Nofovaavaaia le alii na ta’usala i le Faaoolima

Pago Pago - AMERIKA SAMOA

E 5 tausaga lea ua nofovaavaaia ai se alii e 30 tausaga mai Samoa, ina ua ta’usala e le Fa’amasinoga o ia i le masina na te’a nei i le solitulafono mamafa o le faaolima i le tulaga lua, e mafua mai i le fa’alavelave lea na ia faaoolima ai i se isi e ala i lona fa’aaoga o se paipa u’amea e faaoo ai manu’a i lona ulu.

O se tasi o tuutuuga o le faasalaga nofovaavaaia a le susuga a Lave Faasega, poo Ualesi Faasega e pei ona iloa ai o ia e le to’atele, e aofia ai lona tuli o masina e 20 i le Toese i Tafuna. 

A mae’a ona tuli lona faasalaga faa falepuipui, ina ia tuua lea o Amerika Samoa ae toe fo’i atu i lona atunu’u na malaga mai ai, e le mafai ona toe ulufale mai i totonu o le teritori i totonu o le 5 tausaga o lana nofovaavaaia.

Afai ae maua o ia o taumafai e toe ulufale faamalosi mai i se auala faasolitulafono i le atunu’u, o le a auina atu o ia i luma o le Fa’amasinoga ma faatonuina loa le tuli faamae’a o lana faasalaga faanofovaavaaia e 5 tausaga o lo o totoe.

E le gata i lea, o le a faila foi e le malo moliga faaopoopo faasaga ia te ia, i lona taumafai lea e ulufale faasolitulafono mai i le atunu’u.

O le masina na te’a nei na tula’i ai Faasega i luma o le Fa’amasinoga Maualuga mo le lauina o lana faasalaga. Sa taofia pea o i ai le Toese i Tafuna talu mai le taimi na pu’e faapagota ai o ia i le tausaga na te’a nei, ina ua le mafai ona ia totogi le tupe sa faatulaga e tatala ai o ia i tua.

Na ulua’i tu’uaia e le malo ia Faasega i le moliga o le faaoolima i le tulaga muamua, o le vaega A lea o solitulafono mamafa, lea e faasala ai se tasi i le Toese mai le 10 e oo atu i le 30 tausaga, pe faasala foi i le olaga atoa i le Toese, faapea ai ma moliga mama e 2 o le faaoolima i le tulaga 3 faapea ai ma le faaleaga meatotino i le tulaga 3, o le vaega A o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, pe faasala foi i faasalaga uma ia e 2.

Ae i lalo o se maliliega na sainia e Faasega ma le malo, lea foi na talia e le Fa’amasinoga i le masina o Tesema o le tausaga na te’a nei, na malie ai le ua molia e tali ioe i le moliga na toe teuteu e le malo, le solitulafono o le faaoolima i le tulaga 2, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

I le tali ioe ai o Faasega i le moliga e pei ona ta’usala ai o ia e le Fa’amasinoga, na ia ta’utino ai e faapea, i le aso 30 o Oketopa, 2020, na ia faaoolima ai i le alii na aafia e ala i lona fa’aaoga o se paipa malo e sasa ai lona ulu ma manu’a tigaina ai o ia. Na taua atili e le ua molia e faapea, na mafua ona tula’i mai lana solitulafono i lea aso, ina ua le mafai ona faatonutonu lona ita i le alii na aafia.

Ina ua maua le avanoa e faaleo ai sana faamatalaga mulimuli a o le i tuuina atu le faaiuga a le Fa’amasinoga, na faatoese ai le ua molia e tusa ai o lana solitulafono, ma ia talosagaina ai se isi avanoa mo ia e toe fo’i atu ai i lona aiga e tausi lona to’alua ma lana fanau, ma tautua lona aiga, nu’u ma le Ekalesia.

Na tu’uaia e Faasega le Tiapolo, o le mafua’aga lea o le faalavelave na tula’i mai, ina ua le mafai ona ia onosa’i ma faapalepale. Sa ia faatoese i le malo o Amerika Samoa i lona le usitaia o tulafono o le malo. Sa ia faatoese fo’i i lona aiga i le solitulafono ua ia faia ua mafua ai ona ta’uvalea le igoa ta’uleleia o lona aiga.

Na ta’utino Faasega i le Fa’amasinoga, o ua le lava nofo i le Toese, ae ua fia fo’i i tua i lona aiga e mafuta i lana fanau. 

“E le o a’u na mafua ai ona tula’i mai le vevesi i lea aso, ae o le Tiapolo na ia faaosooso ia te a’u, ma mafua ai loa ona ou faatino le solitulafono ma ou faaoolima ai loa i le uso na aafia,” o le faamatalaga lea a Faasega.

Sa ia faatoese foi i le alii na manu’a i lana solitulafono, ina ia faamagalo o ia e tusa ai o le vevesi sa tula’i mai. Sa ia ta’utino i le Fa’amasinoga, e le toe tula’i mai se faalavelave faapea i le lumana’i, ae o le a taumafai e onosa’i ma faapalepale.

Na fesili le Fa’amasinoga ia Faasega poo fea lona aiga lea e talosaga mai e toe fia fo’i i ai. Na tali le ua molia, “Ou te toe fia fo’i i lona aiga i Ottoville o lo o i ai lo’u to’alua ma la’u fanau.”

Na faailoa e le Fa’amasinoga ia Faasega e faapea, o le faa 3 ai lea ona ta’usala o ia e le Fa’amasinoga i le solitulafono o le faaoolima. E faa 2 ona ta’usala o ia e le Faamasinoga Faaitumalo, ma le mataupu e pei ona nofosala ai i luma o le Fa’amasinoga Maualuga. 

I le silasila a le Fa’amasinoga, e foliga mai na te le amanaia Tulafono a le malo o Amerika Samoa, e leai fo’i se lesona taua na ia maua mai i taimi e 2 na faanofovaavaaia ai o ia e le Fa’amasinoga Faaitumalo.

Na talosaga le Loia Fautua a Faasega mo se faasalaga faanofovaavaaia, e faitau ai ma masina e 15 ia ua mae’a ona tuli e Faasega i le Toese a o taofia ai o ia e faatali ai le taimi e lau ai lana faasalaga.

E ui e faa 2 ona nofosala Faasega i luma o le Fa’amasinoga Faaitumalo, ae na finau lana Loia Fautua, o se taimi muamua lenei ua ta’usala ai o ia i luma o le Fa’amasinoga Maualuga. Sa ia taua atili e faapea, o masina e 15 na taofia ai Faasega i le Toese i Tafuna, ua lava ma totoe e fai ma ana faasalaga i lenei mataupu, ma ua tele fo’i se lesona ua ia aoaoina mai ai i lea taimi umi na taofia ai i le Falepuipui.

Na lagolago le Loia a le malo i le talosaga a le itu tete’e, ma ia finauina ai se faasalaga faanofovaavaaia mo le ua molia. Na taua e le itu a le malo e faapea, e tasi le vaiaso na taofia ai le alii na manu’a i le Falema’i i Faga’alu ae toe te’a loa i tua i lona aiga.

Sa ia taua atili fo’i e faapea, ina ua fesiligia le alii na manu’a i sona finagalo, sa ia taua ai le mae’a lea ona toe teuteu le vevesi na tula’i mai i le va o aiga e 2, ma ua ia faamagalo fo’i ia Faasega e tusa ai o le mea sa ia faia ia te ia.

A o le i tuuina atu le faaiuga a le Fa’amasinoga, na faatepa e le Fa’amasinoga itu e 2 e tusa ai o mau faamaonia o lenei mataupu, atoa ai ma le faalavelave na tula’i mai.

E pei ona taua e le Faamasinoga e faapea, sa galue Faasega i lona fanua, ae tau atu ai i le alii na manu’a o loo ia ave faagaoi fua o lana faatoaga e aofia ai talo, fa’i ma popo. Na fesili Faasega i le alii na aafia i le mafua’aga o lona tu fua i lona fanua ma ave faagaoi ana meatotino, peita’i na lu’i e le alii na aafia ia Faasega ma mafua ai loa ona tula’i mai le faalavelave.

Mo se itu lelei e ono faamama ai se faasalaga mo Faasega, ua faamauina e le Fa’amasinoga, o le alii na aafia na amataina le faalavelave. Peita’i, e le avea lea itu ma auala e manatu mama ai le Fa’amasinoga i le matuia o manu’a na aafia ai le alii na manu’a.

Na manatu le Fa’amasinoga e tuli e Faasega tausaga e 5 i le Toese i Tafuna, peita’i ua manatu le Fa’amasinoga e faanofovaavaaia o ia mo le 5 tausaga, i lalo o tuutuuga e aofia ai lona tuli o masina e 20 i le Toese i Tafuna, e faitau ai ma masina e 15 ua mae’a ona ia tuliina i le taimi nei.

Lona uiga, e toe 5 masina e tuli e Faasega.

A mae’a ona tuli masina e 20 i le Toese, ona tuua loa lea e Faasega o Amerika Samoa ae toe fo’i atu i lona atunuu na malaga mai ai o Samoa.

E le mafai ona ia toe ulufale mai i totonu o le 5 tausaga o lana nofovaavaaia.

Ua fautuaina e le Fa’amasinoga le Loia a le malo ina ia tu’u atu le kopi o le faaiuga i le Pulesili o le Ofisa o Femalagaaiga, ina ia mautinoa e aofia ai le igoa o Faasega i le lisi o tagata e le tatau ona toe ulufalemai i le atunu’u.