Vaaia le lolofi o le to’atele e fai a latou tui o le ‘booster’

Pago Pago - AMERIKA SAMOA

Talu mai le 2 vaiaso ua tuana’i atu na faamaonia ai le pipisi i le atunuu o le siama o le KOVITI-19, na maitauina ai le tau fai lolofi atu o le atunu’u i nofoaga eseese mo le faia o le tui lona 3 po o le ‘booster shot’.

O le vaiaso na te’a nei na faafofogaina ai finagalo eseese o le atunu’u e faatatau i le faama’i atoa ai ma lagona popole ina ne’i avea lenei faama’i o se faama’i oti mo Amerika Samoa.

E pei ona silafia, e 3 lava nofoaga o lo o faagasolo ai tui o le booster shot i nofoaga eseese o le atunu’u e aofia ai le Fale Taalo a le aoga maualuga a Samoana; o le maota o Tupulaga i Tafuna faapea ai ma le Maota o le Ekalesia Katoliko i Leone.

O le aso Tofi o le vaiaso na te’a nei na maua ai le avanoa o le Samoa News e faatalatalanoa ai nisi o le atunu’u na lolofi atu mo le faia o tui o le booster i le maota o Tupulaga i Tafuna (DYWA) atoa ai ma le Faletaalo a le aoga maualuga i Samoana, e tusa ai o latou lagona e faatatau i le televave ai o le pipisi o le fa’amaa’i.

“Aisea tatou te popole ai pe afai o Amerika Samoa o le atunu’u Kerisiano,” o le finagalo lea o Latu Sulufa’i.  “E leai se mea e faigata i le Atua”.

E le talitonu le susuga a Sulufa’i i le televave o le faatupulaia o i latou ua faamaonia le aafia i le faama’i. I lona taofi, e i ai le vaega e le o sa’o.

“E faapefea ona fai mai ua to’atele le aofa’i o le atunuu ua faamaonia le aafia a’o lenei lava e leai se isi ua maliu pe taofia foi i le falema’i ona o ‘auga matuia pe ua tigaina fo’i.”

(I se ripoti I le aso ananafi mai I le DOH, ua faailoa mai ai, e to’afa I latou ua taofia nei I le falema’I I le Koviti-19).

A o lei ta le itula e 6:00 i le taeao o le aso Tofi o le vaiaso na te’a nei, o le taimi lea ua matua faatumulia ai lava le nofoaga o Tupulaga Talavou i Tafuna i le mamalu o le atunu’u na lolofi atu mo le faia o tui o le booster. Ae ina ua oo ane i le taimi ua tatala ai le faitoto’a ua amata ona gasolo tagata i totonu e fai tui, o le taimi lea ua oo atu ai le laina i le nofoaga o loo i ai le Ofisa o Ta’avale Afi i Tafuna (OMV).

Na talosagaina nisi Leoleo faaopoopo mo le nofoaga o le DYWA i Tafuna e fesoasoani ai i Leoleopo o loo gafa ma le galuega, ina ua maitauina le aga’i atu ina vevesi tagata ma tau tulei solo.

I ripoti na taua ai le tu’uaia e le mamalu o le atunu’u o alii ma tamaitai Leoleo, o i latou e mafua ai ona tuai le faagasoloina o le laina, ona e tele naua faatonuga ma suiga latou te faia, ae ana tu’u tasi lava le galuega i Leoleopo o loo tiute i le nofoaga, e faigofie atu ma televave le faasologa o le laina.

I le nofoaga i le aoga maualuga a Samoana, e to’atele le atunuu sa faasea i le toe faafo’i o i latou i aiga ina ua maitauina e alii ma tamaitai ofisa o le Matagaluega o le Soifua Maloloina le to’atele o le atunu’u ua lolofi atu, ma ua faigata ai ona faatino le galuega. 

“Aisea ua toe faafo’i ai tagata e o i aiga e aunoa ma le faia o tui a’o lea fo’i na sau le faatonuga i tagata ina ia aga’i mai e fai tui,” o le fesili lea a se tasi o Tina na aga’i atu ma lana fanau e to’alua e fai a latou tui.

Na vevesi le isi itu o le lotoa a Samoana ina ua teena e alii Leoleo Faitoto’a le atunuu mai le ulufale atu i totonu. O se faatonuga mai se tasi o Leoleo Sinia na usitaia e alii Leoleo Faitoto’a ma mafua ai loa ona faasea le to’atele na le mafai ona ulufale i totonu.

Na vaaia le tau tulei o le laina e ulufale ai i totonu o le vaega e faia ai tui. O nai Tina ma fanau e oo lava foi i Tama ma tupulaga talavou, ua tau fai feoma’i solo i totonu ma ua leai ai lava ma se tausisia o le nonofo valavala mo le 6 futu.

Pau le itu taua sa molimauina, na faaaoga e le atunu’u uma sa lolofi atu i lea aso tali fofoga mo le puipuiga o le pepesi o le fa’ama’i.

Na taua e Filipo Sauaso, 54 tausaga le matua mai Aua le faateia ina ua ia vaaia foliga popole o tagata a o lolofi atu e fai a latou tui. O Sauaso na alu atu e momoli atu lona atalii e fai lona tui.

“Aisea na latou faatuai ai i le tele o masina ao tu’itu’i atu le malo e o mai e fai tui puipuia,” o le fesili lea a Sauaso. Sa ia taua i le Samoa News, o le masina o Tesema na te’a nei na fai ai tui lona 3 a lona aiga, - i lona to’alua ma lana fanau to’a 3, sei vagana ai lava lona atalii laititi lea faatoa fai le tui ona sa pisi i le aoga.

Na taua e le Tama ia Talifilemu Opeta le tatau lea i le atunu’u ona tu’u le popole ma le faitio, ae amata ona tapenapena mo se isi faafitauli tele e ono tula’i mai i le lumana’i.

Sa ia taua le tele o tagata o lo o faasea i le le lelei ona faatautaia e le malo ma le Komisi o le KOVITI-19 o ta’iala ma lapataiga mo puipuiga o tagata. Ae i lona talitonuga, e le o se taimi lenei e faitio ai ma tusi tusi lima, ae o le taimi e tapena ai le aiga mo le lumana’i.

“Ua uma le taimi o le faitio ma le faasea, o le taimi o le galulue faatasi ma vaai poo lava mea uma e manaomia e lou aiga pe afai e tapunia faafuase’i le malo onao pipisi o le faama’i. Vaai poo lava mea’ai mo le aiga poo isi fo’i mea e mana’omia pe afai ae tapunia faleoloa ma galuega,” o lana fautuaga lea.

O le lagona foi lea o le susuga a Faamanu Unasa ina ua fesiligia e le Samoa News i sona finagalo e tusa ai o le tulaga ua i ai le atunu’u i le taimi nei, atoa ai ma le pipisi o le faama’i.

Na taua e Unasa e faapea, ua tatau i tagata ona taumafai e ola ma soifua i le atunuu faatasi ai ma le faama’i.

“E le toe alu ese le faama’i ma Amerika Samoa,” o lana vavalo lea.

“Vaai i Amerika, sisila i atunuu eseese, o lea ua toe foi lava le olaga i le mea tuai sa i ai ae o loo i ai pea lava le faama’i e le o alu ese. E faapena fo’i tatou, ia tatou faamasani e ola i se siosiomaga o loo i ai le faama’i ma taumafai e tausisi i ta’iala ua tuuina mai e ta’ita’i mo le puipuiga o le faama’i,” o le saunoaga lea a Unasa.

AVE LE TUI E FAI I TUA I AIGA

O se tasi lenei o finagalo na mafai ona faaleo e le atunuu ina ua fesiligia ni o latou taofi i se auala e taofia ai le faafitauli o le lolofi atu o tagata i nofoaga o loo faia ai tui lona tolu.

Na taua e nisi i le Samoa News e faapea, afai ua fai ma lu’itau le tumu tumu o nofoaga o loo fai ai tui, ua tatau i le Matagaluega o le Soifua Maloloina ona fai se fuafuaga e ave ai tui e fai i tua i aiga, e pei o le auala na faatino e le malo o Samoa i ni nai masina e lei mamao atu.

O le talitonuga o le atunu’u, afai ae ave tui e fai i tua i aiga, e le gata e taofia ai le tumu tumu o nofoaga o loo faia ai tui, ae toe faigofie ai foi i le aufaigaluega ona faatino la latou galuega.

Saunoa le Faatonusili o le Matagaluegag o le Soifua Maloloina ia Motusa Tuileama Nua e faapea, o le ave o le tui i tua i aiga, o le isi lea fautuaga sa vaavaai i ai le Ofisa, peita’i o le faafitauli, e le mafai ona mautinoa ai le malu puipuia o le tui.

Na faamanino e Motusa le tatau ona ausia pea le maualuga o le malulu o le nofoaga e teu ai le tui ao lei faaaogaina. Afai ae soona feavea’i solo i tua, e ono leaga ai tui ma ono aafia ai se soifua o se tasi.