TALA I VAIFANUA

Pago Pago - AMERIKA SAMOA

PUIPUIA PEA MANU’A MAI LE COVID-19

I le taimi nei ona o lo’o pepesi le verusi covid-19 i Tutuila nei, ae o lo’o mama pea lava le Manu’atele, o lea ua fa’atulaga ai e le DOH se faiga ina ia mautinoa lava o lo’o malu puipuia mai pea Manu’a i le Covid-19.

O lo ua fa’ailoa e le DoH, e ao ina faia uma suega mo e o le a malaga, ma fa’ailoa mai e le o a’afia ona fa’ato’a malaga lea, pe a oo ina toina mai se avanoa mo nisi e malaga.

O se tala mautu mai sui mamalu o le FEMA lea o fesoasoani malosi i le galuega a foma’i ma tausima’i i le atunuu, sa fa’ailoa ai i le fonotaga ma le Komiti Fa’afoe o le covid-19 i le atunuu, “O le vave ona fa’alogoina o lo ua tau alia’i mai ia te oe o auga o le Covid-19 ma e alu loa e fa’amautinoa pe ua e maua ai pe leai, o le vave fo’i lea ona e le afaina tele i le verusi o le Covid-19.”

“Ona o le aotelega lea sa i ai ia Mati 27, e 3,422 o le 84.7% o i latou na o lo ua mae’a faia tui puipuia e pei ona fa’atulagaina e tete’e atu i le verusi, ae 4.2% ua ta’itasi o latou tui ua faia, ae 6.8% e le’i faia ni o latou tui puipuia, ae o le 4.5% e le’i oo i tausaga e faia ai tui puipuia poo le 5 tausaga. Mai lea lava aotelega o tagata uma na fa’amaonia o i ai le verusi lea, e 56.1% e le’i faia ni tui o le Booster.” 

Ua toe fa’apupula atili e le sui lea mai le FEMA, “Ua lava tapena tagata, ae ua i ai lava le avanoa e maumau ai le soifua ona e le’i atoatoa le tapenaga.” O lana toe tima’i, “Ia e faia lau vaega, ina ia le avea i tatou ma se sootaga e oo mai ai le maumau o le soifua i nisi e pele ia i tatou.”

O le vaiaso lenei sa fa’atulaga e oo ai i le faitauga sili ona maualuga le aofai o e ua a’afia i le verusi e ala i suega fa’atautaia ma le aofai o le a fa’amaonia le a’afia. E tusa i le 300-400 tagata i le aso e tasi. 

Ua fa’ailoa fo’i e ali’i foma’i, “O le mea e tatau ona silafia e le atunuu, ua mafai ona fa’amaonia nei matematega, ona ua to’atele o le atunuu ua tofu faia a latou vaega uma i le galuega tima’i, ia le fa’apotopoto ae taofiofi mai le fa’atasitasi e pei ona masani ai le tatou soifuaga. Ia tumama ma fa’amama mea uma i totonu o tatou lotoifale ma nofoaga faitele e masani ona fa’aaogaina e le mamalu lautele i so’o se taimi, ia fa’avava mamao ma le tasi i le isi, ma ia fa’aauau lava ona fa’aaogaina a tatou pupuni fofoga i taimi uma.”

ANZ AMERIKA SAMOA BANK - TULA’I ESE MAI AMERIKA SAMOA

Ua fa’alauiloa e le Pulega o le Amerika Samoa Bank, ua mae’a faia le fa’aiuga i latou e ona lea faletupe i le atunuu, o le a fa’amuta le latou tautua ma tula’i ese mai le tatou atunuu, Amerika Samoa.

Ua faia le fa’aiuga ina ia mafai ona fa’amalosia a’ia’i le latou tautua i atunuu e ese mai i Amerika Samoa e aofia ai Fiti, Samoa, Vanuatu, Atu Kuki, Solomona ma Kiribati, ma ua aofia ai fo’i ma Timor Letste, ae o ona lala i Amerika Samoa ma Guam o le a latou tapunia lea.

O le Pule SIli o le ANZ i le Pasefika, Tessa Price, sa ia fa’ailoa “O matou lala i isi atumotu o le Pasefika ua silia ma le 142 tausaga o matou fefa’ataua’i ai, ma o i matou fo’i o le latou fa’amoemoega sili i tulaga o fefa’ata’uaiga ma ua iloga le olaola ai o matou fo’i ala o tautua, ma ua mafai fo’i ona malosi se matou tali atu i o latou mana’oga, aua o lo’o feso’ota’i tonu ma sootaga ma ala eseese o fesoasoani mai Ausetalia ma Niu Sila.”

“Peita’i i Amerika Samoa, e o i matou le ituaiga o faletupe o lo’o malosi i ai lea tulaga, ma ua le mafai ona tauva i matou i ala fa’apisinisi ma isi faletupe tetele i le Iunaite Setete aua e le o tutusa ituaiga o aiaiga tau tulafono o teugatupe ma fefaataua’iga o fa’agaoioia ai matou tautua i Ausetalia ma Niu Sila ma le Iunaite Setete o Amerika. O le malosi’aga o tautua a le ANZ e le o maua i le matou sootaga ma pa’aga i totonu o le teritori, ona aiaiga nei, ma ua iloga ona a’afia ai le tautua i ona vala e tatau ona malosi ai e tautua pisinisi, tagata lautele ae maise le Malo o Amerika Samoa.”

O lo ua fa’ailoa mai e 6 masina ua fa’atulaga ina ia saunia lelei e tagata uma o faia teugatupe i le latou faletupe sootaga ma nisi faletupe ina ia tautuaina ai i latou a’o le’i tapunia o latou lala uma i le teritori o Amerika Samoa.

Ua fa’ailoa mai e le pule sili o le ANZ bank i Amerika Samoa ma Guam, Clarke Schaumann, “O lenei fa’aiuga ua faia e le’i faigofie ona fa’amautu, peita’i o se fa’aiuga e ao ina faia.”

Ua tuuina mai fo’i e le pulega se sootaga e mafai ona sailia ai e nisi o le atunuu faletupe i le Iunaite Setete e mafai ona fa’auia uma i ai le latou teugatupe i laina o feso’ota’iga ma isi faletupe uma i laina tafailagi  covidbanking.joinbankon.org.

Pe afai fo’i o le a tapunia latou ATM poo masini talatupe, o le a mafai lava e le mamalu o le atunuu o i ai latou pepa tala tupe ona fa’aaoga i masini ATM a le TBAS.

PRODIEUS LUTU-FUGA - AUSIA AGAVA’A MO AOGA FA’AMILITERI E 2

Ua matua fa’atiafiaina le tatou sui Faipule i le Konekeresi, Uifa’atali Aumua Amata, ua ma nuia le talosaga a le ali’i talavou o Prodieus Lutu-Fuga mai Samoana High i a’oga Fa’amiliteri e lua na fa’aulu ai ana talosaga.

Ua talia mai o ia i le A’oga Fa’a-Kapeteni o Va’a Folau poo le Merchant Marine Academy fa’atasi ai ma le taliaina fo’i o lana talosaga e fia ulufale i le US Coast Guard Academy.

Ua faamanuia mai fo’i le afioga le Faipule i le Konekeresi a le tatou malo i le ali’i talavou, ua fa’amanuiaina ana talosaga e lua ma o le a ia filifili fo’i i le aoga o le a fa’aauau i ai lana taumafaiga i le tausaga a’oga fou. O le talosaga a Lutu-Fuga i le US Coast Guard Academy e le moomia ai se fa’amaoniga a le tatou Sui i le Konekeresi, peita’i na fiafia lava Lutu-Fuga e fa’aulu i ai lana talosaga ona o lona naunau i sona avanoa i nei ituaiga o a’oga i le lumana’i.

O le US Coast Guard foi, sa amata ona o mai e fa’alauiloa i a’oga maualuluga i Amerika Samoa i le 2018, le aoga o le i ai o nisi o alo o le atunuu i a latou A’oga fa’apitoa nei, aua e aoga ona puipuia lava e alo o Amerika Samoa o latou lava gataifale ma ia tumau lea manulauti i o latou loto ma agaga, o latou laufanua ma gataifale e ao ina saogalemu.

“Fa’amalo atu ia oe Prodieus Lutu-Fuga, ua ou fiafia ou te fa’ailoa atu lou pasia lelei o agava’a uma e mafai ai ona e ulufale i le Mechant Marines Academy i King’s Point , New York. Peita’i ua fa’ailoa mai fo’i lou agavaa e te ulufale i le US Coast Guard Academy i New London, Connecticut, ma o ni avanoa lelei tele ua e filifili ai, aua se faiva e te fia a’utau ai ma soloa’i mai ai e te tautua ai i le lumana’i. O avanoa fo’i ua sili ona mo’omia nisi e agava’a ai mo le tautuaina o le tatou atunuuu.”

Ua le gata i lea, ae ua fa’afetaia le sapaia ma le tausiga a matua, le tina ia Kimeberly Lutu-Fuiava ma le pa’ia o aiga ona o le taumafaiga a le fanau,e afua mai lava i aiga ina fafau se’ia oo ina gafatia e le tamaititi ona fa’amautu ana filifiliga i faiva e fia aoaoina lelei ai, ia agava’a mo lona lumana’i manuia.