TALA I VAIFANUA

Pago Pago - AMERIKA SAMOA

ASO MALOLO - ASO GAFUA, FEPUARI 21

I se tusi fa’alauaitele a kovana, Lemanu Peleti Mauga ua ia fa’alauiloa ai o le Aso Gafua, Fepuari 21, o le Aso Malolo i Amerika Samoa, - o le President’s Day, ma o le aso malolo foi lea a le fetarale. 

Ma o le a tapunia ofisa uma o le malo i lea aso. O le tele o pisinisi tua i le atunu’u o le a tapunia fo’i i le aso Gafua, e aofia ai fale tupe e lua i Amerika Samoa. 

Ua fautuaina e le kovana le mamalu lautele ina ia avea lea aso malolo ma aso a manatua ai i latou sa avea ma Peresitene o Amerika fa’apea ma a latou tautua i le malo tele o Amerika.

Talu ai ona o le aso malolo, o le a leai se lomiga a le Samoa News i le Aso Gafua ma o le a tapunia foi le ofisa, se ia o’o ia Fepuari 22. 

FA’ATULAGA E SAMOA FA’ANOFOESEA MO PASESE MAI PAGO PAGO

Ua fa’ailoa e le malo o Samoa, afai ae toe tatala feoa’iga i le va o Samoa e lua, o le a amata ona fa’anofova’ava’aia pasese uma mai Tutuila i se umi e oo atu i le 21 aso, ona o sui uma lava e malaga atu I Apia, e le’i mua’i nofova’ava’aia fa’ato’a malaga atu ai.

I se fa’asalalauga ua fa’ailoa e le Minisita o le Soifua Maloloina (MOH)  ua fa’atapula’a ai lea suiga mo i latou mai Amerika Smaoa. 

“O le ituaiga verusi o le Covid-19, le Omicron, ua iloga mai le malosi tele ma le vave ona pesia ai o nisi, ma ua tatau ai foi ina vave fa’ae’e se isi tapula’a o le fa’asa i lo tatou va femalaga’i i le taimi nei,” o se fa’aupuga lea o le fe’au fa’anatinati i le vaiaso lenei a le MOH.

O pasese uma e fia malaga i Samoa mai Pago Pago, e ao ina fa’anofoesea mo le umi e 14 aso pe o se umi fo’i e fa’atulaga e le MOH i Samoa. 

Pe afai ae maua ane se suega a nei sui ua maua i le Covid-19, o le a mautinoa lava le taofia o lea sui mo le 21 aso pe sili atu fo’i.

Ona o le taimi nei o lo’o taofia lava le toe malaga mai o nisi mai le Iunaite Setete o Amerika, ua fa’atulaga mai e Samoa le mafai lava ona ulufale atu o tagata Amerika Samoa ma nisi o nonofo mai i Amerika Samoa nei i Samoa.

O nisi uma atu pasese sa mua’i malaga mai Amerika ae uia ai Amerika Samoa, e ao ina silafia e fa’anofoesea i latou i Samoa mo le 21 aso i Amerika Samoa a’o le’i malaga atu ai i Samoa.

O soo se pasese lava e toe malaga atu ae le’i mua’i fa’anofoesea mo le 21 aso i Amerika Samoa o le a le mafai ona ulufale I Samoa, ma e toe fa’afo’ia mai i Pago Pago nei.

O fanau uma lava e i lalo ane o le 12 tausaga le matutua, e ao ina atoatoa le 2 tui puipuia o le Covid -19 fa’ato’a mafai ona fa’ataga e ulufale i Samoa.

Ua fa’amamafa mai fo’i e lea poloa’iga fa’amalosia a le MOH, “O sui malaga ta’ito’atasi o le a iloiloina ta’ito’atasi lava fa’aiuga e faia ia i latou, a’o le’i fa’atagaina e malaga i Samoa.”

O e faimalaga uma e aofia ai ma le auva’a, e tatau ona tofu mae’a faia uma tui ta’ilua o ituaiga o vaila’au ua mae’a fa’atulaga ma pasia lelei e le WHO lea e aofia ai le Pfizer, Moderna, Janssenn[tasi le tui], Sinopharm ma le AstraZeneca.

Ua tatau foi ona mua’i pasia ana suega o le Covid-19 ma ia fa’aalia iuga e le o ia te ia se verusi o soo se ituaiga o le Covid-19, ma ia fa’alauiloa e ala o emeli i upega tafa’ilagi i le fa’atonu o Gasegase mo le Soifua maloloina i lana emeli [email protected]  emeili a le fomai Dr Robert Thomsen [email protected].

SUESUEGA FA’APITO I TAFEGA E TUPU PEA I FAGAIMA E LE ARMY CORPS OF ENGINEERS

Ua fa’atautaia nei se suesuega faapitoa a le vasega o Inisinia fa’apitoa mai le US Army Corps of Engineers ina ia fa’afo’ia ai le fa’afitauli numera tasi i le afio’aga o Fagaima, le tulaga o lologa ma tafega pe a oo ina fa’atimutimu lea vaipanoa o le atunuu.

O le suesuega muamua na fa’aiu ane e ao ina mua’I faia se faatanoa e fa’aalu uma i ai tafega o lologa pe a oo ina timuga tetele le atunuu. O laueleele sa aofia i lea suesuega tele e afua atu i Tafuna se’ia pa’ia Leone.

Peita’i ua fa’atautaia nei le suesuega lea ua aofia ai le vaifanua o Fagaima, Malaeimi ma le Pala Lagoon.O le fa’aiuga ua fa’ailoa mai e tauau ina toe fa’aopoopo se isi galuega tele e pa ese ai tafega ma e ono a’afia ai le 300 o falenofo o aiga i le afio’aga o a’afia i tafega.

O le tau aofai o le galuega ua fa’ailoa mai e tusa ma le $138 miliona lea e mafai ona totogia e le Malo tele le 65% o lea tau aofai, ae o le isi vaega e totogia lea e le Malo o Amerika Samoa.

O le susuga Benjamin Reder, o le Inisinia fa’apitoa mo le galuega lea, ua toe soso’o mai le taimi e mafai ai ona fa’ailoa atu finagalo o le atunuu, ae maise ai lava o aiga o loo a’afia o latou fale i le poloketi lenei, ma ua toe fa’atulaga mai lea taimi mo fonotaga fa’alaua’itele e fa’ailoa ai taofi o tagata lautele I lea mataupu se’ia oo ia Mati 01, 2022.

Pe afai e te fia maua sa’o fa’amaumauga mai le sui Inisinia lea o le galuega, o le a maua lou avanoa e te fia fa’auia a sau fesili ia te ia i lana emeli o le [email protected].

PASIA SENETOA FONOTI D. JESSOP - TOTINO KOMITI FA’AFOE  O LE FALEMA’I

O le aso ananafi na fa’amonia ai e le Maota Maualuga tofiga a le kovana sili mo Fonoti D. Jessop e avea ma totino o le Komiti Fa’afoe a le Falema’i o le LBJ. 

I lalo o tulafono a le malo, e na o le Maota Maualuga e fa’amonia tofiga a le kovana mo totino o le Komiti Fa’afoe a le falema’i. 

O Fonoti o le a ia fa’atumua le avanoa sa tula’I ai le susuga Ufagafa Ray Tulafono, lea na fa’amavae mai ai ia Fepuari 01, 2022.

O Fonoti ua litaea mai i lana tautua i le Malo o Amerika Samoa lea sa tautua ai i le Matagaluega o le Puipuiga o le Saogalemu Lautele.i lona tofi o le Sui Komesina ma le Komesina o Leoleo, ma o lana lea tautua e matua tele tausaga sa ia tula’i mai ai.

O lana tautua i lana Ekalesia LDS sa avea ai ma Pule o le Malumalu Tele i Apia, Samoa mo le Ekalesia a Iesu Keriso o le Au Pa’ia o Aso e Gata Ai.

Sa tofia fo’i e Kovana Lemanu Mauga le susuga le Faife’au Patolo Mageo i le Komiti Fa’afoe lava o le Falema’i tele, peita’i ua toe fa’ailoa mai, ua toe fa’aui esea mai lea tofiga ae le’i toe faia le iloiloga i ai.

O sui totino o lea lava Komiti Fa’afoe ua aofia ai Dr Malouamaua Tuiolosega le ta’itaitono, Dr Jean Anderson le Sui Taitaifono, Tamasoali’i Dr Joseph Tufa ma Moefa’auo William Emmsley.