TALA I VAIFANUA

Pago Pago - AMERIKA SAMOA

ULUFIA COVID-19 LOTOIFALE AMERIKA SAMOA - FA’AMALOSIA FA’ASA LANU MUMU:

Ua mae’a fa’alauiloa atu e le afioga le Kovana Sili Lemanu Peleti Mauga i le mamalu lautele o le atunuu, “Ua ulufia nei e le Covid-19 nisi o lotoifale o aiga i le teritori, ma ua fa’amalosia ai nei le Fa’asa Lanu Mumu.”

Ona o nisi o le aufaigaluega a le Matagaluega o le Soifua Maloloina sa mua’i fa’amaonia lana suega o i ai verusi o le Covid-19, ua mae’a fo’i ona fa’anofoesea mo le isi 10 aso ina ua fa’amaonia se  tasi o ana su’ega i le vaitau o le fa’anofoesea a le Aumalaga o Ianuari 27, 2022; peita’i ua alu atu i tua i lona aiga, ae ua toe pesia ai nisi o lona aiga e to’a fitu mai le to’avalu o i latou.

Ua mae’a maua ane lea fuainumera, peita’i ua mae’a fa’atasi nei sui e to’afitu o lea aiga i le sauniga lotu na faia, ua le malupuipuia uma ai nisi sa feso’ota’i ma nei sui uma o lea aiga. O le ala lea o le fa’amalosia loa e Kovana Lemanu o le Fa’asa Lanu Mumu.

Ua tapunia uma matagaluega o le Malo, se’ia vagana ai i latou e tatau lava ona faigaluega e feso’ota’i ma le tautuaina o le atunuu i lenei vaitau o le pepesi ai o le fa’ama’i i le atunuu.Ua fa’ailoa mai, o le tamaitai faigaluega lea a le DOH, o lo’o ua fa’anofoesea i lona aiga i Leone. Peita’i ua faia suega a sui uma o lona aiga, ua maua uma lava i latou e toafitu.

O se mea e lelei ona ua mae’a uma ona faia tui puipuia o sui uma o lea aiga, ma ua leai fo’i nisi o va’aia ai auga tigaina o le gasegase covid-19.

I le taimi nei ua fa’ailoa mai e le fa’atonu o le Soifua Maloloina, “Ina ua fa’amaonia suega Covid-19 a sui o le aiga o lea tamaitai faigaluega, ua amata fo’i ona faia uma sailiga o sui na fesoota’i ma i latou e afua mai le sauniga lotu ma isi uma mea sa auai ai. E faia uma lava suega a nei sui pe a maua le feso’ota’iga ma i latou.”

I le taimi nei ua fa’aaogaina le Falema’i fa’aitumalo i Leone mo le tapenaga o suega a sui uma sa feso’otai ma sui o lea aiga e afua mai le aso na tuu ai le tamaitai e fa’anofoesea i lona aiga. Ua fa’aauau pea ona fa’aaogaina le Falema’i fa’aitumalo i Amouli mo tuiga o le mamalu lautele mo tui puipuia o le Covid-19, e aofia ai fo’i ma nisi o faleta’alo o aoga i le teritori o le a fa’alauiloa atu mulimuli.

Ua fa’amamalu nei fo’i le Fa’asa Lanu Mumu, o le fa’asa sili ona malosi lea ua aiaia e le Malo e tau fa’aititia ai le so’ona feoa’i, ma le mafuta atu i nisi o le atunuu ina ia taofiofi mai ai le pipisi. O le taimi nei ia fa’aaoga lava le pupuni fofoga i taimi uma i tua i aiga, ae maise nisi o fa’ataletale ma mamafa le isu pe tau puni ma fufusi lau fa’aloto i lou fatafata.

O le tatou galulue fa’atasi lava e mafai ai ona taofiofia mai le soona pipisi o le fa’ama’i i o tatou aiga ma afio’aga uma o le atunuu.

O aiaiga o le Fa’asa Lanu Mumu ua fa’amamafaina nei:

• pisinisi uma o le a fa’ataga na’o ni tagata ua filifilia totoa e le pulega e ao lava ina faigaluega. E tatala latou tautua mai le 5:00 i le vaveao se’ia pa’ia le itula e 4:00 i le afiafi.

• tagata faigaluega uma a le Malo ma pisinisi o le a galulue na’o tagata e auga latou tiute i le fa’amalosia, togafitiga ma le puipuia o le mamalu lautele mai le pisia i le fa’ama’i Covid-19.

• O Ofisa Faigaluega o le a latou fa’asino a’ao i nisi  ao ina faigaluega e fa’atautaia tiute ma tautua mo tagata lautele ina ia mafai ona maua e le lautele mea e tausia lelei ai o latou soifua maloloina, fa’aauau ona fa’aaogaina tautua lautele i le tausiga o aiga i o latou lotoifale, ia mafai ona kuka lelei latou tausami ma ia maua fo’i le vai taumafa mama, faia latou tagalavalava, fa’aleleia pea le fa’amamaina o latou lotoifale mai lapisi lafoa’i, ia fa’aauau pea ona tautuaina mai pisinisi i tua i le Uafu ma fefa’ataua’iga o oloa i le atuuu, ma o tagata faigaluega e feso’ota’i sa’o ma nei tiute e ao lava ina faigaluega.

• O isi galuega uma a le Malo o le a malolo lelei ma tapunia se’ia vagana ai sui ua tofia mai matagaluega ta’itasi e fa’atautaia tautua e tatau lava ona fa’atino mo le soifua lautele o tagata o le atunuu.

• Taofia uma lava femalaga’iga i le ea i va’alele, fa’apea fo’i ma femalaga’iga i va’a folau i le sami.

• Tapunia le toe ulufale mai o ni va’alele se’i vagana ai va’a o le Malo e fia tulaueleele mai.

• O lo ua tapunia fo’i nisi o fa’atasiga e toe fa’atautaia ma fa’atasitasi i ai nisi e to’atele.

• O nisi o fa’aopoopoga i lenei fa’asa o le a faia lava i le taimi e tauaofia ai fonotaga a le Komiti Fa’afoe o le Covid-19 ma ta’ita’i o le Malo, ma o le a fa’alauiloa atu mulimuli i le mamalu lautele lona fa’amamaluina.

TATALA DAY CARES - PEITA’I UA TOE TAPUNIA NEI ONA O LE FA’ASA:

Ina ua mae’a ai ona tapunia le vasega o Nofoaga e Tausia Fanauiti i le atunuu mo le lua vaiaso, sa mana’omia ona fa’aleleia a’ia’i lea tautua ina ia saogalemu le fanauiti mai le pesia i le RSV, ae o lea ua toe tapunia nei ona o le fa’asa ua pesia le mamalu lautele o le atunuu i le Covid-19.

O se fa’amatalaga mai le tamaitai Fomai Dr Elizabeth Lauvao, sa ia fa’ailoa ai, “Ua lava atoatoa le lua vaiaso mo tapenaga uma a Day Cares i le atunuu ina mautinoa e le pepesi ai le verusi o le RSV i le fanauiti e tausia ai.”

Peita’i ua oo mai i lenei aso Lua na tuupoina e tatala ai le tautua, ae ua fa’amalosia mai ai le Fa’asa Lanu Mumu a le tatou malo.

Ua fa’ailoa mai fo’i le malosi o le RSV sa sofa’i ai le atunuu, e latalata i le 100 ma’i e vaaia i le falema’i i aso ta’itasi ae o le taimi nei ua pa’u mai lea faitauga i le na’o le 15 - 20 o gasegase RSV e oo atu mo ni togafitiga.

Ona o lea tulaga lelei ua i ai nei le aofai o gasegase ua toe va’aia ona o le RSV, ua tapunia ai fo’i le talavai fa’apitoa sa fa’atula’ia mo le tautuaina o nisi e gasolo atu i itula afiafi i le falema’i tele i Faga’alu.