Nofovaavaaia le alii na ta’usala i le umia faasolitulafono o fualaau faasaina

Pago Pago - AMERIKA SAMOA

E 5 tausaga lea ua nofovaavaaia ai se ali’i e 40 tausaga le matua mai Vaitogi, ina ua faamaonia e le Fa’amasinoga tu’uaiga o le umia faasolitulafono o fualaau faasaina. O se tasi o tuutuuga o le nofovaavaaia a le susuga a Faasegi Tuamafa e aofia ai lona tuli o masina e 20 i le Toese i Tafuna, peita’i, e na o le 11 masina na tuli e le ua molia ae faia loa le poloaiga a le Fa’amasinoga i le masina na te’a nei ina ia tatala i tua le ua molia e saili sana galuega i totonu o le 90 aso.

O se avanoa lelei lea ua maua e le susuga a Tuamafa mai le Faamasinoga Maualuga, pe a faatusatusa i le faasalaga faa falepuipui e 5 tausaga e mafai ona faasala ai o ia i le Toese, ina ua mae’a ona ta’usala o ia i le solitulafono o le umia faasolitulafono o vaega o le pauta faasaina o le aisa.

O le masina na te’a nei na tula’i ai Tuamafa i luma o le Faamasinoga Maualuga mo le tuuina atu o lana faasalaga, e tusa ai o le solitulafono lea ua ta’usala ai o ia e le Faamasinoga.

Na ulua’i tu’uaia Tuamafa e le malo i le moliaga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala fo’i i le salatupe e oo atu i le $20,000 le umi, poo le faasala fo’i i faasalaga uma ia e 2.

A e i lalo o se maliliega na sainia e le malo ma Tuamafa, lea fo’i na talia e le Faamasinoga Maualuga i le masina na te’a nei, na malie ai Tuamafa e tali ioe i le solitulafono o le umia faasolitulafono o vaega o le pauta faasaina o le aisa, lea e mafai ona faasala ai se tasi i le Toese mo le umi e oo atu i le 5 tausaga, pe faasala fo’i i le salatupe e oo atu i le $5,000, poo le faasala fo’i i faasalaga uma ia e 2.

I le tali ioe ai o Tuamafa i le moliaga e pei ona ta’usala ao ia e le Faamasinoga Maualuga, na ia ta’utino ai e faapea, i le 2 tausaga talu ai, i le aso 25 o Novema 2020, na ia umia faasolitulafono ai vaega o le pauta faasaina o le aisa. Na ta’utino atili le ua molia e faapea, i le aso e pei ona taua, na taofi ai e Leoleo lana ta’avale i luga o le alatele, ona o lona le usitaia o tulafono i le alatele.

Ina ua saili e Leoleo lana ta’avale, na maua i ai se paipa tioata o lo o i ai vaega o le pauta faasaina o le aisa. Na tautino atili le ua molia e faapea, o lana gaioiga sa faia i lea aso, sa le tusa lea ma ala o le tulafono.

O le masina o Iuni o le tausaga nei na faatoa molia ai e le malo ia Tuamafa e tusa ai o lenei solitulafono, ae i le mae’a ai o le 6 vaiaso talu ona taofia o ia i le Toese e faatalitali ai se faaiuga o lana mataupu, na talia ai loa e le Faamasinoga le talosaga a le itu tete’e mo se avanoa e tatala ai le ua molia i tua e faatali ai le taimi e lau ai lana faasalaga.

Ina ua maua lona avanoa mai le Fa’amasinoga Maualuga, na faatoese ai loa Tuamafa e tusa ai o lana solitulafono ma ia talosagaina ai se isi avanoa mo ia e faaauau ai pea lana tausiga i lana fanau laiti e to’a 3.

Na taua e Tuamafa ma ona loimata e faapea, e tasi le masina talu ona taofia o ia e Leoleo ae maua atu le tala faanoanoa ua maliu lona to’alua. O se tulaga sa matua mafatia ai lona loto ona o le motusia faafuase’i o le mafutaga ma lona to’alua, atoa ai ma lona tuua lea o ia ma lana fanau ae alu e leai se tala e fai atu.

Na tuuaia a le ua molia o ia ma le sese o lana filifiliga sa faia, o le mafua’aga lea o le tutupu o nei mea leaga i lona aiga, aemaise ai lava le motusia o le mafutaga ma lona to’alua. 

Sa ia taua i le Faamasinoga lona aoaoina o se lesona taua mai totonu o le Toese, ma ua ia lagona ai le leaga o le tagofia o fualaau faasaina. A o i ai i le Toese, sa ia molimauina ai le to’atele o tupulaga talavou o loo tuli a latou faasalaga i totonu. Sa ia faapea ane i lona loto, ua tele nei aso o le olaga ua ma’imau i le Toese, ae ua leai se taimi e tausi ai lona aiga.

Sa ia ta’utino i le Faamasinoga Maualuga, afai ae maua sona avanoa, na te le toe tagofia ni fualaau faasaina pe na te toe solia fo’i se isi lava tulafono a le malo.

Na talosaga lana loia fautua i le Faamasinoga mo se faasalaga faanofovaavaaia mo le ua molia. Na taua e le loia fautua e faapea, e tele tausaga o galue malosi le ua molia e tausi lona to’alua ma lana fanau, o ia fo’i o se Tama e loto alofa i lona aiga, e faamoemoeina fo’i o ia e lona aiga i mea uma lava. 

E le o ia o se tagata e inupia pe tagofia fualaau faasaina ae sa galue malosi pea mo le tausiga o lona to’alua ma le la fanau laiti e to’a 3. 

Ae o le taimi lava na sese ai le filifiliga a lenei ali’i ina ua mafuta atu i ana uo o loo latou tagofia fualaau faasaina ma le ‘ava malosi, o iina loa lea na amata ai loa ona faaletonu lona olaga, seia oo lava i lona fealua’i i totonu o lana ta’avale ma fualaau faasaina.

Na lagolago e le loia a le malo le talosaga a le itu tete’e, ma ia finauina ai fo’i le Faamasinoga mo se faasalaga nofovaavaaia mo lenei ali’i. Na talitonu le Faamasinoga, ua salamo moni le ua molia e tusa ai o lana solitulafono sa faia. 

A o le i tuuina mai le faaiuga a le Faamasinoga, na faamanatu e le ali’i Fa’amasino i le alii ua molia lo latou amanaiaina o lana talosaga ma loimata ina ia tuu atu se isi avanoa mo ia e toe fo’i ai i tua e tausi lona aiga ma lana fanau.

Ae o le mataupu e pei ona ta’usala ai o ia, na mafua mai ina ua sese lana filifiliga sa faia i le 2 tausaga talu ai, ina ua maua e Leoleo se paipa tioata o lo o i ai vaega o le pauta faasaina o le aisa i totonu o lana ta’avale. 

Na taua e le Faamasinoga e faapea, o se tasi lea o auala ua maitauina e le Faamasinoga i le taimi nei, o le auala lea ua to’atele tagata ua aafia ai i le tulafono, ona e avea le taofia e Leoleo o taavale i le le usitaia o tulafono tau le alatele ma itu e maua atu ai ma isi solitulafono e pei o le umia faasolitulafono o fualaau faasaina.

Na taua e le Faamasinoga e faapea, atonu ua avea le maliu o le faletua o le ua molia ao i ai o ia i le Toese ua fai ai ma ana faasalaga i lenei mataupu, peita’i e le o le faasalaga tonu lea o lo o faataoto mai e le Tulafono. O lo o talanoa mai le Tulafono i le faasalaga faa falepuipui.

Na taua e le Faamasinoga e faapea, e tau feololo mai pe ana faapea o se tamaitiiti talavou lea na tagi ma loimata ma faatoese i le Faamasinoga e tusa ai o lana solitulafono, atoa ai ma le talosagaina o se isi avanoa o ia, ae o le itu e le o nofo lelei ai i le Faamasinoga le tagi talatala a le ua molia mo se avanoa, e le gata o ia o se tagata matua ua to’a 3 le fanau, o le ulua’i taimi lenei ua ta’usala ai o ia i se solitulafono, a o le nei lava e le o saga tonu lona mafaufau i le mea tonu ma le sa’o e tatau ona faia.

E 5 tausaga na manatu le Faamasinoga e loka ai le ua molia i le Toese, peita’i ua faamalumalu lona tuliina o lea faasalaga, ae o le a nofovaavaaia ai o ia i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tulia o masina e 20 i le Toese i Tafuna, ae faitau ati ma vaiaso e 11 lea ua mea’a ona ia tulia. O le umi o lo o totoe ai o lana faasalaga faa falepuipui, o le a taofi lona tuliina.

Ua faatonu e le Faamasinoga le ua molia, e le faatagaina ona ia toe tagofia le ‘ava malosi poo fualaau fa’asaina, a ia avea o ia o se tagatanu’u e tausisi i tulafono a le malo i taimi uma. E $2,000 le salatupe lea ua faatonu e le Faamasinoga ia Rhode na te totogia.

Na faamamafa e le Fa’amasinoga i le ali’i ua molia, ia tausisi i lana folafolaga lea ua tuuina atu i le Faamasinoga, na te le toe solia se tulafono a le malo. Afai ae le savali ai, o le a le toe maua loa se isi avanoa mo ia.