Talosaga Faipule Alumamalu mo se isi ATM mo Manu’a

Pago Pago - AMERIKA SAMOA

O le iloiloga a le Komiti o le Faagaioiga o le malo a le Maota o Sui, ma le Pulega o le Faletupe a Amerika Samoa (TBAS) i le vaiaso nei, na toe faamanatu ai e le afioga i le ali’i Faipule mai le itumalo o Manu’a #1 i le Pulesili o le TBAS lana folafolasaga i le tausaga na te’a nei, o lona fausia lea o ni masini ATM se 2 mo le itumalo o Manu’a.

Na faamanatu e le afioga a Alumamalu Filoiali’i Ale ia David A. Buehler, e o o mai lava i le taimi nei o lo o faatali pea tagata o lona itumalo i le isi masina ATM sa ia folafola e faapipii i le tausaga na te’a nei.

“Sa ou talosaga atu ia te oe i le tatou feiloaiga i le tausaga na te’a nei mo se isi masini ATM mo lo’u itumalo i Manu’a, ma e ta’utino mai ai o le a faatino lea tulaga mo le itumalo. E o o mai lava i le taimi nei e le i taunuu lava lau folafolaga lea mo Manu’a,” o le saunoaga lea a Alumamalu ia Buehler.

Saunoa atili Alumamalu, e le lava le masini ATM e tasi o lo o i ai i Manu’a i le taimi nei, ona o nisi o taimi e fai ma leaga ai le masini, ona malaga mai lea o tagata o le itumalo i Tutuila e tala atu ai tupe e fa’aaoga e o latou aiga.

Na taua e Alumamalu, e le o se tulaga faigofie le alu o le silia i le $100 a le tagata Manu’a e totogi ai lona pasese, e sau ai i Tutuila e tala atu se tupe, ona o le faaletonu soo i le masini ATM o lo o i ai.

Na faamatala e Buehler ia Alumamalu ma le Komiti, e i ai le fuafuaga fou a le TBAS ua mae’a ona faatulaga mo le fausiaina o se isi masini ATM mo Manu’a, ao lo o vaavaai pea i se taimi fetaui e faataunuu ai lea fuafuaga.

Na faauilavea le afioga a Alumamalu ma saunoa atu ia Buehler e faapea, “O lau molimau fo’i lea na fai mai i le tatou feiloaiga i le tausaga na te’a nei, fai mai ua i ai le fuafuaga ua i ai mo le fausiaina o se isi masini ATM, a o lea ua oo mai i le aso e lei faia lava se mea.”

“O lea lava e faatalitali lo’u itumalo po o afea e fausia ai se isi masini ATM mo i latou. E ova i le $100 le tupe e totogi e le tagata mo le vaalele e sau ai i Tutuila e tala atu se tupe i le masini ATM i Tutuila nei, talu ai le leaga soo o le masini ATM o lo o i ai i Manu’a,” o le saunoaga lea a le afioga a Alumamalu.

Saunoa Buehler, o se tasi o faafitauli o lo o faigata ai ona faapipii se iisi masini ATM i Manu’a, e le gata e taugata ma lusi ai tupe a le Faletupe, ae tau leai fo’i ni tagata o lo o nonofo i Manu’a latou te faaaogaina lea auaunaga.

Na toe osofa’i e le afioga a Alumamalu ia le Pulesili o le TBAS ma saunoa atu i ai e faapea, “Aua e te toe aumaia ni ituaiga faamatalaga e faapena, o lo o i ai tagata o lo o i ai i Manu’a i le taim nei. Pe to’atasi lava le tagata e nofo i Manu’a, e faitauina lava lena tagata o tagata soifua, e tatau fo’i ona agava’a i soo se tautua o loo maua i Tutuila nei.”

Na fesoasoani atu le Taitai Komiti, afioga i le alii Faipule mai Aua ia Faimealelei Anthony Fu’e Allen i le mataupu ma ia fautuaina ai le susuga a Buehler, pe to’atasi pe to’alua tagata e nonofo i Manu’a, e tatau lava ona faatino auaunaga e tautua ai tagata ia e to’alua.

“O le Faletupe lea a tagatanu’u o Amerika Samoa. Afai e faitau miliona o lo o fa’aalu e le malo mo le fausiaina o atina’e mo Tutuila, e tatau fo’i la ona faatino auaunaga nei e pei o le masini ATM mo tagata Manu’a,” o le saunoaga lea a Faimealelei.

Na fesili le afioga i le alii Faipule ia Avagafono Tuavao Vaimaga Maiava, poo malu puipuia teugatupe a le atunuu i totonu o le TBAS, e ui e le o puipuia le Faletupe i lalo o Teugatupe a le Feterale (FDIC).

Saunoa Avagafono e faapea, o tagata Samoa e fai faalavelave lava i aso uma, e to’atele fo’i tagata e tua i nonogatupe e faatino ai la latou tautua mo aiga, nu’u ma ekalesia. 

Sa ia faafetaia le pulega a le TBAS e tusa ai o le tautua o lo o faatinoina mo tagatanu’u o Amerika Samoa i nei tausaga e tele talu ona faatula’i mai le auaunaga a le Faletupe.

E ui e le i mafai e le alii Pulesili ona faamaonia i lana molimau le malu puipuia o teugatupe a tagatanu’u, peita’i sa ia taua e faapea, o le faanaunauga atoa lena o le tautua a le TBAS, ia malu puipuia teugatupe a tagatanu’u faapea ai pisinisi ma le malo.

O se tasi o mataupu na fesiligia i le taimi o le iloiloga, o le faaletonu o lo o maitauina i cards a le TBAS.

Saunoa le afioga i le alii Faipule ia Lua’itaua Gene Pan e faapea, o se tasi o faafitauli o lo o maitauina i le tele o taimi, o le le mafai lea ona faaaoga cards a le TBAS i taimi e totogi ai faatau a tagata i Faleoloa. O nisi o taimi, e toe fo’i ai tagata i le masini ATM e toe tala mai le tinoitupe e totogi ai a latou faatau, ona e fiu e fa’aaoga cards e le lelei.

Na faamanino e Buehler, o se tasi o faafitauli e mafua ai le tulaga lea, o masini o lo o faaaoga e le tele o faleoloa, o masini mo cards a le ANZ, e leai ni masini e faapitoa mo cards a le TBAS, atonu o iina lea e mafua ai ona le kilia, ae o lo o i ai lava le tinoitupe i totonu o le card.

Sa ia taua atili e faapea, o Me i lona aso muamua lea ua fuafua e faaaoga ai masini mo cards a le TBAS.

O le isi faafitauli e pei ona saunoa Lua’itaua, o le telefoni atu o le tagata e fia talanoa i se tagata faigaluega a le TBAS, ae tali mai e le masini. 

Sa ia taua e faapea, e le fia talanoa tagata o le atunuu i se masini, e fia talanoa tagata o le atunu’u i se isi fo’i tagata soifua. Ae o le tele o taimi, e tali mai ai le masini. Ae a tuu atu i ai le talosaga mo se mataupu e manaomia, e le toe fesootai mai le masini.

Saunoa le Pulesili, o lo o taumafai pea e faaleleia tulaga e pei ona taua.

Saunoa le afioga i le alii Faipule ia Mike Asifoa e faapea, e foliga mai e le o aga’i i luma le tautua a le TBAS, ae o lo o aga’i i tua, e fua i le faitau miliona lea e gau ai tupe maua a le Faletupe.

Sanoa Buehler, ua mafua le faaletonu e pei ona tula’i mai, ona o le tele o taimi na tapunia ai galuega ma auaunaga ona o le faama’i o le KOVITI-19. 

Na faamanino e le afioga a Faimealelei ia Buehler e faapea, o le autu atoa na mafua ai ona valaau le iloiloga, o le tulaga i ripoti e faatatau i le tula’i ese o le Faletupe o le ANZ, atoa ai ma le fiamalamalama o le Fono, pe gafatia e le TBAS ona tauave le tautua sa faatinoina e le ANZ mo le atunu’u.

Saunoa Faimealelei, e ui e le i faamautuina mai le fuafuaga a le ANZ e tula’i ese, peita’i e tatau ona i ai se fuafuaga faataoto a le TBAS e tapena ai i latou mo lea taimi pe a oo mai.

E tusa ai ma faamatalaga ua maua e le Komiti, e 12,000 teugatupe o lo o taulimaina e le TBAS, ae silia i le 20,000 teugatupe a tagatanuu ma pisinisi o loo taulimaina e le ANZ.

O le fesili, pe faamata e gafafia e le TBAS ona tauave uma teugatupe nei, na faamanino ai e Buehler, e fiu e mafai e le TBAS ona tauave uma teugatupe e pei ona fesiligia.

Na faamanino e Buehler e faapea, afai e tapuni le ANZ, e mafai e le TBAS ona tauave teugatupe uma o loo i le ANZ. Afai e manaomia se aufaigaluega e faaopoopo mo le TBAS, e mafai ona faa faigaluega e le TBAS tagata faigaluega a le ANZ i le taimi e tapunia ai lana auaunaga mo le atunu’u.