TALA I VAIFANUA

Pago Pago - AMERIKA SAMOA

MAUA 1LT PAUNGA, ALAMOANA - FA’AILOGA “BEST SAPPERS” I LE US ARMY

Se tasi o alo o le atunuu o lo’o tautua pea i le US Army, 1Lt Alaimoana Paunga, ua fa’ailoa mai na paga ma se tasi o ta’ita’i  o 1LT Eric Mattia i le tauvaga fa’apitoa lea a le USArmy o le Best Sappers, ua tumati’e le laua fa’amoemoe mai le to’atele o paga sa tauva, ma ua taua’aoina ia i la’ua lea fa’ailoga i le vaitau fo’i o fa’ailogaina le Aso na fa’atu ai le USArmy Reserve i Amerika ia Aperila 2022.

Ua fa’amau fa’ailogaina lenei taumafaiga ma ua taua’aoina ia i la’ua le fa’ailoga ma le fa’aeaga o le “Best Sappers of the US Army”.

O is o se tasi e tupuga mai i ona matua mai Tonga ma Nuuuli o Amerika Samoa. O lona tama o Alaimoana Paunga mai Ha’ano Ha’apai ma lona tina o Luisa Paunga mai Felemea Ha’apai ma Nuuuli Amerika Samoa. Peita’i o le ali’i fitafita sa soifua a’e o ia i Amerika Samoa ia iulai 1994.

Ua mae’a lelei aoaoga mai South Carolina State University, lea fo’i a mua’i mafai ai ona fa’au’u mai ai o se ali’i Ofisa o le USArmy ma avea ai fo’i ma se tasi o totino o le Corps of Engineers.

I le taimi nei o lo’o tiute i la’ua i Fort Hood Texas, ae o lo’o galue i le 20th Engineer Battalion, 36th Engineer Brigade. O lo ua fa’aolioli mai lea alo o le atunuu e ta’ita’ia le 87th Combat Engineer Company lea ua mae’a fa’aolioli mai e amata ai ia Iulai 2022.

I le aso o le tauvaga, ua soa ai le alo o Amerika Samoa ma se tasi o ta’ita’i 1LT Eric Mattia  mo le tauvaga lona 15 a le LTG Robert B. Flowers Best Sappers, ma ua la’ua ausia ai le tulaga muamua. Malo le tauata’i!!

Ua fa’ailoa mai e silia ma le 50 paga sa tauva, ae o lea ua tumati’e le taumafaiga a lea Toa Samoa ma lana paga, o se agaga me’eme’e ma le fa’afetai ua maua e le tapua’iga a matua ma aiga ae maise ai nei le tatou Malo, ona taumafaiga nei a fanau o tautua i vaega au, e atili ai ona fa’aeaina ma taualoa Amerika Samoa ma ala eseese o tautua ai, i le va ma le malo tele o Amerika.

AISEA FA’ATOESE AI LEMANU - A’O LE’I FAIA LANA LAUGA O LE FU’A?

Ua i ai vetereni o le atunuu ua latou fa’ailoa mai, e ao ina fa’ailoa i le lautele o le atunu’u le mafuaga ua fa’alalolalo mai ai se saunoaga ale afioga le Kovana Sili, Lemanu Peleti S. Mauga a’o le’i saunoa e tusa o le auau o le sisigafu’a o le 2022.

“O le mea muamua, o le vava mamao ai o Fu’a a le Malo Tele ma le Malo fa’ateritori o Amerika, o se mea ua fa’afaigata ai ona iloga le sasi o pou us sisia ai le fu’a a le Iunaite Setete o Amerika ma le fu’a fo’i a le tatou malo. Ae a faatutu faatasi  fu’a ona fa’afaigofie lea ona matauina le sa’o o lea tulaga.”

“Pe afai e fa’aalo tagata uma i le fu’a a le Malo Tele, e ao ona tu tonu le sisiga o le Fu’a i lou itu tauagavale, e talafeagai ma le fa’aalo o lou a’ao o lo’o i lou fatu, ma le fa’aalo o le lima taumatau o e o lo’o agaia le fu’a a le Malo tele. Ua matauina, o le mafuaga o le fesasisa’i ona afai e fua i e nonofo i lalo ane o le Pavillion i Fagatogo, ona sa’o lea o le pou o sisia’e ai le fu’a!”

“Peita’i o lenei tausaga, ua o mai uma tagata i lalo o le fale’ie lea e fa’asaga atu i le Pavillion. Ua le talafeagai ai la le pou ua sisi ai le fu’a a le Malo Tele,  ma le fa’aalo e tatau ona faia e i latou uma ia sasao i lalo o le fale’ie lea e fa’asaga atu i le fu’a a le malo tele.”

“Ua tutusa pau ma le tagata o lo’o femalaga’i i le ala ma e taga’i atu i le sisiga o le fu’a i le taimi nei, i le pou sa sisi a’e ai, o lo’o sese lava. Ua le fetaui ma se fa’aalo a so’o se tasi o i luga o le ala, pe taga’i atu i le sisiga o le fu’a. O le mea lelei, ua tuuina i lalo, ae le o fa’atumauina ona sisi ai pea i le taimi nei.”

“O le sisiga o Fu’a i lumafale o le Matagaluega o le Puipuiga o le Saogalemu Lautele i Amerika Samoa, ua fetaui lelei ma le tulaga e tatau ona i ai le sisiina a’e o tagavai e lua i so’o se taimi.”

“Ua na’o sina fautuaga, ia taga’i fo’i i le fitaituga o le afioga i e na tulei mo le aso fa’ailogaina o le tatou malo, ua matua laina i se taimi umi, outou o lo’o vagaia mea uma e faatino mo le Malo, ia taga’i toto’a i mea iti fa’apenei, aua e le tutusa uma le malosi o ta’ita’i i taimi uma e tutula’i ai mo se upu fa’afetai, ao se fa’amalosi’au i le atunuu.”

“Ia faia se fa’amalumaluga o e tutula’i i le la, ua tele ina fausia o tatou fale tetele, ma le Malae Tele fo’i i Tafuna, ae leai ni fa’amalumaluga mai le laina o malo fa’aaloalogia. Ou te iloa lelei, o le ala lea o le fa’anofoia uma o le mamalu o e vala’aulia i lalo ane o fale’ie, peita’i ua sasi ai le tulaga e sisi a’e ai tagavai.”

#3 POLOKETI TAMA’ITA’I AMERIKA SAMOA FA’AALIGA ALE  NJSHS

Mai le anoanoa’i o galuega fa’atino na folasia mai setete ma teritori eseese o le Malo o Amerika, e ua pikia ai le galuega fa’atino a le tamaitai Amerika Samoa o Liualevaiosina Chloe Lei’ato ua tulaga tolu. O le fa’aaliga lea lona 60 a le Nationa Junior Science & Humanities Symposium i le vaega fa’apitoa o le “Life Science.”

O le galuega lea a Liualevaosina Le’iato na ia fa’apupula atili ai le a’afiaga o a’au ma le ‘amu sa ia ausia ai le tulaga lua i le fa’aaliga na fa’atautaia i le Pacific Hawaii Symposium i suesuega fa’asaeanisi ma ala e mafai ona toe fa’aolaola ma fa’amautu atili ai le ola lelei o le amu ma a’au. Na ausia e lana galuega lea le tulaga lua i Hawaii.  O faaaliga nei na auai Le’iato na fa’atautaia i ala fa’avetuale tau tafa’ilagi ona o le lutia ai o le atunuu ma le lalolagi i le Covid-19.

Ina ua mautinoa e Liualevaiosina  ua tulaga tolu lana taumafaiga i le Iunaite Setete atoa, sa ia fa’ailoa ai, “O le taumafaiga lenei, e matua ou le mafaia lava pe ana le fa’atasi mai le Atua ia te a’u, fa’apea fo’i le sapai malosi mai a lo’u aiga ma a’u faufautua fa’apitoa o o’u faia’oga. Fa’afetai o le fa’ailoga lea mo i tatou uma.”

“O le mea mautinoa ana le outou sapaia lenei fa’amoemoe, e le i’u mai ma le manuia ua i ai nei. Ou te matua fa’afetaia le avanoa ua ou maua ou te suia ai Amerika Samoa i lenei tauvaga fa’asaenitisi, o fa’afitauli fo’i ua folasia i le taumafaiga o mea moni o feagai ai ma le tattou atunuu ona o aafiaga i fesuia’iga o le tau i le lalolagi. Ua le lava ni upu e fa’amatala ai le agaga fa’afetai mo i latou uma lava na tofu sa’o mo lenei taumafaiga. O la tatou fa’ailoga fa’atasi lenei, e mautinoa ua toina mai e le Atua mo i tatou uma, fa’amalo le galulue,” o sana tala lea. 

SAUNIA ASPA TANE VAI 500KALONE - MO AIGA I AUNUU

Ona o tulaga ua lofia le suavai mama e taumafaina e le to’atele o e o alaala tumau i Aunuu e le suasami, o lea ua tapena ai e le ASPA le 48 Tane Vai e ta’i 500kalone le tetele ina ia tufaina atu i aiga o loo mana’omia le suavai taumafa manino e fa’atalia mai timuga i le motu.

O lo’o mautinoa lava e mafai ona faaaoga le suavai ua ta’ia mai paipa vai mo le fa’aaogaina i ala o ta’elega ma nisi mea, ae o le suavai mo le gaosiga o mea taumafa ma le fofoga taumafa, ua tapena ai le matagaluega o lo’o pulea le suavai, mo tane vai e 500kalone le tetele, ia fa’atalia ai le suavai timu e aiga.

Ua fa’ailoa mai e Wallon Young, Pule Sili o le ASPA,”O le fonotaga a le komiti o le ASPA a le fono faitulafono sa talanoaina ai le a’afiaga o le si’isi’i pea o le maualuga o le suasami ma ua a’afia ai le suavai taumafa i atumotu o Amerika Samoa ae maise lava Aunuu, lea na afua ai ona faliu le tatou Pulega o le Suavai Mama Taumafa e saili ala e mafai ai ona fa’afo’ia lea fa’afitauli i se taimi vave lava a’o le’i a’afia le soifua maloloina o e o lo’o alaala i Aunuu.

O lo ua i ai le Kamupani a le Tutuila Wind & Energy ua galulue faatasi nei ma le ASPA e tau fa’amautu a’ia’i lea poloketi ma fa’apasia fo’i e ta’ita’i o le atunu’u mo le sapalai lelei o le eletise i Aunuu.

O le eletise lea e mafai ai ona galue lelei le fa’amamaina ese o le masima o lo ua lofia le suavai taumafa mama mo Aunuu. A le lava le sapalai o le eletise, o le a le mautinoa fo’i ona lelei le suavai fa’amamaina lelei mo le taumafa i le motu.

Ua fa’ailoa e Wallon Young, o se mea lelei ona o Kamupani lauiloa tetele i Iapani e lua lea e fai pa’aga ma le Tutuila Wind Energy o le Nippon ma le Renova, lea ua latou auaufa’atasi e fa’atulaia lea faamoemoe lelei mo Aunuu.