TALA I VAIFANUA

Pago Pago - AMERIKA SAMOA

FA’AMAUINA TO’A 17 UA MALILIU MAI LE COVID-19 I LE ATUNUU

Mai fa’amaumauga o le fa’aiuga o le aso 10 Aperila 2022, ua fa’ailoa ai le atoaga o le 17 e ua maliliu ona o a’afiaga o le Covid-19, fa’aopoopo i ai ma isi lava a’afiaga o latou gasegase tumau sa mua’i maua ai a’o le’i pepesi le Coronavirus i le atunuu.

Peita’i o le aso 10 Aperila na fa’amauina ai le to’a 12 o e ua maliliu i le Covid-19, aisea ua sii vave ai lea faitauga? Ua fa’ailoa mai, o le to’a 4 o isi gasegase sa toai taunuu atu i le falema’i ae ua maliliu sa suesueina auiliili pe o maua i le Covid-19 ma ua mae’a nei sailiga ua fa’amaonia o lo’o ua maliliu i latou ona o a’afiaga o le Covid-19.

O maliu nei sa le aofia i le faitauga sa faamauina mai, ona o le tulaga e ao ina fa’amaonia a’ia’i, o le Covid-19 sa mafua ai ona maliliu i latou ma le oo mai ai i le falema’i.

O maliliu la nei ua mae’a fa’amaonia nei: 93 tausaga o le tina na maliu ia Mati 29, ma e le’i au mai i le falema’i ae ua maliu; 77 tausaga o le tama maliu ia Mati 30, e le’i au mai fo’i i le falema’i ae ua maliu; 39 tausaga o le tina Maliu ia Mati 30, maliu a’o fa’atalitali i le fale’ie a le Covid-19; 87 tausaga o le tina maliu ia Aperila 3, 2022 e le’i au lelei mai fo’i i le falema’i ae ua maliu. 

O le lipoti ua fa’amauina mai ia Aperila 09, 2022 sa fa’ailoa mai ai ua to’a 12 i latou ua maliliu i le Covid-19, peita’i ua leai se isi lipoti a le foma’i mai le LBJ Medical Center e tusa o ni fa’amaumauga mai le sui ua atoa i ai le to’a 12 o e ua maliliu.

O lo’o fa’aauau pea lava ona faia tuiga i nofoaga ua maea fa’alauiloa atu i le amataga o le vaiaso, ma ia amana’ia mai le fa’atalosaga a le tatou Malo ma le Komiti Fa’afoe o le Covid-19, ia gasolo atu ina ia faia tui puipuia, va’ai alofa i le fanauiti ia le pesia ma maumau le soifua i lenei fa’ama’i.

TALIMALO KOVANA AUMALAGA A SENATOA SA TO’AI MAI I LE ASO TOONA’I

O le itula e 2:00 i le aoauli ae tulaueleele loa le va’alele a le Malo sa malaga mai ai le to’a 30 o le Aumalaga a le vasega o Senatoa mai le Malo Tele, o se latou malaga ta’amilo e aofia ai ma le tatou nei teritori. E le’i malaga mai ai le tatou Faipule i le Konekeresi, Uifa’atali Aumua Amata peita’i, sa fa’atasi atu le afioga Kovana Lemanu PS Mauga e faafeiloa’ia le aumalaga ma latou o mai ai mo se matamataga i le tatou atunuu, ma le ‘aiga ua saunia lelei i le Maota o le Malo i Maugaoali’i.

Mai le aumalaga lenei sa fa’atasi mai ai ma o latou faletua, ma nisi o sui mamalu o le au fa’asalalau a le Senate a le Malo tele, ma ua fa’apea lava ona fa’afeiloa’ia ma le fiafia i latou uma e le tatpu ta’ita’i a’o le’i toe vala’aulia fa’apitoa i latou uma mo le asiasiga i se vaega o le tatou nei motu. 

Mai le malaeva’alele i Tafuna seia pa’ia Fatumafuti ona latou tutu ai lea iina ma faia sina maimoaga pu’upu’u a’o le’i fa’aauau atu le maimoaga i le taulaga i Fagatogo ma fa’atasi atu i le Maota o le Malo i Maugaoali’i.

Sa talisua ma le fiafia i latou i le ‘aiga o le aoauli i le Maota o le Malo ma toe taliu ai i le Malaeva’alele i Tafuna e toe fa’aauau le faigamalaga. Ua aofia i le aumalaga le ali’i o Senatoa Graham lea e fa’alauiloa ana fa’amatalaga tu’usa’o i le Twitter e faasaga i le Peresetene o le Malo o Rusia, ua tatau ona fa’atagatavaleina e se tasi, ona o lona sao i le amataga o le taua o latou faia e fa’asaga ia Ukraine.

Ua matauina le fiafia o ali’i senatoa o malaga mai e oo mai fo’i i le teritori pito i mamao mai i Saute o le lalolagi o Amerika, mao se tas fo’i o Senatoa sa iloga ona fiafia i lea faigamalaga o le susuga Senatoa Ronnie Jackson. Ua toe taliu le faigamalaga ina ia fa’aauau atu i le Atu Mariana, Ausetalia, Filipaina ma Thailand ma toe fo’i ai i Amerika.

TALIA E LE TUSI ATA FALEFONO FOU ATUGALUGA SENATE FAUSAGA O LE MAOTAFONO

O le susuga le ali’i tusi ata fale o le fausaga o le falefono fou Mark Lively na vala’auina fa’apitoa ina ia saunoa e fa’amalamalama pe talia fo’i atugaluga ua fa’ailoa mai e sui senatoa o le Maota Maualuga, ona o le popolega i le fausaga o le Maota Fono Fou. O lea fonotaga sa faia lea i le aso Gafua o le vaiaso ua te’a.

O le atugaluga lava o le vasega o Senatoa e masani fo’i ma fausaga o fale tetele, na mafua ona o le va’aiga a i latou i le fa’ata’atitiaga o Amopou U’amea tetele o le taualuga o le Maotafono. Ua i ai le latou manatu, e tauau e le ausia e lea fausaga ma lona fausia ia mautu lelei aiaiga tau fausaga a le FEMA ua mae’a fa’atulaga mai mo le maotafono lenei.

E le’i fa’a’alo’aloa fa’afesili a Senatoa Utu Sila Poasa na tuusa’o atu ia Lively, aua o ia e tatau fo’i ona auai i taimi uma a’o lo’o fa’agasolo le fausaga o le Maotafou, aua o le auivi lea e pa’u i ai le mamafa atoa o le taualuga o le Fale atoa. Ona o le fale u’amea le fausaga, e ao fo’i ina atoatoa ma mautu atili lona fausaga mai ona lagolago se’ia oo i ona u’amea fa’alava.

Ona o Lively o lo’o fa’amautu o ia i Honolulu, ua i ai lo latou sui o lo’o fai ma ia va’aia le galuega a le Kamupani Faufale a le Paramount o lo’o fausia atoa le fale e tusa o aiaiga uma o le fausaga ua fa’atulaga mai e le FEMA ma pasia ai i le ata na tusia e Lively. O le sui aloaia i Amerika Samoa nei, o John Goeke, o ia lea e galue tumau i le OPM a le tatou malo.