TALA I VAIFANUA

Pago Pago - AMERIKA SAMOA

6 FANAU AOGA MAUALULUGA FILIFILIA TAUVAGA FA’ASAENISI AMERIKA 2022

I  le tau fa’asiusiuga o le Laugatogi a le fanau sa fa’atauva i a latou galuega fa’atino fa’asaeanisi i le teritori, mai lava i a’oga tulaga muamua se’ia paia a’oga maualuluga i Amerika Samoa, sa tolaulauina ai loa le to’aono o sui ua togisilia i a latou poloketi fa’asaeanisi sa fa’aulu e tauva ai i lenei tausaga.

O le aoauli o le aso Faraile na fa’atautaia ai lea laugatogi i le Gov. Rex Lee Auditorium i Utulei ma sa fa’atumulia lea maota i le vasega o Fanau a’oga sa fa’atauva, fa’apea le vasega o pulega ma faia’oga o a’oga uma sa tauva o latou sui i lenei tausaga, fa’atasi ai ma Matua ma sui o aiga na oo uma atu e tapua’ia faiva o latou fanau pele.

I le tauvaga a le fanau a’oga maualuluga, lea sa fa’atautaia i le aso Tofi o le vaiaso na te’a, e tusa ma le 120+ le aotelega o poloketi na fa’aalia,

O le sui na ia mauaina le togisilia i poloketi fa’asaenisi na fa’aalia a fanau a’oga maualuluga uma i le teritori ua maua lea e Princess Viejo mai le a’oga maualuga a Fa’asao Marist i Lepuapua. O le sui na tulaga lua o le galuega fa’atino fa’asaeanisi lea na fa’aulu mai e Kelly Liang mai le Pacific Horizons i Tafuna.

O le tulaga tolu o nei poloketi fa’asaeanisi a a’oga maualuga lava o le galuega na fa’aalia a Georgia Cox mai le Pacific Horizons School i Tafuna. O le tulaga fa na maua lea e le tamaitai o Matavai Aupa’au mai Tafuna High School.

O le tulaga lima na maua lea e le poloketi fa’asaeanisi na saunia e Dimble Bonhart mai le a’oga maualuga a Fa’asao Marist i Lepuapua. Ma le poloketi fa’asaeanisi ua tulaga ono o le galuega lea a le tamaitai o Chen Edison mai le Fa’asao Marist High.

O lenei tausaga ua tula’i mai e na’o tamaitai lava ua ausia tulaga togisilia o poloketi fa’asaeanisi na fa’atauva i le 2022. Ma sa fa’alauiloa fo’i e Netini Sene sa fai ma fofoga o le Polokalama o le Science Fair, “O le tausaga nei e le malaga ai i tatou nei i fafo mo le tauvaga. Ona o le Cvid-19 ma a’afiaga o le soifua o lo ua i ai nei i tagata femalaga’i, ua mae’a fa’amautu mai e le vaega o fa’atautaia le tatou nei polokalama i fafo, o le a fa’atautaia mea uma e ala i fesoota’iga fa’avetuale ma o le a fa’amasinoina fo’i fa’apena le tatou nei tauvaga atoa a le fanau a’oga maualuluga i le Iunaite Setete o Amerika.”

Mai le 120+ le aotelega o poloketi um ana fa’aulu mai ale vasega fanau i a’oga maualuluga uma i le teritori sa fa’atauva ma fa’amasinoina i le aso Tofi i le Fale Laumei lavai Utulei, o le fanau lea ua lautogia nei mo lea fa’amoemoe aua se ‘ai o  Amerika Samoa i lea foi polokalama a le Iunaite setete atoa.

Mai a’oga tulaga muamua, sa fa’aulu mai le 160+ o poloketi ma ua mafai fo’i ona fa’aalia ma fa’amasinoina uma nei galuega fa’atino fa’asaeanisi i le aso Lua o le vaiaso na te’a nei. Sa fa’amasinoina nei poloketi ae sa fa’atautaia fa’akalasa poo le Cluster. E aotelega vasega e talitutusa le tulaga o a’oa’oga fa’asaeanitisi o lo’o ua a’otauina ai fanau a’oga.

Mai le Kalasa a le K-2 ua maua mai ai sui nei ua tulaga muamua se’ia oo i le tolu: Togisilia le tamaitai o Jessica Wong mai le South Pacific Academy; tulaga lua ai le poloketi a Matatumua Tauanuu mai Fitiuta ma le tulaga tolu ua maua lea e Melissa Trail mai le a’oga a Manumalo Academy.

Mai le Kalasa Vasega 3-5 ua maua mai ai le fa’aiuga lenei:

Togisilia ai le Poloketi a Torah Jones mai le Pacific Horizons; Tulaga Lua ai le poloketi a Miguel Dee Wees mai le South Pacific Academy ae tulaga tolu le galuega fa’atino fa’asaeanisi a Jariel Marisol mai le Manumalo Academy.

Mai le Kalasa o le Vasega 6-8 ua maua mai fo’I fa’aiuga nei a fa’amasino sa latou galulue e togi galuega fa’asaeanisi a le fanau i lenei tausaga: Tulaga Togisilia ua maua lea e Alicia Annadale mai Pavaiai Elementary. O le tulaga lua na maua lea ele poloketi fa’asaeanisi na saunia ma fa’aulu mai e Ida Dee Wees mai le Sotuh Pacific Academy ma le tulaga tolu o le Poloketi fa’asaeanisi lea sa saunia e Kim Garciama Frank Wulf mai le a’oga a Marist St Francis.

I le mae’a ai o le Laugatogi lea ua le mafai ona mautu mai poo ai le a’oga ua maua le togisilia i le aotelega o togi na ausia e latou fanau a’oga sa tauva i lenei polokalama mo le tausaga a’oga 2022. Peita’i ua fa’ailoa mai, o le a fa’ato’a maua mai mulimuli a’o le’i mae’a le tausaga a’oga nei.

FAANOFOESEA AI AUMALAGA MAI HAWAII:

O le aumalaga e to’a 277 na to’ai taunuu mai le afiafi o le aso Tofi na te’a nei, ua fa’anofoia nei le faletalimalo o le Tradewinds, Fatuoaiga ma le Sadies Restaurant i Utulei. Ua fa’ailoa fo’i i le aumalaga, ia nofosauni mo le fa’anofoesea mo le 14 aso pe sili atu, e fuafua toto’a lava i fa’ai’uga o suega Covid -19 lea e faia a i latou a’o fa’anofoesea.

Afai lava e leai ni lavelave i suega o le a fa’atautaia a i latou, o le a faia lava fa’aiuga faigofie a le vasega o foma’i ma le Komiti Fa’afoe fo’i i le latou fa’anofoesea ai.

O lo ua nofosauni fo’i le aumalaga mo a latou suega muamua e faia lea i le aso Gafua. Peita’I e tusa ai ma se faamatalaga ua fa’ailoa mai a le susuga le Fa’atonu o le Matagaluega o le Soifua Maloloina, Motusa Tuileama Nua, ua ia fa’ailoa mai ai, “O le tatou maota fou lea ua faatula’ia i le malaeva’alele, o lo ua fa’amatuu nei mo le fa’anofoesea o e malaga mai   o se taimi pu’upu’u pe tasi le aso ma toe taliu fa’apea ma e malaga ulufale mai Samoa.

KOMITI FAAFOE O LE COVID-19 TUUTUUGA MO E MALAGA MAI SAMOA

Ua i ai ni tuutuuga ua mua’i tapena e le Matagaluega o le Soifua Maloloina ina ia fa’ae’e i e malaga mai Samoa, pe a ulufale mai ma fa’anofoesea. I le taimi nei ua tuuina atu nei aiaiga ma tuutuuga se’ia taga’i toto’a i ai le Komiti Fa’afoe o le Covid-19 ma faia I ai se latou fa’aiuga.

I le taimi nei ua talosaga mai avanoa e ulufale mai ai i latou mai Samoa e ala i le TalofaPass, o le taimi muamua sa latou le fa’aaogaina lea itulau mo e fia ulufale mai i Amerika Samoa. O lo ua fa’atulaga fo’i le lima aso e fa’anofoesea ai, ae ua fa’amoemoe lava fo’i le fa’aumiumi atu o lefa’anofoesea pe afai e lelei lava i’uga o su’ega Covid-19 e faia a i latou nei.

A'o le taofia femalaga’iga mai Samoa i totonu o le tatou teritori, sa pau lava le mea e ao ina usita’ia e le aumalaga mai Samoa, ia fa’ailoa mai ua mae’a faia o latou tui puipuia o le Covid-19, e le lesitala fo’i i latou i luga o le tatou TalofaPass.

Peita’i, sa fa’aaogaina le TalofaPass e i latou uma e malaga mai Fiti ma Hawaii.

E ese mai le faia o latou tui puipuia e ao ina pasia e i latou a latou suega o le Covid-19, i totonu o le 72 itula ae le’I malaga mai i Amerika Samoa nei.

O le isi fo’i suiga o le fa’asa lea mo femalaga’iga i le va o Samoa ma i tatou, o le taofia lea o malaga mai Samoa pe afai o lo’o ua fa’aauau pea ona fa’anofoesea nisi o aumalaga mai Hawaii. O se tamau lea ina ia le a’afia vave nisi o lo’o ua fa’anofoesea pe a oo ina a’afia le atunuu i le Covid-19 pe a le mafai ona taofiofia i le fa’anofoesea o le aumalaga mai i le atunuu.

Lua o le taumafaiga lava aua afai ae fa’ateleina nisi e a’afia, e mana’omia fo’i le lava lelei o nofoaga e fa’anofoesea ai nisi o le a fa’amaonia ua i ai le verusi, fa’atasi ai ma nisi sa latou feso’ota’i a’o fa’anofoesea.

Ua faailoa e leai nisi sa tete’e i nei aiaiga mo le fa’asa o femalaga’iga mai Samoa mai sui mamalu uma o le Komiti Fa’afoe o le Covid-19, peita’i ua fa’ailoa mai o lo ua fa’asolo atu nei aiaiga uma e talanoaina e ali’i ma tamaitai foma’i fa’ato’a toe fa’afo’I mai lea e fa’amalosia loa e le Matagaluega o le Soifua Maloloina.