Fesiligia faaiuga ua toe faa faigaluega ai Leoleo e to’alua o lo o molia i le faaoolima

Pago Pago - AMERIKA SAMOA

O le faaiuga ua faia e le Matagaluega o Leoleo e toe galulue ai Leoleo e to’alua o lo o tu’uaia faatasi ma isi Leoleo e to’alua, i le mataupu lea na manu’a tigaina ai se ali’i i le masina o Me o le tausaga na te’a nei, ua fesiligia e le to’atele o tagata e aofia ai fo’i ma isi Leoleo Sinia i totonu o le Matagaluega.

O Leoleo e to’alua o loo fesiligia i lea tulaga e aofia ai le Tamaitai Leoleo Kapeteni ia Capt. Margie Alofaituli, ma le alii Leoleo ia Elleryquinn Histake.

O Alofaituli ma Histake, e to’afa i ai Leoleo, na taofia faapagota i le Toese ma molia i lo latou aafia i le faalavelave lea na manu’a tigaina ai le susuga a Sitope Faalata i le masina o Me o le tausaga e 2021.

O isi alii Leoleo e to’alua e aofia ai Off. Dustin Maiava ma Off. Faau Levi.

O le vaiaso i ona tua atu na taofia faapagota uma ai i latou nei ma molia i le Tulafono. 

O Alofaituli e $15,000 na faatulaga e tatala ai o ia i tua, o Histake ma Maiava e tai $20,000 na faatulaga e tatala ai i laua i tua, ma Levi e $25,000.

O le vaiaso i ona tua atu na tatala ai i tua Alofaituli ma Histake ina ua mae’a ona la totogi vaega tupe sa faatulaga e tatala ai i laua i tua.

Na taua e ni molimau i le Samoa News e faapea, o le taimi lava na tatala ai i tua Alofaituli ma Histake, na toe galulue ai loa i laua i o la tiute faa Leoleo e aunoa ma se faaletonu.

O Alofaituli na toe fo’i atu ma galuega o se Taitai Uati e pei ona galue muamua ai ao le i tula’i mai le mataupu e pei ona molia ai o ia, ae o Histake ua toe fo’i atu i lana galuega o se tasi o Leoleo e vaaia ma puipuia le saogalemu lautele i luga o le alatele.

Na taua e nisi o Leoleo Sinia i totonu o le Matagaluega o Leoleo e faapea, e le sa’o ma talafeagai le faaiuga ua faia e le Matagaluega e toe galulue ai Leoleo e to’alua ua aafia i le tulafono.

Na taua e se tasi o Leoleo e faapea, e i ai Leoleo na molia i le solitulafoo mama o le ave ta’avale ‘ona, ae na faia le faaiuga a le Matagaluega e le tatau ona toe faigaluega sei vagana ua mae’a le faaiuga o lana mataupu.

“Afai sa mafai ona faia lea faaiuga i le Leoleo na molia i le ave ta’avale ‘ona, o se solitulafono mamafa, aisea la ua le mafai ai ona apalai fo’i lea faaiuga i Leoleo e to’alua ia ua toe valaauina i le galuega, ae o lo o molia i solitulafono mamafa,” o le fesili lea a se tasi o Leoleo Sinia.

Na lagolagoina e se tasi o Leoleo le finagalo o le isi Leoleo sinia. Sa ia taua e faapea, ua tele faasea ma tu’uaiga a le atunu’u lautele faasaga i Leoleo ma le latou auaunaga, e mafua mai i amiooga le taupulea o loo faia e nisi o Leoleo.

“I lo’u lava taofi, o Leoleo nei ua aafia i le tulafono, e le tatau ona toe galulue i latou, e le tatau foi ona toe avea o ni Leoleo. E le gata ua latou le usitaia le tautoga ma le tulafono, ae ua atagia mai foi i a latou gaioiga lo latou le manatu mamafa i le faatinoina o latou tiute faa Leoleo,” o le finagalo lea o se tasi o Leoleo.

Sa ia taua e faapea, e ui lava e le i faamaonia tu’uaiga faasaga I ia Leoleo e to’afa ua molia, ae ua ata mai i mau faamaonia na mafai ona tauaao e Leoleo i le taimi na mae’a ai le faalavelvae, ua lava ma totoe ia mau faamaonia e faailoa mai ai le matuia o gaioiga sa faia

Na taua e se tasi o Leoleo ua malolo litaea i le mae’a ai o le silia i le 25 tausaga o lana tautua i le Matagaluega o Leoleo e faapea, e le tatau lava ona toe faa faigaluegaina Leoleo ua aafia i le tulafono, a e tatau ona ave a latou aso malolo e faatalitali ai se faaiuga o a latou mataupu o loo faagasolo i le taimi nei.

Na taua e le Leoleo ua malolo litaea e faapea, o le Leoleo ua uma ona faatauto na te faamalosia le tulafono.

“E faapefea la ona toe foi le Leoleo e faamalosi le tulafono pe afai o lea ua tu’uaia i lona soli atoa ai ma lona le usitaia o le tulafono,” o le saunoaga lea a le Leoleo ua malolo litaea.

“E ui e le i faamaonia le solitulafono, ae o mau faamaonia lea ua vavala mai ai, ua latou faatinoina lava le tulafono i o latou lava aao e aunoa ma le fesili i le Fa’amasinoga. O nei gaioiga ua atagia mai ai lo latou le manatu mamafa i le Tulafono, e le popole foi i le Tulafono.”

Na taua e le Leoleo ua malolo litaea, sa ia faitau ma le toto’a i le ripoti e faatatau i lenei mataupu, atoa ai ma gaioiga sa faia e Leoleo uma e to’afa i le taimi o le faalavelave.

I lana vaavaai, e matua fesiligia lava le finauga a Leoleo e to’atolu na o e pu’e faapagota mai le susuga a Faalata, i lo latou faapea mai, sa tete’e Faalata i Leoleo ao latou taumafai e pu’e faapagota o ia, ae o le taimi lea o loo loka lima o Faalata.

“E faapefea ona tete’e se tagata i Leoleo ae o loo loka ona lima? o le fesili lea a le molimau.

“E pei ona ou faasoa atu, ua lava mau faamaonia ua tauaao e Leoleo e lagolago ma faamaonia ai le tagi faasaga i Leoleo nei e to’afa. Lona uiga, e le tatau ona toe i ai i latou nei i totonu o le li’o o Leoleo sei vagana ua mae’a a latou faamasinoga ona manino ai loa lea o le isi tulaga e oo i ai le mataupu. Pe faamaonia pe solofua fo’i tu’uaiga faasaga ia te i latou.”

Ina ua fesiligia e le Samoa News se faamaoniga o lenei mataupu, na faamaonia mai ai e le Sui Komesina o Leoleo ia Jerry Letuli le moni ma le faamaoni o le toe fo’i atu o Leoleo e to’alua e galulue i le Matagaluega o Leoleo.

Na faamanino e Letuli e faapea, e leai se mafuaaga e taofia ai fua Leoleo nei mai le toe foi atu i le galuega, e leai fo’i se mafua’aga e fautuaina ai fua i latou e ave ni a latou aso malolo.

O le ave o aso malolo o le tagata faigaluega, o le matafaioi ma le faaiuga lena e faatino e le tagata faigaluega, e le faamalosia e le malo poo le Ofisa o Leoleo le tulaga.

Na faamanino fo’i e Letuli e faapea, o moliga ua faila faasaga i Leoleo nei e to’afa, ua na o ni tu’uaiga lava e le i mafai ona faamaonia. I lona talitonuga, o loo tumau pea le ta’uleleia o Leoleo nei e to’afa, sei vagana ua faamaonia e le Faamasinoga a latou moliga, ona faatoa mafai lea ona ta’usala i latou i moliaga e pei ona tu’uaia ai.

Na saunoa atili fo’i le susuga a Letuli e faapea, e le fesiligia le sa’o o le faaiuga ua faia i Leoleo e to’alua e toe foi atu ai e galulue ao faagasolo ai taualumaga o a laua faamasinoga.

Sa ia faamanino atili e faapea, e le o toe faatino e Alofaituli ma Histake tiute faa Leoleo e pei ona galulue muamua ai i laua, ao lea ua tuu atu i ai galuega mama (light duty) e pei o le galulue i le Ofisa, tali le telefoni, atoa ai ma le faatinoina o isi uma tiute i totonu o le Ofisa, ae le o toe faatino e i laua nei tiute faa Leoleo i luga o le alatele.

O le vaiaso na te’a nei na tutula’i ai Leoleo uma nei e 4 i luma o le Faamasinoga Maualuga mo le latou ulua’i tula’i, ina ua latou manatu e faaagafua o latou aia tatau faaletulafono, e aua ai nei faataunuuina le ulua’i iloiloga na faatulaga e faia i luma o le Fa’amasinoga Faaitumalo.

Na teena e i latou nei tu’uaiga uma faasaga ia te i latou, ma ua faatulaga ai loa le isi iloiloga e faia i le masina o Aokuso o le tausaga nei.

O Alofaituli o loo tu’uaia i moliaga e 3 e aofia ai le faia o faamaumauga le sa’o, faia o gaioiga le sa’o faasolitulafono, atoa ai ma le tuuina atu o ni pepa sese ma le le faamaonia, o ni solitulafono mamafa o le vaega C, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000.

O alii Leoleo e to’atolu o loo molia faatasi i lenei mataupu e aofia ai Histake, Maiava ma Levi, o loo tu’uaia i latou i moliga o le faaoolima i le tulaga muamua, faapea ai ma moliaga e lua o le faia o faamaumauga le sa’o atoa ai ma le tuuina atu o faamaumauga sese i luma o le Fa’amasinoga, o ni solitulafono mamafa uma.

Talu mai le vaiaso na te’a nei na tutula’i ai i latou nei i luma o le Fa’amasinoga, e na o Alofaituli ma Histake ua tatala i tua, ae o Maiava ma Levi o loo taofia pea i le Toese sei vagana ua totogi le tupe na faatulaga e le Fa’amasinoga ona faatoa mafai lea ona tatala i laua i tua mai le Toese i Tafuna.