TALA I VAIFANUA

Pago Pago - AMERIKA SAMOA

32 AOFA’I I LATOU MALILIU I A’AFIAGA O LE COVID-19

I le fonotaga a le Komiti fa’afoe o le Covid-19 i le aso Lua na te’a nei, ua lipotia mai ai e le lipoti a le Foma’i mai le LBJ Medical Center, Dr Abraham Le’iato, ua toe fa’aopoopo nei le tasi sui ua maliu i le aotelega o i latou ua maliliu mai i a’afiaga o le Covid-19.

O le sui lea ua mulimuli fa’amauina nei ua maliu mai le Covid-19, o le tama e 89 tausaga le matua, e le’i faia ni ona tui puipuia mai le Covid-19, ae sa i ai fo’i ona gasegase tumau na talavai ai ae le’i po’ia i le Covid-19.

Ua tamau ai nei fa’amaumauga o le aofai o e ua maliliu ona o a’afiaga o le Covid-19 ua 32 ai nei. 

Na fa’ato’a si’ima’I ane le tama lea ia Iuni 27, e le’i taofia ae na toe ave e lona aiga i le fale e fa’anofoesea ai, peita’i na toe fa’ananati mai e lona aiga i le aso 29 Iuni, 2022 peita’i e fa’atoai atu i le falema’i ua maliu o ia.

E ese mai le covid-19 ua fa’amaonia le i ai o le verusi covid i lona tino, ae ua pneumonia fo’i le tama. Ua fa’amaonia e le’i faia ni ona tui puipuia o le Covid-19.

Ua fa’aaoga fo’i lea avanoa e Dr Leiato e na te toe tima’ia ai le Komiti Fa’afoe o le Covid-19, ua toe sofa’i mai fo’i le Covid-19 i le taimi nei i le lautele o le atunuu. Ua matauina i fa’amaumauga a le falema’i i Faga’alu mai le 24 itula ua te’a ua atoa le 25 o sui ua fa’amaonia le suega o le Covid-19 i le falema’i tele i Faga’alu. E to’a sefulu o i latou e ao ina amata faia i ai togafitiga mo le Covid -19, ae to’a 6 lea iua taofia nei i le falema’i Covid-19.

E tusa ai lava o lea lipoti a Dr Le’iato, ua fa’ailoa mai ai, ua toe oso maualuga fo’i le aofai o tagata ua maua ai le verusi i le vaitau lenei. Mai le fitu aso talu ai ua fa’amauina le 317 o tagata ia fa’amaonia le suega covid-19. Ua atoa i ai le 6,811 o tagata ua a’afia talu mai ona lutia le atunuu i lenei fa’ama’i mai ia Fepuari 21, 2022. O le aofai o lo’o totoe pea ma le verusi i le taimi nei e 394, ae o isi uma o lea aotelega na maua ua toe mama mai le ma’i covid-19.

Ua fa’ailoa fo’i e le vasega o foma’i o lo’o nafa ma le tautuaina o le atunuu mai le Covid-19, ua fa’ailoa ai, “O le toe fa’amamaina o le fa’asa lea fo’i ua alia’i mai ai lea toe oso maualuga o le aofai o nisi ua toe maua i le Covid-19. Ona ua tau le toe fa’aaogaina le pupuni fofoga ma ua tumutumu lava tagata i taimi uma e mafuta ai, ua le fa’avava mai isi i nofoaga faitele.

FA’AILOA E LE F.A.S.T, TOE SOSO’O MA FA’AAOGA MALAE VA’ALELE I FAGALI’I

O lo ua fa’alauiloa e le faigamalo fou a le FAST i Samoa, ua i ai le latou fa’ai’uga e toe soso’o le malae va’alele i Fagali’i ina ia fa’aaogaina pea mo feoa’iga a va’alele laiti a le Samoa Airways lea e matele ina femalaga’i i le va o Amerika Samoa ma Samoa.

O le susuga le Minisita o Feoa’iga i le Ea ma Alatele i le atunuu, Olo Fiti Va’ai sa ia fa’ailoa atu i le Palemene i lana lipoti fa’amaumau, le iuga o le a faia i le Malae Va’alele i Fagali’i. 

Fa’ailoa e le ta’ita’i o le Itu agai o le Malo, Fonotoe Pierre Lauofo, “Ae o le a se mea o le a fai i le tulaga pu’upu’u o le malaeva’alele i Fagali’i ne’i ono tutupu mai ai ni fa’alavelave? O le mafuaga tonu lea sa ala ai ona tapunia le malaeva’alele aua e fa’alogoina e le pasese uma lava le taofiofi mamau o le afi o va’alele pe a oo ina tulaueleele ina ia le so’ona ova mai le malaeva’alele le sese’e mai i le malae.”

Ua fa’ailoa mai e Olo Fiti Va’ai, “O lo ua fa’aavanoa le eleele o le Malo i le itu i sisifo o lea malae sese’e o va’alele e toe soso’o ai le malae lea, ina ia le maua lena tulaga.”

Ua fa’aauau le fa’amatalaga a le ali’i Minisita i lea tulaga ma ia toe fa’ailoa mai ai, “E le gata i le soso’o o le malae sese’e o va’alele, ae ua manatu fo’i ina ia faia se ala laupapa fa’asima i le isi itu o le Malaeva’alele. Ona o va’alele ia e mama lava, aua o lo’o fa’asea fo’i le to’atele ona o le tetele o uu o va’alele i taimi o sauniga i aso Sa, ae umi lava le malaeva’alele e le oo mai le sese’e o va’alele i le itu lea e a’afia ai malumalu ma sauniga fai i le pisi o le malaeva’alele.”

“O le tapunia ai o le malaeva’alele ona o ni fa’alavelave na toetoe lava a ogaoga se a’afiaga o le pasese, ona ua le lava le umi o le malaeva’alele e sese’e ai va’alele sa tau tulaueleele, ma ua aga’i atu lava ina toetoe oo i le pa uaea lea e si’omia ai le malaeva’alele. O le mea sa’o lea, aua e fa’alogoina uma lava e le pasese ma ali’i pailate i so’o se taimi e tulaueleele ai va’alele nei, le taofiofi mamau e pailate o afi o va’alele i taimi e fa’aifo mai ai o le a tulaueleele.” O se saunoaga lea a le ali’i Minisita e tusa o le latou fa’amoemoe mo Fagaili Airport.

Ina ua tapunia, sa tuuina atu aloia le malaeva’alele lea i le Matagaluega o Leoleo mo le fa’aaogaina e faia ai su’ega mo ave taavale i taimi e a’oa’oina ai mo latou laisene aveta’avale.

Ua fa’ailoa mai e le ali’i minisita Olo Fiti Va’ai, “O le to’atele o e na aoga fo’i le Malaeva’alele lea mo le sailiga o le tamaoaiga tausi e ala i oloa fefa’ataua’i, ua misia lea avanoa sa latou mauaina a’o fa’atautaia le malaeva’alele mo feoa’iga a va’alele laiti nei i le va ma Pago Pago, ina ua tapunia.”

O lea la ua toe fa’atagaina nei lea vasega o pisinisi e toe fa’atautaia i le taimi nei e saunia lelei ai mo le tatalaina o malaga fa’avaomalo. Tatou toe fo’i la e tausaili le auro lea sa tatou maua muamua.”

E tusa ai ma le fuafuaga o le malaeva’alele i Ti’avea i Aleipata, ua fa’ailoa mai e Olo Fiti Va’ai, “E le o toe i ai se fuafuaga a le FAST e fa’aauau lea galuega sa fa’atulaga e le faigamalo ua tuanai nei.”