TALA I VAIFANUA

Pago Pago - AMERIKA SAMOA

FAITAU AOFAI O SUI UA MALILIU ONA O LE COVID -19 UA ATOA LE 12:

E oo mai i le afiafi o le aso Sa ma le taeao o le aso Gafua, e le’i suia lava le aofai o tagata ua malilu ona o a’afiaga o le Covid-19, o tumau pea lava i fa’amaumauga a le Matagaluega o le DOH le to’a 11, peita’i, o le faitauga ua tatau ona suia i ai ua atoa le to’a 12 o i latou.

O le tama mulimuli na fa’amauina ua maliu ona o a’afiaga o le Covid-19 e 93 tausaga lona matua, na maliu o ia i lona aiga, peita’i ua mae’a ona fa’amaonia lana suega ua i ai le verusi o le Covid-19. Na maliu lea tama i le aso Toona’i, ma ua atoa i ai le to’a 12 o e ua maliliu ma ua lisia o lo ua a’afia i le Covid-19. Ua fa’amauina fo’i, e le’i faia ni tui puipuia o lea tama matua, ma sa gata ona oo mai o ia i le falema’i mo ni talavai i le tausaga e 2019.

O le sui lona 11 o le tama e 74 tausaga le matua ma ua mae’a ona faia ona tui puipuia e lua ae le’i faia sona tui o le Booster.

FA’AILOA VAVE MAI E TAPUNIA PISINISI FA’ATAUTAIA A LE TBAS IA APERILA 16 &17, 2022:

Ua vave ona fa’alauiloa mai e le tatou faletupe o le TBAS o le a le tatalaina o latou faitoto’a mo pisinisi masani i le aso Toonai ma le aso Sa o le vaiaso a sau, ona ua i ai ni galuega e ao ina fa’aleleia atili a le faletupe a’o le’i aga’i atu ina latou tautuaina le mamalu lautele o le atunuu e suia mai latou teugatupe uma i le tatou faletupe i le teritori.

O le taimi lea e masani ona fa’aaogaina ai nao tatou masini talatupe e le mamalu o tatou pa’aga fa’apisinisi o lo’o fa’atautaia latou teugatupe i le tatou faletupe. 

O lona uiga o ituaiga o fesoota’iga nei o le a motusia mai le tautuaina o tatou tagata lautele e masani ona fa’aaogaina nei ala o tautua a le TBAS.

“O le ituaiga o galuega e ao ina fa’aleleia i le taimi lea e feso’ota’i lelei ma le fa’aaogaina o nei ituaiga o tautua i le lumana’i o le Faletupe, ma o le a mana’omia lava ona taofia uma nei tautua a’o fa’atautaia galuega fa’aleleia atili nei. O le umi e tapunia ai nei tautua i laina feso’ota’i, e 16 itula soso’o, ma o le a a’afia atu ai ma le aso 17 Aperila, 2022.” O se fa’apupulaga lea a le ali’i pule sili o le faletupe Dave Buhler

O lo ua fa’ailoa mai e le pulega o le tatou faletupe, “Ia fa’autagia mai e tatou tagata uma o loo teuina a latou tupe i le tatou Faletupe, ina ia le utia au fuafuaga uma ona o lenei taofiga o fefa’ataua’iga i taimi o lo ua ta’ua e taofia le tumau ai nei mea uma i le vaitaimi atofa mo galuega faaleleia a le faletupe.”

Manatua o le a motusia ai le fa’aaogaina o lau pepa talatupe o i ai i au fa’atauga sa’o mai faleoloa ma e aofia ai fo’i ma le talaina mai o au tupe mai le masini talatupe ATM.

Ua fa’atulaga e taofia nei tautua i le itula e 7:30pm Aso Toona’i se’ia oo i le 12:00i le aoauli o le aso Sa Aperila 17, 2022.

E moomia lava ona taofia nei mea uma, a’o fa’aleleia atili le tautua a le faletupe i nei ala o feso’ota’iga ma fefa’atauaiga ao le’i fa’aopoopo mai le isi siitaga o le tautua e ala i fesoota’iga tafa’ilagi.

Pe afai e i ai se isi fa’afesili e mo’omia pea lava e soo se tasi e mafai ona fa’afesili sa’o mai i le tatou faletupe a’o le’i oo i lea taimi e motusia ai le tautua i laina feso’ota’i a le tatou faletupe mo se isi fa’amalamalamaga taua mo oe. Mai le itula e 9:00am i le itula e 3:00pm i aso faigaluega ta’itasi poo le [email protected] poo le teletoni 633-8143.

SAILIA E LE KAMUPANI VA’ALELE SAMOA AIRWAYS NISI O MALO FA’AATUMOTU E TAUTUA AI:

Ua talosagaina nei e le Samoa Airlways a le Malo o Samoa nisi malo fa’aatumotu o le pasefika latou te tautuaina e fa’aaogaina ai latou va’alele o i ai i le taimi nei. Ua aofia ai i nei malo Fiti, Tonga, Atu Kuki, Vanuatu, Solomona, Niue, Tokelau ma Wallis & Futuna.

Ua fa’ailoa mai o nisi o malo ua fa’afeso’ota’ia ua le aofia ai Niu Sila ma Ausetalia, ma ua tula’i mai, ona o ituaiga o va’alele o lo’o ua totoe nei a le fuava’alele a le Samoa Airways, ua le aofia ai va’alele tetele ia e masani ona fa’aaogaina i lea va ma malo tetele nei. 

“Ona o lea ua le aofia Ausetalia ma Niu Sila i malo o le a tautuaina e le Samoa Airways, ua avanoa ai lea ala’ea mo tautua a nei malo e lua ma latou kamupani va’alele e tautuaina ai ma Samoa.” O se tala lea mai le sui o le Kamupani Va’alele a le Samoa Airways.

I lalo o le Vaega Fa’aupufai a le HRPP sa latou taumafai ai e lisia le va’alele tele 737-800 a’o le’i oo mai i le tausaga e 2021, ae peita’i e le’i mae’a aiaia ma fa’ataunuu lea fuafuaga tele a le faigamalo ae oo i le vaitau o le palotaga lea fo’i na tatou iloa le tele o fita na feagai ai ma Samoa i le taumafaiga e fa’aa’e se faigamalo tumau mo le Malo.

I le taimi nei mai le faigamalo a le FAST ua fa’aleaogaina ai lea taumafaiga ma ua le toe taumafai ai le Kamupani Va’alele a le malo o Samoa e fa’atau pe lisia mai lea va’alele. O le iuga lea ua i ai nei le fa’atautaiga o le Kamupani Va’alele, ole a tautuaina atumotu ae tuu le avanoa i isi pa’aga Kamupani Va’alele  e tautuaina mai le va ma malo tetele.

Fa’ailoa e le susuga le Minisita o le Civil Aviation a le Malo o Samoa, Olo Fiti Va’ai, na ia fa’ailoa maia, “O le va’alele lea o lo’o i ai pea lava i Brisbane ona o lo’o i ai ni fa’aletonu  e tatau ona inisinia fa’aleleia.”

“Ua le mafai foi ona fa’aauauina e le Pacific Aviation Safety i Port Villa, suesuega tau inisinia ona ua le mafai ona taua’aoina mai e le Samoa Airways nisi o fa’amaumauga sa moomia e mafai ai ona faamae’a ai ona siakia lenei va’alele ua lisia mai e i latou.” O se isi lea tala fa’aauau mai a lea sui o le Samoa Airways.

I le taimi nei ua toe talia nei le talosaga a le Virgin Australia e le Malo o Samoa ina ia fa’aauau mai ai faigamalaga i le va o Samoa ma Sydney ma Brisbane Ausetalia.

O le tulaga o i ai lea taumafaiga e maua ai le va’alele tele lea mo le Samoa Airways ona o lea ua fa’ailoa mai e le malo o lo ua latou solofuaina lea fa’atauga mo le Kamupani Va’alele a le Samoa Airways, i le tau e $180miliona.

FA’ALAUILOA LOU TAOFI E TUSA O LE ASO FAAPITOA MO LE LALOLAGI - POLOKETI A LE ROTARACT:

Ina ia matua una’ia malosi se galuega lelei o se toe fa’amanatu ma fa’ataua atili o le Aso Fa’apitoa mo le Paneta o le Lalolagi, ua tapena ai e le Rotaract Club a le Rotary Club se latou “Fa’atalanoaga Taua” e fa’atautaia i ala o feso’ota’iga tau Upega Tafailagi i le aso 22 o Aperila, 2022.

O le latou taumafaiga muamua lea sa fa’atinoina ia Aperila 06, 2022, sa latou fa’aautuina lea i le “Fa’aleleia atili o le Siomaga.” ma sa fa’atinoa lea e sui e to’atolu o le Rotaract Club. O i latou ia o Ian Moffitt , Leilua Watson ma Sabrina Sulua’i - Mahuka. O latou folasaga sa latou tuufa’atasia mai ai nisi o mea o lo’o taulamua ona manaomia le toe fa’aleleia ma o ni fa’afitauli o sili ona lalamua i tulaga e tatau ona fa’aleleia atili.

E tolu fa’aapotopotoga e le o ni fa’alapotopotoga a le Malo pe faia fo’i mo se polofiti, ae o lo’o ua fa’ailoa ai nisi o latou fesoasoani e toina mai lea i le malo tele ma e fa’auia mai e le Malo ma nisi o fa’alapotopotoga e le fa’atinoa mo se taui tau tupe.

O le susuga Mffitt o se tasi o tagata sueseu a le National Park Services o Amerika Samoa, ma o ia lea sa ia folasia mai le tulaga o le A’au ma le Gataifale i ona sosia poo punaoa e ao ina fa’aauauina pe fa’atumau mo tupulaga fai a’e o le atunuu. Ua oo lava lana tautalaga i tulaga o i’a ma ituaiga e tatau ona fa’aauau pea lava ona i ai aua augatupulaga fai ae o le atunuu, ma ituaiga o fagotaga e mafai ona fa’amautinoa ai o lo’o ausia le fa’amoemoe o le i ai pea o nei ituaiga o i’a, amu ma isi punaoa uma o le gataifale i le lumana’i.

O Sulua’i-Mahuka o le faia’oga o le Gagana Peretania i Samoana, o se sui totino o le “Finafinau” o se fa’alapotopotoga tumaoti e galulue mo le fa’aleleiga atili o le Siomaga ma o le faia’oga na manumalo i le TTY tausaga 2021.

O ia lea sa ia fa’amatala auiliili a latou poloketi e galulue i ai o tagata talavou e toe fa’afo’ia le sosia lelei o le siosiomaga i a latou galuega fa’atino fa’atasi. O galuega toe fa’amama, toe toto la’au, ma ua atoa le 6 tausaga o lo’o latou fa’atautaia pea nei galuega i mea ua latou va’aia, o lo’o ua i ai le mana’omia ona toe fa’aolaola lelei i le Siomaga.

Ua le gata i lea fo’i ituaiga o tautalaga, ua latou fa’amatala fo’i o latou sao ua fa’atino mo le taumafaiga a le atunuu ina ia gafatia e le lautele ona soifua fa’atasi i lenei fo’i vaitau ma o latou lu’iga o i ai. Ua tele fo’i isi poloketi ua latou galulue fa’atasi ai mo le Rotary Club, ua foliga mai o le Asosi na afuafua mai ai le Rotaract ina ia latou fa’atinoa le tele o latou poloketi aoga mo le atunuu.

O le isi lea la o latou poloketi fa’atino o le “Fa’atalanoaga i luga o Laina Fesoota’i Tafa’ilagi” ma ua fa’atulaga i le aso Toona’i nei. O le a aofia fa’atasi le Rotaract Club ma le Rotary Clu o Amerika Samoa, fa’apea le anoanoa’i o sui o le Rotary Club mai Fiti, Niu Sila ma Ausetalia.

“O le fa’atalanoaga o le a ‘au’au lea i ala e mafai ona fa’aleleia atili ai le Siomaga ma fa’atumauina ai mo isi augatupulaga uma o lo’o soloa’i mai o atunuu uma i le lalolagi atoa.” O se fa’asalalauga lea a le tamaitai o Sulua’i-Mahuka.

O le a fa’ailoa atili nisi o mea uma e fa’aalia i ai sou taofi i luga o le Itulau Facebook a le Rotaract mo nisi fa’amaumauga tau lea poloketi, poo le emeli [email protected].