Molia se Tina i le faia o sau’aga i se tasi o lana fanau

Pago Pago - AMERIKA SAMOA

E 35 tausaga le matua o se Tina mai se vaega o Malaeimi na pu’e faapagota e Leoleo i le masina na te’a nei, ona o tu’uaiga i lona faia lea o sau’aga mamafa i se tasi o lana fanau, o lana tama e 11 tausaga le matua. O lo o tu’uaia fo’i o ia e le malo i lona faaoolima lea i se tasi o Tina, i lona faailoa i Leoleo o le mataupu e faatatau i le sauaina o lana tama.

O le masina na te’a nei na tula’i ai le Tina ua molia i luma o le Fa’amasinoga mo lana ulua’i iloiloga, ma ia faailoa ai i le Fa’amasinoga lona mana’o e fa’ataunu’u le ulua’i suesuega o lana mataupu.

E pei ona taua e le malo, o le mataupu e faatatau i le faia o sau’aga faasaga i le tamaitiiti e 11 tausaga le matua natula’i mai i le aso 29 o Ianuari o le tausaga na te’a nei 2021, ae o le mataupu e faatatau i le faaoolima faasaga i le isi Tina na tula’i mai i le aso 15 o Fepuari na sosoo ai, tusa lea o le silia i le 2 vaiaso talu ona tula’i mai le ulua’i mataupu.

E 2 tagi ua fa’aulu e le malo faasaga i le Tina ua molia.

I le tagi muamua, ua molia ai o ia i lona faia o sau’aga mamafa faasaga i se tasi o lana fanau e laititi i lalo o le tulafono, o le vaega D lea o solitulafono mamafa, lea e mafai ona faasala ai se tasi i le Toese mo le umi e le sili atu i le 5 tausaga, pe faasala foi i le salatupe e le sili atu i le $5,000, poo le faasala fo’i i faasalaga uma ia e 2; faapea ai ma le moliga o le faia o gaioiga e ono lamatia ai le saogalemu o fanau laiti, o le vaega A lea o solitulafono mamafa, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e 2.

I le tagi lona 2 a le malo, ua molia ai le Tina ua aafia i le moliga e tasi o le faaoolima i le tulaga 2, o le vaega D lea o solitulafono mamafa, lea e mafai ona faasala ai se tasi i le Toese mo le umi e le sili atu i le 5 tausaga, pe faasala foi i le salatupe e le sili atu i le $5,000, poo le faasala fo’i i faasalaga uma ia e 2; faapea ai ma le moliga o le faia o gaioiga e ono lamatia ai le saogalemu o fanau laiti, o le vaega A lea o solitulafono mamafa, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e 2.

E $20,000 le vaega tupe lea ua fa’atulaga e totogi ona faatoa tatala lea o le Tina ua molia i tua mai le Toese i Tafuna.

Afai ae tatala o ia i tua mai le Toese i Tafuna, e le mafai ona ia toe taumafai e faafesoota’i molimau a le malo, pe na te toe faia fo’i ni isi sau’aga faasaga i lona atalii na aafia poo se isi fo’i o lana fanau laiti, a ia avea o ia ma tagatanu’u e tausisi i tulafono a le malo.

O le faalavelave e pei ona tu’uaia ai le Tina ua molia, na alia’e mai i le tausaga na te’a nei, peita’i o le masina na te’a nei na faatoa molia ai lenei Tina i luma o le Fa’amasinoga.

E pei ona taua e le malo i le latou tagi e faapea, o le aso 29 o Ianuari o le tausaga e 2021, na talosagaina ai e se Tina mai Malaeimi se fesoasoani mai le Ofisa o Leoleo i Tafuna, faasaga i se tamaititi e 11 tausaga le matua o lo o i ai manu’a i lona tino, e mafua mai ina ua faia i ai e lona Tina ni sau’aga e ala i le sasa faamo’amo’a o ia i se lala laau maini.

Na aga’i atu Leoleo i le Fale o le Tina na ia ripotia lenei mataupu ma fesiligia ai o ia e tusa ai o le faalavelave. Ina ua mae’a, sa aga’i atu Leoleo ma fesiligia le Tina o le alii na aafia, o ia fo’i lea o lo o molia i lenei mataupu.

Na taua e le molimau i Leoleo, o le taeao o le aso lea sa ia faalogoina ai le faufauee mai o se tasi o le fanau a le Tina ua molia, e foliga mai o lo o ia sasa tigaina. O le afiafi o le aso lava lea na ia vaaia ai le tamaititi e 11 tausaga le matua na aafia o tafafao ma lana fanau, ae o lo o iloga ai manu’a ma una’oa i lona papatua faapea ai ma ona lima.

Na faailoa e Leoleo i le Tina ua molia i le taimi na fesiligia ai o ia, e le o taofia faapagota o ia, ae mafai lava ona ia tula’i ma toe fo’i atu i lona aiga i soo se taimi e manatu ua talafeagai ai ona toe fo’i atu i lona aiga. Na malie le Tina ua molia e talanoa i Leoleo e tusa ai o manu’a sa vaaia i le tino o lana tama.

Na taua e le Tina ua molia i Leoleo e faapea, o le taeao o le aso e pei ona taua sa alu ai i le Faleoloa ae fai lana faatonuga i lana tama e 11 tausaga le matua e nofo lelei i le fale e vaai nai ona tei laiti, e le umi ona alu ae toe vave mai. i le fale.

Ina ua toe fo’i mai i le fale, sa ia iloa ai e le o i ai lana tama e 11 tausaga le matua i le fale, o lo o tafafao ma nisi o tamaiti o le latou aiga tuaoi, ae o lana tama e 4 tausaga le matua o loo fealua’i i fafo o le fale e latalata i le auvai. Sa ia popole ina nei tula’i mai se faalavelave i lana tama laititi, na mafua ai loa ona ia sasa tigaina lana tama na aafia e ala i lona faaaoga o se lala aute maini.

Na ta’utino le Tina ua molia i le sese o lana faaiuga sa faia, ae na ia faia i luga o le vave o lona ita i lana fanau.

Ina ua mae’a ona fesiligia e Leoleo Suesue le Tina ua molia e tusa ai o lenei mataupu, na tatala ai loa o ia e toe fo’i atu i lona aiga.

I le tuana’i ai o le 2 vaiaso talu ona mae’a le faatalatalanoaina o lenei mataupu i le aso 15 o Fepuari, 2021, na maua ai e le Ofisa o Leoleo i Tafuna se telefoni mai se Tina i Malaeimi, e faatatau i se Tina na alu atu ma faaoolima ia te ia i tua o lona fale i totonu lava o lona fanua.

Na fesiligia e Leoleo le Tina na aafia ma manino ai, o ia lea na faafesootaiina le Ofisa o Leoleo i Tafuna e faatatau i le tamaititi e 11 tausaga le matua lea na fasi faamo’amo’a e lona Tina, ae o le fafine na faaoolima ia te ia, o le Tina o lo o molia i lenei mataupu.

Na taua e le Tina na aafia i Leoleo Suesue e faapea, a o galue i lana Togalaau Toto i tua o lona fale i le aoauli o le aso e pei ona taua, na te’i ina ua valaau atu le Tina ua molia ia te ia pe mafai ona sau la te talanoa i se mataupu taua.

Sa loka le pa e ulufale atu ia i lona fanua peita’i na te lei iloaina pe na faapefea ona ulufale atu le Tina ua molia i totonu o le lotoa ae sa tapuni le faitoto’a o le pa.

A o la talanoa ma le Tina ua molia e faatatau i le mataupu na ave ai o ia e Leoleo e mafua mai i lona fasiga o lana tama, na faateia le Tina na aafia ina ua faaoolima le ua molia ia te ia e ala i lona tu’i o ia ma futi lona ulu. A o taatia i lalo, sa ia lagona le kiki e le ua molia i lona papatua ma ona foliga a o faaauau pea ona ta tu’i ma faaoolima ia te ia.

Na taumafai le Tina na aafia e tete’e atu peita’i sa faigata sana gaioiga ona o loo faaletonu lona vae i le taimi lea, ma ua faigata ai ona faia sana gaioiga e tete’e atu ai i gaioiga ma le faaoolima atu a le ua molia ia te ia.

I le ulua’i iloiloga o lenei mataupu i le masina na te’a nei, na faamanino ai e le molimau a le malo i luma o le Fa’amasinoga mau faamaonia e lagolago ai le tagi faasaga i le Tina ua molia.

I le moliga mamafa o le faaoolima i le tulaga lua atoa ai ma le moliga mama o le tu fua i le fanua ma le fale o le isi tagata, na faamanino ai e le molimau a le malo e faapea, sa loka le pa e ulufale ai i totonu o le lotoa ma le fanua o le Tina na aafia, peita’i sa ulufale faamalosi i ai le ua molia e aunoa ma se faatanaga, ma ia faatino ai le solitulafono o le faaoolima.

Na taua atili fo’i e le molimau a le malo e faapea, o le manu’a na aafia ai le ulu ma foliga o le Tina na aafia, na atagia mai ai le tulaga e ono lamatia ai lona soifua, e mafua mai i gaioiga a le ua molia.

O le masina o Aperila lea ua faatulaga e toe valaau ai le mataupu a le ua molia i luma o le Fa’amasinoga Maualuga, i le mae’a ai lea ona teena e le ua molia o moliga faasaga ia te ia, ina ua tula’i mo lana ulua’i iloiloga i le 2 vaiaso talu ai.

O lo o taofia pea i le Toese i Tafuna i le taimi nei le Tina ua molia, e le o mafai ona ia totogi le tupe ua fa’atulaga e tatala ai o ia i tua.