Faamavae le Loia Fautua mo tagata lautele mai lona tofiga

Pago Pago - AMERIKA SAMOA

Ua tula’i mai nei se faaletonu i le Ofisa o le Loia Fautua mo tagata lautele, ina ua faamavae le alii loia sa faauluulu i ai le Ofisa, le susuga a Michael White mai lona tulaga i le vaiaso na te’a nei. 

O le aso Tofi o le vaiaso na te’a nei, Iuni 30, 2022 na tau aao aloaia atu ai e le susuga a White lana tusi faamavae i le Ofisa o le ali’i Kovana ia Lemanu Peleti Palepou Sialega Mauga, ae o le taimi lea o loo toesea ai o ia i atunu’u i fafo.

O le aso Faraile o le vaiaso na te’a nei, Iulai 1, 2022, o le aso mulimuli lea a White i totonu o le Ofisa atoa ai ma le faatinoina o ona tiute faa loia i luma o le Fa’amasinoga.

O le aso Lua o le vaiaso nei, Iulai 5 na faatoa silafia ai e le Fa’amasinoga Maualuga le mataupu e faatatau i le faamavaega a le susuga a White, ina ua leai se Loia Fautua na tula’i mo tagata molia i le taimi na valaau ai a latou mataupu. 

O le itula e 8:30 i le taeao o le aso Lua o le vaiaso nei na tutula’i ai ni tagata molia se to’afa i luma o le afioga i le ali’i Fa’amasino ia Elvis P. Patea.

O le afioga i le ali’i Faamasino Lagolago ia Su’apaia J. Pereira ma le afioga i le ali’i Fa’amasino Lagolago ia Paepae I. Fai’ai na lagolago ia Patea i lenei mataupu. 

Ina ua valau le mataupu muamua, na aga’i atu le tagata molia ma saofa’i i le laulau e masani ona alala mai ai le Loia Fautua, nao ia lava i lana itu e leai ma se Loia Fautua.

O le tamaitai Loia ia Stephanie Rogers na tula’i mo le itu a le malo. 

Ina ua fesili Patea i le loia a le malo pe na te iloa le faaletonu ua tupu, na tali le tamaitai loia ia Rogers, “ioe, ua uma ona iloa e le Ofisa a le Loia Sili le faafitauli e faatatau i le faamavae ai o le alii Loia Fautua ia White mai lona tofiga i le vaiaso na te’a nei”.

Na faamatala e Rogers i le Fa’amasinoga, o le aso Tofi o le vaiaso na te’a nei na faamavae ai White, ae o le aso Faraile na sosoo ai, Iulai 1 lona aso mulimuli i luma o le Fa’amasinoga. 

Na taua atili e Rogers e faapea, o le taeao o le aso lea, aso Lua, na logo atu ai e le Ofisa o le Kovana le latou ofisa e tusa ai o le tusi faamavae a White.

Na fesili Patea i le Failautusi a le Fa’amasinoga pe na tuuina atu e White se tusi e logo ai le Fa’amasinoga e faatatau i lana faamavaega, na tali le Failautusi a le Fa’amasinoga, “E leai”.

O le taimi lea na poloaina ai loa e Patea le tuuina atu o se poloaiga faapitoa ia White ina ia oo atu ai i luma o le Fa’amasinoga e faailoa atu le mafua’aga e le tatau ai ona faasala o ia e le Fa’amasinoga, i lona le faatinoina o ona tiute o se tagata faigaluega a le Fa’amasinoga. 

TULA’I WHITE I LUMA O LE FA’AMASINOGA

O le aso Lulu na sosoo ai, Iulai 6 na tula’i ai White ma lana loia fautua ia Marcellus Talaimalo Uiagalelei i luma o le Fa’amasinoga, mo le tuuina atu o lana tali e tusa ai o le mafua’aga e le tatau ai ona faasala o ia i lona le faatinoina o ona tiute i le Fa’amasinoga.

E to’atolu Faamasino Lagolago na i ai faatasi ma Patea i le iloiloina o le mataupu a White. O i latou nei e aofia ai Su’apaia, Muasau T. Tofili ma Faamausili Pomele. 

Ina ua valaau le mataupu a White i luma o le Fa’amasinoga, na faailoa ai e Uiagalelei lona tauaao o le poloaiga faasaga ia White ma ua la sauni fo’i e tuuina atu la laua faamatalaga e tusa ai o lenei mataupu.

Na maua le avanoa o White e tula’i ai i luma o le nofoa molimau ma faamanino le mataupu e tusa ai o lona faamavae mai lona tofiga o le Loia Fautua mo tagata lautele.

Mai le 11 tausaga na tautua ai mo le Ofisa o le Loia Fautua mo tagata lautele, e 4 tausaga na avea ai White ma Loia Fautua.

O le masina o Mati o le tausaga nei, na faamavae ai le alii loia fautua lagolago sa to’alua ma White, le susuga a Ryan Anderson ma toe fo’i atu ai o ia i Amerika, ae tauave to’atasi ai e White le Ofisa seia oo ina faamavae i le aso Tofi o le vaiaso na te’a nei.

Talu mai lea taimi, e 850 mataupu sa tauave e White. O se galuega faigata e le mafai ona faatino e se Loia se to’atasi. 

E tele masina na taumafai ai White e saili se fesoasoani mai Taitai o le malo. E le gata o le Kovana, o le Lutena Kovana, ae o isi fo’i Ta’ita’i na ia manatu e mafai ona latou fesoasoani atu i le faafitauli, e ala i le avatu o nisi Loia e fesoasoani ia te ia. 

Talu mai taumafaiga e tele, e leai ma se isi na manatu e fesoasoani ia White ma tuu atu se tali e tusa ai o le manaoga i totonu o le Ofisa.

Na taua e White le tele o taimi na ia faalogoina ai suiga i lona soifua maloloina. E i ai le taim na malolo ai mo le 2 vaiaso ina ua maualuga lona toto. O nisi o taimi e oo atu ai le manatu e sili ai pe a pule i lona ola, ina ia faamama ai le avega sa ia tauaveina.

Na pau le tali na tuu atu e le Lutena Kovana ia te ia, e onosa’i mo nai masina se 4 pe 5 atonu e oo atu ai ua maua se tali mo lona manaoga. 

“Ina ua siliga se fesoasoani mai Taitai o le malo, na ou manatu ai loa, e le toe aoga ona toe avea a’u ma Loia Fautua mo tagata lautele, ona ua le mafai ona ou tuuina atu le tautua e tatau ma talafeagai mo tagata lautele,” o le molimau lea a White.

E i ai taimi e le lelei ai sana moe, ma e silia i le masina atoa o aafia o ia i lea faafitauli. E nao lona mafaufau i tagata ma le faaletonu o le auaunaga o loo ia tuuina atu mo i latou.

“E i ai taimi na ou nofo ai i lalo ma ou mafaufau, pe aoga ea lenei galuega mo a’u ma lo’u olaga. O lea e tausi lo’u aiga, e i ai fo’i lo’u afafine e 6 tausaga le matua e moomia ona ou tausia, ae afai e oo mai le oti ia te a’u ona o le mamafa o le avega o loo o’u tauaveina talu ai le tele o faafituali i lenei galuega, ona leai lava lea o se aoga,” o le molimau lea a White.

Talu mai le masina o Oketopa o le tauasga e 2020, e na o le tasi lava le aso malolo na mafai e White ona malolo mai ai i le galuega, e mafua lea tulaga ona e leai se tagata e mafai ona faatinoina le galuega.

“I le avea ai o oe ma Loia Fautua, e tatau ona e mafaufau poo tatau le auaunaga o loo e faia mo tagata. I la’u vaavaai i le auala na ou tautuaina ai tagata o le atunu’u, na ou iloa ai, e le tatau ona toe avea a’u ma Loia Fautua, ona e lei mafai ona ou tuuina atu le auaunaga e tatau mo tagata lautele.”

Ina ua mae’a ona faatino ona tiute i luma o le Fa’amasinoga Faaitumalo i le aso Faraile o le vaiaso na te’a nei, na aga’i atu ai loa White e feiloa’i ma le Faamasino Sili ia Michael Kruse ina ia faailoa i ai le mea ua tupu. E lei avanoa le Faamasino Sili, o lea na ia taumafai ai i sona avanoa i le Faamasino Sili lagolago ia Patea, peita’i, e le’i avanoa fo’i Patea.

E na o le afioga i le ali’i Fa’amasino Sili Lagolago ia Fiti Sunia na avanoa, ma maua ai loa le avanoa o White e faailoa ai ia Sunia le mea ua tupu atoa ai ma lana tusi faamavae. 

Na faailoa atu e Sunia ia te ia, o le a ia talanoa i isi uma Fa’amasino e tusa ai o lana faamavaega. 

I le taeao o le aso Lua o le vaiaso nei, e talitonu White, e leai se mafua’aga e ala ai ona toe tula’i i luma o le Fa’amasinoga, ona ua le toe avea o ia ma Loia Fautua mo tagata lautele.

Na faailoa manino e Patea ia White, sa tatau lava ona alu atu i le Faamasinoga i le taeao o le aso Lua o le vaiaso nei, e faailoa atu le tulaga i lana tusi faamavae, ona o lea sa i ai mataupu na faa tulaga e valaau i le taeao lea, i le taimi ao avea o ia ma loia fautua.

Na tali White, talu ai ua le toe avea o ia ma Loia Fautua i le taimi, na faigata ai ona toe a’e se manatu ia te ia e tula’i i luma o le Fa’amasinoga.

Na toe tali Patea e faapea, e le tau tuli i se tusi e tuuina atu, ae sa i ai lava le avanoa e tula’i ai White ma faaleo i ana lava upu i luma o le Fa’amasinoga le tulaga ua oo i ai lana galuega. 

Na finau White e faapea, ao avea o ia ma Loia Fautua, sa ia maua ai le avanoa e tula’i ai i luma o le Fa’amasinoga, ae talu ai ua faamuta lana galuega ma ua le toe avea o ia ma Loia Fautua, o le mafua’aga lena na le mafai ai ona toe tula’i i luma o le Fa’amasinoga.

Na tagi le alii o White ma faatoese i le Fa’amasinoga e faamagalo o ia e tusa ai o lona faamatala e logo le Fa’amasinoga e tusa ai o lona faamavae mai lona tofiga o le Loia Fautua.

Sa ia taua lona taumafai e fai le mea sili e tautua ai tagata lautele, peita’i, ua ese le taunuuga ua oo i ai. Sa le’i i ai sona manatu o se tulaga faapea o le a faamuta ai lana tautua, ae talu ai o faaletonu ua tutupu, o le mafua’aga lea ua tula’i mai ai lenei faaletonu.

Sa ia faatoese foi i tagata lautele uma o le atunuu sa ia tauaveina a latou mataupu e tusa ai o le faaiuga ua ia faia.

O le vaiaso fou o le a faailoa atu ai le faaiuga a le Fa’amasinoga e tusa ai o le mataupu a White.