TALA I VAIFANUA

Pago Pago - AMERIKA SAMOA

TOE AMATALIA GALUEGA A LE STAR KIST SAMOA CO.

O le pulega a le Kamupani I’a i totonu o le atunuu, Star Kist Samoa ua toe tatalaina nei a latou galuega masani, o le gaosia lea o le I’a Tu’uapa i le atunuu, lea sa faamalolo ona o le Faasa Lanu Mumu o le Covid-19 i le teritori.

Ua faailoa mai e le susuga le alii pule sili ma o le Peresetene Andrew Choe, “O le fa’afetai ua tuuina atu i le afioga le Kovana Sili, ae maise le Taitaifono o le Komiti Faafoe ma le latou Komiti mamalu ona o le fa’asiliga ua toina mai mo le matou nei Kamupani. Sa talosagaina se fesoasoani ina ia pasia a’ia’i le fa’atulagaga ia mafai ona pasia e toe amatalia matou galuega masani, lea ua toina mai le avanoa ina ua pasia lelei uma aiaiga e tatau ona matou faia mo lea fa’amoemoe. Faafetai le fesoasoani mai, fa’afetai le manatu mai i lenei tautua aua e to’atele fo’i i latou o e o fa’amoemoe aiga i le tamaoaiga e maua atu i latou galuega mo le tausiga o latou aiga.”

“Ona o lo’o tele lava galuega e tatau ona faataunuu e le Star Kist Samoa i le taimi e tatau ai, ma o le tele o ia sapalai o oloa o lo’o latou gaosia e tautuaina ai le mamalu lautele o le Vaega Au i a latou tausami, fa’atasi ai ma le sapalai o loa tau i’a tuu apa i faleoloa ma maketi tetele o le Iunaite Setete. O loo lalamua lava le Star Kist Samoa i a latou oloa fa’atau atu i fafo, o lo’o tumati’e i latou i latou oloa tuu apa nei i le Iunaite Setete atoa.”

RIPOTI I TULAGA O LE KOVITI-19 I TOTONU O LE ATUNU’U MAI I LE ASO FARAILE UA TUANAI

I le lipoti a le Foma’i i le LBJ Medical Center, Dr Akapusi Ledua, sa ia fa’ailoa ai i le Komiti, “E 230 suega sa faia i le falemai tele i Faga’alu, na maua ane e 26 o i latou ua fa’amaonia e maua ai le verusi o le Covid-19. Mai lea to’a 26 ua fa’amaonia e 11 o i latou o tagata faigaluega a le falemai. E aofia ai ma le foma’i e to’atasi ua taofia nei i le tatou falemai o le Covid-19 i le taeao o le aso Faraile, Mati 11, 2022.”

Ina ua toe fesiligia atu e le vasega o tusitala le ali’i foma’i e fa’ailoa atili mai le aofai o fomai ma tamaitai tausima’i ua a’afia ae fa’ailoa mai, “O lo ua mautinoa o le to’atasi o le foma’i lea ua taofia nei, ae o isi uma e eseese lava mea o lo’o maua mai ai, to’atasi le sui tiute mai le Eye Clinic, to’atasi mai le OBGyn, toatasi mai le ER, ma ua faigofie ai ona faia fesuia’iga o e tautuaina le mamalu lautele o le atunuu pe a gasolo mai i le falemai.” O se tali lea a Dr Ledua.

I le lipoti lava lea a Dr Ledua ua fa’ailoa ai, mai le to’a 26 lea na fa’amaonia le i ai o le Verusi Covid-19, e to’afitu ua tuia i le vaila’au mo togafitiga o le Covid-19 lea sa malaga mai ma le aumalaga a le Feterale ma le CDC. E na’o le to’aono i le sui mulimuli lava o le foma’i ua taofia nei i le Falema’i mo Togafitiga o le Covid-19. O le to’atolu sa mua’i taofia mai ua fa’ate’a ma ua saogalemu lava i latou uma mai lea falemai, to’alua ua fuafua e fa’ate’a i le aso Toonai pe a tumau pea lava le sologa lelei o la’ua togafitiga, ae le oni auga o le Covid-19 na mafua ai ona taofia. O lona uiga e na’o le to’atasi o le a tumau ai pea se’ia oo mai i le fonotaga o le aso Sa poo ananafi lea na fa’atulaga mai le aso Faraile i le fonotaga lenei.”

O le to’atele o sui na fa’amaonia i le falemai o lo ua maua ai verusi o le covid-19, o lo’o ua fa’anofoesea i o latou aiga, ona e le o alia’i mai ai ni auga tigaina o le Covid-19 i le taimi na fa’amaonia ai latou suega Covid-19.

E pei ona fa’ailoa i luga o le to’a 61 lea ua faamaonia suega o le Covid-19, o lo’o tuufa’atasia uma i ai suega sa fa’amaonia mai nofoaga uma sa faia ai suega Covid-19 i le aso Faraile atoa ma e aofia ai ma le LBJ Medical Center e 26 i latou na maua mai ai.

Mai nisi o fa’afesili sa tuuina mai e le vasega o sui fa’asalalau, ua fesiligia ai le umi o le taimi e fa’anofoesea ai sui mai tua i aiga, ae o le to’atele lava e malolosi ma e lei toe fa’amaonia i isi a latou suega mulimuli mai o lo’o a’afia pea i le Covid-19. Lea na talosagaina ai pe le toe fa’aitiitia mai i le nao le 7 aso pe lima fo’i aso e fa’anofoesea ai?

Ua tali le susuga le Ta’ita’ifono o le Sui Kovana o le tatou Malo, Talauega Eleasalo Ale, “Se’i muamua lava tagai le komiti fa’afoe fa’apea ma ta’ita’i o le Malo fa’atasi ai ma pa’aga o lo’o galulue malosi i le taumafaiga lenei, ma soalaupule i latou ua mafai ona tuuitiitia ai le faitauga o nisi e ono lamatia le soifua i le pepesi pea o le Covid-19, ona fa’ato’a toe faia mai lea o se suiga i le umi e fa’anofoesea ai i tua aiga sui ua fa’amaonia suega o le covid-19.”

Ona o le tulaga fo’i ua i ai isi ituaiga suega ua mafai lava ona faia e le aiga latou suega e le tau oo mai ai i le falema’i mo nei suega, ua fa’ailoa mai o le a amata ona tufatufaina fo’i i setete i fafo i le masina nei, ua fesiligia ai fo’i e le vasega o sui fa’asalalau, pe mata e mafai ona maua mo aiga Amerika Samoa?

Ua talia e sui mai fafo lea fesili ma ua latou fa’ailoa mai, “O le taimi lava e tufatufaina ai i aiga i fafo nei ituaiga o suega e le CDC, ua alagatatau fo’i ona fa’auia mai vaega o nei suega i le tatou nei teritori. E soo se mea lava e pasia mo setete ma isi teritori uma o le Iunaite Setete o Amerika, e i ai fo’i le vaega e toina mai o Amerika Samoa i soo se mea e agaga i le puipuiga ma le fa’asaogalemuina o le soifua o tagata lautele mai le Covid-19.”

Ole tulaga o le pasia e toe amatalia galuega a le Star Kist sa fesiligia la le ituaiga pasiga na fa’atautaia e sui mamalu mai le Feterale, ina ia latou fesoasoani i lea fo’i pasiga, ia mautinoa ai le tulaga saogalemu o le aufaigaluega i taimi faigaluega ma toe fo’i i o latou aiga. O le fa’afesili, poo a ni aiaiga tamau o lea sailiga o le saogalemu o le aufaigaluega a le Kamupani I’a?

Na tali le afioga le Lutena Kovana, “O aiaiga sa fa’amalosia pea lava ona faia pupuni fofoga, ia faia suega i le o atu i totonu e amata le aso faigaluega, ma ia fa’avava mamao nofoaga e tutu ai tagata faigaluega mai le tasi. O mea ia e ui ina faigata ona fa’atino le fa’avava mamao o tagata faigaluega mai le tasi, ae ua usita’ia ma ua mafai ai ona pasia e amata galuega a le Kamupani i le aso Faraile na te’a nei, Mati 11, 2022.”

Mai le faitauga e 494 o sui ua fa’amaonia le i ai o le verusi covid-19 i le atunuu talu mai le aso Faraile i le fonotaga mulimuli sa usuia, ua fa’amaonia ai le to’a 44 o i latou sa i ai le verusi ua toe mama nei iua le toe maua ai. O lona uiga ua na’o le 450 i latou o totoe e tatau ona puipuia lelei.