TALA I VAIFANUA

Pago Pago - AMERIKA SAMOA

LATALATA 500 FANAU A’OGA - FA’AAOGA POLOKALAMA E SAILIA AI TOGI

Ua latalata I le 500 le fanau a’pga au fa’aaogaina tatou le vaitau lenei e sailia ai togi e fa’apasi ai latou mataupu sa le ausia togi e pasi ai ona o le fa’asa o le Covid-19, ma sa faigata fo’i ia i latou ona fa’amae’a meaa’oga ona o le ituaiga o aoaoga na fa’atautaia i lea vaitau uiga o le soifua aoaoina.

O nei fanau uma lava e amata mai le Vasega 9 e oo i le vasega 12 ma o lo’o fa’aaogaina ai faleaoga o le Samoana e fa’atautaia ai vasega fa’apitoa nei.

Ua fa’ailoa mai e Matau’a A’asa Matai, “Talu mai ona amata vasega nei, ua va’aia le to’atele o le fanau a’oga ua faaaogaina tatau lenei vaitaimi ma avanoa lelei nei e fa’apasia ai e i latou vasega sa le pasi e i latou ma o le a suia fo’i o latou togi pe a fa’ai’uina lenei a’oa’oga ae ua aga’i i luga o latou togi ua ausia.”

Sa ia fa’ailoa lava, “O le to’atele o le fanau, e le’i faigofie ia i latou le fesuia’iga o le ituaiga o aoaoga mai le potu a’oga i le faia lea e fa’aaoga ai le masini komipiuta e ui ina taumafai atili i latou, ae le ausia lava e i latou le malamalama’aga e maua mai le faia’oga e a’oa’oina i latou i potu a’oga e pei ona toe faia nei.”

O le susuga le faia’oga Tamali’ileupuia Tela, sa ia fa’ailoa mai, “O le aoaoga i laina tafa’ilagi e le’i faigofie ona mautu ai le malamalama o fanau a’oga, ma o le fua na alia’i mai, e to’atele na’ua le fanau sa le ausia togi e masani ona latou maua pe a malamalama lelei i aoaoga i potu a’oga.”

“Pe afai e toe fa’aauau mai lea ituaiga o aoaoga i le isi tausaga a’oga lenei ua savalia, e mautinoa lava e to’atele atili le fanau e le ausia togi e pasi ai, aua o le a fa’atetele atili lea fa’aletonu i le soifua aoaoina o fanau.” o se toe fa’aopoopo mai lea a Tela e tusa o le fa’afitauli ua iloga mai i le soifua aoaoina o fanau lea ua toe fa’aauau a’oa’oga e fa’apasi ai latou mataupu.

“E moomia lava ona i ai le fanau aoga i le potu a’oga ina ia mafai ona fa’amalamalama a’ia’i e faia’oga i a latou mataupu uma o tau’avea, ma o le ala lea sa tigaina tele ai le fanau i a’oa’oga tafa’ilagi, e le o maua le sootaga lea e mafai ai ona fa’afesiligia e i latou faia’oga pe a oo ina fia malamalama  i taimi uma.”

“Ua iloga nei, ua matua lelei lava togi ua ausia e fanau, ae o le isi lava mea, e atili ona vaivai le taumafaiga a le fanau a’oga, pe afai ae popole i le tulaga o lona le iloa o se mea, ma atili aina fiu lona mafaufau e tau sailia le atamai,” o se toe fa’amatalaga lea a Tela.

MAE’A KILIVA PUSA TUPE SILIVA MA SENE APAMEMEA FALETUPE -TBAS UTULEI

Ua fa’ailoa mai le agaga fiafia tele o le Faletupe o le TBAS i Utulei ina ua mae’a umia le kiliva fa’apitoa o latou tupe siliva ma tupe apamemea i le fa’ai’uga o le vaiaso ua te’a. O lenei oka ua fa’ato’a taulimaina lea e le TBAS i le aso 6 Iulai, 2022.

I le tele o taimi e va’aia ai le fa’aaliga taua i luma i faitoto’a o le faletupe, ua talosagaina ai le vasega o Faipisinisi e le o maua ni latou tinoitupe lusi poo tupe siliva ma tupe apamemea e tautuaina ai i latou, ina ia mafai ona fa’atino a’ia’i fefa’ataua’iga ma tautuaina le atunuu atoa e ala i a latou sui e moomia ai tupe siliva ma tupe apamemea mo sui o fa’atauga.

Ona o lo’o i ai talosaga mai Kamupani ma Pisinisi i le atunuu e fia maua ni tupe siliva ma tupe apamemea, o lea la ua fa’ailoa mai, ua gafatia nei ona avatua se vaega o nei oka i le taimi nei e le faletupe TBAS i Utulei.

Fa’asolo le avanoa lenei e fa’amuamua lava fo’i i latou na mua’i fa’amauina le talosaga mo ni tupe siliva ma tupe apamemea fefa’ataua’i. 

Fa’ailoa e le TBAS, o le oka sa talosagaina e le o maua atoa mai i le taimi nei mo ni tupe siliva ma tupe apamemea. Mai le 77 oka sa fa’aulu mai ma ua fa’amauina e le tatou faletupe, e tusa lea ma le $500,000.

Ua toe fa’aulu nei fo’i le talosaga e le faletupe TBAS ina ia mafai lava ona fa’aatoa mai le Oka ua mae’a tamau i talosaga a le vasega o faipisinisi i le atunuu. Ma ua fa’ailoa mai e tauau e fa’ato’a maua mai lenei oka toe fa’aatoa ia Aukuso 2022.

VA’A FOU O SAMOA FEMALAGA’I MV LADY NAOMI 60, MAI IAPANI

O lo ua sauni nei le faigamalo fou a le FAST i Samoa e tatalia le to’ai taunuu mai o le faigamalaga a le latou Va’a fou lava mai Iapani, e suia ai le MV Lady Naomi lea e faimalaga nei i le va o Samoa ma Pago Pago le ‘MV Lady Naomi’.

O le va’a fou lea o le a toe fa’aigoaina lava i le “MV Lady Naomi - 60” e fa’amau fa’ailoga ai se aseta a le Malo ua tamau i le atoaga o le 60 tasuaga o lana faigamalo, ma ua toe fa’aigoaina fo’i i le suafa o le tamaitai Palemia ua fa’ato’a tula’i i lenei vaitau i le faigamalo a Samoa, Fiame Naomi Mata’afa.

O le Minisita o Feoa’iga i le atunuu Olo Fiti Vaai sa ia fofogaina atu lea lipoti i le Palemene i le vaiaso ua te’a. Ua toe fa’aauau ai fo’i le faiga tuai o mea, e fa’aigoaina ai va’a e tautuaina le vainuu o Samoa ma Pago Pago i  le MV Lady Naomi, ae fa’aigoaina va’a i le va o Savaii ma Upolu i le MV Lady Samoa.

O le va’a lenei i lona tau na fa’atauina mai ai i lona fou atoatoa faato’a tuu i le tai e $66.74 miliona ma sa fa’atupeina e le faigamalo a le Palemia o Iapani ua fa’atagatavaleina nei Shinzo Abe. O le a suia ai nei le Sa e fa’atautaia faigamalaga i le va o Samoa na lua, Tutuila ma Apia. Ua atoa fo’i le 20 tasuaga o femalaga’i ai le MV Laday Naomi tuai i lea vainuu ma  se tautua fo’i ua iloga le tula’i mai o lena Sa o le Malo Tuto’atasi.

“O le vaa la’u pasese ma uta fou lenei, sa mua’i fa’ailoa mai e le faigamalo tuai a Samoa e fa’aigoaina o le MV Lady Samoa lV, peita’i ua suia nei ma toe fo’i i le faiga tuai na fa’atulaga, ia fa’aigoaina va’a e femalaga’i i le va o Samoa na Lua fa’avaomalo i le MV Lady Naomi - 60, e tamau ai le aseta a le Malo ua maua mai i le fa’amanatuga o lona 60 tausaga.” O se fa’amatalaga aloa’ia lenei a le Minisita o Feoa’iga ua tula’i mai nei i le foe, Olo Fiti Va’ai. “O le a tumau lava le fa’aaogaina o le MV Lady Samoa e fa’aigoaina ai va’a i le va o Savaii ma Upolu,” o sana toe saunoaga lea i lea fo’i suiga ua tamau nei.

“O le tupe toina mai mo fesosoani a Iapani mo Samoa, lea sa fa’aaogaina tatau mo le fa’atauina mai o lenei Sa i le tausaga fa’aletupe ua te’a ma sa fa’ato’a tuu i le tai i le masina o Aperila 2022 i Hiroshima, ae fuafua o lana malaga lea e oo mai ia Setema 2022, ua mae’a pasia lelei ai mo ana femalaga’iga e fela’ua’i ai pasese ma uta i le va o Samoa ma Amerika Samoa.”

O lenei fo’i aseta a Samoa ua atagia ai le tumati’e o le agaga o ta’ita’i o nei malo na lua, ina ia fa’atino le va lelei ma isi malo uma o le lalolagi e ala i galuega lelei e fa’atino ai tautua mo le lautele o latou tagatanuu. O se galuega fo’i o le a va’aia ma fa’amauina ai le tulaga si’itia o le fua e mafai ona oo i ai auaunaga mo le lautele o faigamalo pe afai e lelei ona tapuia o fa’ai’uga lelei aua feoa’iga saogalemu ma ala e fa’atino ai faigamalaga ma fela’ua’iga  faavaomalo.

O le masina o Setema 2022, ua tapena ai le Minisita o Feoa’iga ma Fela’ua’iga a Samoa, e talia ai le ulufale aloa’ia mai o lea Sa fou mo Samoa i le taulaga i Apia.