TALA I VAIFANUA

Pago Pago - AMERIKA SAMOA

VAIASO ATOA MO MALUTAEAO PALENI IUNAITE SETETE & TERITORI

O le vaiaso lenei, Mati 07-11, 2022, ua fa’atulaga foi i le Iunaite Setete atoa ina ia avea ma vaiaso e faataua ai malutaeao paleni a le fanau a’oga ao le’i amatalia le aso atoa o aoaoga.

“E taua tele lava le ‘aiga muamua lenei o le aso. E tatau ona mua’i fa’alogoina e le fanau le agaga fiafia ma ua leai se mea e atugalu ai a’o fa’asaga atu i aoaoga o le mafaufau i aso ta’itasi. E sii foi ona taua le ulua’i aiga o le aso i le tausiga o le soifua maloloina o le fanau,” o se tala lea ma i le alii Pule o le Sapalai o Mea’ai Fanau A’oga i le Lekeona lea e aofia ai ma teritori o Amerika i le Pasefika, Jesus Mendoza Jr.

E tusa ma le 17,000 le aotelega o le fanau a’oga i a’oga uma lava i le teritori ma ua faatulaga e le Matagaluega o A’oga a le tatou malo lenei vaiaso e tufatufaina atu ai pepa e talafua ai oloa tau mea’ai mo le fanau aoga uma i le teritiori. “O se fa’ataua lava lea ua tapena i ai le matagaluega e tusa o le fa’amoemoe e ao ina fa’ataua le tausiga lelei o fanau a’o alo faiva i a’oaoga i aso taitasi,” o se saunoaga lea a le susuga le Fa’atonu o le ASDOE, Talauega Samasoni Asaeli.

O lea aofai o pepa e talafua ai oloa tau mea’ai mo le tamaititi e to’atasi e $200 ma e tasi lava fo’i le taimi o le a maua ai lenei fesoasoani e matua.

Ona o le Polokalama  o Mea’ai a le Fanau A’oga e fa’atupeina ma toina mai e le Matagaluega o Fa’ato’aga a le Malo Tele,  o lea e tatau ai lava ona faia le vaega e tatau ona fa’atino e le tatou Matagaluega o Aoga a’o feagai ai le fanau a’oga ma aoa’oga i laina fa’ata’alise o feso’ota’iga i Upega Tafailagi e pei ona i ai nei, a’o soifua le atunuu i le Fa’asa Lanu Mumu o le Covid-19.

Talu mai ona fa’amamaluina le Fa’asa Lanu Mumu i le atunuu, ua fa’apea fo’i ona nonofo ai le fanau i aiga ma ua tausia lava e aiga i latou a’o fa’atautaia a’oa’oga fesoota’i fa’ata’alise i laina Tafa’ilagi.

Ona o lea sa taumafai e fa’atulaga se ala e mafai ai ona fa’auia le fesoasoani i aiga ta’itasi o fanau aoga ina ia latou maua mea’ai paleni lelei na fuafua e le USDA e tausia lelei ai le fanau a’o feagai ma a’oaoga, o lea ua afua ai ona fa’atino le tufatufaga lenei o pepa e talafua ai oloa tau mea’ai mo le fanau a’oga, ia tausia lelei ai i latou e latou aiga.

“E ao ina fa’afetaia le vaega o lo’o fa’atautaia ma fa’atupea maia auaunaga eseese mo le tausiga lelei o fanau a le Iunaite Setete atoa, aua e le o lape lava le latou tautua e ui ina savalia taimi uiga o le soifuaga i totonu o le atunuu atoa o Amerika. O lea ua fa’atautaia fo’i lenei auauga e fa’auia atu i matua, ina ia mautinoa lava ua tausia fanau i le atoaga e tusa ona manatu ai ta’ita’i o le Malo tele. O se aiga paleni e amatalia ai le aso, o se una’iga lelei lea mo fanau ina ia tausia lelei lo latou soifua maloloina a’o alofaiva i aoaoga o aso ta’itasi,” o se toe saunoaga  lea a Mendoza Jr o le SLP lea e va’ava’aia i tatou fa’atasi ma isi malo uma i le tatpu Region 9.

O nisi o aoga ua latou fa’atulaga se faiga e tufatufaina atu ai nei fa’amanuiaga mo fanau. Ua susu atu le matua ma le ID aoga o lona alo ma le pepa tui, ae ua fa’asolo i mata’itusi muamua o fa’ai’u o nisi ua fa’atautaia ai le tufatufaga, e pei ona faia i le Food Stamp.

O nisi aoga ua fa’atautaia lava le tufatufaga latou a’o susu atu Matua ma fa’atalitalia i le laina. Poo le a lava le faiga, ua fa’ailoa mai e le ASDOE, ua pule lava Sitafine i le la o lona va’a i tua i a’oga ta’itasi. Ua le aia moo i liu o va’a i laumua ta’itasi, ua pule lava latou i le faiga ma le siakili e fa’afaigofie ai le tufatufaga.

TOLU ASO FA’ANOFOESEA AUMALAGA MATI 10 MAI HONOLULU

Mai le to’a 300 o le pasese ua mae’a lesitala i luga o le TalofaPass ina ia malaga mai ia Mati 10, 2022 i le atunuu, ua fa’ailoa mai ua suia nei le ituaiga fa’anofoesea o le a nofo puipuia ai i latou ina ne’i malaga mai nisi ma le Covid-19 i o tatou laufanua nei.

Ua fono le Komiti Fa’afoe, fono fo’i foma’i uma o lo’o aofia i le taumafaiga ina ia taofiofi pea le so’ona lutia o le atunuu i le Covid-19, ma ua faia ai le fa’aiuga ua fa’ailoa atu. Ona o lea ua tatou ola ma le Covid-19 i le taimi nei.

Ua fa’atulaga e faia suega e lua a sui uma e malaga mai, a’o alaala pea i latou i Hawaii, o le latou suega mulimuli lava e faia lea i le toe 48 itula ona malaga mai lea. I le to’ai taunuu ai e fa’anofoesea i latou i nofoaga ua lisia, Sadies by the Sea, Fatoaiga ma le Falema’i Fou i le Malaeva’alele.

I le atoa ai o le 72 itula talu ona to’ai taunuu ma fa’anofoesea i nofoaga nei, o le a faia ai le latou suega muamua i le aso Sa lea, ma afai ae leai se tasi e fa’amaonia o i ai verusi o le Covid-19, o le a malaga i latou uma na i le fale mo fa’anofoesea ai mo le isi 7 aso. Peta’i o nisi o le a fa’amaonia ua i ai verusi ole Covid-19, o i latou na e taofia pea e fa’aauau ona fa’anofoesea.

O le suega moomia muamua lava e ao ina faia a sui malaga uma e fia ulufale mai i Amerika Samoa, e faia lea i le toe 5 aso malaga mai, e faia mai le setete o e alaala ai, ma e aga’i mai ai loa i Hawaii mo lau suega mulimuli e toe 48 itula e malaga mai loa i Amerika Samoa nei.

E ao ia te oe ua fia malaga mai, ona atoatoa ou tui puipuia sei vagana ai fanau e i laiti ane i le 5 tausaga i le aso e te malaga mai ai i Amerika Samoa.

Ia ia te oe fo’i kopi uma o nei fa’amaumauga o ou tui puipuia ua mae’a faia.