Faamaonia moliga o le faia o uiga mataga i se tamaitai na tu’uaia ai se ali’i mai Samoa

Pago Pago - AMERIKA SAMOA

Ua faamaonia e le Fa’amasinoga Maualuga moliga o le faia o uiga mataga i se tamaitai na tu’uaia ai se ali’i e 35 tausaga le matua mai Samoa, ina ua talia e le Fa’amasinoga Maualuga le maliliega na sainia e le malo ma le ua molia i le vaiaso na tea’ nei.

O le vaiaso na te’a nei na tula’i ai i luma o le Fa’amasinoga Maualuga le susuga a Frank Seumalo, lea na taofia i le Toese talu mai le taimi na pu’e faapagota ai o ia i le tausaga na te’a nei, ina ua le mafai ona totogi le tupe na faatulaga e tatala ai o ia, mo le tolaulauina o le latou maliliega ma le malo.

Na ulua’i tu’uaia e le malo ia Seumalo i le moliaga mamafa o lona tagofia lea o itutinosa o se teineititi e talavou i lalo o le tulafono i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, pe faasala i le salatupe e le sili atui le $5,000, poo le fa’asala fo’i i fa’asalaga uma ia e lua.

Sa tu’uaia fo’i o ia i moliaga mama e 2 o le faaoolima i le tulaga tolu, atoa ai ma le faia o amioga e ono lamatia ai le saogalemu o fanau laiti, o le vaega A lea o solitulafono mamafa, lea e mafai ona fa’asala ai se tasi i le toese mo le umi e le sili atu i le tausaga, poo le fa’asala i le salatupe e le sili atu i le $1,000, pe faasala fo’i i fa’asalaga uma ia e lua.

Ae i lalo o le maliliega na sainia e Malo ma le malo, lea fo’i ua talia e le Fa’amasinoga Maualuga, ua malie ai le ua molia e tali ioe i le moliaga mamafa o lona tagofia lea o itutinosa o se tama’ita’i e talavou i lalo o le tulafono i le tulaga muamua.

I le tali ioe ai o le ali’i ua molia i le moliaga e pei ona ta’usala ai o ia e le Fa’amasinoga Maualuga, na ia ta’utino ai e fa’apea, i se taimi o le aso 11 o Aperila, 2021 i Amerika Samoa, na ia ulufale faamalosi ai i totonu o le fale o le tama’ita’i na a’afia, ma ia tago atu ai i lona fatafata ao moe o ia i luga o lona moega.

O lea gaioiga sa ia faia e pei ona ta’utino ai le ua molia i luma o le Fa’amasinoga Maualuga, sa ia faia ina ia faamalie ai lagona tu’inanau sa ia te ia.

Na fesili le Faamasinoga pe na faamanino atu e se isi ia te ia tuutuuga uma o le maliliega aufa’atasi ao lei tuu i ai lana saini, na tali le ua molia, na faa Samoa atu e se tama’ita’i pagota ia te ia tuutuuga uma o le maliliega aufaatasi ma le malo, i le aso na la talanoa ai ma lana loia fautua i le toese i Tafuna.

Na fesili le Fa’amasinoga i le ali’i loia fautua pe aisea na ia fa’aaogaina ai le auaunaga a le tama’ita’i pagota e faaliliuina tuutuuga o le maliliega ma le ua molia, ae le faaaogaina se sui o le latou Ofisa, na tali le alii loia fautua, o le taimi nei, o lo o feagai pea le latou Ofisa ma le faafitauli o le leai o se tasi e faatinoina le galuega o le faaliliu upu mo tagata molia.

O tagata faigaluega e to’atolu sa galulue i le tulaga o le faaliliu upu ma le faamatala upu ua malaga i fafo, ma o loo faasalalau avanoa a le Ofisa i le taimi nei.

Ua talosagaina e le malo le Faamasinoga ina ia faasala le ua molia i se faasalaga faanofovaavaaia, e aofia ai ma le tuutuuga o lona tuua lea o le atunuu ae toe fo’i atu i Samoa mo le umi o lana nofovaavaaia e 5 tausaga.

E pei ona taua e le malo i tuutuuga o le latou maliliega e fa’apea, o lenei mataupu na tofu atu i le Ofisa o Leoleo i Tafuna i le taeao o le aso 11 o Me, 2021, ina ua talosagaina e se ali’i se 22 tausaga le matua se fesoasoani a Leoleo, fa’asaga i ni uiga mataga sa taumafai le ua molia e faia i lona tuafafine e 16 tausaga le matua. 

Na aga’i atu Leoleo i le fale o le aiga na aumai le ali’i e 22 tausaga le matua ma lona tuafafine na a’afia, ma aga’i atu loa i le Ofisa o Leoleo mo le fa’atalatalanoaina o lenei mataupu. E le i auai matua o le teineititi na a’afia ona sa faigaluega i laua.

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma al ese loa.

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa ma le manatu ina ia fa’amalie ai lagona tu’inanau o le tino.

Na ee le teineititi na aafia i le taimi na tago atu ai le ua molia i lona tino, ma ia fai atu ai loa i le ua molia e alu ese ma le fale. E lei tauina e le teineititi na aafia i se tasi le faalavelave muamua sa tula’i mai, ona sa ia manatu, ailoga e toe tula’i mai lenei mataupu i le lumana’i.

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine. 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili lana ato tupe.

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu. 

O lo o taofia pea le ua molia i le toese i Tafuna ina ua le mafai ona ia totogi le tupe e $10,000 na faatulaga e le Fa’amasinoga e tatala ai o ia i tua, talu ona taofia mai o ia i le masina o Aperila o le tausaga na te’a nei, e faatali ai le lauina o lana faasalaga i le masina fou.

Ua talosagaina e le Fa’amasinoga le Ofisa Nofovaavaaia e tapena se ripoti tusitusia faasaga i le talaaga o le ali’i ua molia, atoa ai ma le siosiomaga o le faalavelave na tula’i mai, ina ia fuafua i ai se faasalaga a le Fa’amasinoga.

E le o se taimi muamua lea ua aafia ai le ua molia i le tulafono. O le tausaga e 2018 na ta’usala ai o ia e le Fa’amasinoga Faaitumalo i le solitulafono o le ave ta’avale ‘ona faapea ai ma le gaoi, ma faasala ai o ia e nofovaavaaia mo le 12 masina. O se tasi o tuutuuga o lana nofovaavaaia, o le se’i lea e le Fa’amasinoga Faaitumalo o lona laisene ave ta’avale mo le 6 masina.

E pei ona taua e le malo i le latou tagi, ina ua mae’a ona osofa’i e le ua molia le fale o lana uo tamaitai ae ave faagaoi le telefoni a le tupe e $125, na sola ese o ia mai le fale o lana uo ma aga’i atu i lana ta’avale. Na saili e Leoleo le ta’avale ma maua i Nu’uuli, ma faamaonia ai le tagofia e Malo o le ‘ava malosi ma faafoe le ta’avale.