TALA I VAIFANUA

Pago Pago - AMERIKA SAMOA

20 FA’AU’U MAI LE VASEGA FA’AI’UASO - MANUMALO BAPTIST ACADEMY MAY 25, 2022:

E toa 20 le fanau fa’ai’uaso mai le Aoga Maualuga a le Manumalo Academy i le aso Tofi, Me 25, 2022 ma sa amatalia le sauniga fa’apitoa o le fa’au’uga i le 8:00 i le taeao i le Faleta’alo a le aoga.

I lea sauniga mamalu sa tula’i ai le susuga I le faifeau lagolago a le Aoga Maualuga ia Pastor Edmund Occena, mo le ta’ita’iga o le sauniga mamalu ina ua mae’a sisi a’e tagavai o Malo o le Iunaite Setete ma le Malo o Amerika Samoa. 

O e fo’i na vala’aulia fa’apitoa e aofia ai le afioga Mauga Tasi Asuega ma le Faletua Tai’ulagi, le sui o le Ofisa Lotoifale a le Konekeresi, Le afioga le Matua, Pulu Ae Ae Jr. fa’apea ma le fa’atonusili o aoga Talauega Samasoni Asaeli.

O le tamaitai o Letitia “Tish” Peau sa ia saunoa fa’afeiloa’ia le mamalu o malo fa’aaloalogia, matua, aiga ma uo aemaise le vasega faai’uaso.

I le saunoaga a le afioga I le Kovana Sili, na ia faapea mai ai “Ona o lo outou fa’au’uga, ua faia ai sa’u suesuega taua i le Tusi Pa’ia e tusa o le tusi o lo’o outou siitia mai ai le ‘auga o le tou fa’amoemoe i le aso. Ua ou iloa ai, o Salamo 119, o le mataupu sili lea ona umi o le Tusi Paia atoa, e vaevaeina i ona vaega e 22, e ta’i 8 fo’i fuaiupu i ona vaega taitasi nei. Peita’i e tofu ona vaega ma le autu o lo’o talanoa i ai. “Savali i le Malamalama o le Ali’i!”

“O le aso lenei o le amataga lea o lau savaliga na’o o oe, e le gata ina e savali i le malamalama o le Alii, ae ia avea oe o se malamalama o le Ali’i mo se isi o loo tausulusulu ma le iloa le ala, o se mea sili lea e mafai ona fai mo lena sui.”

“Ia fa’amumu tele lau sulu, ina ia le gata na’o oe e te savali ai, ae ua malamalama mo isi fo’i ia iloa lelei le ala. E tele ituaiga o pogisa i le ala, ae ia pei o la outou manulauti i le Laumua nei, Ia avea pea oe ma Sulu! Sulu o le Manumalo o Ieova le vi’iga sa outou saunia mo le aso, Ieova ua e Manumalo!”

“Ia saga fesoasoani le Atua Manumalo, ia te outou i le ala fita o fa’afitauli e tele, ina ia tumau e fa’amumu lau sulu, e savavali ai i lona malamalama. O maia ina o, ia mumu pea lau laumea i soo se ala e tou te ui atu ai.” 

Mai le vasega lea, e to’a 16 sikolasipi mai le Malo mo fanau a’oga i Iunivesite i fafo ua pasia mai e le Komiti Fa’afoe o Sikolasipi a le Malo, fa’apea fo’i ma le to’atolu o sikolasipi mo i latou e ulufale atu i le tatou Kolisi Tuufa’atasi i Malaeimi nei. 

E to’alima i latou ua ausia togisila i le vasega faau’u ma ua lisia mai ai suafa o: Jasmine Adrielle Mondelo; Georgina Taufailematagi Alofa; Kirsten Hailey Nunag De Lara; Kimberly Dianne Flores Mendoza ma Katherine Kim.

Na aofia I isi fa’ailoga faapitoa, le fa’ailoga mai I le Faipule I le Konekeresi, Uifaatali Aumua Amata, lea sa ausia e le tamaitai ia Katherine Kim, lea foi sa ia mauaina le fa’ailoga mai I le Rotary.  E toalima na ausia se fa’ailoga faapitoa a le JROTC.  

Ma le faailoga taua tele sa tapena mo se ta’ita’i lelei ua mataituina lona agava’a i tofiga tau ta’ita’i mataala ma le mautu o le fa’atinoga o ona tiute i taimi uma, ua taua’aoina lea i le tamaitai o Georgina T. Alofa.

TOE AMATALIA ATOATOA TAUTUA & GALUEGA AUFAIGALUEGA A LE MALO

Ua fa’ailoa mai i le fa’asalalauga fa’alaua’itele o le Fa’asa mo le Covid-19 fou lea o le a fa’agasolo ai lenei fo’i fa vaiaso, le suiga o galuega a le aufaigaluega a le Malo, lea ua toe fa’atulaga e toe amatalia e pei o le mea e masani ai ia Iuni 01, 2022.

O le a leai se tasi e toe faigaluega fa’avaitaimi  i ofisa ae galulue mai tua i aiga, e pei o mea sa matele i ai a’o fa’amamalu le fa’asa o le Covid-19, ua fa’amalosia uma ona galue i Ofisa i le 8 itula o le aso faigaluega.

Ua le gata i lea ae ua toe tatalaina fo’i nofoaga e tausia ai fanau iti e afua mai pepe se’ia paia le 7 tausaga le matutua poo Day Cares, ae o loo faigaluega matua. Toe tatala uma fo’i ma Bingos, Faletifaga, faleta’alo ma fa’amalositino, Faleoti Ulu ma Teuteu Tino.

O lona uiga o Iuni 01, 2022 ua toe sologa lelei ai mea uma e tusa o galuega a le Malo ma Kamupani eseese uma i totonu o le atunuu e pei o le mea sa i ai, ae le’i lutia le atunuu e le Covid-19 i tulaga o tautua eseese ma galuega o lo’o galulue i ai  tagata lautele o le atunuu.

Peita’i, e fautuaina pea lava le mamalu o le atunuu, ia fa’aauau ona fa’aaoga o pupuni fofoga ma ia fa’avava pea lava ona alaalata’i i nofoaga faitele aua e le’i te’a le Covid-19 mai o tatou laueleele i le taimi nei. 

I le taimi nei ua fa’ataga na’o le 50% o le to’atele e mafai ona auai, ae ua le manatu ina ia fa’atumu atoatoa nofoaga uma o lo’o fa’atasitasi i ai le atunuu e tusa o le mea sa masani ai.

Ua le toe i ai ni pisinisi ua fa’asa ona fa’atautaia ae ia amana’ia mai le limiti o lo ua fa’atagaina ona tautua i totonu o nofoaga nei e pei o fale’aiga, faletifaga, Bingo  ma Sauniga fai a Ekalesia, fa’apea fo’i o Pa Pia ma isi pisinisi e umi ona tautuaina ai le to’atele e pei o faleoti ulu ma teuteu tino, ulu ma foliga.

Mo Pisinisi e Tautuaina ai Tagata i tulaga o Lauao, Foliga, Day Care ma Tino fa’apea fo’i ma Fale’aiga ma isi ua fa’amautu mai le Fa’asa e ao ina tausisia:

1/Tagata uma lava ua 5 tausaga ma matutua atu e tatau ona fa’aalia lou pepa tui puipuia e lua ua mae’a faia.

2/Ua faailoa fo’i e tagata faigaluega uma ua mae’a ona faia tui puipuia e lua o le Covid-19.

3/ E tatau ona fa’aaogaina le pupunifofoga i taimi uma sei vagana le taimi o loo tausami ai.

4/ E tatau ona nonofo fa’avava i totonu o le fale’aiga poo le a lava le nofoaga o faia ai le fa’atasiga ma e  tatau ona ta’i ono futu le va mai le isi sui i autafa.

O le a le toe fesiligia e le Fale’aiga ni pepa tui o e gasolo atu e tausasami i le latou fale’aiga, ae o le a fesiligia e i latou pepa tui o latou tagata faigaluega ina ia mautinoa o lo’o tofu i latou ma nei tui puipuia, a leai  ua le tatau ona toe fa’afaigaluegaina lena sui. E mataituina fo’i e le Pulega o le Fale’aiga  ma le aufaigaluega ia le toe tumu atoatoa le latou fale’aiga i taimi uma, ae na’o le 50% o le fale’aiga ua fa’atumulia i taimi uma.

Mo Bingo ma Faletifaga:

1/ O latou tagata faigaluega uma e tatau ona fa’aalia a latou pepa tui o tui puipuia o le Covid-19.

2/ Fa’amalosia le fa’aaogaina o Pupuni fofoga i taimi uma.

3/ Ia fa’avava i tulaga ma nofoaga i totonu o le fale o faia ai nei fa’atasiga.

4/ E pule lava le pisinisi latou pe fa’aalia e le tagata ulufale atu o latou pepa tui o tui puipuia o le Covid-19 fa’ato’a ulufale ai.

5/ O le taimi atofa fou e tapunia ai pisinisi uma o le 10:00 i le po ae sei vagana ai o pisinisi e aoga i le tautuaina o e gasegase ma ni tautua e aga i le tausiga o gasegase e tatau ai ona tatala pea lava.

O le taimi e tatala mo feoa’iga ma tautua lautele ua faamuta i le 11:00 ae amatalia i le itula e 4:30 i le taeao.

Ua fa’atulaga lenei fa’asa ma ona aiaiga nei e fa’amamaluina mo le 30 aso ma o le a muta lea ia Iuni 27, 2022.

FOA’I MULIMULI A LE VASEGA COHORT #35 - MO LE AUFAIGALUEGA A LE LBJ MEDICAL CENTER:

I le itula e 1:00 o le aoauli o le aso Faraile na te’a sa fa’ataunuu ai le toe foa’i na tapena e le vasega fa’ai’uaso o le Polokalama a le COHORT #35, o Faia’oga o lo’o a’otauina ina ia umia fa’ailoga maualuluga i lea taumafaiga tuufa’atasia e le Iunivesite o Hawaii i Manoa ma le tatou matagaluega o a’oga a le malo ASDOE.

O lenei vasega sa latou amataina ona foa’i o mea taumafa mama ina ia mautinoa o lo’o tagolima le vasega o le aufaigaluega galulue a le Falema’i tele i Faga’alu, a’o aga atu i latou e tautuaina le mamalu o e gasegase i le LBJ Medical Center.

Talu mai le masina o Aperila e ta’ilua lava vaiaso ma faia lenei foa’i e le vasega fa’aiuaso lenei, o se fa’ataita’iga lelei ma o le latou fa’atinoga fo’i o le tautua lautele, o se tasi o mea o lo’o fa’atulaga i le latou polokalama lea o le COHORT e ao ina fa’atino ma le agaga atoa e i latou, a’o le’i fa’au’uina.

O le agaga o le fa’afetai e fa’aleo lava e le pulega o le tatou falema’i aua o le tele o nei foa’i o lo ua tufatufaina atu mo latou tausiga i itula e tatau ai e le latou vaega o lo’o tapenaina mea taumafa a le mamalu o e o fa’ataotolia o latou gasegase i le falema’i. 

“Ona o i matou o lo’o nafa ma le tautuaina o e fa’ataotolia i mea tausami paleni ma e tatau mo o latou gasegase, o lea ua fa’aoo mai ai fo’i foa’i uma lava nei mo le tufatufaina lelei i le aufaigaluega faigaluega ae maise lava i le po, lea ua le toe tatalaina ni matou fale’aiga ma faleoloa tulata mai mo ni fa’aatauga a le aufaigaluega mo ni a latou tausami aua le malosi o le tino ma le mafaufau e fa’atautaia ai tiute.” O se tala lea a le tamaitai Dietician a le Falema’i Mrs Ianeta Ah Ping.

Peita’i o le toe foa’i na faliu i ai lea vasega na to’atele i latou na pa’au ane mo le toe aso nai Moamoa, ose faamoemoe lelei sa latou tinou ina ia taunuu ma fa’amautu lelei.

O le susuga le Foma’i Dr Abraham Le’iatoa na avea ma sui o le Pulega a le Falema’i mo lea fa’amoemoe, e na te talia ai ma le agaga fa’afetai le foa’i na taulima e le COHORT #35 ma sa saunia fo’i le isi tusi fa’afetai e le Pulega o le LBJ Medical Center mo le vasega lenei e fa’amauina ai le latou galuega lelei ua faatino ma e fa’atuatusi sa’o i le UH Manoa ma le latou pulega o le COHORT Program fa’atasi ma le ASDOE.

O le susuga Tayfao Lealaimatafao o le COHORT #35 na taliaina le latou tusi fa’ailo ma le agaga fa’afetai na tauaaoina peita’i o sui mamalu o le vasega sa auai i lea foa’i taua e aofia ai: Henipira Fuimaono le Failautusi o le COHORT #35, Epifania Iosefo lea sa saunoa  e fa’ailo le latou foa’i i lea aso, ma isi sui uma sa lagolagosua e aofia ai Athena, Elisiva, Taimane, Penina, Celeste, Ashley Fiti, Alice ma Amanda.

Na auai fo’i le Pule o Tagata Faigaluega a le Falema’i ma o le tamaitai fo’i ua avea ma Teutupe a le Falema’I DR. Akenese Nikolao Pula i lea fa’amoemoe, ma o sui mamalu ia o le Pulega o le falema’i sa fai ma sui e talia lea foa’i taua.