo pulea ma faagaioiina, ae taua le faailoa o le lagona lenei, ua pagatia le atunu’u ona o le TalofaPass.

Na lagolagoina e le afioga i le Sui Fofoga Fetalai ia Fetui Fetu Jr ma le afioga ia Manavaalofa Tutuila Manase le finagalo lava lea e tasi ua tatau ona taofi le TalofaPass.

Saunoa le afioga i le Sui Fofoga Fetalai e faapea, e le o se taimi muamua lenei ua ia tula’i ai ma faaleo lagona mafatia o lona itumalo talu ai le tautua a le TalofaPass. I lona taofi, ua miliona ma miliona tupe ua alu i le faatupeina o lenei TalofaPass, ae foliga mai e le o lelei lava la latou auaunaga i le atunu’u.

“Afai o lea ua tatou molimauina le tele o faasea mai le atunu’u e faatatau i le TalofaPass, o lo’u lava taofi, ua tatau ona aloaia se faaiuga a le Fono Faitulafono e faia i lenei tulaga. Ua pagatia le atunu’u ma ua avea lenei mataupu o se mataupu e faatiga mafaufau i tagata malaga. Ua tele tupe ua alu atu ae leai se alofa o alia’e mai ai, e na o le atili ai ona tele tala ma gugulu le atunu’u,” o le saunoaga lea a le Sui Fofoga Fetalai.

Saunoa le afioga a Manavaalofa, e toatele foi tagata o lona itumalo ua latou fesiligia le taua o le TalofaPass ma le mafua’aga ua umi ai ona fa’aaoga e le faigamalo. I lona taofi, ua tatau ona toe silasila le malo i le tulaga pagatia o le atunuu e mafua mai i le TalofaPass, ma faia loa i ai se faaiuga talafeagai.

I le saunoaga a le afioga i le alii Kovana ia Lemanu Peleti Sialega Mauga i le tatala aloaiaina o le Tauaofiaga lona 4 o le Nofoaiga lona 37 a le Fono Faitulafono i le vaiaso na te’a nei, na toe saga faamausali ai e Lemanu lona lagolagoina o le auaunaga a le TalofaPass, e ui i le tele o faasea mai le atunuu.

Saunoa Lemanu, o le mafua’aga autu na ala ai ona faatula’i le TalofaPass, ina ia mafai ai ona tuu faatasia faamaumauga uma a tagata e fia malaga mai i le teritori, ina ia faamaonia ua atoatoa uma o latou tui puipui mo le faama’i o le KOVITI-19, atoa ai ma le faamaoniga o pepa malaga e moomia le faaaogaina