Taofia i le Toese ni alii se to’alua ona o tu’uaiga o le gaoi

Pago Pago - AMERIKA SAMOA

O le masina na te’a nei na pu’e fa’apagota ai e Leoleo ni ali’i se to’alua ona o tu’uaiga i lo la auai i le osofaiga o se Faleoloa i Tafuna i le amataga o le masina o Tesema o le tausaga na te’a nei.

O ali’i e to’alua ua molia nei e aofia ai Soo Kato ma Pine Aga. O le masina lava fo’i na te’a nei na tutula’i ai i laua nei i luma o le Fa’amasinoga Fa’aitumalo mo le la ulua’i iloiloga. 

Ua molia e le malo le ali’i o Kato i moliaga mamafa e 2 e aofia ai le talepe fale i le tulaga lua ma le moliaga o le gaoi, o le vaega C lea o solitulafono mamafa, lea e mafai ona fa’asala se tasi i le toese mo le umi e le silia i le 7 tausaga, pe faasala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

O le alii o Aga o lo o tu’uaia i moliaga e 2 o le talia o oloa na ave faagaoi faapea ai ma le tete’e atu i Leoleo ao taumafai e pu’e fa’apagota o ia, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, pe faasala fo’i i faasalaga uma ia e lua.

E $10,000 lea ua fatulaga e tatala ai i tua Kato, ae $5,000 e tatala ai i tua Aga. Afai ae mafai ona tatala i laua i tua mai le toese i Tafuna, ua fautuaina i laua e le Fa’amasinoga ina ia tausisi i soo se tulafono a le malo, e le mafai fo’i ona la taumafai e tuua le atunuu se’i vagana ua tuuina atu se poloaiga a le Fa’amasinoga.

E le mafai ona la taumafai e faafesoota’i molimau a le malo i soo se auala, e aofia ai ma i latou o lo o a’afia i lenei mataupu. Ua poloaina fo’i e le Faamasinoga ia Kato ma Aga ina ia aua ne’i la toe taumafai e aga’i atu i le nofoaga o loo i ai le fale na tula’i mai ai le solitulafono, po o fanua o isi aiga ma pisinisi e aunoa ma se faatanaga mai aiga ma pisinisi e ana ia fanua.

Na teena e le Fa’amasinoga le talosaga na faaulu e le loia a i laua ua molia, mo se avanoa e mafai ai ona fa’aitiitia le tupe e tatala ai i tua i laua. Na talosaga le loia fautua lagolago ina ia faaitiitia le tupe e tatala ai Kato i le $2,000, ae faaitiitia le tupe e tatala ai i tua Aga i le $1,000.

Na taua atili e le loia fautua e fa’apea, o i laua nei ua molia, e le o ni tagata e ono masalomia le sosola ese ma le atunu’u, e le o ni tagata fo’i e ono lamatia ai le saogalemu o tagata lautele. O Kato ma Aga e pei ona taua e le la loia fautua, o ni ali’i o lo o galulue mo le tausiga o la aiga, o le ulua’i taimi fo’i lenei ua molia ai i laua i ni solitulafono.

Na tete’e le loia a le malo i le talosaga a le itu tete’e. Na taua e le loia a le malo e fa’apea, o le tupe ua faatulaga e tatala ai i laua nei, ua talafeagai mo le mamafa o solitulafono o loo molia ai i laua. Na taua atili fo’i e le itu a le malo e fa’apea, o gaioiga sa faia e i laua nei i le taimi o le solitulafono, na atagia mai ai le avea o i laua ma tagata e ono lamatia ai le saogalemu o tagata lautele.

I le mae’a ai ona iloilo e le Fa’amasinoga o faafinauga a itu e lua, na tuuina mai ai loa le faaiuga e teena ai le talosaga ina ia faaitiitia tupe e tatala ai i laua i tua. E talitonu le Fa’amasinoga, o lo o talafeagai pea lava vaega tupe ua mae’a ona fa’atulaga ma le mamafa o solitulafono o lo o tu’uaia ai i laua.

TAGI A LE MALO

E pei ona taua e le malo i le latou tagi e fa’apea, o le masina o Tesema o le tausaga na te’a nei na logoina ai e le ali’i Pule o le Faleoloa a le Lin Mart i Tafuna le Ofisa o Leoleo mo se fesoasoani, se gaioiga faasolitulafono e aofia ai le ave faagaoi o oloa mai lona faleoloa, lea na maua ina ua mae’a ona ia vaavaai i ata sa pu’e e le masini pu’e ata a le Faleoloa.

Na taua e le ali’i Pule o le Faleoloa i Leoleo e faapea, ina ua usu mai i le taeao o le aso Tofi, 12 o Fepuari 2022 e tatala lona faleoloa, sa ia maitauina ai le faitoto’a pito i tua ua malepe, atoa ai fo’i ma le faamalama i le itu i Saute o lona Ofisa ua tatala ese luva e 5. Sa ia maitauina fo’i i le vaega e teu ai oloa i le Fale Teuoloa, le tele o pusa oloa ua aveesea mai le nofoaga sa i ai ae o isi atigi pusa laiti ua paepae solo i luga o le foloa.

Na siaki e le Pule o le Faleoloa le masini pu’e ata ma maua ai gaioiga sa mafai ona pu’eina i le itula e 3:43 i le vaveao o le aso lava lea, o se tagata e fusi atoa lona ulu o loo fealua’i i totonu o le faleoloa.

Na tuuina atu e le Pule o le Faleoloa i Leoleo le kopi o le ata sa pu’eina e le masini a le Faleoloa, ina ia mafai ai ona fesoasoani ia latou sueseuga, ma galulue ai loa alii Leoleo Suesue e tu’u faatasi mau faamaonia mo le latou suesuega.

E pei ona taua i suesuega a Leoleo, e tele naua oloa na aveese ma gaoia mai i totonu o le Faleoloa. O nisi o ia oloa e aofia ai pusa saimini e 10, lea e ova i le $80 le tau aofa’i; e 2 pusa ga’o o le ituaiga o le Wesson oli e tusa ma le $165 lona tau aofa’i; 2 pusa o pepa ‘ai e taua o le ‘onion rings’ e tusa ma le $192.40 le tau aofa’i; faapea ai ma le tele o mea’ai tupu apa e silia ma le $250 lo latou tau aofa’i. E oo fo’i i pusa o oloa mo pepe e pei o mea’ai ma isi oloa e patino i pepe na gaoia uma.

A o galulue Leoleo i le tau sailia o ni fa’amatalaga e uiga i lenei fa’alavelave, sa fa’afuase’i ona aga’i atu se tagata ma ia faailoa i Leoleo, o lo o i ai ni fa’amatalaga o lo o ia te ia e ono fesoasoani i le latou suesuega o lo o fa’agasolo e uiga i lenei mataupu.

Na taua e le molimau lea e fa’apea, i se tasi o aso ao faia le latou inugapia ma ana uo i le fale o se tasi o ana uo, na faafuase’i ai ona alu atu le uo a lona uso matua e igoa ia “KATS”, poo Kato fo’i e pei ona taua i le tagi a le malo ma fesili atu ia te ia, pe mana’o e fa’atau sana pusa ga’o fai mea’ai mo lona afafine pepe. 

Na taua e le molimau lea i Leoleo e fa’apea, e tusa ai o le fa’amatalaga a Kato ia te ia, e 2 pusa o oloa mo pepe na o atu ma ona matua mai le aso fanau o le afafine o le latou Pulenu’u, ma, o loo tau saili se isi e faatau ai ona e leai se pepe a le latou aiga.

Na fa’aauau suesuega a Leoleo ma latou asia ai loa le fale a le susuga a Kato mo se avanoa latou te talanoa ai e uiga i lenei mataupu, ma malie ai loa Kato latou te malaga ma Leoleo i le Ofisa o Leoleo i Tafuna mo se latou talanoaga.

Na aga’i atu Leoleo ma latou pikiina mai Kato mai lona fale, ae auina atu i le Ofisa o Leoleo i Tafuna mo suesuega. Ina ua fesiligia o ia, sa ia ta’utino ai i Leoleo ma faamaonia lona osofaia o le Faleoloa o Lin Mart ae gaoia le tele o oloa sa i ai.

Na taua atili e Kato i Leoleo e fa’apea, o le tele o oloa sa ia gaoia sa ia tuuina atu lea i lana uo o Aga, o ia fo’i lea e ana le ta’avale na fa’aaoga e la’u ese mai ai oloa mai le taimi na gaoia mai ai ae momoli atu i lona fale i Ottoville.

O oloa uma sa gaoia e pei ona taua e Kato, o lo o i ai uma i le fale o Aga.

E 2 aso talu ona tuana’i le fa’atalatalanoaina e Leoleo o Kato, ae latou aga’i atu loa ma piki mai le susuga a Aga.  Ina ua taumafai Leoleo e loka lima o Aga, sa tafiti solo o ia ma taumafai e tete’e atu i Leoleo. Mulimuli ane, sa mafai lava ona loka e Leoleo ona lima ma taofia ai loa o ia i lalo o le vaavaaiga a Leoleo.

Ina ua fesiligia o Aga, sa ia ioeina ai le fa’aaogaina o lana ta’avale a la’u ese mai ai oloa sa gaoia mai e Kato mai le nofoaga o loo i ai le Faleoloa na a’afia, ae la’u uma atu i lona fale. Sa ia taua atili fo’i e fa’apea, o nisi o oloa sa mafai ona fa’atau ma la vaelua ai ma Kato i le tupe, ae o isi oloa sa teuina lava i lona fale mo le fa’amoemoe e fa’aaoga mo ia ma lona aiga.