Nofosala i le Toese mo le 5 tausaga i le umia o fualaau faasaina

Pago Pago - AMERIKA SAMOA

E 5 tausaga lea ua faasala ai e le Fa’amasinoga Maualuga se alii mai Vaitogi e nofosala ai i le Toese i Tafuna, ina ua ta’usala o ia i le solitulafono o le umia faasolitulafono o vaega o fualaau faasaina o le aisa, atoa ai ma le umia o se a’upega malosi e lei lesitalaina.

Na faamanino e le afioga i le alii Faamasino ia Elvis P. Patea i le taimi na tuuina atu ai le faasalaga i le susuga a Barritt Siaumau e faapea, e ui i talosaga mai Loia mo se faasalaga faa nofovaavaaia, peita’i ua manatu le Fa’amasinoga, e le talafeagai se faasalaga faanofovaavaaia mo Siaumau, ona e le o se taimi muamua lenei ua aafia ai o ia i le tulafono.

Na faamanino atili e Patea ia Siaumau e faapea, e faa 3 ona faamaonia e le Faamasinoga Maualuga ana solitulafono mamafa. E faa 2 i le solitulafono o le ave ta’avale ‘ona, ae faatasi i le solitulafono o le umia faasolitulafono o fualaau faasaina, lea na ta’usala ai o ia i le 2019, ma e oo mai i le taimi na pu’e faapagota ai o ia e Leoleo i le mataupu e pei ona faasala ai nei o ia, o loo i lalo o ia i le vaavaaiga a le Ofisa Faanofovaavaaia.

O le vaiaso na te’a nei na tula’i ai Siaumau i luma o le Fa’amasinoga Maualuga mo le tuuina atu o le faaiuga faasaga i le solitulafono ua ta’usala ai o ia.

Na ulua’i tu’uaia e le malo ia Siaumau i le solitulafono o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mo le umi e le itiiti ifo i le 5 tausaga ae le sili atu fo’i ma le 10 tausaga, faatasi ai ma le solitulafono o le umia faasolitulafono o se a’upega mata’utia e le’i lesitalaina, o le vaega A lea o solitulafono mama, lea e faasala ai i le faasalaga faa falepuipui mo le umi e tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e 2.

A e tusa ai ma le maliliega na sainia e le ua molia ma le malo, lea foi na talia e le Fa’amasinoga Maualuga i le 2 masina talu ai, na tali ioe ai le ua molia i le moliga o le umia faasolitulafono o se a’upega e lei lesitalaina, atoa ai ma le solitulafono mamafa o le umia o vaega o le pauta faasaina o le aisa.

I le tali ioe ai o le ali’i ua molia i moliga e pei ona ta’usala ai o ia e le Fa’amasinoga, sa ia ta’utino ai e faapea, i le afiafi o le aso 4 o Iuni 2021, na maua ai e Leoleo fualaau faasaina ma se a’upega e lei lesitalaina i totonu o le ta’avale sa ia faafoeina.

Ina ua maua le avanoa o Siaumau, na ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i lona aiga e tausi lona Tina ma tautua lona aiga. 

Sa ia taua le tele o se lesona na ia maua ao taofia ai o ia i le Toese mo le umi e 12 masina, lea ua avea ma a’oa’oga taua mo lona olaga i le lumana’i. 

Sa ia ta’utino i le Fa’amasinoga, ua lagona lona salamo, na te le toe faia fo’i lenei solitulafono i le lumana’i.

Na finau le Loia a le malo i le Fa’amasinoga mo se faasalaga faanofovaavaaia, e aofia ai se taimi faa falepuipui e tuli e le ua molia i le Toese. 

Na faavae le faafinauga a le malo i faamaumauga a le Ofisa Nofovaavaaia, e faatatau i isi fo’i solitulafono na ta’usala ai le ua molia. 

Ina ua fesiligia le Loia a Siaumau mo sana faafinauga, na taua ai e le ali’i Loia ia Michael White le tele o taimi na ia fautuaina ai le ua molia e tusa ai i lona le usitaia o poloaiga a le Fa’amasinoga. Na taua e White e faapea, o lo o nofovaavaaia le ua molia mo le 5 tausaga talu mai le 2019, a o lea fo’i ua toe faamaonia e le Fa’amasinoga le isi solitulafono o le umia o fualaau faasaina.

O le mae’a ai ona iloilo e ali’i Fa’amasino o mau faamaonia e faatatau i le mataupu a Siaumau, atoa ai ma faafinauga a loia, na tuuina mai ai loa le faaiuga a le Fa’amasinoga. 

Na faailoa e le afioga i le ali’i Fa’amasino ia Pate’a i le ali’i ua molia, e le o se taimi muamua lenei ua ta’usala ai o ia e le Fa’amasinoga i solitulafono mamafa. E faatolu ona faamaonia e le Fa’amasinoga solitulafono mamafa na tu’uaia ai o ia, e faalua i le ave ta’avale ‘ona, ae faatasi i le umia faasolitulafono o vaega o le pauta faasaina o le aisa. 

O le tausaga e 2019 e pei ona faailoa e Patea ia Siaumau na ta’usala ai o ia e le Fa’amasinoga Maualuga i le umia faasolitulafono o fualaau faasaina o le aisa, ma tu’u atu ai e le Fa’amasinoga le avanoa e faanofovaavaaia ai o ia mo le 5 tausaga.

“O lea faatoa silia laititi ma le 2 tausaga talu ona tu’u atu le avanoa ia te oe, ae toe loka oe e Leoleo ma molia i le solitulafono e pei ona ta’usala ai oe e le Fa’amasinoga, o lou umia faasolitulafono lea o vaega o le pauta faasaina o le aisa,” o le faamanatu lea a Patea ia Siaumau.

“Ina ua e talosaga mai i le taimi muamua mo se avanoa, sa tu’u atu e le Fa’amasinoga le avanoa ia te oe. O lea fo’i la ua e toe talosaga mai mo se isi avanoa, ae ua manatu le Fa’amasinoga, e le toe aoga se isi avanoa mo oe, e le toe aoga fo’i se faasalaga faanofovaavaaia mo ia, ona e foliga mai e te le’i a’oa’oina lava se lesona aoga mai isi mea sese sa e faia muamua.”

Mo le moliga o le umia faasolitulafono o vaega o le pauta faasaina o le aisa, e 5 tausaga ua faasala ai e le Fa’amasinoga le susuga a Siaumau e nofosala ai i le Toese i Tafuna. 

Mo le moliga o le umia o se a’upega e le’i lesitalaina, e tasi le tausaga ua faasala ai o ia i le Toese. O nei faasalaga faa falepuipui e 2 o le a tuli faatasi, lona uiga e na o le 5 tausaga e tuli e le ua molia i le Toese, ae aofia ai ma masina e 12 lea na taofia ai o ia i le Toese e faatalitali ai se faaiuga o lenei mataupu.

O le afioga i le ali’i Fa’amasino Lagolago ia Su’apaia J. Pereira ma le afioga i le ali’i Fa’amasino Lagolago ia Paepae I. Fai’ai na lagolago ia Patea i le iloiloina o le faasalaga o Siaumau. 

E pei ona taua e le malo i le latou tagi, o le afiafi o le aso 4 o Iuni 2021 na tula’i mai ai le mataupu e pei ona nofosala ai nei Siaumau, ina ua taofi e Leoleo lana ta’avale i se solitulafono i luga o le alatele ae maua ai se fana ma fualaau faasaina i totonu o le ta’avale. 

E leai se laisene ave ta’avale a le ua molia na i ai i le taimi na taofia ai lana ta’avale. E leai fo’i se isi lava pepa faamaonia e mafai ai ona faamaonia o ia i Leoleo. Na taofia e Leoleo le ua molia ma auina atu i le Ofisa o Leoleo i Tafuna mo suesuega. Na avatu faatasi ai fo’i ma lana ta’avale.

Na su’e e Leoleo le ta’avale a le ua molia ma maua ai fualaau faasaina. O se paipa tioata sa i ai vaega o le pauta faasaina o le aisa na maua i totonu o le ta’avale. Na maua ai fo’i e Leoleo ma pulufana.

Na maua le ua molia e fai sana faamatalaga i Leoleo ina ua fesiligia o ia e tusa ai o fualaau faasaina ma pulufana na maua i totonu o le ta’avale. 

I le tausaga e 2019, na ta’usala ai e le Fa’amasinoga Maualuga le ali’i o Siaumau i le solitulafono o le umia o vaega o le pauta faasaina o le aisa, ma nofovaavaaia ai o ia mo le 5 tausaga.

O tuutuuga o lana nofovaavaaia e aofia ai lona tuli o masina e 20 i le Toese i Tafuna. O lea faasalaga na tuuina atu ina ua talia e le Fa’amasinoga Maualuga le talosaga a Siaumau mo se isi avanoa o ia. 

Na fautuaina e le Fa’amasinoga Maualuga ia Siaumau, ia usita’i ma tausisi i poloaiga a le Fa’amasinoga o le a tuuina atu ia te ia. O ia poloaiga e aofia ai lona tausisi i tulafono a le malo, e le tatau fo’i ona ia toe solia se isi tulafono i totonu o le 5 tausaga o lana nofovaavaaia. 

E silia laititi i le 2 tausaga talu ona mae’a le tuuina atu o le fa’asalaga nofovaavaaia a Siaumau, ae toe molia loa o ia i le mataupu fou e pei ona ta’usala ai o ia. 

O loo taoto i luma o le Fa’amasinoga Maualuga le talosaga a le malo mo se avanoa e faaleaoga ai le nofovaavaaia a Siaumau, talu ai fualaau faasaina ma pulufana na maua i totonu o lana ta’avale i le tausaga na te’a nei.