TALA I VAIFANUA

Pago Pago - AMERIKA SAMOA

FA’AAUAU TUIGA COVID-19 & BOOSTER I AOGA I LE ASO FARAILE

Ua fa’ailoa e le Matagaluega o le Soifua Maloloina o le a fa’aauau i le aso Faraile nei, Fepuari 18, mo tui puipuia o le Covid & booster i nisi o aoga. 

O tuiga mo le puipuia o fanau mai le 5-11 tausaga le matutua, fa’atasi ai ma tuiga mo tagata matutua ma le ituaiga o tui o le Booster mo e ua atoa pe o le a atoa le taitasi le tausaga talu ona mae’a faia tui puipuia o le Covid-19.

Manatua mo fanauiti uma e ao ina i ai matua e sainia pepa e fa’ataga ai ona faia tui o latou fanau, fa’apea ai ma le taua’aoina atu uma o pepa fa’amaumau o le fanauiti ina ia mautinoa o lo’o sa’o lelei le fanau o lo’o faia o latou tui puipuia.

Telefoni le DoH i le 219 mo nofoaga fa’apitoa i aoga. 

FA’AMONIA FONO FAITULAFONO TOE TOFIA KOMESINA O PALOTAGA

O le vaiaso ua te’a na fa’amaonia ai e le Maota Maualuga ma le Moata o Sui, tofiga a le afioga i le Kovana Sili, Lemanu Peleti Mauga, e toe avea ai Dr. Lealofi Uiagalelei ma Komesina o Palotaga ae maise o le avea ma ta’ita’i o le Ofisa o Palota a le malo o American Samoa. 

I le tusi sa taua’aoina e le Kovana sili i le Fono Faitulafono, ua ia toe fa’amanatu ai agava’a o Uiagalelei i lona lea tofiga. “Ua mae’a mautu atu ia outou afioga le agava’a ma le mae’ae’a lelei ona fa’ataunuu e Dr  Lealofi Uiagalelei o ona tiute o le ta’ita’i o le Ofisa o Palota a le tatou Malo. Ua iloga lona fa’amaoni i ona foi tiute ma le usita’ia o tulafono tau palotaga a le tatou malo i taimi uma e lona ofisa i palotaga sa faatautaia i le tatou teritori talu mai ona tutula’i i lea tofiga mai le tausaga e 2015.”

E ese mai lenei tofiga o lo’o i ai fo’i ona agava’a fa’apitoa sa tautua ai i le Matagaluega o Alagamanuia mo Tagata Lautele ma le tatua umi fo’i i le matagaluega o A’oga a le tatou Malo.

“O le tautua a lenei tama o le atunuu ua iloga ma ua taualoaina fo’i, aemaise ua iloga ma fa’amauina le umi fo’i o lana tautua matavela ua iloga ai lona agava’a ma loloto fo’i o lana tofa fa’ata’ita’i o soo se matagaluega sa tautua ai.”

“Ou te mautinoa ma ou fa’atuatuaina le ta’ita’iga a Dr Uiagalelei o le a mafai ona fa’aauau ai lana tautua mata’ina o le Ofisa o Palota a le tatou Malo e pei ona ia mae’a fa’ataunuuina i tausaga sa tula’i mai ai pea o le Taitai o Palotaga a le Malo o Amerika Samoa,” o se atoaga lea o se tusi a Kovana Lemanu Mauga, e taualoa ai lana tofiga o Uiagalelei ua fa’aulu atu nei mo le taitai o le Ofisa o Palota.