TALA I VAIFANUA

Pago Pago - AMERIKA SAMOA

ASO MALOLO - ESETA & SISIGAFU’A AMERIKA SAMOA

E fa aso o le a fa’amautu ai le malologa o lenei fa’aiuga o le vaiaso, ona ua pa’u fa’atasi nei le fa’amanatuina o le Eseta ma le tatou sisigafu’a 122 ai tausaga talu ona tausia ma va’ava’aia lelei Amerika Samoa e le Malo tele o Amerika.

I le taimi nei e na’o le Malo o Amerika Samoa e fa’amamalu ai le aso Malolo mo le Eseta poo le Maliu o Iesu e togiolaina ai le lalolagi o tagata soifua uma mai le agasala. Peita’i ua soso’o ai ma le aso Sa lea ua pa’u tonu i ai le Aperila 17, o le aso na osi feagaiga ai Amerika Samoa ma le Malo tele o Amerika e avea i tatou ma se tasi o ona teritori.

O le aso Faraile e le o se alo Malolo a le Malotele, peita’i e tatala pea lava tautua e pei ona masani ai, e aofia ai le Falemeli tele i Fagatogo, ma o le Ofisa o le Saogalemu e fa’atautaia lava o latou tiute. O tatou faletupe ua fa’ailoa mai o le tatala lava mo le afa aso ona tapunia lea. TBAS e tatala mai le 9:00 se’ia pa’ia le 12:00 ona tapunia lea.

O le faletupe a le ANZ o le a tapunia i le itula e 12:00 ae matala pea le fa’amalama mo auaunaga masani e tala ai tupe ma teuina fo’i tupe, ma afai e mae’a lea o le a tapunia aloa’ia atoa loa auaunaga i le fa’aiuga o le vaiaso e aofia ai le aso Toona’i atoa. 

Ona o le aso Gafua lea ua fa’atulaga e fa’amamalu ai le Sisigafu’a lona 122 i Amerika Samoa, o lea o le a tapunia atoa ai uma faletupe e lua i le aso atoa.

“Ina tatou tutu fa’atasi ia Amerika Samoa ma fa’afetaia le Atua, aua o Ia sa fa’asinoa’ao i o tatou tua’a ua ala mai ai le tatou sootaga ma le Malo o le Iunaite Setete o Amerika, lea ua tatou va’aia pea le tutu mai, ma  fesoasoani ia i tatou i so’o se pagatia tatou te lutia ai, e le mafai ona le pa’au mai ma fesoasoani i lo tatou vaivai. Fai sau tatalo fa’afetai i le toetu manumalo o Iesu lo tatou fa’aola, fai fo’i sau fa’afetai i le alofa o le Atua ua tatou faipa’aga ai ma le Malo e sili ona tele lona tamaoaiga ma le agaga fesoasoani i ona teritori e malutia ai i so’o se faigata o lutia ai le tatou folauga. Fa’afetai i le Atua, fa’afetai fo’i ia Amerika,” o se vaega lea o le saunoaga a Kovana Lemanu Peleti Mauga. 

AOFAIGA A’AFIA I LE COVID-19 O’O I LE 5,475

Ua fa’ailoa mai le aofaiga o i latou ua maua i le Covd-19 talu mai ona amata sofa’i mai lea fa’ama’i i le atunuu ua atoa le 5,475 i latou e o’o mai ia Aperila 11. 

O le aofai o i latou ua toe malolosi mai le Covid-19 ua lisia mai ai le faitauga e 3,763 i latou, ma ua fa’amautu mai la o le aofai tonu o i latou o soifua nei ma le verusi o le Covid-19 i le atunu’u e 1,712 i latou.

Fa’ailoa e le susuga le Foma’i Dr. Akapusi Ledua, “E le faigofie ia matou o galulue ona va’ai atu i le tiga matuitui o le taofia o le tagata o aiga, ae maise lava matua matutua o lo ua fa’amaonia nei ua maliliu i le Covid-19, ae le mafai ona oo mai i ai se tasi o lona aiga e fai atu i ai se mavaega, pe o se toe fa’amafanafanaga i le o le a malaga. O se tiga matuitui lea e le mafai e matou foma’i ma tausima’i ona tau fa’amatala, aua e tofu lagona e i tatou o tagata o atumotu lea tiga ona o mafutaga pele ma mamae ma matua.”

E o’o mai ia Aperila 11, e 18 ua maliliu ona o le COVID-19.

MAUA PAILATE I LE COVID-19

Ua atoa le lua o aso o taumafai e malaga va’alele togipau a le Samoa Airways i le Manu’atele ae ua taofia pea lava, ona ua i ai le tasi o pailate sa fa’atulaga e fa’afoea lea faigamalaga ua maua lana suega o le Covid-19, ua ia te ia le Verusi.

Ona o le faigata tele o le taumafaiga e puipuimalu pea le Manu’atele mai le a’afia i le fa’ama’i, o lea ua pa’u ai le faigata i aoga o maliu sa tatau ona auina atu i le va’alele fa’atasi ma o latou aiga i nei malaga na fa’atulaga ma totogipau e i latou.

I le taimi nei ua leai ni pailate e mafai ona ausia le agava’a ua fa’atulaga e le DOH a le tatou Malo, o lea ua le mafai ai fo’i ona toe fa’ao’o mai nisi pailate e le Samoa Airways mai Samoa.

“O le mana’omia lea i ai, o le Pailate o lea fa’ato’a maua lava i le Covid-19, e le taulia, ae mana’omia le pailate ua mae’a maua, ma ua mae’a togafitia ma ua toe malosi mai le Covid-19. Ole ituaiga tagata lena e le o toe malosi tele le Verusi o le Covid-19 o lo’o fealua’i ma ia,” o le tala lea a le faatonu o le DOH, Motusa Tuileama Nua.

Ua galulue fa’atasi le Matagaluega o le Soifua Maloloina i Samoa, le tatou matagaluega fo’i o le soifua Maloloina iinei, ma le Kamupani Va’alele a le Samoa Airways ina ia mautu mai lea ituaiga o pailate e fa’afoea faigamalaga uma i le Manu’atele, aua o lea ua taofia ona o le Pailate ua fa’ato’a maua lea i le Verusi o le Covid-19 iinei.

O le Aso Gafua na taofia ai malaga se’ia oo mai nisi pailate mai Samoa e fa’afoea va’alele, peita’i o lea ua le oo nei lea fa’amoemoe, aua e leai se pailate a Samoa o ausia le agava’a lea e moomia nei a le DOH.

O le mea ua faia nei, ua alu le isi malaga muamua a le Manu’atele mo Manu’a ma avatu ai le isi maliu ma le pa’ia o aiga. O lea e toe fo’i mai loa toe alu fo’i e avatu ai le isi maliu ma lona auaiga atoa mo le fa’alavelave.

Fa’aalia le tulaga le fiafia tele o nai aiga, aua o le isi maliu ua mae’a faia fa’aaloaloga uma i si’i na alolofa atu ma isi tapenaga uma lava o le toe aso o si o latou pelega, ae o lea ua le taunuu fo’i le fa’amoemoe, ua faaauau pea ona tolopoina ona o ala o fa’aletonu fo’i i tulaga o feoa’iga. 

Talu mai lava le tausaga 2020 a’o feagai i tatou uma ma le tapenaga ina ne’i lofia i tatou i le Covid-19, sa fa’amautu mai lava e le Samoa Airways a latou pailate e to’alua e nonofo mau i Amerika Samoa ma tautua le mamalu o e femalaga’i i le va o Tuituila ma Manu’a. E matua sailia lava fo’i e le Samoa Airways i latou ua agava’a ma e mama mai le Covid-19 ina ia fa’afaigaluegaina i’inei. Peita’i ina ua tula’i mai le a’afiaga lea, ua to’atasi le pailate ua fa’amaonia lana suega, ae ua taofia ai ma le isi aua o lo’o ua fa’amauina o ia o se e galue feso’ota’i tele ma le Pailate ua a’afia.

O lo ua taofia nei i la’ua nei i le tatou falema’i fou o le Covid-19 i le Hangar a le Malaeva’alele ma ua tatou iloa lelei e fa’anofoesea mo le 14 aso.