TALA I VAIFANUA

Pago Pago - AMERIKA SAMOA

TALOSAGA LE MATAGALUEGA O FEFA’ATAUA’IGA LIUA FA’AAOGAINA TUPE MO ISI GALUEGA LELEI:

Ua talosaga atu le Matagaluega o Fefaasoota’iga i le USDepartment of Housing & Urban Development ia ia suia mai le fa’aaogaina o tupe o totoe na toina mai mo le tausaa fa’aletupe 2019 ma le 2020, e fa’aaoga e Amerika Samoa mo poloketi e aoga e fa’aleleia ai poloketi mo Turisi i le atunuu.

O le aofai o lea seleni ua taumafai e suia lona fa’aaogaina tatau e $800,000. Ua mae’a talia mai le fa’aaogaina o le isi vaega tupe e toeititi alva $40,000 e fa’aleleia ai le falemata’aga i Fagatogo. Ua fa’apea fo’i le isi $50,000. mo le fa’atula’ia o se malaeta’alo mo Tafuna Elementary School, peita’i o le $761,291 o lo’o i ai pea i le CDBG mo nei tausaga fa’aletupe e lua, lea ua talosagaina e faaaoga le $400,000 mo le Vaega #2 o le Poloketi Laumei ma le Malie i Vaitogi, ae fa’aaoga le isi $400,000 mo le falema’i i le Paka Liona, lea ua va’aia le fa’agasologa lelei o lena galuega tele.

Ua faailoa atu e le tamaitai fa’atonu o le DOC, Peti Matila, “O le vaega lua o le poloketi lea i le maimoaga o le Laumei ma le Malie i Vaitogi o se nofoaga faitele e mafai ona aoga uma lava i tagata o le atunuu fa’atasi ma e maimoa mai fafo e fia oo i lea nofoaga matagofie. E ao ina fa’amae’a lelei ona i ai pakaga o ta’avale, se nofoaga e malolo i ai, faleta’ele e fia fa’aaogaina ma le ala savali e saogalemu a’ia’i ai le soifua i lea nofoaga matagofie tele o le atunuu. E ao ina mautinoa le saogalemu o tagata uma e fia maimoaina le Laumei ma le Malie ma usu fo’i le pese e manu a’e ai i’a nei mo le maimoa a le atunuu ma e tafafao mai fafo.”

O le isi vaega tupe lea e fia fa’aaogaina i le falema’i i le Paka Liona o le a fuafua e fa’atuina ai le fale mo ni foma’i e fia tautuaina le atunuu e ala i togafitiga ma siakiga o gasegase. E mafai ona fa’atautaia e so’o se Foma’i agava’a ua moomia ona fa’atautaia a latou lava falema’i mo siakiga ma togafitiga o soo se gasegase. O lea fale o le a fa’atuina lea i le itu o i ai atufalega lea ua mae’a fa’aofi i le ata o le suiga matagofie ua amatalia i le Paka Liona.

Ua fa’asalalauina fa’alaua’itele lea aiaiga o le fa’aaogaina o nei vaega tupe i luga o le uepesite a le Matagaluega o Fefa’ataua’iga i a latou Upega Tafa’ilagi ina ia mafai ona fa’aulu atu ni manatu poo ni fa’asea fo’i o le mamalu lautele i le fa’aaogaina o nei alagatupe ua talosaga e suia nei.

Ua fa’ailoa mai e le tamaitai fa’atonu Petti Matila, “E na’o le tasi lava le manatu na fa’aalia mai luga o le Uepesite e tusa o le mana’oga e fa’ailoa mai se taofi e tusa o le fa’aaogaina o nei tupe mai le HUD. Peita’i ua mae’a lava le taimi ae fa’ato’a fa’aulu mai lea manatu, ae na tali pea ina ia fa’aatoatoa ai le galuega e tatau ona faia e le matagaluega.”

“O le manatu lea sa matele ina fa’atutu mai ona o fausaga o atufalega ma suiga o lo’o ua mae’a va’aia nei i le Paka Liona ma lona alagatupe o fa’atupe ai poo fea e aumai ai? Ua talia nei lea fa’afesili, e le o le Matagaluega o le DOC lea e fa’atupea galuega uma i le Paka Liona i lona suiga fou ua va’aia nei. E tusa ma le fa’alauiloaga na tuuina atu muamua, O le Matagaluega o Paka ma Malae Ta’alo ma le isi vaega tupe e toina mai le Ofisa o le Kovana Sili ona maua ai lea o le Paketi fa’asoa mo le poloketi atoa o le toe fa’aleleia ma fa’amatagofie atili le Lions Park e $1miliona. O le vaega tupe a le Ofisa o le Kovana o lo ua faailoa mai e mai le Economic Stabilization Fund poo fa’atupega mo galeuga toe fa’amautu ai le Atina’e e fa’atautaia mai e le Ofisa o le Kovana.”

“O le vaega muamua o le poloketi Paka Liona, o le suaina esea atoa lea o malae ta’alo tuai sa i ai, ma le tele o fale sa fa’atutiuina ai ma nofoa ma laulau sa i ai, ma sa ese fo’i le Kamupani sa latou fa’atautaia lea galuega mai le Kamupani ua malo i le vaega lua, o le fausia lea o fale ua tatou va’aia nei ua toetoe mae’a, o le Kamupani lea a le Silva Group.”

FANAU LE’I MAUA TOGI FA’AU’U - MAFAI ONA AOGA I AI TOGI SUMMER SCHOOL PROGRAM

Mo le fanau e le’i maua togi e fa’au’u ai i le fa’au’uga sa faia nei o a’oga maualuluga a le Malo, ua fa’ailoa mai e le susuga le Fa’atonu o A’oga, Talauega Dr. Samasoni Asaeli, “O le a aoga togi ma galuega fa’atino o le a faia e i latou i le polokalama mo le tu’uaga o a’oga, e mafai ona fa’aopoopo ai latou togi e pasi ai, peita’i ua suia ai fo’i ma le fa’atulagaga masani sa sau a’i aoa’oga i a’oga maualuluga, e na’o le faia’oga lava e mafai ona suia togi o le tamaititi a’oga o saili lona tipiloma i a’oga maualuluga a le malo.”

O se suiga o le a faia nei, e ao ina faia e uia ala ua mae’a fa’atulagaina ma e tonu lava. Ua le tali mai fo’i le fa’atonu i le fa’afesili pe to’afia le fanau ua le fa’amanuiaina le taumafai i lenei tausaga a’oga.

“O le faiga ua fa’atulaga nei, o fanau nei o le a faigaluega pe ua a’o’oga lava i le polokalama mo le ono vaiaso soso’o. O le a o gatusa lea ma le aofaiga o itula e tatau ona a’oa’oina ai le fanau i potu a’oga mo le afa tausaa e tasi. O lona uiga o lona togi e tasi le credit lea ua agava’a ona fa’amauina.

Afai o le tamaititi aoga e 0.5 - 1 le credit lea e fia maua e pasi ai, e tatau lava ona a’oga pea se’ia maua lona togi e pasi ai ana mataupu. Ona mafai loa lea ona taua’aoina lona tusi pasi Tipiloma.

Pe afai e lua credit lea e mana’omia ona maua e pasi ai, e tatau la ona tuu le filifiliga ia te ia, pe su’e lana suega o le GED pe toe fo’i mai e a’oga i le tausaga a’oga fou.

TALOSAGA FA’AFAIGOFIE FEMALAGA’IGA I LE VA MA TUTUILA - FA’AAOGA AI LE TALOFAPASS

Ua lagona se leo o le talosaga na fa’aulu i le Palemene a Samoa, aua ua faigata tele ona femalaga’i mai o tagata matutua i Amerika Samoa ona e fa’aaoga ai le tatou TalofaPass.

O le talosaga na fofogaina e Tea Peato, o le vaega fa’aupufai a le Fa’atuatua i le Atua Samoa ua Tasi, mai Fa’asalele’aga #4. O sana tala, ua faigata tele ona fa’aaoga le TalofaPass e fa’aulu mai ai sana talosaga ae o lo ua iloilo toto’a e le Palemene le latou Paketi fa’asoa mo le tausaga fa’aletupe fou. 

Ua fa’afofogaina e le au fa’asalalau lea tlosaga, ma ua latou lipotia mai mo le silafia e le au fa’asalalau a le tatou nei malo, aua o le TalofaPass o le itulau lea e mafai ai ona malaga mai so’o se tasi i le tatou atunuu, ma malaga ese atu i fafo. 

O le isi galuega tele sa fa’atino e le tatou malo, o le auina atu lea i Samoa o sui e to’alua ina ia la’ua a’oa’oina le fa’aaogaina o lenei itulau mo faigamalaga mai, ae maise ia fa’amasani ai fo’i le au tusi pasese a le Samoa Airways ma nisi o Ofisa Tusi Pasese eseese lava i Samoa, e fesoasoani ane i a latou tagata fia malaga mai, ma fa’atumu a latou sootaga nei ma le tatou Malo, ia mafai ona malaga mai.

O lena galuega fesoasoani sa fa’atauuuina lea i le amataga o Iuni, 2022 ma ua tatau la ona nofouta le to’atele o Ofisa Tusi pasese mo femalaga’iga i Samoa ma ala o so’otaga e fa’atumu mai ai fa’amaumauga o e fia malaga mai i Amerika Samoa e fa’aaogaina ai le itulau a le TalofaPass.

E ese mai lea ae ua fa’ailoa mai fo’i e le au fa’asalalau i Samoa, ua talosagaina e lea sui o le Palemene, ua le toe fa’aaogaina le TalofaPass ma ia toe fa’aleleia atili sootaga o fefa’ataua’iga i le va o malo na lua, ma ia toe soso’o fonotaga a Samoa na Lua e pei ona sa faia i vaitau o le faigamalo tuai a Samoa.

Na saaia mai e le sui mai le itu agai, Lauofo Pierre Lauofo lea talosaga a le sui mai Fa’asaleleaga #4 ma ia fa’ailoa ai, “E moni lelei lava, e oo lava ia te a’u, ua fiu lava e taumafai ona ulu i le itulau lea e fa’amau ai so’u avanoa e malaga ai i Pago Pago, ua i’u lava ina le toe sau. E fa’aluaina fo’i le talosaga ina ia toe tatala fefa’ataua’iga i le va o malo o Samoa na Lua. Ua maoa’e le faigata ona ulu i lea itulau, ma e moomia lava ona silafia lelei e le tagata ona fealua’i ai pe a oo ina matala mai ia te oe se avanoa.”

O le minisita fo Fa’ato’aga ma Faigafaiva La’auli Leuatea Schmidt sa ia faapupula mai le taunuuga o lo’o ua i ai nei talanoaga i le va o le Malo o Samoa ma Amerika Samoa, ma ua fa’ailoa ai fo’i ma le fuafuaga ua taoto ai lea mataupu.

“O le afuaga ona tolopo o nei talanoaga taua i le va o le malo o Amerika Samoa ma Samoa ona o le Covid-19 ua lutia ai malo na lua. O lo ua tatou tatalia nei le toe to’ai taunuu mai o le tatou Palemia mai lana malaga ua i ai nei i Niu Sila, se’ia taga’i toto’a i ai i se maliliiega ua mae’a faatulaga  ma ua fa’atulaga ai se suiga fou o tatou feso’ota’iga ma le tatou usoga ia Amerika Samoa.”

O lo ua toe taliu mai nei le faigamalaga a le Palemia o Samoa Fiame Naomi Mata’afa lea sa malaga ai e auai i le fonotaga a Taitai uma o malo i le Puleaga a Peretania poo le Commonwealth lea sa usuia le fonotaga i Rwanda.