To’atolu isi tagata maliliu Koviti-19 i Amerika Samoa

Pago Pago - AMERIKA SAMOA

E tusa ai ma ripoti mai le Task Force i le taeao ananafi, ua taua ai le toe maliliu ai o nisi se to’a 3 o le atunuu mai le faama’i o le Koviti-19.

O le afioga i le tamaitai faipule ia Andra Samoa, o le sui lea o le Maota o Sui i le Task Force sa ia faamaonia lea tulaga i le taimi o le Fono a le Maota o Sui i le taeao ananafi.

Saunoa Samoa e faapea, o i latou e to’a 3 na maliliu ananafi, ua atoa ai le to’a 7 o i latou ua maliliu i le faama’i.

O se tasi o i latou e to’a 3 na maliliu ananafi o se tina talavou e 29 tausaga, ae o le tagata matua e 63 tausaga le matua. O i latou foi e to’a 3 faatoa maliliu atu, e i ai foi gasegase tumau o le tino e aafia ai i latou.

Sa ia taua atili foi e faapea, ua oo atu nei i le 4,206 le aofai o i latou ua faamaonia le aafia i le faama’i talu mai le aso Lulu na te’a nei.

Na tula’i le afioga i le alii Faipule ia Ape Mike Asifoa le tulaga mata’utia ua aga’i atu i ai le faama’i mo Amerika Samoa, pe a faatusatusa i nisi o setete o le malo tele e pei o Misisipi.

Saunoa Asifoa e faapea, o ripoti mai le malo tele ua manino ai, o Mississippi le setete pito toatele tagatanuu na maliliu i le aso 28 o Mati ae ua 2 tausaga talu ona fetaiai Misisipi ma le faama’i.

Mo Amerika Samoa, o lea faatoa 5 vaiaso talu ona aga’i mai le faama’i, talu mai le aso 21 o Fepuari, ao lea ua to’a 7 tagata maliliu, lona uiga, e fai lava se televave o le alu o le maliu i totonu o Amerika Samoa.

Sa ia fautuaina tagatanuu uma ina ia faataua puipuia o le faama’i ma tausia le saogalemu o tagata uma o aiga aemaise lava tagata matutua o aiga o loo i ai gasegase tumau.