TALA I VAIFANUA

Pago Pago - AMERIKA SAMOA

SISIGAFU’A 2022 - SOFA’IA COVID-19 & FA’AITITIA POLOKALAMA

“O OE & LOU FA’AVAE” o le ‘au’au lea o le fa’amoemoe o Amerika Samoa i lana sisigafu’a lona 122 ai lenei, ae ua matua sofa’ia lava e le Coronavirus lona fa’amanatuina, ma ua sili ona pu’upu’u lona fa’amanatuina, peita’i, e le fa’aitiitia ai lona taua, i loto ma agaga ae maise i olaga o le atunuu atoa o Amerika Samoa ma ona tagatanuu, ma e o soifua fa’atasi ai ma fa’aauau ona faia galuega mo lona atina’ega mautu.

Mai le tolu tausaga ua te’a, ua fa’aauau pea lava ona fa’aititia le fa’amanatuga o le aso fa’apitoa mo Amerika Samoa. O le polokalama mo lenei tausaga sa faia i le Malaeoletalu i Fagatogo. 

Na saunia le Upu fa’amalosi ma le sauniga fa’afetai e le susuga le Faifea’u Tui L. Tuliatu o le Ekalesia Aso Fitu ma o le Aufaipese fo’i a lea lava Ekalesia sa saunia vi’iga o le sauniga.

I le saunoaga a Kovana Lemanu P.S. Mauga sa ia fa’afeiloa’ia le atunuu ma fa’amaulalo atu ona o le fa’aititia o le fa’ataunuuina o le fa’amoemoe sa loma, ma sa amata tapena i ai le atunuu ae lutia loa le fa’amoemoe i le sofa’i mai o le Covid-19 ia Fepuari 22, 2022 ma toe soloia ai mea uma na fa’amoemoe e fa’ataunuu. O le fa’atoesega ina ua le tau lau o le fa’amoemoe. 

Peita’i e tele mea sa toe manatu e toe fa’aa’e i lenei tausaga, e afua mai tu’uga fautasi o se mea e matua fa’atauva ai afio’aga ua tofu Sa ae maise o le mamalu lautele o Samoa o lo’o nonofo matau mai i fafo pe a mai se sao o le latou Fautasi i le tu’uga o le sisigafu’a.

Ua iloga ona fuafua o le a toe fa’aa’e fa’aili pu i lenei tausaga, ae amata mai e le fanau a’oga, o mea sa nene’e ai talavou e fa’atino le soifua fiafia i le musika ma fa’aili i totonu o le atunuu. Toe faia ta’avale teuteuina ma solo a autalavou. E mautinoa sa fa’ao’o atu tusi vala’aulia mo le tala a’ao mai o nisi o aumalaga mo le aso fiafia o le malo o Amerika Samoa, ae ua toe soloia uma nei tapenaga ona o le faigata o le fa’ama’i, ua lutia Amerika Samoa, ae ua faapea fo’i ma le usoga ia Tumua ma Pule i lenei lava vaitau e tasi.

O le fa’atulagaga sa i ai, ia le silia ma le 30 i latou i lalo i fale’ie, sa maua lava lea tamau. Ua suia le malo e na’o ona taiulu o vaega e tolu o lana faigamalo fa’ateritori. Kovana Lemanu Peleti ma Ella Mauga, Sui Kovana Talauega Eleasalo ma Maryanne Ale, Fa’amasino sili Lealaialoa Michael ma Abigail Kruse, Peresetene o le Senate Tuaolo Manaia Eti ma Fiapa’ipa’i Fruean, Fofoga Fetalai o le Maota o Sui Savali Talavou Ale ae le’i pa’au mai le faletua.

Ua aofia ai ma le Sui o le Faipule i le Konekeresi fa’apea ma le sui o le Malo tele na auai ai le tamaitai o lo’o fa’auluulu i ai galuega alofa a le FEMA ona o le Covid-19, Allison ma le Sui o le Ofisa o le Initeria fa’alotoifale Lydia Faleafine Nomura.

Na pa’au mai fo’i le afioga le Failautusi o le Ofisa o Mataupu Tau Samoa, Afioga le Ma’oputasi Mauga Tasi ma Tai’ulagi Galea’i Asuega, ma sui o Kovana Itumalo Misaalefua ma le faletua Lina Hudson, ona uma ai lea o nisi sa auai i lalo o le fale’ie o vala’aulia mamalu.

Ona o le pa’u ai o le aso tonu o le Sisigafu’a a Amerika Samoa i le aso Sa o le Toetu, o lea ua fa’amau fa’ailogaina ai le aso 18 Aperila e avea ma aso patino mo le fa’ailogaina o le Fu’a ma malolo ai tagata faigaluega uma e fa’amamalu le latou aso o le Fu’a 2022. 

FA’AMANUIAGA O LE FU’A  FAIPULE I LE KONEKERESI - UIFA’ATALI AMATA

“O le aso fa’amanatuina o le Fu’a a le tatou Malo, o se aso taua tele i o tatou tagatanuu uma, ma o le a tulitulimatagau pea le ufi a Sina, ae a se fa’ailogaina atoatoa o le tatou aso fa’apitoa i le tausaga fou pe a sopo i ai le soifua o tatou tagatanuu ma lo’u nei ola.”

“Peta’i e ui ina fa’aititia lava ona fa’amanatuina lenei aso, ae le avea ai le taua i o tatou agaga o lenei aso ua fa’amau fa’ailoga ai le feagaiga osia i le va o le tatou faigamalo ma le faigamalo a le Iunaite Setete o Amerika, lea e fa’aauau pea ona tatou faipa’aga e oo mai i le aso.”

“E le avea ai fo’i mautu ma le aoga o lenei ulua’i feagaiga osia i le va o tatou malo e lua, aua mai lava lena ulua’i tasuaga 17 Aperila 1900 se’ia oo mai i le 2022, o tatou soifua saogalemu ma le filemu pea i lalo ifo o apa’au o le Malo tele. Ua oo mai i lenei tausaga e le o tali ese lava le Iunaite Setete i o tatou mana’oga, o lo’o fa’aauau lava ona latou taualoaina le feagaiga osia ma le tatou malo fa’ateritori, e fa’afetaia ai le tofamamao ma le tofamanino a tatou tua’a na latou amata mea i lo tatou soifua fa’apa’aga ma le Iunaite Setete.”

“Ua tatou fiafia e faamanatu pea lava le avea o i tatou ma pa’aga a se atunuu tele ma le malosi. O lona paolo e fa’amalumalu i ai i tatou uma o ana pa’aga. Ua avea lo tatou sao e ala i a tatou fanau i totonu o vaega au, ma se tautua ua tatou nene’e ma mitamita ai.”

“Ou te toe fa’amanatu atu ia i tatou i lenei aso o el Fu’a, ia tatou fa’afetaia le Atua ona o tatou fanau ma aiga sa tautua ma o lo’o fa’auau pea ona tautua nisi i vaega au, aua o lo taotu sao soifua lea i le feagaiga osia ma le Iunaite Setete o Amerika. Tatou tuu atu i talosaga lo latou soifua tautua toto ma tautua tuavae i le Malo Tele, ia sao i ama le auaunaga, ia alofagia lava e le Atua i latou gapatia ma olooloia e fa’aui se sao mo lo tatou teritori.”

“Aua fo’i nei galo ia i tatou ina tatalo fa’atauanau i le alofa silisili ese o le Atua ina ia utufia loimata o le fa’anoanoa ona o e pele ua motusia mafutaga mafana ona o le Covid-19 ua sofa’ia lo tatou saogalemu fa’alotoifale, ia tuu atu fo’i i talosaga i le Atua le malosi ma lona poto e fa’aulufia le aufaigaluega o lo’o galulue i le ao ma le po mo le togafitiga o gasegase ma le sailia o e ua fa’agasegasea i le Covid-19, ina ia maua pea le malosi ma le fiafia e galulue fa’amaoni, ia saogalemu le atunuu.”

“O le fa’afetai ia sii a’e pea i le Atua ona o lona alofa e le mavae ma i tatou, ma lona foa’i mai o le soifua i le to’atele o lo’o saogalemu pea mai lenei fa’ama’i e fa’aauau tiute faia ma auaunaga a si tatou Malo i aso nei ua fitaituga ai le tatou folauga i ma’i vale o lenei olaga. Ia manuia  lau Fu’a Amerika Samoa.”

ASO ANANAFI NA MAUA AI SIAKI O LAFOGA

O le aso ananafi lea e tufatufaina atu ai siaki o lafoga totogi mo le vaega lona lima o le fa’asologa o lafoga totogi lea e aofia ai uma i altou na faila mai ia Fepuari 03, 2022 a latou lafoga. O lo ua fa’ailoa mai o le aofaiga o siaki uma ua mae’a ona faia e tufatufaina atu i lea aso ua maua ai le aofaiga e $1.4miliona e fa’aalu ai e le malo.

O le aofai mo lafoga totogi a le fanauiti o lo’o tausia e matua i o latou aiga e fa’aalu ai le $1.1miliona ae o le isi vaega o totoe o lafoga totogia lea mo tagata faigaluega.

E tolu lava fo’i ala o le a fa’ao’o atu ai nei siaki o lafoga. O le pusameli a nisi o lo’o ua fa’amauina a latou pusameli e fa’ao’o atu ai latou lafoga, teugatupe i faletupe mo e ua latou filifili e fa’auia atu fa’apea latou lafoga, ma le taua’aoina sa’o atu ole Siaki i le fa’amalamalama e tautua ai le atunuu a le vaega o le Disbursing a le tatou Matagaluega o Tupe a le Malo i le Maota o le Malo i Utulei.