78 FANAU FAAI’UASO AOGA MAUALUGA MATATA ESEESE I NUUULI

Pago Pago - AMERIKA SAMOA

Mai le a’oga maualuga Matata Eseese i Nuuuli ua fa’au’u mai ai le to’a 78 o i latou na tausailia ai latou fa’ailoga tipiloma i matata ua agava’a e fa’aauau ai a’oa’oga mo fa’ailoga maualuluga, pe ua manatu fo’i e sailia ai se lumana’i e ala i galuega ua a’otauina ai.

O le aso Lua na te’a nei sa faia ai le latou fa’auuga i le latou faletaalo fou, lea ua fa’ato’a lua tausaga talu ona fa’aaogaina mo latou fa’au’uga. O le afioga le Sui Kovana sa avea ma fofoga taumolimoli o le Malo e fa’amalosi’au i le fanau talavou, ina ia “Loto mau, ia loto Toa ma lau Amio ia atoatoa!” O le sini fo’i lea ua lomia o se auau o le latou aso fa’ailogaina.

“Ua mae’a taoso outou i faiva ua outou fiafia ma agava’a e tausailia ai le lumana’i, pe fa’aauau ai sailiga mo tusi pasi maualuluga, tau ina ia outou iloa, ua mae’a ai le faiva o faia’oga iinei, ma matua fo’i, ae o le aga’i i luma o le a faia e oe lau filifiliga ma au fa’ai’uga i le ala e te uia. O se mea e mautu ai le outou sini ua mae’a tusia, ia loto mau i lau taumafaiga. Ia toa lou loto ia maua le sini sa e fa’ananau i ai, O lau amio fo’i ia lelei ona atoatoa.”

“Ua mautinoa ua mae’a lu’ia fo’i outou ma outou fa’amoemoe e le Covid-19, ae ua iloga mai, e le o fa’avaivai ai outou ma o se mea sili lea ua mafai ona fa’atino mai e le malo ma le matagaluega o aoga le latou vaega, ae ua outou tumau ma fa’atino i le atoatoa.”

“Fa’amalo la’ia ia te outou ma nai o outou matua ma aiga, ae maise fo’i o le aufaigaluega a le Malo ma le matagaluega o a’oga, sa outou pale feagai ma tausaili fa’atasi se ‘ai o le aso.” 

“Na vave lava ona manatu i ma’ua ma le Kovana ina ia fa’apu’upu’uina le vaitau e fa’aaogaina ai a’oa’oga vavamamao ae fa’atino i ala fa’ata’alise fa’atafa’ilagi, aua ua va’aia na amata mai o tau fa’amasani i ai outou le fanau, ae ina ua mae’a le masina e tasi o le tatou fa’anofoesea i aiga ma fa’atautaia mai ai a’oa’oga, ua ese le tele o taimi ua fa’aaogaina i luga o le facebook ae ua le toe tele i meaaoga ma suesuega.”

“O se mea e le mafai ona toe tafiesea, aua ua faigofie tele ona feso’ota’i ma nisi lava e mamao mai ia te’i latou, ma ua agaga outou ina ia faifaipea, ae ua galo le sini, o meaa’oga ia mautu ma lelei. O le ala lea o le toe suia o tatou apefoe ma toe fa’afo’i outou mo sina taimi i potu a’oga, ae ua tulata lava ina mae’a le tausaga aoga lenei.” O se vaega lea o le fe’au fa’amalosi’au na fofoga i ai le sui Kovana i lana folasaga i le fanau fa’au’u.

“E manatu e tatau ona umi lava se lisi o nisi e tatau ona tou fa’afetaia i le aso, ua le gata  le fa’afetai a le Malo ia te outou le vasega fa’ai’uaso, ae ua soso’o atu foi ma le fa’afetai i le vasega o faia’oga uma lava. Aua ua le a’otauina na’o outou i le aoaoga fa’ata’alise vavamamao i upega tafa’ilagi, ae ua o gatusa ai  ma nai faia’oga. Malo le tauata’i, o a ni fua ua tatou maua i lenei tausaga a’oga, tatou aeae nei manu ua ulu.” Fa’afetai le galulue ma le loto i fanau a le atunuu ina ia popoto ma atamamai aua le lumana’i o si tatou malo.”

Ina ua mae’a le saunoga mamalu ma le fa’afetai fo’i a Lutena Kovana Talauega Eleasalo Ale, sa nafa loa tama’ita’i faufautua a le Vasega Fa’ai’uaso, Agamalu Fuimaono Tauese ma le tolaulauina fa’apitoa o le togisilia ma le tulaga lua o le vasega fa’aiuaso. 

O le tamitai ua avea lenei tausaga o le A’oga Matata Eseese na tula’i mai ai Celestral Tuiloli, o le alo tamaitai o le Epikopo LDS i Mapusaga Fou.O lo’o ia tau’avea le matata o le Tusiata Fale ma o le lona 6 i le fanau e to’aiva a nai ona matua o Falao Gaga ma Segia Tuiloli o Mapusaga Fou. O lo’o fa’au’u fo’i Celestral ma togi maualuluga i ana mataupu uma sa tauavea i le a’oga.

O le tamaitai ua avea le tulaga lua o le 2021-2022 o Leilani Togi mai Tafeta ma Aoloau. O se tasi sa mua’i aoaoina mai le Pavaivai Elementary School ma e le’i i ai o ia i lenei tausaga i lona fa’au’uga. Sa maimoaina mai e ia le sauniga atoa i luga o le televise a’o tapena e taliu mai i Hawaii. Sa tu’ua e ia le atunuu ona o le fa’atasiga fa’atauva a le HOSA sa agavaa e malaga ai. O lo’o fa’au’u ma togi maualuluga i ana mataupu sa tauavea.

E to’alua sui o lo ua maua agava’a uma e mafai ai ona fa’amautu sikolasipi mai le Malo o Amerika Samoa. O le susuga Taetuli Julius Laulu mo lana Iunivesite e a’otau ai i fafo ma le susuga Aitofi Levu lll lea ua filifili o le a a’e i le ASCC i le tausaga a’oga fou, e fa’amautu ai ana taumafaiga i le Architect ma le Engineering.

O isi fa’ailoga na tapena e le PTA ua fa’amautu mai ai le Sui ta’alo lelei o le tausaga ua maua e Peko Leasiolagi mo ali’i. O le itupa o tamaitai ua maua ai le fa’ailoga mo le tamaitai ta’alo lelei o le tausaga ua maua e Jaelene Isilei. Tama sili lana ta’alo i so’o se fa’agatama i le tausaga atoa ua maua e Leo Togia ae o le tamaitai ua maua lea e Annalisha Solo.

O le fa’ailoga mo le taitai agava’a o le tausaga ua maua lea e Isaac Alosio, ae o le tamaitai ta’ita’i lelei ua maua e Marissah Ioane. O le sui faufautua fo’i mo le vasega fa’au’u i lenei tausaga ua filifilia ai Marissah Ioane mo lea fa’ailoga taua.

O le fa’ailoga a le Culinary Art ua maua lea e Salevai Misi ae o le fa’ailoga a le Pacific Enterprise Scholarship ua maua lea e Leilani Togi. O le fa’ailoga ale Rotary Club mo le Vaega fa’aiuaso a le Matata Eseese ua maua lea e Leroy Tupa’u.

Fa’ailoga a le USArmy na maua lea e Albert Mailo, Gloria Malauulu, Joseph Solopa, Archillies Sosoli, Leaniva Tolise, Sunia Sinisa ma Blessings Suatia. Fa’ailoga a le Matata Eseese i lenei tausaga ua maua lea e Ryan Boria, ae o le tamaitai ua agava’a i le Matata Eseese o lenei tausaga a’oga ua maua lea e Leaniva Tolise. O le fa’ailoga o le togisilia i le SAT ua maua e Taetuli Julus Laulu ma le tulaga lua i le SAT i togi na maua o Aifoi Levu lll.

Sa tofusia le fanau ma tusi fa’amau fa’ailoga o le latou taumafai ua i’u mai le A’oga Maualuga o Matata Eseese mai lana afioga le Faipule i le Konekeresi, UIfa’atali Aumua Amata.