TALA I VAIFANUA

Pago Pago - AMERIKA SAMOA

248 FANAU FA’AU’U MAI LAUMUA O LE TOA - 5 TAMAITAI TOGISILIA

Ua a’e manuia le fa’atautaiga, ua sili ona to’atele le aofai o le fanau fa’au’u mai le Laumua o le Toa i lenei tausaga, ua silia fo’i le aofai o Sikolasipi ua latou maua mai le Malo Amerika Samoa, e to’alima fo’i le fanau ua togisilia ma latou GPA 4.0, ae to’atasi lava le tulaga lua i lana GPA e 3.994.

O le to’alima o tamaitai ua togisilia e to’afa i latou sa auai i le latou aso fa’au’u, Filomena Afioa’e, Matavai Auapa’au, Latoria  Lafua ma Elzira Noga, peita’i o le tamaitai e to’alima ai i latou, sa malaga o ia i fafo e auai i le Tauvaga a le HOSA, sa manumalo ai i le teritori mo lona avanoa lea e fa’aalia ai lana galuega fa’atino fa’afoma’i, MarianiveTau’ave.

O le sui ua ia mauaina le tulaga lua i le vasega fa’ai’uaso o William Spitzenberg ll.

Ole to’asefulu na lautogia e maualuluga ai o latou togi i le vasega fa’ai’uaso ua fa’alauiloa mai ai le tulaga 3: Liualevaiosina Chloe Leiato, tulaga 4 e to’alua i la’ua o Uaea Sialega ma Kristina Timoteo; tulaga 5 o Fa’afofola Fa’aita; tulaga 6 o Anthony  Savaiianaea ma Diana Siaosi; tulaga 7 o Letoe’e - Lillyann Launiu; tulaga 8 o Karoline Ilimaleota; tulaga 9 o Moeva Fiu ma le tulaga 10 o Michael Iosefo.

O le sauniga o le fa’au’uga sa tula’i ai le susuga le Fa’afeagaiga Metotisi mai Nuuuli, Rev.Sailia’i Tuma’ai ma ia ta’ita’ia le sauniga i se upu fa’amalosi mo le vasega fa’ai’uaso mai le Tusi Pa’ia, Ioane 21-9,10: “Ua latou tuta, ona iloa lea o le afi malala…Aumaia nisi i’a ua outou maua nei…o le aotelega o le faiva ua lau selau, limagalau ma le tolunalau, 153 ua i ai i le upega, ae le’i masae le upega.”

Ua fa’ailoa manino i lea mataupu ma fuaiupu o le Talalelei na tusia e Ioane, le faiva o e tapua’ia le faiva pe a alu le faiva, e nofo tapua’i ma tapena le mea tausami e tatalia ai le faiva, ua a’e manuia mai le fa’atautaiga, ua atoa i’a i le upega, ae le’i masae le upega. Ua sagisagi fiaifa le tapua’iga a matua ma aiga, o tautai sa latou fa’atautaia le fa’atautaiga i Faia’oga ma le Laumua, lea ua silamio ma le fiafia aua ua a’e manumalo faiva i le tai loloto o le sailiga o le atamai ma le poto lautele. O i’a o le fa’atautaiga ua tulaga maoa’e i le atunuu 248 i latou i lenei tausaga. E le’i masae le Upega, ua atoa i’a i le fafao.”

“Ua outou tofu pulou, o manu ua faia e le Atua, lo’u agaga e, ia e fa’amanu atu ia Ieova, aua fo’i nei galo se mea e tasi o ana meaalofa. Ia momoli lava lapalapa o malo i lea ona mea uma lava! Ia e fiafia lava oe ia Ieova ona foa’iina lea e Ia ia te oe, o mea e mana’o i ai lou loto.”

O le tima’iga a Kovana Lemanu P.S. Mauga, “Pe afai e le o e va’aia se avanoa lelei mo oe, mautinoa taumafai e saili le avanoa. Ia mafai ona e tutua’ai i avanoa ua e maua ma fa’aaoga tatau. Ua amata i le taimi nei lau savaliga ua na’o o oe, e te faia lau filifiliga ma au lava fa’ai’uga. O lau savaliga e fa’aaoga i ai lou fa’alogo ma usita’i e taumafai atili ia maua lou fa’amoemoe. Ia e tumau i lou fa’amoemoe aua o oe e to’atele e te fa’atinoa ni fua o lau taumafaiga. Aua le fiu, aua le solomuli, ua ia te oe le malosi’aga e mo’omia mo lau taumafaiga.”

“Fa’ataoto 9:10 O mea uma ua e iloa e ao ina fai, ina faia ia ma lou malosi,”  O se toe fa’amalosi lea a Kovana Lemanu i le vasega fa’ai’uaso. 

Mai fa’ailoga fa’apitoa na tapena e le PTA ua mautu ai le togisilia i le SAT 1300, ma le ACT 30, i le a’oga maualuga a Tafuna na avea lea e Elzira Kakei-Fuilima Noga i le 30 togi na ia maua.

Fa’ailoga faasikolasipi sa taua’aoina mo fanau e ulufale i le Kolisi Tuufa’atasi Amerika Samoa mai le PTA ua maua lea e Marianive Tauave ma Karoline Ilimaleota. Fa’ailoga sikolasipi mai le PTA Tafuna High mo fanau e sailiga fa’ailoga i Iunivesite i fafo ua maua lea e Liualevaiosina Le’iato ma Elzira Noga.

O le fa’ailoga na saunoa e le PIOA Consulting mo se Sui o le Vasega e fa’amoemoe e tausailia tusi pasi maualuluga mo le fa’a-Inisinia ma Tekonolosi fa’aonaponei ua maua lea e William Spitzenberg ll. O le fa’ailoga Sikolasipi na saunia e le Auaiga Loi-On ua maua lea e Matavai Auapa’au ma Dora Matila.

Sikolasipi ua saunia e le Tongan Market Coporation ua maua lea e Maika Tatofi. Fa’ailoga na tapena e le Warrior Football ua maua ai le fa’ailoga o le Varsity Champions ma ua lua ai lenei o tausaga o tumau pea ia i latou le Siamupini o le Fa’agatama lea i le teritori. Ua maua fo’i e le ‘au Football a le Laumua o le Toa le Jr Varsity le siamupini o lenei tausaga a’oga 2021-2022.

E le gata i lena ae ua maua e le au malosi a Tafuna le Siamupini o le Varsity Volley Ball 2021-2022 a Ali’i  ma le Siamupini a le Jr Varsity Boys Volleyball Champions.

O le Faia’oga filifilia mo le tausaga nei ua filifilia ai le tamaitai faia’oga o Pearl Mendoza ma le Faia’oga o le Tausaga ua filifilia ai Christian Sa’alea, ma o ia lea o le a malaga fo’i e asiasi i le Laumua ma fa’afeiloaia le afioga le Peresetene o le Malo tele.

I latou ua maua avanoa fa’asikolasipi mai le Malo o Amerika Samoa e to’a 17 i latou, e to’a 7 e ao’oga i Iunivesite ma Kolisi i fafo: El;zira Noga, Marianive Tau’ave, William Spitzenberg ll, Liualevaiosina Chloe Leiato, Kristina Timoteo, Yvonne Collins, Hana Kuaea. 

E to’a 10 e a’o’oga e sailia fa’ailoga maualuluga i le tatou Kolisi Tuufa’atasi: Filomena Afioa’e, Matavai Auapa’au, Matavai Auapa’au, Latoria Lafua, Michael Iosefo, Maea Fepulea’i, Centennial Wulf, Grace-Marie Wanjau, Alofamoni Galoia, Naleigh Hudson ma Manea Smith.

TAOFIA SAILIGA MO NIUTEA JR. LAULU,  LE MAUA LONA TINO - OGASAMI LE’ALA

Ua tapunia aloa’ia le sailiga na fa’atino e Leoleo tiute fa’apea le EMS sa fa’anofoia fale’ie na fa’atutu i lumafale o le maota o Ma’aelopa Bob Tuiasosopo i Le’ala, ina ua ausia le 72 itula talu ona tausailia le tino o lea talavou, sa tafea atu a’o ta’e’ele i lea ogasami sousou.

O le atali’i o Niutea Jr Laulu o Vailoa, 22 tausaga le matua, na leiloa lona tino a’o ta’e’ele ma se tasi o ona tausoga i lea ogasami a’ave tele ona galu, ao sousou fo’i le tai i le aso Faraile ua te’a.

Na tau fai tafea uma i la’ua e to’alua i le taimi na ta’e’ele ai ina ua taia i la’ua i se galu tele, i le afiafi o le aso Faraile ua te’a. O le itula tonu fo’i lea ua fa’amae’a ai sailiga a le Matagaluega o le Puipuiga o le Saogalemu Lautele i le aso Gafua na te’a nei, ae le’i toe maua lava lona tino. O lo’o sao mai nei lona tausoga sa la’ua ta’e’ele.

I le fa’amatalaga a si ona tina, Muavae Laulu, “Sa nofo i le fale ma si ona tama, a’o a’u ma le isi vaega o le fanau sa o i le ‘aiga na faia i Tafuna mo se tasi o matou aiga na fa’au’u fo’i, O lona uso la’ititi lea na fa’au’u mai Leone sa matou o, a’o ta’alo lava lana ta’aloga i le fale ma fa’amuli atu ma lona tama.”

“E le’i i ai se fa’ali’ali’a o la’u toe va’aiga lea i si a’u tama, ae fa’ate’ia fo’i le loto, ina ua logotala i le fa’alavelave ua toe tausailia mai ai nei lona tino,” se tala fa’anoanoa lea a le tina. “O Niutea Jr Laulu ua fai lona to’alua, lea o lo’o tiga fa’atasi ma i matou uma.”

Na amata mai le sailiga ma fa’aaogaina va’a o le Marine Patrol a le DPS ae na iloga le faigata tele ona fa’afoea le sailiga ona o le malolosi tele o galu i lea ogasami i Le’ala.

I nai toe itula sa totoe ae oo atu le asiasiga a le Faipule o Amerika Samoa i le Konekeresi Uifa’atali Aumua Amata ma ia fesilgia po’o a mai le taumafaiga ma le sailiga i le tai.

O le susuga Cliff O’Brien sa ia fa’afeiloa’ia lana afioga Uifa’atali Amata ma ia fa’ailoa, “O le taimi nei, ua fo’ifua lava le taumafaiga talu mai ona amatalia i le aso Faraile na amata mai ai.”

Ina ua fesiligia pe le’i toe va’aia lava le tino o NJ talu mai ona tafea atu, ae fa’ailoa mai sa toe va’aia tasi lava. “Na toe va’aia tasi lona tino ua toe tafea mai i uta i le vai papa le la e pei o se ava, peita’i o le taimi lea ua matua luluti mai galu malolosi ma ua le mafai ai ona fa’ao’o atu se taumafaiga e toe aumaia ai lona tino. Ina ua toe matu atu galu malolosi na ma lona tino, e le’i toe va’aia ai lava.”

O se fa’amatalaga aloa’ia lea a O’Brien na saunoa i ai i le la’ua talanoaga ma le afioga le Faipule i le Konekeresi i le afiafi o le aso Gafua, ma ua amata fo’i ona tapena a latou mea uma ina ua atoa le 72 itula o tausailia lava le tino o Niutea Jr Laulu.

Mai le sailiga ale ‘au maulu, sa maua mai se’evae tosotoso ma sa mafai ona fa’ailoa ai e le to’alua o Niutea Jr. o se’evae ia o si ona to’alua pele.

TUFATUFAINA ATU LE VAEAG #13 O SIAKI O LAFOGA IUNI 22

O Iuni 22, 2022 ua toe fa’aalu atu ai le vaega lona 13 o lafoga totogi a le mamalu o tagata faigaluega i le atunuu sa faila latou lafoga ia Mati 10 se’ia oo ia Mati 16, 2022.

Ua fa’ailoa mai e 570 i latou o le a taua’aoina atu latou siaki o lafoga ma ua atoa ai le $1.9miliona ua fa’aaluina ai i lea fo’i vaega o siaki lafoga.

O lo ua fa’aaluina le $1.4miliona o siaki lafoga a le fanau ma le $437,356. i siaki lafoga tagata faigaluega ta’ito’atasi. O le tele o nei siaki e 480 o le a fa’auia i le falemeli, peita’i o le 52 e taua’aoina mai le fa’amalama o tautua a le Ofisa o le Disbursing o le Malo, ma le isi vaega e 38 ua fa’auia sa’o i latou teugatupe.

Mo i latou sa faila a latou lafoga i lea vaitau, ae le o maua ni a latou siaki, ua taosagaina ia ina latou vala’au mai i le telefoni a le Ofisa o Lafoga ina ia mautinoa ua silafia pe aisea ua fa’aletonu ai ona maua lau siaki lafoga. Pe afai e te susu ane e piki lau siaki pe siaki lau pusa meli ia manatua e tutu fa’avava ma ia faia lau pupuni fofoga i taimi uma.