TALA I VAIFANUA

Pago Pago - AMERIKA SAMOA

FA’ATULA’IA KOMISI GALULUE E TETE’E & SOLOIA FUALA’AU FA’ASAINA & VAILA’AU OONA

Ua fa’atula’ia e Kovana Lemanu P.S. Mauga le Komisi Galulue fou e 20 ona totino, ina ia latou galulue malosi e tete’e ma fa’aumatia le fa’ama’i ua fa’atetele mai i le atunuu, o le tagofia fuala’au fa’asaina ma vaila’au oona.

Ia le gata i lea, ae ia fa’aaogaina metotia ua a’otauina ai, e fa’ao’o atu ai fautuaga lelei, tima’iga aoga ma ia sailia togafitiga ua fa’atulaga e toe fa’afo’i ai le soifua laulelei ia i latou ua a’afia ma ua faigata ona togafitia ona o a’afiaga o fuala’au fa’asaina ma vaila’au o’ona.

O lo ua fa’atuina nei la le Komisi Fa’apitoa e Tau ma Tete’e atu i le Fa’aaogaina o Fauala’au Fa’asaina ma Vaila’au O’ona e ala i le poloa’iga mai le Kovana Sili o le Malo na fa’alauiloa mai ia Me 12, 2022 ua tapena fo’i ma le tusi fa’alauiloa i le mamalu lautele o le Malo, lea fa’ai’uga ina ia fa’atula’ia lea Komisi Galulue a le Malo mo se leleiga mai a’afiaga ua matua sasao fa’afa’ama’i i le atunuu, le tagofia ma a’afia ai le soifua i fuala’au fa’asaina ma vaila’au o’ona.

“O le taua ua fesaga’i nei ma i tatou ua a’afia ai le tatou aganuu, tatou atumotu ae maise o tatou fanau. Ua tutu fa’atasi i ma’ua ma le Lutena Kovana, Talauega Eleasalo ina ia una’ia le fa’amoemoe lelei o lenei Komisi Galulue e Tau ma Fuala’au Fa’asaina ma Vaila’au O’ona i le atunuu, ia fa’asaoina le soifua o fanau, o mea e sili ona taua i so’o se atunuu, o le latou lumana’i ia manuia ma soifua laulelei. Ua umi tele o fa’ataututu mai le tatou malo ma lenei fa’ama’i fita ma ua i ai le talitonuga mautu, e tatau ona tatou tutu malosi ma fa’aaoga uma metotia ua tatou silafia ma a’otauina ai, e fa’aitiitia ai ma soloia lea fa’afitauli i o tatou lotoifale. E tatau ona matua malosi le taumafaiga e sailia le togafitiga ma fa’ataunu’u loa.”

“Ou te talitonu i le tatou galulue fa’atasi, mai o tatou ta’ita’i o le tatou malo e oo lava i o tatou tagata lautele uma, fa’atasi ai ma e ua a’otauina faapitoa i nei ituaiga o mea fita tau fualaau fa’asaina ma vaila’au oona, ia tatou sofa’i fa’atasi ma e o galulue malosi e tete’e ma fa’atoilalo le lagona fia tagofia o fuala’au fa’asaina ma vaila’au o’ona i o tatou tagata ua a’afia.” O se tima’iga lea mai le afioga Kovana Lemanu Mauga.

Ua tofia fo’i le Sui Kovana e avea ma Ta’ita’ifono o lea Komisi Galue e Tau ma Tete’e i Fuala’au Fa’asaina ma Vaila’au O’ona i le atunuu, ua to’atele fo’i o fa’atonu o Matagaluega eseese ua tofia mai e avea ma sui totino o lea Komisi. Peita’i ua i ai sui e to’atolu ua fa’atulaga e tatau ona tofia mai le vasega o pisinisi, fa’apea ma le mamalu lautele o fa’alapotopotoga e le faaautu mai ni vaega o le Malo ma le vasega o Ekalesia i le atunuu.

Ua fa’atulaga mai tiute tau’ave o lea Komisi Galue:

1) Tuufa’tasia latou pa’aga galulue fa’atsi ina ia mafai ona soloia uma le fa’afitauli tau le tagofia o Fuala’au Fa’asaina ma vaila’au o’ona i le atunuu.

2) Ia latou sailia fo’i pa’aga e galulue fa’atasi ma i latou, o nisi e matua malolosi lava i le taumafaiga lenei, ma e mau talitonuina i latou.

3)Faatulaga Aiaiga e mafai ai ona fa’aititia ma fa’asolo atu ina soloia  le a’afiaga o tagata o le atunuu i fuala’au fa’asaina ma vaila’au o’ona.

4) Ia fa’ao’o mai ni fautuaga i le Kovana e tusa ai o le taumafaiga ia fa’atulaga se tulafono tau fa’aofi e mautinoa e fa’aititia ma soloia ai le fa’ama’i leaga tele o le tagogia lea o fuala’au fa’asaina ma vaila’au o’ona i Amerika Samoa.

O lo ua fa’ailoa mai fo’i nisi o pa’aga galulue fa’atasi ma lenei Komisi Galulue, o nisi lava o fa’alapotopotoga na fa’atula’ia muamua e tatau ona galulue mo lea lava fa’amoemoe e tasi ma o le a latou matua fausia se so’otaga mautu ma lelei mo le fa’amoemoe ua folasia ma aiaia nei.

E tatau ma ua fa’atulafonoina le ta’i fa’atasi ona fono o i latou uma nei mo le aga’i i luma o le taumafaiga lenei ma e fa’ailoa mai fo’i a latou fa’aiuga fai i le Kovana sili ma e i ai le latou fonotaga fa’alaua’itele e fa’atautaia fa’aletausaga e tatala ai le avanoa i le mamalu lautele mo le latou silafia ma fa’afesili.

6,053 A’AFIA I LE COVIF-19 - 31 MALILIU AI, 110 O TOTOE MA LE VERUSI

Mai le aso Gafua ma le fa’ai’uga o le faitauga o e ua a’afia i le Covid-19 i le atunuu ua oo atu i le 6,053 i latou sa a’afia ma maua ai le verusi mai lava i le amataga ia Fepuari 21, 2022. Peita’i ua toe malolosi uma lava le to’atele ae ua totoe ai na’o le 110 i latou i le taimi nei o i ai pea le verusi Covid-19. 

O lea ua siitia ai nei le aofai o e ua a’afia i le Manu’atele i le to’a 67 i latou, 33 i Faleasao, 23 i Tau ma le 11 i Ofu.

Peitai o isi uma fa’amaumauga ua suia nei o le aofai o e ua maliliu ua siitia nei i le 31 ma o le tama lea na fa’ato’a si’ima’i ane i le falema’i tele i Faga’alu i le aso Tofi ua te’a, ua maliu ma ua fa’amauina lona maliu e fia i a’afiaga o le Covid-19.

$33,800 FA’AALU E LE FEMA I MALIU O LE COVID-19 I AMERIKA SAMOA

I le fa’atalanoaga ma le tamaitai fa’atonu o le FEMA, Ms Allison Pfaendler, lea e ta’ita’ia a latou galuega fesoasoani mo i tatou ona o le Covid-19 ua ia fa’ailoa ai, “Ua atoa nei le $33,800. ua mae’a fa’aalu e le FEMA o fesoasoani tupe mo aiga o e ua maliliu ona o le Covid-19 i le atunuu.”

Ua fa’ailoa mai, “E le’i atoa le sefulu o talosaga ua mae’a talia ma fa’auia atu le tinoitupe fesoasoani, ma o le aofai lea o fesoasoani tupe ua mae’a toina atu mo talosaga na talu mai Me 02, 2022. Ua fa’atapula’a fo’i le maualuga o lea fesoasoani tupe i le $9,000. mo le maliu e tasi, ae moomia lava fa’amaumauga tamau o lisiti e fa’ailoa ai le tupe na fa’aalu mo le maliu e fa’aulu atu fa’atasi ma le talosaga.”

Ua fa’ailoa Pfeandler, o le maliu i soo se setete lava o Amerika, o le maualuga o le $6,500. peita’i o lea e sili atu ai le tupe fa’atulaga mo maliu a le Teritori o Amerika Samoa ona ua matauina le gaoioiga fai a aiga, ma le ala o fa’atino ai i tulaga o le aganuu i toe taimi o e maliliu.”

Ina ua fesiligia lava le ala e mafai ai ona fa’auia talosaga i lea fesoasoani mo aiga o e ua maliliu, sa fa’ailoa mai e Pfaendler, “O le mea muamua lava o lou vala’au lea i le laina ua fa’atulaga e amata ai ona e talosagaina lea fesoasoani 1-844-684-6333 e mafa ona vala’au e le totogia mai le itula 2:00 i le vaveao ma le 2:00 i le afiafi.”

“O iina o le a mafai ona tuu mai ai le fa’atonuga o au mea uma e tapena ma lisiti o mea na totogia ma e oo lava i le fa’aliuefuefuina o le tino maliu o pelega ua maliliu e mafai ona fa’auia atu.”

“Afai o le a moomia le fesoasoani e le pa’ia o aiga  e fia talosaga ona o tulaga o feuiuia’iga ma ala ua fa’aulu atu ai nei pepa uma mo le silafia a le FEMA fa’apea fo’i ma tulaga o le gagana o lo’o talanoa mai ai e tautuaina i latou, e mafai ona oo ane i le EOC poo le Ofisa autu a le TEMCO ma fesoasoani mo fa’alavelave fa’afuase’i ina ia fesoasoani atu le aufaigaluega ua fa’atulaga e tali atu mo lea mana’omia. A leai e mafai ona vala’au i le laina telefoni 684-699-3800.”

E ese mai lea fesoasoani ua fa’aauau pea lava ona tali atu lea aumalaga fesoasoani a le FEMA i le mamalu o le aufaigaluega a le Matagaluega o le Soifua Maloloina i le fa’atautaiga o tuiga o tui puipuia o le Covid-19, ma le fa’atautaiga o suega covid -19 ina ia mataituina le aotelega o le atunuu ua a’afia i le fa’ama’i. O lo ua latou fa’amaumauina fo’i nei gaoioiga uma ua faia i Amerika Samoa aua latou lipoti fa’amautu mo a latou galuega na fa’atino ma le ala o fa’atino fa’atasi ai o latou tiute fa’atasi ma tatou aufaigaluega uma o galulue mo le toe soloia o le Covid-19 mai le atunuu.