Nofovaavaaia le Loia Fautua mo tagata lautele mo le tausaga atoa

Pago Pago - AMERIKA SAMOA

E tasi le tausaga lea ua tuuina atu e le Faamasinoga Maualuga a Amerika Samoa e nofovaavaaia ai le ali’i sa avea ma Loia Fautua mo tagata lautele, susuga Michael White, ina ua faamaonia e le Fa’amasinoga lona faatamala e faatino ona tiute i galuega tau Faamasinoga, e ala i lona le oo atu i le Faamasinoga e fai ma loia fautua a i latou na faatulaga a latou mataupu i le aso Lua o le vaiaso na te’a nei, Iulai 5, 2022.

O poloaiga faapitoa ua tuuina atu e le Fa’amasinoga ia White e usita’i ma mulimulita’i i ai, a o nofovaavaaia ai o ia mo le tasi le tausaga,  e aofia ai lona tausisi i tulafono a le malo, atoa ai ma le tofia o ia e le Fa’amasinoga e fai ma loia fautua a i latou uma sa faatulaga le lauina o a latou faasalaga i le masina lenei o Iulai. 

O le taeao o le aso Tofi o le vaiaso na te’a nei, Iulai 7, 2022, na tuuina mai ai e le Fa’amasinoga Maualuga lana faaiuga faasaga ia White. 

O le afioga i le ali’i Fa’amasino Sili Lagolago ia Elvis P. Patea na faatautaia lenei mataupu, faatasi ai ma afioga i ali’i Fa’amasino Lagolago ia Su’apaia J. Pereira ma Paepae I. Fai’ai.

O le ali’i Loia ia Marcellus Talaimalo Uiagalelei na tula’i mo White i lenei mataupu. 

O le mataupu faasaga ia White na tula’i mai i le aso Lua o le vaiaso na te’a nei, Iulai 5, 2022, ina ua le oo atu o ia i le Fa’amasinoga e tauave mataupu a i latou e to’afa na faatulaga le lauina o a latou faasalaga i luma o le afioga i le ali’i Fa’amasino ia Patea.

O White, ua atoa le 11 tausaga talu ona tautua i le Ofisa o le Loia Fautua mo tagata lautele, o ia o le Loia Fautua lagolago. Ae i le 4 tausaga talu ai i le 2018, na faamaonia aloaia ai loa le avea o ia ma Loia Fautua mo tagata lautele i Amerika Samoa.

O le aso Tofi o le vaiaso i ona tua atu, Iuni 30 na tuu atu ai e White lana tusi faamavae i le Ofisa o le Kovana. O le aso Faraile na sosoo ai, Iuni 1, o lona aso mulimuli lea e avea ai ma Loia Fautua.

O lona faamavae ese ai mai lona tofiga, ua tula’i mai ai mo se taimi muamua i le teritori, ua leai se Loia Fautua mo tagata lautele.

I le tuuina mai ai o le faaiuga a le Fa’amasinoga Maualuga i le aso Tofi na te’a nei, na saunoa ai le afioga i le ali’i Fa’amasino ia Patea e faapea, o nisi o tiute tauave a White i le avea ai o ia ma Loia Fautua, o lona tula’i lea e puipui aia tatau o i latou e molia atu i le tulafono i solitulafono mamafa atoa ai ma solitulafono mama. E oo lava foi i tagata nu’u e aafia i solitulafono tau i Femalagaaiga, aemaise ai fanau e talavou i lalo o le tulafono, o i latou uma nei e tula’i ai le Loia Fautua e aunoa ma se totogi.

Na faamanino atili fo’i e Patea e faapea, o loo manino le Faavae o Amerika Samoa e pei ona pasia mai e le Fono Faitulafono, e le tatau ona faamavae ese le Loia Fautua mai lona tulaga, sei vagana ua mae’a ona faasalalau le avanoa ma ua faamaonia le i ai o se tasi Loia ua faamaonia le sui tulaga ia te ia.

Na taua e Patea e faapea, ua manino le Fa’amasinoga i mafua’aga na ala ai ona faamavae le susuga a White mai lona tulaga, e le gata o lona soifua maloloina, ae ua i ai fo’i lona soifua i le tulaga ua le maua sana malologa lelei ma ua oo atu ai nisi o ma’i ia te ia.

Na manino lelei foi i le faafofoga a le Fa’amasinoga le faafinauga sa tuuina atu e White ma lana loia ia Uiagalelei, e faatatau i le le mafai lea e White ona toe tula’i i luma o le Fa’aasinoga e fai ma loia fautua mo i latou na faatulaga e lau a latou faasalaga i le aso Lua o le vaiaso na te’a nei, ona o le talitonuga a White, ua le toe avea o ia ma Loia Fautua i le taimi lea.

E pei ona taua e White i lana tali i le Fa’amasinoga ina ua fesiligia o ia, e ui o ia lea sa tula’i mo tagatanu’u i soo se taimi e valaau ai a latou mataupu, peita’i na mafua ona tula’i o ia e fai ma loia a i latou ua molia, ona o le taimi lea o loo avea ai o ia ma Loia Fautua mo tagata lautele.

Ae o le taimi lava na faamavae mai ai i lona tofiga lea, o le taimi fo’i lea na muta ai loa le toe avea o ia ma Loia Fautua mo i latou uma o loo molia

I le silasila a le Fa’amasinoga i le faafinauga a White e tusa ai o lenei mataupu, e le sa’o lea tulaga.

Na faamanino e Patea e faapea, soo se Loia lava e galue faa loia, tusa lava poo le malo poo se Ofisa Loia Tumaoti e galue ai, e tutusa uma lava tulafono ma ta’iala e tatau ona usita’i ma mulimulita’i ai i latou uma.

Sa ia taua atili foi e faapea, e i ai tiute faapitoa mo soo se loia e tatau ona faatinoina, talu mai le taimi na tuu atu ai le malosi faaletulafono atoa ai ma le laisene e galue ai o se Loia i le Fa’amasinoga.

“Mo Amerika Samoa nei, o le afioga i le Faamasino Sili, o ia lena sa tuuina atu le malosiaga i le loia e galue ai,” o le saunoaga lea a Patea.

I Tulafono a le Faamasinoga Maualuga 104, o lo o manino mai ai le tatau lea i le loia ona mulimulita’i ma tausisi i tulafono e faatautaia ai lana galuega. Soo se loia e le usitaia nei tulafono ma ta’iala, e ono mafai ona tuuina atu i ai se faasalaga e le Fa’amasinoga.

O le taimi lava e faamavae ese mai ai se Loia mai lona tulaga faa loia sa i ai, e tatau i lea Loia ona ia faailoa i le Faamasinoga lana faaiuga ua faia, faapea ai ma tagata uma lava sa ia tauaveina a latou mataupu.

“Ua manino mai i mau sa auiliili i lenei mataupu, ua faatamala le alii loia ia White e faatino lea tulaga, ina ua le mafai e ia ona faailoa i le Fa’amasinoga lana faaiuga e pei ona faamavae mai ai lona tulaga. E le i logoina fo’i e ia i latou uma o lo o i ai a latou mataupu i luma o le Fa’amasinoga e tusa ai o lana faaiuga,” o le saunoaga lea a Patea.

Ua faamaonia e le Faamasinoga le le tausisi o White e faatino ona tiute i lalo o le tulafono. 

Ua faamalumalu e le Faamasinoga se faasalaga mo White, ae ua nofovaavaaia o ia mo le tausaga e tasi i lalo o tuutuuga e ao ona usita’i i ai.

O ia tuutuuga e aofia ai lona usita’i i tulafono a le malo, ma ua tofia faapitoa foi o ia e fai ma loia mo i latou uma ua faatulaga e lau a latou faasalaga i le masina lenei o Iulai, i le aofiaga e tusa ma le toa 28.

O mataupu uma foi a i latou ua mae’a ona sainia maliliega ma le malo, lea foi o loo saini ai White, ua tofia e le Fa’amasinoga le susuga a White na te tauaveina mataupu a i latou nei. 

Ua tuu atu e le Fa’amasinoga vaiaso e 2 e malolo ai le susuga a White mo lona soifua maloloina, ae o le vaiaso mulimuli o Iulai lea ua faamoemoe e tatau ona amata valaau ai loa nei mataupu mo le lauina o a latou faasalaga. 

Ua poloaina le susuga a White ina ia faia faamaumauga uma o ona itula faigaluega ma tuuina atu i le Failautusi o le Fa’amasinoga lana pili. 

Ua faatonu foi e le Fa’amasinoga le Failautusi ina ia tapena se vaega faapitoa e teu malu i ai faamaumauga uma o le a tuuina atu e le susuga a White, ina ia faigofie ai i le Fa’amasinoga ona vaavaai ma iloilo.