TALA I VAIFANUA

Pago Pago - AMERIKA SAMOA

5,341 SUI UA A’AFIA I LE COVID-19 – TO’A 12 UA MALILIU

I le fa’aiuga o galuega i le aso Faraile na te’a nei, ua faamauina ai le atoa o le to’a 5,341 I latou ua a’afia I le gasegase o le Koviti-19.  E to’atasi na faamauina ua maliu, ua atoa ai le fuainumera e to’a 12 I latou ua maliliu I a’afiaga o lenei faama’I.

Ua fa’amautu mai e na’o le 91 le au pasese a le va’alele fa’apitoa na malaga mai ia Aperila 07, 2022. Na faia uma lava suega a le Pasese atoa lea ma e leai ma se tasi na fa’amaonia se suiga o i ai se verusi o le Covid-19, o lea ua tatala uma ai i latou e malaga i o latou aiga. Ua fa’atulaga le aso e faia ai latou suega e le aufaigaluega i le aso 10 ma le 11 o Aperila, ma e fa’asolo atu i latou i le Malaeva’alele i Tafuna e fa’atautaia ai latou suega ona matala loa lea o i latou mai le fa’anofoesea i aiga. O aso ta’itasi uma o le a fa’auia mai ai latou fa’amaumauga i luga o le TalofaPass ina ia mautinoa e le o ma’i se tasi o i latou nei.

O le pasese lea ua fa’ailoa mai e to’a 21 le aumalaga lea a le FEMA na malaga mai ai, ma o i latou nei ua fa’atulaga e galulue fa’atasi ma le DOH ma le LBJ Medical Center, e to’a 13 le aumalaga a le NuWest lea sa malaga mai ai fo’i, o vasega o foma’i, tausima’i ma techs na fa’atulaga e fesoasoani fo’i i togafitiga o le atunuu ua a’afia i le Covid-19. O lo ua fa’atulaga le isi to’a 14 o tausimai ma foma’i faapea ma Techs lea sa fa’ailoa mai ua mae’a ooi mai i le aso Toona’i O le vaiaso ua te’a.

O le aumalaga a le NuWest lea o lo’o ta’ita’ia mai e le tamaitai o Amy Wildermuth, fa’atonu o le Stragetic Partnership a le NuWest, sa ia fa’ailoa maia, “O le tautua masani lea a le latou aumalaga sa fa’atino i Washington, o le taumafaiga ia fa’aititia lava le aofai o le atunuu e a’afia ma maliliu ai i le Covid-19 mai le amataga o le fa’ama’i lenei.”

E 13 vaiaso lea o le a galulue ai lenei aumalaga mo le tatou falema’i i Faga’alu.

O le vaiaso fo’i na te’a sa amatalia ai ona faia suega o le Covid-19 i le Manu’atele. E lua aso sa faia ai suega i Ofu ma Olosega, ae tasi le aso i Ta’u Manu’a, ae ua fa’ailoa mai i le lipoti fa’amaumau a le Matagaluega o le Soifua Maloloina, “O lo’o tumau pea lava le mama o le Manu’atele mai lenei fa’ama’i.”

Na malaga i le aso Gafua se va’alele ma avatua ai le sapalai o tui puipuia fa’atasi ai ma suega uma mai le Matagaluega o le Soifua maloloina mo le Manu’atele, ua fa’ailoa mai o lo ua i ai pea lava sui ole Matagaluega o le Soifua Maloloina o lo’o galulue ma nonofo tumau i le Manu’atele, Ofu ma Olosega ma le FaleTa’u, o i latou na sa fesoasoani tele i le fa’atautaiga o suega ma toe siakia nisi e le’i faia tui puipuia ina ia fa’amae’a lelei uma lea tulaga i le Manu’atele.

FAAILOA NI FA’ALETONU UA FEAGAI MA NISI O AIGA - ONA UA FA’AUMIUMI LE FA’ASA O LE COVID-19:

O nisi o manatu fa’aalia, e tusa ai o le fa’aumiumi fo’i ona tapunia o a’oga fa’atasi ai ma e fa’asa o galuega  ma ua le taga fo’i le feoa’i, ua avea ma se pa pupuni i nisi o ala sa mafai ona tausailia ai le tausiga o aiga i totonu o le atunuu.

“O lo ua i ai popolega i pili totogi mo le eletise, o pili fo’i e totogia mo le sootaga o laina tafailagi mo meaa’oga a le fanau. O nei mea e fou tele i lo’u matua, e le masani ai, ae ua tuu le fa’atuatuaga i fanau e faia ai meaa’oga i nei ala uma. Ua taumafai e fa’aoo i ai le malamalama, ae tele mea e feso’ota’i ma nei nea e fa’aaoga, ua atili ai le niniva ma avea ma popolega poo se atugaluga i lo’u tina. Ua tele taimi ua ese lata va’ai atu i mea o faia e le fanau i luga o nei laina, ote atu ae fai mai o lae fai meaa’oga. E mautinoa lava e le o meaaoga nei.”

“Ua oo mai suega, ta’ilo poo ilafia e nei fanau se mea aoga i a’oga nei. Ae ua fai lava ona o le manatu e sau taimi ona toe fa’aleleia lea, ae ia le maumau se ola o i matou uma i le Covid-19 ma lona saua i le atunuu.”

“Asiasi atu i le ASPA, ua fai si maualuluga o pili ua taoto mai ai, e moni e le o motusia, ae tafefe i le taimi e amata ai galuega ae sau ma le tala, ua i ou a’ao le pili tipi. O mea nei e vave ai ona atugalu le mafaufau o matua, ma avea ma mea e foliga mai o le a mama’i ai, ae o fia ma’i se isi.”

Fesiligia le ASPA i le maualuga o le isi pili fou ua fa’aopoopo, ae tali le Kesia, “Oi o le pili lena e le’i alu atu se isi e fua lau mika vai, ma lau mika eletise, o lena e fua fa’atatau le faiga o le pili lena i lau pili na muamua atu. O le pili lena sa fa’aputu mai lava talu ona a’afia le tatou atunuu i le Covid-19, ae ua fua fa’atatau i ai le isi pili fou?”

O nei mea e fa’aoso le fiafia ai matua ma tagata totogi pili, ae fa’apefea la ona mautinoa o le lisi a le ali’i faitau mita o loo mau ai le faitauga tuai poo le faitauga fa’ata’ita’i, Ia o mea na o le a oo i ai le faitau mita lea e le savali ae totogi? Amuia outou o maua totogi ae le faigaluega.

“O le totogi o le fale mautotogi lea e nonofo ai le isi fa’afitauli. E le maua fo’i se tupe a le tagata e ona le fale latou pe a le totogia le matou mau ai i lona fale. A leai la ma ni galuega e le faigofie lava ma se mea e tasi. O lea fo’i e le’i maua mai lafoga aua e le’i oo mai le fa’asologa i le aso na faia ai le lafoga. O le tupe na maua mai mea’ai a le fanau e to’alua o a’o’oga, o lea ua leva na uma.”

O le fa’asoaina o le tupe pe a oo ina toe tatala lelei galuega ma fa’ataga e faia nisi gaoioiga e fesoasoani ai i le tama o le aiga ma lana siaki e fa’asoa mo le tausiga o le matou aiga, e mautinoa e le o faigofie, ma ua avea ma se atugaluga e moe ae le ma moe ai le mafaufau.” O se tagi tautala lea a se tasi o tina talavou, ua le faigaluega nei ona ua nonofo le fanau i le fale, ae ua alu na’o le tama e faigaluega se’i toe a’e a’oga a le fanau, maua le taimi o le tina e faigaluega ai.

MAUA I LE ASO GAFUA APERILA 11, 2022 - LAFOGA TOTOGI MAI IA FEPUARI 2&3:

O le vasega o e na faila latou lafoga ia Fepuari 02 & 03, 2022 ua fa’ailoa mai o le a aofia i le vaega o siaki lafoga ua mae’a faatulaga e tufatufaina atu i le mamalu lautele o le atunuu i ala ua e fa’atalosaga e fa’auia atu ai lau siaki lafoga.

O le aso Gafua nei o lo ua fa’atulaga e tatala ai le tufaina atu i nei siaki lafoga totogi, ma ua lapata’ia fo’i le atunuu, ina ia alofagia, afai e te oo mai e tu i laina mo lau siaki lafoga, ia faia lou pupuni fofoga ma ia e tufa’avava mai le tasi sui o lo’o i ou tua ma ou luma fo’i o le laina.

O le aotelega o le tupe fa’aalu mo nei siaki lafoga uma ua totogia nei e $1.4miliona na fa’aalu ai e le Matagaluega o Tupe a le tatou Malo. O le vaega tupe na fa’aalu i siaki lafoga totogi a le fanauiti e $1,068,486. ae o le aotelega o siaki lafoga ta’ito’atasi e leai ni fanau tausi na fa’aalu ai le $245,163.

O le a lava le ala na e mana’o ai e fa’auia atu ai lau siaki, teugatupe, pusa meli poo le fa’amalama a le Ofisa Disbursing, ia e oo ane i ai mo lea fa’amoemoe lelei.

Ua toe fa’amanatu atu fo’i e le Ofisa o Lafoga a le tatou Malo, afai e i ai se fa’afesili i lau lafoga ua mae’a faila, aua ne’i toe taumafai e oo atu i le Ofisa o Lafoga, ae na’o na e telefoni atu i le 633-4182 ma e fa’afesiligia se fesoasoani i lau mataupu o e fia mautinoa lelei lona tali.