TALA I VAIFANUA

Pago Pago - AMERIKA SAMOA

FIU AIGA E SAILI MEA’AI MO FANAU AOGA - MAUA LE NOFOAGA, UMA MEAAI AE LE’I TA LE 11:00AM:

Ua atoa le lua vaiaso atoatoa talu ona mae’a toe a’e le fanau a’oga. Ua amata fo’i ona masani matua i le vasega o fanau e usu i le a’oga i aso ta’itasi o le vaiaso, peita’i, o le mea’ai mo fanau o lo’o nonofo pea i aiga ma fai mai ai a’oga, lea ua fa’afitauli nei, fa’apea fo’i ma fanau e le o a’e i isi aso uma o le vaiaso.

Na faia feso’ota’iga ma le Ofisa o le Polokalama o Mea’ai a le Fanau a’oga, ua fa’asino mai le nofoaga muamua o le falesa LDS i Mesepa, gasolo i ai ae ua fai si tuai.

Toe maua mai le nofoaga lona lua o le falesa Metotisi i Fagaima. Ua manuia le sailiga i le lua aso o le vaiaso, ae o isi aso uma ua misi, ua le lava mea’ai, na tapena, ma ua mae’a mea’ai ae le’i taina le afa o le 10:00am.

O le tina lea sa fa’asea mai fo’i, o le tina e fai lona auala poo le ta’avale, e faigofie mamao ona fealua’i. Peita’i o le to’atele o nai matua e savavali lava i le nofoaga ua fa’ailoa mai, pe faatali fo’i le pasi. 

“E feololo la le nofoaga ua i ai nei mo fanau uma nei e a’o’oga i Manulele ma Tafuna aua e mafai ona vave oo ane i ai matua, ma ua mafai fo’i ona maua mea’ai i le tele o aso o le vaiaso. Peita’i, o lo ua fa’ailoa mai e nisi matua, o le fa’aletonu o le tautua ona o le le lava o le tapenaga.”

Mai le matua o lo’o ua tigaina soo atu ae le maua se mea’ai mo le 3 o aso o le vaiaso muamua, ma le 3 foi o aso o le vaiaso lona lua o le a’e ai o a’oga, ua ia fa’ailoa mai, “O le tulaga ua oo mai e sili ai ia ona nofo loa aua le toe alu e aumai mea’ai a le fanau, o le a tapena ia na’o se saimini a le fanau i le fale.”

O lea ua savalia nei le tolu o vaiaso talu ona toe a’e a’oga, ua i ai le fa’amoemoe o matua, o le a feololo se isi fa’atautaiga o lea tautua i lenei vaiaso, nai lo vaiaso e lua ua muamua atu, ae a leai, o lona uiga e le o tagai toto’a le pulega o le SLP i se faiga lelei e tufatufaina ai mea taumafa a le fanau a’oga i aso taitasi mo nai fanau o lo’o nonofo i aiga ma a’o’oga mai ai.

TO’A 4 FA’AMAONIA O I AI VERUSI COVID - 11 TAOFIA  & AUMALAGA FOU A LE FEMA:

O le aumalaga a le Hawaiian Air i le aso Tofi ua te’a, Me 12, 2022, ua fa’amaonia le ulufale mai o nisi ma le verusi o le Covid-19. I le taimi nei o i latou na ma nisi sa iloga ona latalata ia i latou i lea faigamalaga ua taofia nei ina ia fa’anofova’ava’aia i le falema’i o le covid a le matagaluega o le Soifua Maloloina i le malaeva’alele i Tafuna. Ua atoa le to’a 11 o i latou ua taofia fa’atasi nei.

I le malaga mai a le va’alele lea e to’a 241 le aofai o le pasese na malaga mai. 

I le va’alele lea ua malaga atu ai le to’a 31 o sui uma na galulue i Amerika Samoa nei a le FEMA, ae o lo ua fa’ato’ai mai i le malaga o le aso Tofi na te’a nei le to’a 18 o le aumalaga fou a le FEMA mo galuega fesoasoani i le taumafaiga lava e toe fa’afo’ia le malosi o e uma ua a’afia ma o le a a’afia i le Covid-19 i le atunuu. 

E le gata i lea, ua faailoa mai, o lo ua malaga fa’apitoa mai ai fo’i ma nei sui e mafai ona fesoasoani i le mamalu o aiga o lo ua maliliu latou pelega i le Covid-19, ae ia fesoasoani i nei aiga uma ina ia maua latou tinoitupe fesoasoani mo le falelauasiga o latou pelega.

E le gata i lea ae o le isi vaega o le aumalaga nei o tausimai ma foma’i ina ia fesoasoani e fa’aauau togafitiga ma tuiga fa’apea ma suega o le Covid-19 i le atunuu, ae maise ai o le Manu’atele lea ua fa’ato’a a’afia i le Coronavirus.

Ua fa’ailoa fo’i i se fa’amatalaga a le tamaitai fa’atonu o le aufaigaluega atofa mai mo Amerika Samoa a le FEMA Allison Pfaendler, “O le vaega lenei o le aufaigaluega fou ua fa’ato’ai mai i Amerika Samoa o le a fesoasoani lea mo le faatautaiga o togafitiga, suega ma tuiga o le Covid-19 i le atunuu faatasi ma le aufaigaluega a le DOH ma le Malo o Amerika Samoa i taimi uma o le a i ai i le teritori.”

“Ua ou fiafia tele ua ou oo atu i le Manu’atele ma ua matou va’aia fo’i le fa’atautaiga o le fuafuaga ua fa’ataoto ma fa’atino ai le galuega tau togafitiga, tuiga ma suega i Ta’u, Faleasao ma Fitiuta, fa’apea ma le fuafuaga ua fa’atulaga nei mo le Faleluasaga o Ofu ma Olosega. Ua iloga e aoga fo’i lea fuafuaga mo galuega uma e fesoasoani i ai sui o le FEMA o le a malaga atu i le Manu’atele mo nei tautua uma.” O se tala mai lea a le tamaitai fa’atonu o le Aufaigaluega a le FEMA mo le covid-19 i Amerika Samoa.

KONESULA FOU O SAMOA I AMERIKA SAMOA - AGAGA GALULUE FA’ATASI MO LE MANUIA O TAGATA:

O lo ua leva ona fa’ailoa mai le tofiga fou o le ali’i Konesula o Samoa i Amerika Samoa, le susuga Fata Brian Kaio, peita’i ona o le taofiga o femalaga’iga i le va o Samoa na lua, ua mafua ai ona fa’atuai lava ona oo mai le sui fou e galue i le tatou Ofisa Autu i Amerika Samoa nei.

Na mae’a tofia lenei ali’i e tautuaina lea Ofisa i Amerika Samoa ia Tesema 2021, peita’i o le umi fo’i lea o taumafai mai le sui mai Ausetalia lea sa galue ai, i Samoa e fa’amautu lona tofiga ma fa’ato’a oo mai ai i le tatou Ofisa Autu o le Konesula o Samoa i le Iupeli Siliva, Fagatogo, Amerika Samoa. 

Ua suia nei e Fata Brian Kaio le afioga Manogiamanu Fonoti Ioane, lea sa tulai ai ai pea i lea tofiga na te fa’atautaia mo le vaitau umi talu mai ona tofia le Konesula Fou ae le’i to’ai taunuu mai lava i le tatou ofisa autu i Fagatogo.

O Fata Brian Kaio sa mua’i galue o ia mo le 4 tausaga i le ofisa o le Konemsina sili o Samoa i Canberra Ausetalia 2013-2017, ona malaga mai lea e ma fa’aauau lana tautua i le Matagaluega o le Va i Fafo ma avea ai ma CEO o le Protocol Division mo le tofiga CEO o lena tautua a le Malo o Samoa.

O le tausaga ua te’a sa ia mauaina ai se avanoa fa’asikolasipi a le Chevening Scholarship ma tauavea ai aoaoga mo lona fa’ailoga o le Masters i le Iunivesite o Oxford i Lonetona, Peretania.

Ona o le sui o se tasi e fiafia tele i le Lakapi ma e agava’a ai fo’i, sa ta’alo o ia i le Kalapu a le Malisi ma sa avea o ia ma fa’atonu o le Liki Lakapi a le Malisi mo ana ta’amilosaga sa fa’atautaia i le tausaga 2018 -2020.

5 ALO AMERIKA SAMOA FA’AU’U MAI IUNIVESITE CONCORDIA NEBRASKA - 3 MAI DIXIE UNIVERSITY:

Mai Seward Nebraska ua fa’au’u manuia mai ai aoa’oga mo fa’ailoga maualuluga o le Masters of Education a le to’a lima o alo o Amerika Samoa. O le fa’aiuga lea ua lisia mai ai o latou suafa i le lisi o le au fa’au’u a lea Iunivesite ia Me 07, 2022. 

O i latou nei e aofia ai: Vaialii Alatina, Cayla Ho Ching-Fogavai, Jenny Logologo, Naitua Perofeta, ma Timo Tua.

I le sauniga mamalu o le latou fa’au’uga sa tula’i ai le ali’i Peresetene o le Concordia University, Dr Bernard Buil, ma ia tima’ia le vasega o le au fa’au’u, “Ia o atu ma fa’atino le galuega ma le to’a ma ia latou fa’aaogaina uma taleni ua mae’a aotauina ai i latou ia faia se suiga i olaga o le fanau o le a latou a’oa’oina, ia fa’atumauina le soifua va lelei ma le fa’amalosia lagona o le fesoasoani a’i ma isi faia’oga uma, ia aoa’o atu ma lo outou  silafia lelei ua mae’a faaauupegaina ai outou i tomai e mo’omia ona ausia e le vasega o faia’oga mo lenei vaitau ma aga’i atu i le lumana’i. Aua ne’i galo ia te outou, ua ou aoao atu fo’i le amio lelei, e atagia lea ia te outou o faia’oga o le fanau talavou.”

I le lauga fa’apitoa o le fa’au’uga lea sa saunoa fa’apitoa ai Dr Kurt Senske, o le sui sa ia fa’atuina le Board Services, lea ua ia umia le Dr of Law Degree mai le vasega fa’au’u o lenei tausaga, sa ia timaia le vasega fa’au’u, “O i tatou o Kerisiano galulue mo galuega lelei uma lava. O lea ua tatou oo mai i le laina e amatalia ai le tatou galuega tima’i ma a’oa’oga atu o fanau ina ia avea ma tagata amio lelei ma agaga e fia fai mea lelei. O i tatou e toe fa’amanatu atu i le fanau, le amio e tatau ma le Kerisiano, ua tatou mafai ona va’ai mamao atu i tua atu o ou manatu fa’apito mo oe lava, ia va’ai atu i le mana’omia o se tasi ma e taumafai e fesoasoani atu a’o maua le taimi. Ia faia se suiga lelei i mo tatou olaga fa’atasi uma i le tatou atunuu.”

O le Concordia University na fa’atuina lea i le tausaga 1894 ma ua i ai lona agava’a atoatoa  i kos uma ua mafai ona aoa’oina ai so’o se tasi, ma ua fa’ailoa mai e tusa ma le 2,500 fanau ua tausailia o latou fa’ailoga maualuluga i lea Iunivesite i lenei tausaga a’oga.

Mai le Iunivesite o Dixie, Utah ua fa’ailoa mai e to’atolu alo o Amerika Samoa ua fa’amauina le mae’a o latou a’oa’oga mo fa’ailoga maualuluga ma ua mae’a fo’i le latou fa’au’uga lea na mae’a fa’amauina ai le aofai e 2,684 le aofai o fanau fa’au’u mai i lenei afa tausaga. 

O le latou fa’au’uga na mae’a faia lea i le Greater Zion Stadium ia Me 06, 2022. O i latou nei e to’atolu e aofia ai: Isalei Afioa’e, Lapaloma Pese ma Joseph Aguimbag. O i latou fo’i nei ua fa’amanuiaina latou taumafaiga ua fa’ailoa atu i ai le agaga fa’afetai o le susuga le Peresetene o lea Iunivesite Richard B. Williams.