Falepuipui le uncle mo le 12 tausaga i le faia uiga mataga

Pago Pago - AMERIKA SAMOA

E 69 tausaga o se Tama mai Faleniu ua faasala e le Fa’amasinoga Maualuga mo le umi e 12 tausaga i le Toese i Tafuna, ina ua faamaonia solitulafono o lona faia o uiga mataga i le tama teine a lona niece e 10 tausaga e matua.

O le faasalaga faa falepuipui e 12 tausaga ua tuuina atu i le Tama ua molia, e afua mai lea i solitulafono mamafa e 2 na ta’usala ai o ia e le Fa’amasinoga.

O le afioga i le ali’i Fa’amasino Sili lagolago ia Fiti Sunia na taulimaina le mataupu a le Tama ua molia, ae lagolagosua i ai afioga i Fa’amasino Lagolago ia Mamea Sala Jr ma Tunupopo Alalafaga Tunupopo.

Talu ai puipuiga i le ono mafai lea ona iloa le tamaitai o lo o aafia i lenei mataupu, o le a le mafai ai e le Samoa News ona faailoa igoa o i latou o lo o aafia i lenei mataupu, e aofia ai ma le Tama ua nofosala.

E tele solitulafono mamafa na molia ai e le malo le Tama ua molia, o ia solitulafono e aofia ai le moliga o le faia o uiga mataga i fanau e i lalo o le 12 tausaga le matutua; faia o amioga faa sotoma i fanau laiti; tagofia o itutinosa o se tamaitai; atoa ai ma moliga e 2 o le faiaiga i se tamaitai e aiga ma fesootai tautoto i ai.

Ae i lalo o se maliliega na sainia e le malo ma le Tama ua nofosala, na malie ai lenei Tama e tali ioe i le solitulafono o le faia o uiga mataga faafeusuaiga faapea ai ma le tagofia o itutinosa o se tamaitai, o ni solitulafono mamafa e mafai ona faasala ai se tasi i le Toese mo le umi e le sili atu i le 7 tausaga, pe faasala i le salatupe e le silia i le $5,000, pe faasala foi i faasalaga uma ia e 2.

I le tali ioe ai o le Tama ua nofosala i solitulafono nei e 2, sa ia ta’utino ai e faapea, i se taimi o le masina o Ianuari o le tausaga e 2020, sa ia faia ai uiga mataga i le tama teine a lona niece e 10 tausaga le matua e tusa ai ma le tulafono. 

Na faatoese le ua molia e tusa ai o lana solitulafono ma ia talosagaina ai se isi avanoa mo ia. Sa ia faatoese foi i lona aiga atoa ai le Tina ma lana tama teine na aafia i lana gaioiga faasolitulafono. Na taua e le Tama lenei e faapea, ua lagona lona sese ma ua salamo fo’i i lana solitulafono sa faia.

Sa ia talosaga mo se avanoa e toe fo’i atu ai i tua i lona aiga e fa’aaoga aso o lo o totoe o lona ola e tautua ai le aiga, nu’u ma le Ekalesia.

Na talosaga lana loia fautua mo se faasalaga faanofovaavaaia mo lenei Tama. Na taua e le Loia Fautua e faapea, mai tausaga e tele o lenei Tama, sa avea o ia ma tagatanu’u lelei e tausisi i tulafono a le malo, ae o le solitulafono e pei ona aafia ai o ia, na tula’i mai ina ua tagofia e ia le ‘ava malosi. 

Na taua e le Loia Fautua e faapea, o le Tama ua molia, o se tagata e alofa i lona aiga toe tautua aiga fo’i, ae o le sese o lana filifili lea ua mafua ai ona tula’i mai lenei faafitauli.

E lata i le 20 masina na taofia ai lenei Tama talu ona pu’e faapagota o ia e Leoleo, e faatalitali ai se faaiuga o lana mataupu, ina ua le mafai ona ia totogi le tupe e $50,000 na faatulaga e tatala ai o ia i tua. Na finau le Loia Fautua na tula’i mo lenei Tama, ua lava ma totoe masina ia e fai ma faasalaga faa falepuipui a le ua molia.

Na matua tete’e i ai le Loia a le malo. Na taua e le loia a le malo e faapea, o le solitulafono na faatino e le ua molia, ua atagia mai ai lona le manatu mamafa i ona tiute faa Tama i le aiga. O ia sa faalagolago i ai le saogalemu ma le malu puipuia o le fanau teine a lona niece, ae ua avea ona lagona tu’i nanau ma itu ua ela ai lana vaai ma ia faatinoina ai loa lenei solitulafono mamafa.

Na faailoa atili e le Loia a le malo i le Fa’amasinoga e faapea, o ituaiga gaioiga nei e le faatagaina i le tulafono, e le tatau fo’i ona ‘alo ai le silasila a le Fa’amasinoga pe mama i ai se faasalaga, ae tatau ona mamafa se faasalaga e tu’u i ai.

E le talitonu le Loia a le malo i se faasalaga faa nofovaavaaia. I lona taofi, e tatau ona faasala lenei Tama i le faasalaga pito maualuga o lo o faataoto mai e le Tulafono, e pei o le 7 tausaga i le feusua’i ma se tamaitai talavou, ma le 5 tausaga i le tagofia o itutinosa o se tamaitai talavou.

O le gaioiga na faia e lenei Tama i le tamaitai na aafia, o le a tauave pea e lea tamaitai i aso uma o lona ola.

Na umi se taimi o malolo le Fa’amasinoga ae iloilo e afioga i ali’i Fa’amasino sa latou faaiuga talafeagai. 

Ina ua mae’a le malologa ma ua sauni le Fa’amasinoga e tuuina mai lana faaiuga, na taua ai e le afioga a Sunia le ofo o le Fa’amasinoga i lenei ituaiga gaioiga na faatino e le Tama matua ua molia.

O ia o se Tama ua matua lona soifua, e faalagolago ai fo’i lona aiga aemaise tamaitai laiti, ae foliga mai ua ia le manatu mamafa i lea tulaga, ae ua faaaoga le ‘ava malosi ma ‘alofaga o lana gaioiga.

“O se tasi lenei o mataupu e pito sili ona faanoanoa ai lagona o le Fa’amasinoga, ina ua oo lava i totonu o le fale sa tatau ona saogalemu ai lenei tamaitai, ae ua le malu ona o uiga tu’inanau sa faatino e lenei Tama matua,” o le saunoaga lea a le Fa’amasinoga.

Saunoa atili fo’i Sunia i le Tama matua ua nofosala e faapea, “Ana faapea o le faasalaga o le solitulafono lea ua ta’usala ai o ia e aofia ai le oti, e matou te tuuina atu fo’i le faasalaga o le oti.”

Mo le solitulafono o le faiaiga ma se tamaitai talavou, e 7 tausaga ua faasala ai le Tama ua ta’usala. Mo le solitulafono o le tagofia o itutinosa o le tamaitai na aafia, e 5 tausaga e nofosala ai le ua molia i le Toese i Tafuna. O ia faasalaga e tuli eseese, lona uiga, e 12 tausaga e tuli e le ua molia i le Toese i Tafuna.

A mae’a ona tuli lenei faasalaga, ua poloa’i e le Fa’amasinoga le Tama ua molia na te tuua Amerika Samoa ae toe fo’i atu i lona aiga i le Malo Tutoatasi o Samoa, e le faatagaina o ia ona toe ulufale mai i le teritori.

O le mataupu lenei na tofu atu i le Ofisa o Leoleo i Tafuna ina ua talosagaina e le aufaigaluega a le Matagaluega o Auaunaga ma Tautua Lautele le fesoasoani a Leoleo, faasaga i se mataupu na tula’i mai i Faleniu e aafia ai se Tama matua e 69 tausaga le matua ma le alualutoto e 10 tausaga le matua.

O tagata na fesiligia e Leoleo e aofia ai le teineititi na aafia, o lona Tina, o lona tuagane e 15 tausaga le matua, atoa ai ma le Tama matua ua nofosala.

Na taua e le tuagane o le tamaitai na aafia e faapea, a o taoto i le potu malolo i se tasi o aoauli ma faafoliga ua moe, sa ia maitauina ai lona tuafafine ma le Tama matua o lo o talatalanoa e pei oni tagata matutua. E le i leva ae ona vaaia le savali o lona tuafafine i totonu o le potu a le Tama matua, ma mulimuli atu ai fo’i ma le Tama matua. 

Na umi se taimi o i ai laua i totonu o le potu, ae ina ua alu atu e vaai, sa ia maitauina ai uiga mataga o lo o faia e le Tama matua i lona tuafafine. Sa ia faailoa i lona Tina le faafitauli ma fesiligia ai loa e lona Tina le Tama matua atoa ai ma lona tuafafine.

Na taua e le teineititi na aafia e faapea, o le aso na tula’i mai ai le faalavelave e pei ona taua, o le aso fanau a le Tama matua, sa inu fo’i fagu pia a le Tama matua i totonu o lona potu.

A o taele i le fale taele, na te’i ina ua tatala atu e le Tama matua le faitoto’a o le fale taele ma alu atu ua tagofia ona itutinosa. Na ave e le Tama matua o ia i totonu o lona potu ma toe faia uiga mataga ia te ia.

Ina ua fesiligia e Leoleo Suesue le ua molia, na ia ioeina ai tu’uaiga uma lava faasaga ia te ia. Sa ia faatoese ma ia taua lona sese. O lona fiafia i lona aso fanau i le aso lea, na alu ai ma faatau mai ana fagupia. 

Na faaosooso o ia e le Tiapolo ma mafua ai loa ona ia faia uiga mataga i le tama teine a lona niece.