TALA I VAIFANUA

Pago Pago - AMERIKA SAMOA

29 MALILIU I LE COVID-19 E O’O MAI IA ME ASO 5

Mai fa’amaumauga o le amataga e o’o mai ia Me aso 5, o le aofa’i o e ua maliliu mai a’afi’aga o le Covid-19 i le to’a 29 sui. O le aotelega o e uma na fa’amauina sa maua i le Covid-19 ua tula’i mai le 5,894 i latou, ae o le taimi nei ua na’o le 146 o i latou nei o totoe ma le verusi o el Covid-19 ina ua mae’a toe malolosi mai le isi vaega tele o tagata. 

Mai le a’afiaga ua i ai nei le Motusa ona o le covid-19 ua fa’ailoa mai ua atoa nei le 35 o i latou. E to’a 25 i latou mai Faleasao, ae na’o le to’a 10 i latou mai Ta’u, o lo’o mama pea le Faleluasagai Ofu ma Olosega i le taimi nei.

O le matagaluega o le Soifua Maloloina sa fa’amuta a latou galuega tautua i tuiga ma suega o le covid-19 i le itula e 12:00 i le aoauli o le aso Tofi na te’a, ina ua manatu e fa’ataua fo’i le amataga o le Vaiaso o tamaitai Tausima’i uma i le teritori ma le Iunaite Setete atoa.

Mai le fa’amaumauga ua fa’ailoa ai le atoaga o le 84.3% o le faitauga atoa o le atunuu ua mae’a faia o latou tui puipuia, e to’a 63.5% ua mae’a faia o latou Boosters ma le 146 i latou o totoe ma le verusi i le teritori atoa.

MALIU ALI’I SAMOA TA’ALO LAKAPI I FALANI - KELLY MEAFUA

Ua fa’ate’ia le to’atele o alo o Samoa o lo’o ta’a’alo Lakapi fa’avaomalo fa’atasi ma Kelly Meafua ina ua lipotia mai lona maliu fa’afuase’i mai Falani, ma ua fa’ailoa mai le mafuaga, ona ua puna pe oso i totonu o le vaitafe i Tarn, Falani.

I le taimi nei ua fa’akonekarate o ia e ta’alo i le ‘au a Montauban a Falani.  E to’alua i la’ua ma Dimitri Vaotoa o lo’o ta’a’alo fa’atasi ai, ma ua fa’ailoa mai e i ai se tasi sa ia molimauina le puna o Kelly i lalo i le vaitafe o Tarn mai le alalaupapa sa la’ua i ai.

O le ali’i ta’alo lakapi lenei mai Samoa, o se tasi e sili ona ta’uta’ua i le tulaga o le Center, ma o ia lea e fa’amoemoe i ai le laina i tua a le ‘au e fa’asoloa maia le polo ina ia sao atu se pasiga i le laina sikoa.

Ua fa’ailoa mai, na mua’i manumalo le taumafaiga a le ‘au Lakapi a Montauban lea e ta’a’alo ai Kelly Meafua ma Dimitri Vaotoa i le 48-40 ‘ai ae tafafao ai i latou i le afiafi lava o lea aso ma ua maliu ai nei o ia i le aso Toona’i Me 09, 2022 ina ua oso i totonu o le vaitafe a’o malulu tele.

Ua fa’ailoa mai i lipoti a le Associated Press, na taumafai le uo mamae a Kelly sa la i luga o le ala laupapa e fa’asao mai Kelly ina ua puna i totonu o le vaitafe, na toe toe fo’i ina maliu atu ai ma ia i lana taumafaiga, ae fa’afetai ua toe fa’asaoina o ia. O le malulu tele o le vaitafe i le taimi na puna ai i ai Kelly ua maua ai o ia i le Hypothermia.

O le auala laupapa lea e 72futu le maualuga o Pont-Vieux e kolosia ai le vaitafe o Tarn, lea na puna mai ai Kelly. Na oso puna mai ai fo’i ma Dimitir Christopher Vaotoa e taumafai e fa’asao lona uso Samoa.

O le tafaoga a le ‘au a le Guardian mai Montauban lea sa alu ma o le mae’a ai o lena tafaoga na tupu ai lea fa’alavelave. O le ta’alo fo’i a Kelly sa matua mata’ina lana fa’asoaina o le polo, ua maua ai le latou manumalo i lea ta’aloga fita ma Narbonne, o le ‘au a le Kalapu sa ta’alo muamua ai fo’i Kelly. O se tasi lea o ta’aloga faitaulia o lo’o fa’agasolo a le Stade Sapiac.

Mai le ali’i Kapeteni o le ‘au a le Montauban sa ia fa’ailoa ai, “O Kelly o se alii ta’alo malosi, e fa’amoemoeina, e matua fa’amalieloto lana ta’alo i so’o se taimi, e fua fo’i i ai le matou fa’atinoga o le pasiga. E le fa’atauva lana ta’alo, ae fa’asoa lelei. O lana fa’amalosi’au ia matou o le a matua silia ona misi i a matou ta’aloga uma. E fa’afiafia tagata i taimi ua tau sau ai le vevela vale o le toto ma fa’aletonu ai fa’ai’uga faia i taimi o ta’aloga, o ia o se uso moni, e te fa’amoemoe i ai, ae le tu’ua fo’i ia te oe se mea ua e mana’o ai, o se uo mamae lava.”

Na soifua a’e Kelly Meafua i Samoa, peita’i i lona olaga talavou sa malaga ai loa i Niu Sila ma soifua ai. Peita’i na fa’ato’a ta’alo lava o ia i le Lakapi ina ua atoa le 20 tausaga o lona soifua. Ina ua mae’a ta’alo mo le ‘au lakapi i Aukilani a’o alaala i Otahuhu i ‘au ta’a’alo Lakapi a fanau talavou e le’i atoa le 21 tausaga le matutua, ona toe si’itia lea o lona soifuaga talavou lava i  Sydney, Ausetalia ae ua mae’a ta’alo mo le Au Lakapi Taito’afitu a Aukilani.

PASESE TOE FA’AFO’I I TAFUNA 2 - PASESE TOE FA’AFO’I I SAMOA 3

Mai Samoa ua toe fa’afo’i mai pasese e to’alua, ua fa’ailoa mai e le’i i ai ni la’ua pepa fa’atumu mai le Matagaluega o le Soifua Maloloina e moomia mo so’o se tasi e fia ulufale atu i Samoa. Ona e le’i umia la e nei sui e to’alua nei pepa fa’atumu, nei e malaga ma i la’ua e ulufale ai i Samoa, e fa’ailoa uma ai isi mau tui puipuia ua mae’a faia mo i la’ua ma aso fo’i na faia uma ai nei tui puipuia ma togafitiga eseese, ua te’ena ai lo la’ua ulufale atu i Samoa.

O le to’alua lea sa toe taliu mai toe tapena la’ua kilia nei mai le Matagaluega o le Soifua Maloloina ma toe taliu atu i le isi malaga mulimuli a le va’alele i Samoa, ma ua talia lelei i la’ua i le to’ai taunuu atu ma nei kilia i le taimi nei. O sui e to’atolu na malaga mai Samoa, ae le’i mua’i fa’atumuina mai ni latou itulau i le TalofaPass ua toe fa’afo’ia i Samoa ina ia mua’i faia mai nei fa’amaumauga i luga o latou TalofaPass.

Ua fa’amalosia fo’i lea aiaiga mo sui uma e malaga mai i totonu o le Teritori o Amerika Samoa, ma ua fa’atulaga ai ina ia mua’i fa’atumu mai lau TalofaPass e te ulufale mai ai. O lea fo’i sootaga ma Amerika Samoa e fa’aulu mai ai uma au pepa fa’amaonia o tuiga ma suega sa faia o le Covid-19 e oo lava i lou tusi folau ma le fa’amaoniga a le Ofisa o Femalaga’iga i Amerika Samoa e mafai ai ona e ulufale mai.

Ua fa’ailoa mai e sui o le tatou Ofisa o Femalaga’iga ma le Matagaluega fo’i o le Soifua Maloloina, “E matua le mautinoa lava e i matou iinei pe fa’apefea ona malaga mai sui nei ae le’i mua’i siakia e le Kamupani Va’alele a le Samoa Airways pe ua mae’a i ai ni a latou TalofaPass.”

“O le TalofaPass foi e fa’aulu atu ai lau OK Board e te malaga mai ai, aua e le o toe lolomia mai ni pemita e ulufale mai ai nisi i le teritori. O lona uiga e matua le mailoa pe na fa’apefea la ona pasia le malaga mai i Amerika Samoa o nei sui e to’ataolu.”

Ua faailoa mai e le Ofisa o Va’alele a le Samoa Airways, ua tele tagata e fia malaga mai ua latou faitioina le faigata tele ona ulufale ma lesitala a latou malaga i ni a latou talosaga mo le TalofaPass. Ua fa’ailoa mai nei fa’afitauli uma i luga o fa’asalalauga tau tusitusiga m,a fa’asalalauga i luga o Siufofoga Fa’asalalau ona o lea tulaga ua fa’afaigata ai ona mautu a latou malaga mai i Amerika Samoa.

Na sailia fa’apitoa lava le fesoasoani a se tasi o Ofisa Tusi Pasese o Malaga a Va’alele i Samoa e fesoasoani ane i pasese uma ina ia mafai ona fa’atalosagaina TalofaPass mo le to’atele o nisi e fia malaga mai i Amerika Samoa nei.