TALA I VAIFANUA

Pago Pago - AMERIKA SAMOA

105 FA’AI’UASO LAUMUA O LE VIKINGS - 3 TOGISILIA I LE VASEGA:

O le aso Faraile o le vaiaso na te’a sa fa’ai’u ai le laina o fa’au’uga o A’oga Maualuluga a le Malo i le Laumua o le Fetu i Sasa’e, poo le Vikings. Ua taula fo’i le folauga i lenei tausaga, ma ua fa’ailoa mai e 105 latou fanau ua ausia togi e fa’au’u ai ma latou Tipiloma, ae to’atolu togisilia i le latou vasega fa’aiuaso o lenei tausaga a’oga 2022.

O i latou nei ua na’o tama’ita’i lava: Eleanor A. Akeli, Apotala T. Su’a ma Apu Visa Taufuiava. O le tamaitai fo’i iua mauaina le tulaga lua i le vasega fa’aiuaso o Ruth P. Satele.

Mai le Polokalama na fa’asolo mo le sauniga mamalu o le fa’au’uga na tofia ai le susuga le Faife’au Rev, Feagaiga Misi e fofogaina le tatalo si’itia i le Atua ona o le tausaga aoga atoa ua mae’a, ae o tumau pea le agalelei ma le alofa o le Atua i le Laumua ae maise i le vasega fa’ai’uaso o le talia nei o latou faailoga ma avea o tama ma teine tuai o le Laumua i Fagaitua.

O le susuga le Pule A’oga sa avea ma fofoga taumolimoli o le Laumua e lauga fa’afeiloa’i mai i le mamalu o malo fa’aaloalogaia na vala’aulia fa’apitoa e auai mo le sauniga mamalu, fa’apea fo’i le vasega o matua ma aiga ua poto i le Faleta’alo o Faga’itua ina ia molimauina le aso fa’apitoa o le fanau fa’au’u. Le vasega o matua fa’aleagaga ma e uma ua aofia ae tainane fo’i le vasega o faia’oga ma faufautua i le a’oga maualuga ma le vasega fitoitonu i ai le aso.

O Suaese Pooch Ta’ase sa ia fa’alauiloa mai le fofoga o le aso, le afioga le Kovana Sili lea sa ia auiliilia le aoga o le fe’au o lo ua mae’a lomia, e avea ma auau o le vasega fa’ai’uaso i lo latou tausaga “Auauna nei, Ta’ita’i Taeao!”

“O lenei fa’aupuga, ua tali tutusa lelei uiga ma le isi  alagaupu a le atunuu, “O le Ala i le Pule, o le Tautua” o lona uiga e te “Tautua nei, ae Pule taeao!” O le agaga tonu lava lea o le tatou aganuu, ia e le tafao tafao lava i so’o se mea e sau e pule, ae leiloa e oe ona fa’auia se tautua mo lou aiga, lou nu’u ma lou malo.”

“E tele ituaiga o tautua, tautua Upu, Tautua toto, tautua tuavae, tautua lava i galuega masani mai ai a’o talavou, ua a’otau ai i totonu o lotoifale o aiga, e fa’asaga e tua ma le tunoa, ae le tausiga o le faletele. O le tofia e aiga o se tasi e avea ma Ta’ita’i poo le Matai, ua iloa lelei e le aiga ua tonu se latou tofiga o le sui ona o lana tautua ua mae’a fa’atino. O le ala i le pule o le tautua!”

“O lea mea moni, o oe o le ta’ita’i lelei o lou aiga pe afai sa e soifua tautua mai ma iloa lelei lou tiute i le fa’asologa mai o lou soifua faatasi ma aiga. Ua silafia lelei fo’i e lou aiga ou uiga ma ala e te tautua ai, afai fo’i e tofia ai oe, ua latou iloa lelei lou loto ma lau tautua au, ua ala ai ona e pale i tofiga o aiga ona o lau tautua.”

“Toa o le Vasa, o oe o tautai i folauga sousou pe malu. Afai e sousou le tai, ua iloga ai lou agava’a fa’atautai o le vasa! Ua mae’a tapena outou mo le vasa lena, tu i luga ma tautua! Fai ou faiva ua e agava’a ai, e te toe fo’i mai, ma e tautua lelei, e i’u lava ina e pale i le pale o ta’ita’i o lou aiga, o lau ekalesia ma lou malo.”

Na mua’i fa’alauiloa mai le tulaga lua i le vasega fa’aiuaso, Ruth Satele i lona togi 3.994 GPA, ona soso’o lea ma sui tamaitai e to’atolu ua tulaga tutusa i a latou GPA 4.0 Eleanor Akeli; Apotala T. Su’a ma Apu Visa Taufuiava.

O Suaese Pooch Ta’ase fo’i sa ia fa’ailoa atu i le susuga le Fa’atonu o Aoga le to’a 105 o le fanau faai’uaso i le aoga maualuga i Fagaitua ua mae’a pasia e i latou uma togi e agava’a ai e talia o latou fa’ailoga Tipiloma o le faailo ua ausia togi e pasi ai e tusa ma aiaiga tau aoga maualuluga i le teritori o Amerika Samoa.

Na talia ma taualoa e le faatonu o a’oga, Talauega Dr. Samasoni Asaeli lea tiute toina mo ia e ala i lona tofi fa’atonu o aoga, ma ia fa’alauiloa o le vasega fa’aiuaso 105 le fanau fa’au’u ua tamau e taua’aoina atu o latou fa’ailoga Tipiloma i lea aso.

Na tufatufaina fa’ailoga ona tula’i lea o Dr Robin Faumuina-Vasai na toe fa’alauiloa maia fa’ailoga sikolasipi a le Malo u fa’amanuiaina ai le Laumua i Fagaitua ma usuina ai loa le pese fa’ai’u o le sauniga ae tatala mai le susuga Rev. Feagaiga Misi.

E tolu fa’ailoga na taua’aoina mo le vasega fa’aiuaso mai Fagaitua o sui ma ausia agava’a uma mo sikolasipi a le Malo Amerika Samoa. Faith Bohanak, Saipale Fuimaono ma le tasi o sui e maua le sikolasipi e fa’aauau ai aoa’oga i le ASCC.

Mo isi fa’ailoga Sikolasipi na saunia e le PTA a Fagaitua ua faailoa mai ai:  Fa’ailoga ta’i $500: Lautogia ai: Noeani Vele, Laula’au Leuta, Faith Bohanak, Easter Florence Tofaeono, Jeff Maumaga Tao. O sui ua maua sikolasipi a le Seaula: Eleanor Akeli,Apotala Tupe Su’a, Tuaoloina Ta’ase ma Leutogitupaitea Toala. O sikolasipi saunia Elaine Giblin Tuatoo: Apu Visa Taufuiava ma Analiz Fiaavae Silila. Sikolasipi sauniga Dr.Vaiula Tuatoo ua maua lea e Francis Mataio. Sikolasipi sa saunia e Marylona & Wilma Parter ua maua lea e Rose Chrysanthium Sevaetoi Tuu.

Le sikolasipi na saunia e “Le Fetuao Samoan Language Center na maua lea e Meli Suesue Ofagalilo. O le Sikolasipi a Jake Poyer ua maua lea e Tiva Sootaga. O le sikolasipi fou lea na saunia e le aiga pele o Capt. Mike Tipoti ua maua lea e Ruth Sateletulaga lua o le vasega fa’ai’uaso. O le sikolasipi na saunia e le STEM na tapena e Chung Sing ua mauaina le e Silika Tulafono.

AUAI LOIA SILI FONO MATAUPU TAU FALETUPE

O le malaga a le va’alele Hawaiian Air i le vaiaso ua te’a, lea na malaga ese atu ai le tatou Loia Sili Fainuulelei F. Ala’ilima-Utu mo le fa’amoemoe e auai i le Laumua i DC mo fonotaga taua lava e fa’ailoa manino ai le tulaga o faletupe i totonu o le teritori nei.

O le Ofisa o le susuga Papali’i David Cohen i DC lea sa mafai ona mua’i mafuta i ai lea fonotaga taua ma isi sui fo’i sa auai o le fa’atonu o State Small Business Credit Initiative Robert Ho Chee, ia Iuni 15 & 16, 2022, e taumafai ona galulue ma fetufa’i ai le aumalaga ma i latou e tusa o le tatou mana’oga tupito tau faletupe.

E i ai isi fonotaga sa fa’atautaia ma sui iloga o le Konekeresi ina ia fa’ailoa ma fa’ao’o atu nisi o atugaluga lava o Kovana Lemanu Mauga, ona o a’afiaga o le atunuu pe afai o le a le i ai se faletupe e Inisiua e le FDIC i le atunuu. O le tula’i ese atu o le ANZ Guam American Samoa, o le a mautinoa ai ua leai se faletupe e inisua e le FDIC i le atunuu, ae mae’a le tautua a le ANZ ia Setema 30, 2022.

Ua faailoa fo’i e le tatou Faipule i le Konekeresi, “O le faao’o atu ai o lea malaga i le Laumua o se mea lelei tele. Ua iloga le naunau o le tatou ta’ita’i ina ia fa’aleleia atili le tulaga o faletupe i le teritori. O se la’asaga lelei ma ua tatau ona faia, aua e tatau ona mautu lelei galuega tau teugatupe a le atunuu, ina ia mautu ma mautinoa e tagata lautele ma le aufaipisinisi fo’i, o lo’o lelei tautuaina a latou teuga’oa.”

Sa ia faafetaia fo’i le sao o le susuga le Loia Sili Fainuulelei Falefatu aua o lea ua tula’i ma saili atu i le Laumua ni vaifofo lelei ma le mautu mo tatou faletupe ia mautu lelei ana tautua i le atunuu.

O le aso Lulu na oo atu ai le aumalaga ma le Pule o le Aufaigaluega a le Ofisa o le tatou Faipule i le Laumua, i le ofisa o Taitaifono a le Senate i Mataupu Tau Teritori, le susuga a Joe Manchin mo se latou fonotaga aoga tele ma ua fa’ailoa mai o le a latou aiaia se mataupu e talanoaina nei i le fonotaga o soso’o mai ina ia mataituina ai le tulaga o faletupe ma tulafono uma e a’afia ai ma le inisiua a le FDIC ma e ono maua ai se faletupe e fia tautuaina Amerika Samoa.

Ua mae’a foi ona fono le aumalaga ma le sui o le Komiti o Faletupe a le Konekeresi ma le sui o le Initeria Nikolao Pula.