TALA I VAIFANUA

Pago Pago - AMERIKA SAMOA

135 TAGATA FA’AMAUINA MAUA COVID-19

Mai su’ega na faia mai le to’a 435 tagata ia Mati 02, 2022, ua maua mai ai le to’a 41 tagata o le atunu’u ua faamaonia le iai o le verusi Covid-19, e pei ona lipotia e le Matagaluega a le Soifua Maloloina. 

Pe afai e toe fa’aopoopo atu le numera lea 41 i le aotelega sa i ai e 94 ua atoa ai le 135 ua aafia i le Covid-19 talu mai le aso 21 o Fepuari.

Ua leai uma nisi o le to’a 135 lea ua taofia i le falema’i na tapena mo le togafitiga o gasegase Covid-19, pe fa’anofoesea fo’i i nofoaga na tapena mo le fa’anofoesea. O i latou ua fa’amaonia o lo’o ua maua ai verusi Covid-19, ua fa’anofoesea mo le 14 aso i totonu lava o latou aiga. Ua faia fo’i suega a i latou ua faanofoesea i aiga i soo se taimi e valaau mai ai pe o i ai ni auga o iloga mai ia i latou e fa’amaonia ai ua po’ia tumau i le Covid-19. O aiaiga ia ua tamau i le feagaiga na tapena e le DOH mo le latou nofova’ava’aia i o latou aiga.

O le aso lenei e fa’aauau ai ona faia siakiina pe maua se tasi o le atunu’u i le Covid-19 i nofoaga e tolu o le Mataluega o le Soifua Maloloina i Amouli, Tafuna ma Leone. O le aso taeao, aso Toanai e faia ai suega o Covid-19 i le malae va’alele i Tafuna. 

LUA MALAGA FA’APITOA VA’ALELE MAI SAMOA

E atoa le 53 o tagata nuu o Amerika Samoa sa mafai ona toe taliu mai i laufanua i le aso Lulu o le vaiaso lenei i le malaga muamua a va’alele e fa’afoi mai ai o tatou tagata sa i Samoa. 

O i latou uma nei sa faia siakiina i le malae va’alele ma e leai se tasi ua a’afia i le Covid-19.

O le isi malaga sa fa’atulaga i le aso ananafi, mo le tusa i le 40 o tatou tagata nu’u. Ma a ma’ea lea malaga ona toe tapunia fo’i lea o le alava’a o va’alele i le va o Samoa e lua, ae e fa’aauau pea le malaga a le MV Lady Naomi mai Samoa, mo le la’uina o uta ma oloa, ae leai ni tagata malaga. 

TUFATUFA FOOD STAMP PE AFAI TALIA TALOSAGA KOMITI FA’AFOE COVID-19

Ua fa’ailoa e le fa’atonu o le Matagaluega o Alagamanuia mo Tagata Lautele, Muavaefa’atasi John Suisala e fa’ailoa mai le fuafuaga ua taoto ai nei le tufatufaga o Food Stamps mo le masina o Mati 2022 lea ua savalia nei.

“Ua maea faatalosagaina le Komiti Fa’afoe ina ia tufatufaina atu a tatou pepa mea’ai mo lenei masina, ae o lo ua tatalia lava se talia mai o lea fo’i talosaga, e le Komiti Fa’afoe o le Covid-19.”

Ua le mautinoa po’o le faiga tuai lava e toe fa’ataunuu ai lea tufatufaga pe o se fuafuaga fou e tau le tumutumu ai nisi i se nofoaga se tasi o le a fa’atautaia ai le tufatufaga lea ua saunoa i ai le susuga le Faatonu Muavaefa’atasi Suisala.

Ona o le manatu lava foi e fa’autagia uma aiaiga o le Faasa Lanu Mumu, e fa’afaigata atili ai ona faia le faiga tuai, aua e matauina i so’o se taimi le tumu o lea ofisa i aso ua tatala ai mo tufatufaga o alamanuia tau Food Stamp.

O lana toe saunoaga ua ia fa’ailoa atu ai, “O le taimi lava e maua mai ai le fa’atagaga mo le tufatufaga o nei alamanuia i le atunuu o agava’a ai, ole a fa’alauiloa atu i leitio, televise, nusipepa ma isi ala feso’ota’i tau tafa’ilagi ma le mamalu lautele o le atunuu, ina ia susu mai e tusa o le fa’atulagaga o le a pasia lelei mai. Fa’afetai tele mo lo outou onosa’i.”