Falepuipui le sui o le US Army Reserve i le gaoi

Pago Pago - AMERIKA SAMOA

O sui e to’alua o le US Army Reserve lea na ta’usala i le umia o fualaau faasaina, atoa ai ma le la aafia ai i le ave faagaoi o ni oloa mai totonu o le Faleoloa mo Fitafita a le malo tele, le PX, ua faasala i le Toese i Tafuna le isi to’atasi mo le 55 aso, ae nofovaavaaia le isi mo le 5 tausaga.

O le vaiaso na te’a nei na tutula’i ai i laua nei e to’alua i luma o le Fa’amasinoga Maualuga mo le tuuina atu o a laua fa’asalaga.

O le susuga a Herman Tatupu ma le susuga a Anthony Sanft na tula’i ai le alii Loia Fautua ia Ryan Anderson, ae o le tamaitai Loia Sili lagolago ia Kristine Soule’e na tula’i mo le malo.

O le afioga i le ali’i Fa’amasino Sili lagolago ia Fiti Sunia na taulimaina lenei mataupu, ae lagolago i ai afioga i ali’i Fa’amasino ia Mamea Sala Jr ma Tunupopo Alalafaga Tunupopo.

E tai 2 tagi na faila e le malo faasaga ia Tatupu ma Sanft.

I le tagi muamua, na tau fai molia ai Tatupu ma Sanft i le moliaga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mo le umi mai le 5 e oo atu i le 10 tausaga, poo le faasala i le salatupe e le sili atu i le $20,000, pe faasala foi i faasalaga uma ia e 2.

I le tagi lona 2, na tau fai molia ai Tatupu ma Sanft i le moliaga o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le sili atu i le $5,000, poo le faasala foi i faasalaga uma ia e 2.

Ae i lalo o se maliliega na sainia e Tatupu ma le malo, na ia malie ai e tali ioe i le moliaga na toe teuteu e le malo, le solitulafono o le umia faasolitulafono o vaega o le pauta faasaina o le aisa, o le vaega D lea o solitulafono mamafa, lea e mafai ona faasala ai se tasi i le Toese mo le umi e le sili atu i le 5 tausaga, pe faasala foi i le salatupe e le sili atu i le $5,000, pe faasala foi i faasalaga uma ia e lua.

Na tali ioe fo’i Tatupu i le moliaga na toe teuteu e le malo, ina ia faailoa ai le solitulafono o le gaoi, o le vaega A lea o solitulafono mama, lea e mafai ona faasala ai se isi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, pe faasala foi i faasalaga uma ia e 2.

I le tali ioe ai o Tatupu i solitulafono e pei ona ta’usala ai o ia e le Fa’amasinoga, sa ia ta’utino ai e faapea, i se taimi i le masina o Novema 2019, sa ia umia faasolitulafono vaega o le pauta faasaina o le aisa.

Sa ia taua fo’i e faapea, i se taimi o le masina lava lea, na ia ave faagaoi ai se sipika mai totonu o le Faleoloa o le PX a le malo tele i Tafuna e aunoa ma se faatanaga a le Pulega a le PX.

E faapena fo’i i le susuga a Sanft, sa ia tali ioe i le moliaga o le umia faasolitulafono lea o vaega o le pauta faasaina o le aisa, i lalo o se maliliega na sainia ma le malo, lea fo’i na talia e le Fa’amasinoga.

I le tali ioe ai o Sanft i le moliga e pei ona ta’usala ai o ia, sa ia ta’utino ai e faapea, i se taimi o le masina o Novema o le tausaga e 2019, sa ia umia faasolitulafono ai vaega o le pauta faasaina o le aisa ina ua taofi e Leoleo le ta’avale na la malaga ai ma lana uo o Tatupu.

FAASALAGA O TATUPU

Ina ua maua le avanoa o Tatupu ma lana loia mai le Fa’amasinoga, na talosaga ai loa le susuga a Anderson i le Fa’amasinoga mo se avanoa e faasala ai Tatupu i se faasalaga faanofovaavaaia, e aunoa ma le tuuina atu i ai o se faasalaga faa falepuipui.

Sa ia taua e faapea, e le i aafia lava Tatupu i ni solitulafono i lona olaga atoa. O ia o se sui o le Ami Faaleoleo a le malo tele o Amerika i totonu o Amerika Samoa, ma o lo o tumau pea le avea o ia ma totino o le Ami Faaleoleo e ui o lea ua nofosala o ia i luma o le Fa’amasinoga.

O le solitulafono a Tatupu ua mafua ai ona faamalolo o ia mai lana galuega i le falema’i o le LBJ i Faga’aalu, ma ua le toe talia fo’i o ia one toe ulufale i totonu o le Faleoloa o le PX.

Na talosaga Anderson i le Fa’amasinoga mo se avanoa e faanofovaavaaia ai Tatupu, ina ia maua ai le avanoa na te a’oa’oina ai se lesona taua mo lona olaga talavou.

Na lagolagoina e le Loia a le malo ia Soule’ le talosaga a le itu tete’e, ma ia talosaga ai i le Fa’amasinoga mo se faasalaga faanofovaavaaia mo le ua molia. E talitonu fo’i o ia, e alaga tatau ona nofovaavaaia le ua molia, ona o le ulua’i taimi lenei ua faamaonia ai sana solitulafono mamafa.

E pei ona taua e le Fa’amasinoga i lana faaiuga e faapea, e ui o lo o tumau pea le avea o Tatupu ma sui o le Vaega o le Ami Faaleoleo, peita’i o le itu e faanoanoa ai, ua le toe faatagaina o ia ona ulufale i totonu o le PX.

Ana leai masini pu’e ata i totonu o le faleoloa o le PX, e le maua le gaioiga sa faia e le ua molia. O le saunoaga lea a le Fa’amasinoga.

Mo le solitulafono o le umia faasolitulafono o vaega o le pauta faasaina o le aisa, e 5 tausaga ua faasala ai le ua molia i le Toese i Tafuna, atoa ai ma le salatupe e $2,000. Ua faamalumalu e le Fa’amasinoga le tuliina o le faasalaga faa falepuipui, ae ua nofovaavaaia ai le ua molia mo le 5 tausaga i lalo o tuutuuga e ao na usita’i i ai.

E 20 masina e tatau ona ia tuli i le Toese i Tafuna. Ua faamalumalu e le Fa’amasinoga le tuliina e le ua molia o lea faasalaga, ae ua lava aso e 5 na taofia ai o ia i le Toese a o faatali ai se faaiuga o lana mataupu, e fai ma ana faasalaga. 

E le tatau ona ia toe tagofia fualaau faasaina na inu i le ‘ava malosi, o le a faia fo’i se suega i lona tino ina ia faamaonia ai lona usitaia o le tuutuuga o le nofo mama mai fualaau faasaina.

E $2,000 le salatupe na te totogiina i totonu o le ulua’i 6 masina o lana faasalaga.

Mo le moliga o le gaoi, e 1 le tausaga i le falepuipui ma le salatupe e $1,000 ua faasala ai Tatupu e le Fa’amasinoga. O le a faamalumalu lona tuliina o le faasalaga faa falepuipui, ae ua nofovaavaaia ai o ia mo le 2 tausaga i lalo o tuutuuga e ao ona usita’i i ai.

Na te tuliina aso e 60 i le Toese i Tafuna, e faitau ai ma aso e 5 na taofia ai o ia a o faatalitali ai se faaiuga o lana mataupu, ona totoe ai loa lea o aso e 55 e tatau ona tuli.

O le aso Faraile o le vaiaso na te’a nei na amata tuli ai le faasalaga faa falepuipui e 55 aso a Tatupu. Soo se taimi e mana’omia ai lona auai atu i koleniga ma aoaoga a le Ami Faaleoleo, ua tuuina atu le poloaiga a le Fa’amasinoga e mafai ai ona tatala o ia i tua e alu e auai ma toe fo’i ane i totonu o le Toese.

E $1,000 lana salatupe e tatau ona totogi i totonu o le ulua’i 6 masina o lana nofovaavaaia. 

O faasalaga e 2 ua tuuina atu e le Fa’amasinoga e tuli faatasi. Lona uiga, e na o le 5 tausaga o le nofovaavaaia ma le salatupe e $2,000.

FAASALAGA O SANFT

Ina ua maua le avanoa o Sanft ma lana loia, na talosaga ai lana loia ia Anderson i le Fa’amasinoga mo se faasalaga nofovaavaaia. Sa ia taua e faapea, o le 4 ma le afa masina na taofia ai le ua molia i le Toese, ua lava lea e fai ma ana faasalaga i lenei mataupu.

Na lagolago le malo i le talosaga a le itu tete’e mo se faasalaga faanofovaavaaia, ma ia finauina ai loa se faasalaga nofovaavaaia.

Na taua e Sunia e faapea, na avea le tau saili e Leoleo o le ua molia ma lana uo ia Tatupu poo fea ua sosola i ai ma oloa mai le PX ma itu na taofia ai e Leoleo le la ta’avale ae maua ai fualaau faasaina i totonu.

Mo le susuga a Sanft, e 5 tausaga i le Toese i Tafuna ma le salatupe e $2,000 na faasala ai e le Fa’amasinoga, ina ua faamaonia le moliaga o le umia faasolitulafono o vaega o le pauta faasaina o le aisa.

Ua faamalumalu le tuliina o le faasalaga faa falepuipui, ae ua nofovaavaaia ai le ua molia mo le 5 tausaga i lalo o tuutuuga e ao ona usita’i i ai.

O nisi o ia tuutuuga e aofia ai lona totogi o le salatupe e $2,000 i totonu o le ulua’i 6 masina o lana nofovaavaaia, ma ia tuli masina e 20 i le Toese i Tafuna, e faitau ai ma le 4 ma le afa masina na taofia ai o ia ao faagasolo taualumaga o lana mataupu. 

O le paleni o lo o totoe o le faasalaga faa falepuipui ua faamalumalu e le Fa’amasinoga, fuafua lava i lona usitaia o poloaiga a le fa’amasinoga. E le faatagaina ona ia toe tagofia le ‘ava malosi poo fualaau faasaina. O le a mafai fo’i ona tuuina atu lona tino e fai i ai suega a Leoleo ma le Ofisa Nofovaavaaia e faamaonia ai lona usitaia o le faatonuga e le mafai ona ia toe tagofia le ‘ava malosi poo fualaau faasaina.