TALA I VAIFANUA

Pago Pago - AMERIKA SAMOA

POTU TALAVAI FA’APITOA MO FANAU A’AFIA I LE FA’AMA’I FOU RSV:

Ona o lo ua fa’amaonia ua i ai le fa’ama’i fou, le RSV, o lea ua tatalaina ai i le Falema’i o le LBJ Medical Center le Potu mo Talavai RSV mo fanauiti e a’afia i lea fa’ama’i pipisi.

O le fa’ama’i RSV poo le Respiratory Syncytial Virus, e aafia ai fanauiti ma le tagata matutua. 

O le Pule o le Talavai a tamaitai poo le Pediatric, Dr Maria Guyapa, na ia faailoa, ua mae’a faia le fonotaga a le Matagaluega o le Soifua Maloloina i le aso Faraile ua te’a, ma ua “fa’ailoa manino ai le fa’ateleina o le fa’ama’i RSV i le taimi nei, ua tatau ai ona fa’atulaga lenei talavai patino mo le fanau,  ina ia mafai ona vave va’aaia e foma’i le fanauiti ua le tau fa’asolo muamua mai ai i le ER.”

“Ua vave tele le pipisi a le fa’ama’i RSV, i le na’o le lua vaiaso e tusa ai ma fa’amaumauga ua mae’a fa’aalia i e ua sulufa’i mai mo togafitiga i le falema’i.”

Ua fa’ailoa ua mae’a fa’atulaga nei se potu fa’apitoa mo talavai mo gasegase RSV i le atunuu. Ua tatala lea talavai i afiafi o aso ta’itasi ma aso Toona’i fo’i mo na’o RSV. O le potu lea ua tatala lava fo’i i le itu o i ai talavai a le fanauiti, le Pediatric Clinic.

O itula ua tatala ai lenei talavai e tatala mai le aso Gafua ma aso Faraile  mai le 4:00 i le afiafi i le 8:00 i le afiafi lava ma aso Toona’i mai le itula e 12:00 i le aoauli se’ia oo i le 4:00 i le afiafi.

Ua mafai foi ona e oo ane i falema’i fa’aitumalo a le Matagaluega o le Soifua Maloloina i aso Lua ma aso Tofi mo talavai i le Tafuna Health Center.

Fa’ailoa e Dr Guyapa, o le fa’ama’i lenei o le RSV o se fa’ama’i e pipisi tele ma e ua fa’atulaga nei Potu Talavai ina ia mafai ona puipuia mai nisi i le so’ona a’afia fo’i i lea fa’ama’i, fa’atasi ai ma tagata lava latou o faigaluega i le falema’i mai le a’afia atu ai.

O le isi fa’aiuga a le matagaluega ina ia taofia uma le fanau mai le aga’i atu i nofoaga e tausia fa’apitoa ai i latou poo Day Care se’ia mae’a ona toe fa’amama auiliilia Day Cares uma e agava’a ai mo le puipuia o fanau mai le RSV mai le pesia fo’i o i latou.

SUIGA O LE TUIGA - FAIA TUI PUIPUIA FANAU 5 TAUSAGA ULUFALE MAI

E tasi le suiga mai le vasega o e ulufale mai i le atunuu, ua manaomia ona mua’i faia latou tui puipuia e lua o le Covid-19. O se auau lea o le tusi sa fa’alauiloa mai le Ofisa o le Kovana na tusia i le aso 04 Fepuari, 2022.

O le suiga la lea ua fa’atulaga nei e ao ina mae’a atoatoa tui e lua o le fanauiti e  lima tausaga le matutua a’o le’i ulufale mai i le atunuu, sei vagana ai o i ai se ala tau togafitiga tau le gasegase e mafua ai ona le faia ni ona tui.

O le tamau sa i ai muamua le tatou fa’asa lea, o e ulufale mai e ao ina 16 tauaga ma sili atu le fanau e tatau ona mae’a faia o latou tui puipuia ole Covid-19 fa’ato’a ulufale mai ai.

O le taimi nei o lo’o tumau pea Amerika Samoa i le Code Blue, ma e mana’omia ona faia tui puipuia o le Covid-19 o tagata faigaluega uma lava sei vagana ai e i ai se fa’amaoniga a foma’i e tatau ai ona le faia tui puipuia o nisi ona o latou fuala’au mo togafitiga o lo’o inumia mo le latou soifua maloloina, pe o nisi fo’i ua fa’amaonia mai e latou tapua’iga ma fa’atuatuaga, e tatau ona le faia ni o latou tui puipuia nei.

O isi mea uma lava ma aiaiga tamau o le fa’asa lenei mo le Covid-19 ma ua fa’amalosia fo’i mai ia Fepuari 06, se’ia oo ia Mati 10, 2022.

FA’AILOA UIFA’ATALI - FA’ALETONU FAATAUTAIA MO TERITORI

Ua fa’ailoa e le tatou faipule i le Konekeresi Uifa’atali Amata ua ia fa’ailoa mai  ai, i sana saunoaga fa’alaua’itele i le Matagaluega o Fefa’ataua’iga a le Malo Tele, e tusa ai o le fa’aupuga o le latou Infrastructure Investment & Jobs Act [IIJA].

O Polokalama fa’atupe ia a le Matagaluega o Fefa’ataua’iga a le Malo tele mo le fa’aleleia o le Talafatai o setete ma teritori ma e fa’auia mai fo’i alagatupe e tele mo lea fa’amoemoe. Peita’i i le latou tusitusiga o lea fesoasoani, ua fa’ailoa manino ai ua le agava’a ai Teritori  i nei alamanuia ae ua na’o setete.

O lea le vaega o lea fesoasoani na matua fa’afesiligia lava e Kovana Lemanu Peleti Mauga ma isi fo’i ta’ita’i o nai malo fa’ateritori o Amerika i le taimi a faia ai le fonotaga a le IGIA i feso’ota’iga tau Zoom i le vaiaso na te’a.

“O lea ua ou toe tusi atu ina ia fa’ailoa atu se finagalo o matou ta’ita’i i Teritori tau atumotu o le Iunaite setete o Amerika, ona ua iloga ua le alagatutusa ona maua e matou faigamalo polokalama fa’ataoto o le Digital Equity & Middle Mile mo teritori,” o se fa’amatalaga aloa’ia lea a le Faipule o Amerika Samoa i le Konekeresi ua tusia i lana tusi i lea matagaluega o le Malo tele.

“Ua mae’a fa’ailoa atu i le Matagaluega o Fefa’ataua’iga a le Malo o Amerika Samoa e le Malo tele o Amerika Samoa e le o agava’a i lenei polokalama ona e le o aofia i latou aua e le o se Setete.”

“Peita’i, pe afai e tu’u atu i le fa’aupuga o lo ua tamau i le tusitusiga o le Polokalama IIJA, Title IV, Sec. 60401 [12] ua fa’ailoa manino ai le fa’aupuga “Setete” ua tutusa lelei ma le fa’auigaga o le aiaiga i le Section 3 o le Communications Act of 1934 [47 USC 153] lea ua matua manino ai le aofia o Amerika Samoa i le fa’aopoopoga e aofia i le District of Columbia, Puerto Rico, ma isi fo’i atumotu o Teritori o le Unaite Setete o Amerika.

“O se mea e matua le taualoa lava pe afai o le a fe’ese’esea’i ona fa’auiga nei vaega maoioi o nei tulafono e lua ua le aofia uma ai Teritor fa’aatumotu o le Iunaite Setete o Amerika e agava’a mo le polokalama aoga mo i latou a le IIJA.”

O se a’ano lea o le tusi ua mae’a fa’aulu atu e le tatou Faipule i le Konekeresi, ina ia amana’ia fo’i i tatou ma isi uma atumotu fa’ateritori o Amerika i nei agava’a mo le talafatai, e sili ona mo’omia mo motu laiti nai lo setete tetele.