TALA I VAIFANUA

Pago Pago - AMERIKA SAMOA

17 FA’AI’UASO A’OGA MAUALUGA IAKINA ADVENTIST ACADEMY 

“Poo fea lava e femaliua’i ai lou fa’amoemoe, ma feavea’i ai ma lou tagata atoa, ia e malaga fa’atasi ma le loto maulalo, e fia silasila i ai le Atua!” O se vaega o le tautalaga fa’apitoa a le susuga le Faife’au Pr. Tui Tuliatu, na tofia mo le ta’ita’iga o le sauniga mamalu o le fa’au’uga ia Iuni 12, 2022, i le faleta’alo fou i le lotoa o Iakina Adventist Academy i Iliili.

Sa auai i le fa’auuga le afioga i le Kovana Sili Lemanu Peleti Mauga ma le Faletua Ella Mauga. Na auai fo’i le Faipule o Amerika Samoa i le Konekeresi Uifa’atali Aumua Amata fa’apea ma le Sui o le Matagaluega o A’oga. Na auai fo’i le tamaitai ua avea ma Sui Mamalu o le USMarines Sgt. Porter, Elenia mo le taua’aoina aloaia o le fa’ailoga fa’apitoa mo le sui ua ausia agava’a uma e ulufale ai i le USMarine Corp.

Ina ua mae’a le tatalo amata, sa fa’anoi loa se 3 minute mo le tautalaga matagofie a le ta’ita’i o le sauniga mo le vasega fa’ai’uaso. O le autu o lana tautalaga o le sini fa’atutu fo’i lea o lenei tausaga a le vasega fa’ai’uaso, “Loto Maulalo!”

“A e fia maua luga, e te alu i lalo lou loto! E leai se mea lelei e te maua pe afai e tausaili ma le loto fa’amaualuga!”

“O le autu sa’o o le tou fa’amoemoe, Loto Maulalo fa’aopoopo ma le Tumau i lou fa’amoemoe, e te maua manuia o e fia sailia! O le tatou aganuu, e amata mai lava e fa’aaoao i tatou uma i le loto foa’i, loto maulalo ma ia e ola fa’aaloalo i tagata ese ma tagata matutua ia te oe. O le fa’ata’ita’iga, a tagi si ou tei la’ititi i le mea ua ia te oe, poo le a lava lou naunau i ai, ae augani le tina Samoa, se avane lau mea lena se’i fa’amalie le loto o si ou tei, ona toe avatu lava lea ia te oe.”

“O ituaiga a’oa’oga na sa tatou soifua mai ai, a’o fafau ma momoli mai ai le naunau o lou tina ia fa’amaulalo lou loto. fa’amuamua le mana’oga o le tasi ia te oe, ma ia e iloa ona alofa atu, ma foa’i atu. O le olaga o le papalagi e fa’apea mai, O le mea lena a le tama matua, tagi oe i lau mea na fa’atau atu, fea o i ai? Tele lava le eseesega, masalo e aoga lea ia te outou, a’o le’i tou sauni atu mo atunuu i fafo, e olaola ai le fa’aupuga ma le fa’atonuga mulimuli ua fa’ailoa atu. E alo lava e oe lou Sa, e te le fa’amoemoe i se isi, ua uma le taimi na fa’afailele ai oe e nai ou matua ma lou aiga.”

“Mai le amataga o le loto maulalo o Iesu, na faigofie ia te ia ona fa’ato’ilalo ai e fefete ma le faufaualuga a Satani. E le’i maluelue le loto maulalo o Iesu i le fefete lea sa fetaia’i ma ia o Satani. Ae poo le a le fefete o Satani ma lona fia fa’amaualuga, na pa’u mataga i le malosi o Iesu, e le’i gaua’i i lana fa’aosoosoga. Sau ai ma le fautuaga mulimuli fa’akerisiano, Ia e manatu ua sili uma isi ia te oe!”

Ua faapea fo’i ona tima’ia Lemanu PS Mauga le vasega fa’aiuaso, ma o se fe’au e toe faamanatu i le fanau o le a tu’ua le malu o latou aiga, ae faia a latou lava filifiliga e tusa o latou mana’oga e fa’auau a’oga pe faigaluega pe tausi aiga, ua i ai lava manuia i le tagata ua loto maulalo ma le agamalu.

“O mea nei poo amio ua mana’o i ai le Atua i ona tagata, poo le a lava sau mea e te fia faia, ua mautinoa lou manuia pe afai e usita’i muamua lava i le auau o lou aso fa’au’u, ia tusia le agamalu ma le loto maulalo i le papa o lou agaga, ua mautinoa e fa’amanuia le Atua e pei ona ia folafola.”

“Ia vala’au i le Atua i mea ua e mana’o i ai, e le tu’ua e ia se mea ua e fia maua pe afai o e feoa’i ma lou Atua ma le loto fa’amaulalo. E toina mo oe le pale o le manumalo.”

“Leai lava se isi mea na ole ai Solomona i le Atua, na toina mo ia, e leai se na muamua pe na mulimuli i le poto sa ia maua. Le poto na te fa’amatala auiliilia ai le uiga o mea uma o le olaga, lea ua ia toe fa’asoa mai, Ia mata’u i le Atua, ia naunau i le alofa, ma ia feoa’i ma lou Atua ma le loto fa’amaulalo. O lana toe fautua lea i le toe tusi o le Failauga 12.Ua ia fa’ailoa fo’i, e fa’amasinoina i tatou uma i mea uma, o mea lelei ma mea leaga, atoa ma mea lilo.”

O le tolaulauina o fa’ailoga na muamua ai ona vala’au le ua ia ausia le tulaga lua i le Vasega fa’ai’uaso ma ua fa’alauiloaina o le tamaitai o Naomi Lualua mai Vaitogi ma Fasitoouta.

O ia fo’i lea ua ia mauaina le fa’ailoga a le Rotary Club i Amerika Samoa, ma ua ia avea fo’i le fa’ailoga mo le Sui sili ona Amio Lelei i le vasega 2022. O le fa’ailoga o le togisilia ua maua lea e Tavillacollin Puni. O ia o le Tiakono i le Ekalesia, e auai fo’i o le sui totino o le Aufaipese fa’apitoa a le Ekalesia ma o ona matua o lo ua ia avea iai le fa’afetai tele mo lona olaga atoa mai i le Ekalesia o Teleia’i Semi ma Falesoa Puni.

O le fa’ailoga o le togi maualuga ua ausia i le vasega fa’au’u mo le SAT ua toina lea i le tamaitai o Alexandra Pearce i lana sikoa o le 1,240.

O le fa’ailoga mo le sui ua iloga le tele o lana taumafaiga mai le amataga o lona ulufale mai seia oo nei ina fa’au’u Most Improved Student ua maua lea e Pese Tialu, o lea fa’ailoga sa saunia lea e le susuga le Faipule Sam Meleisea. O le fa’ailoga mo le ta’ita’i mataalia ma le fa’amaoni i ona tiute i le tausaga a’oga atoa ua maua lea e Meagan Si’umalae Seiteuila Ainuu.

O le sui ua ia mauaina le sikolasipi mai le Malo o Amerika Samoa ua fofogaina mai e le ta’ita’ifono o le komiti fa’afoe o le Sikolasipi, Senatoa Faiivae Godinet e tasi lava na ia mauaina o Alexandra Pearce, e fa’aauau ai ana a’oa’oga i le ASCC.

O le fa’ailoga fa’apitoa na saunia e le Aoga Iakina Academy mo se tamaititi aoga e sili ona tele lona sao i le A’oga i ona tausaga uma sa a’oa’oina mai ai, ua taua’aoina lea mo le ali’i ua togisilia i le vasega, Tavillacollin Puni.

O le fa’ailoga mulimuli na ta’ua’aoina o le fa’aloga na tula’i ai le tamaitai Sgt Elenia Porter ma ia fa’alauiloa le sui e to’atasi ua mae’a filifilia aua ua agava’a o ia e avea ma Fitafita i le USMarine Corp, Osana Luataimi. Sa iloga fo’i ona la’eia e lenei tamaitai le kola mumu i lona fa’au’uga, e fa’amau ai lona agava’a e avea ma fitafita i le USMarines.

TAOFIA AFIOAGA PAGO PAGO - GALUEA’INA ATUMAUGA AGA’I I FAGASA

I le taimi nei ua matauina le galuega tele ua faia i se vaega o le atumauga o Pago Pago ma ua aga’i i Fagasa. O lea galuega ua taofia nei e le Saofaiga o le Afio’aga ae se’i toe mata’i, pe ua faia se pemita o le galuega, ae pe na fa’ataga fo’i e fa’aauau lea galuega tele. O lo ua iloga o i ai le sua tele o i ai e aga’i i le tumutumu mauga o Pago Pago ma e aga’i atu i Fagasa.

Ua fa’amaonia mai e le afioga le Matua Pulu Ae Ae Jr ma sa ia fa’ailoa mai, “Ua afaina le sapalai o le suavai manino a le afioaga o lo’o alalata’i atu i eleele maualalo aua o lea ua sua le pitoaluga o laufanua o le afioa’ga. E tatau ona taofia le galuega ae se’i toe taga’i lelei i le galuega i lona tulaga o le fa’ataga ona faia, ma poo ai fo’i o sainia lea pemita e tatala ai le galuega fa’atino.”

O le galuega lenei sa fa’atautaia mai e tusa o le fa’aiuga i le vaiaso na muamua atu i le vaiaso na te’a nei, e pei ona molimauina mai e nai aiga o lo’o alaala tonu ai e soso’o ma lea fanua ua elia atoa ona atumauga i le galuega ua mae’a faia.

Ua mae’a ona fa’afeso’ota’ia matagaluega e ao ina maua mai ai se tali, i se pemita e fa’ataga ai le galuega, peita’i ua fa’ailoa mai e sui e tatau ona silafia lea galuega ua faatino, “E leai matou te le o iloa se galuega o faia i Pago Pago i le taimi nei, ae maise i eleele maualuluga na o le afio’aga.” O matagaluega na fa’afeso’ota’ia o le Matagaluega o Fefa’atauaiga ma le matagaluega o Galuega Lautele a le Malo.

Ua faauia fo’i ni fa’afesili i le pule sili o le Kamupani a le Paramount Builders, lea e fa’atautaia e Papali’itele Lauli’i Alofa, pe o ai na fa’atonuina lea galuega ina ia amata ona sua, ae le’i i ai se pemita ua mae’a faia e fa’ataga ai ona sua le eleele.

Peita’i e oo mai i lenei taimi, e le’i maua mai se tali o fe’au fa’anatinati o feso’ota’iga tau emeli mai le pule sili o le Paramount Builders lea latou te suaina le eleele i na atumauga.

AOFAI TAGATA UA A’AFIA COVID-19 6,353 

Ua fa’ailoa i le lipoti a le Matgaluega o le Soifua Maloloina e to’a 72 nisi sui fou ua fa’amaonia a latou suega o le Covid-19, o lo’o i o latou tino le verusi o le Covid-19. Mai ia Iuni 13- 19, 2022 na faia ai suega a le to’a 3,150 tagata, peita’i ua fa’amaonia ai e le to’a 72 sui suega covid.

O lea ua toe siitia mai ai le faitauga o tagata ua maua i le Covid-19 i le teritori i le to’a 6,353 tagata talu mai lava ona faitauina i latou e fa’amaonia nei suega a le Covid-19 ia Fepuari 21, 2022.

Ua fa’ailoa mai e le DOH i le taimi nei talu mai lea aso 19 Iuni, 2022 ua toe 102 le aofai o tagata o lo’o i ai pea le verusi o le Covid-19 i o latou tino ina ua mae’a kilia le to’a 6,251 o i latou uma sa maua i le Covid-19. Peita’i ua tumau pea lava le 31 le faitauga o i latou ua maliliu ina ua fa’aopoopo atu le Covid-19 i o latou gasegase tumau sa i ai.

Ua fa’ailoa mai e se tasi o lo’o ua i ai i le nofoaga o faia ai suega a le Covid-19 i le falema’i i Tafuna, ua ia fa’ailoa mai, “Ua va’aia le si’itia o le faitauga o i latou ua maua mai suega ua fa’amaonia ina ua mae’a le pisi tele o tagata i fa’au’uga na fa’atautaia nei.”

“Ua iloga mai i le tele o nei mafutaga, ua to’atele e le’i usita’ia le faia o pupuni fofoga ma nonofo fa’avava mai le tasi o la’ua soso’o. O lea fo’i la ua soso’o mai ma le toe oso i luga o le faitauga o tagata ua a’afia.” O se toe fa’amatalaga lea mai lea sui faigaluega a le DOH. O le aofai o taata o lo’o ua maua i Manu’a e to’a 80ma e toe to’atasi lava le sui lea e i ai pea le verusi covid-19 i lona tino.