TALA I VAIFANUA

Pago Pago - AMERIKA SAMOA

TOATELE TAGATA MALAGA MAI IA IANUARI 27, ‘POSITIVE’ A LATOU SU’EGA KOVITI-19

Ona o le to’atele o I latou sa faimalaga mai I le faigamalaga a le Hawaiian Airline I le aso 27 o Ianuari, na fo’I mai a latou suega Koviti-19, o lo’o ‘Positive’ a latou su’ega, na toe faaopoopo ai loa aso e tolu o le latou faanofoesea, ina ia mautinoa lava le le aafia o le atunu’u I le faamai o le Koviti-19.

O le taimi muamua na tu’u e fa’ataape ai lenei fa’anofoesea o le taeao o le aso Faraile ua tuana’i, peita’i ua toe tolopoina lea fuafuaga a’o faatali nisi o su’ega sa faia I le Aso Toonai, mo I latou o lo’o faanofoesea I Fatuoaiga faapea le nofoaga faanofoesea I tua o le falema’I I Tafuna, faapea ma suega a I latou o lo’o I le Tradewinds lea sa faia I le aso ananafi.

O fa’aiuga o nei suega o le a fa’amaonia ai le malaga i aiga, poo le fa’aauau o le fa’anofova’avaaia o nisi o le aumalaga i le ACF, le itu o lo’o fa’anonofo va’ava’aia ai le to’atele o nisi ua fa’amaonia a latou suega o lo’o i ai vairusi o le Koviti-19.

I le tuiga lona lua lea na toe fa’ailoa mai ai, e to’atolu nisi o le aufaigaluega na ‘Positive’ a latou suega o le Koviti-19  mai le Tradewinds. O lea na vave ai ona toe faia le fa’ai’uga e toe sosoo le umi o le fa’anofova’ava’aia lenei. Ua matauina e to’afa nisi o le aufaigaluega, pe a tuu fa’atasi ma sui na maua muamua lava ua maua mai a latou su’ega, e ‘Positive’.

O nisi e to’a 20 o le aumalaga na maua ane i le Tradewinds, e faamaonia mai a latou fa’amaumauga i le Talofa Pass, sa maua muamua ma ua toe malolosi mai i le fa’ama’i Covid-19. O i latou na e to’a 20 e fa’anofo va’ava’aia mai lava i o latou potu, e matua le fa’atagaina lava ona toe feoa’i mai pe ulufafo fo’i mai o latou potu.

I LE FA’AIUGA O MEA UMA NA FOA’I - MAUA LE AOTELEGA E $532,994.50 MO TONGA:

I le maea ai ona tuufa’atasia uma o foa’i na ma’au i ai le mamalu lautele o le atunuu, le Malo ma le aufaipisinisi ma Ekalesia eseese i le atunuu, ua maua a’e le fesoasoani mo Tonga ua silia ma le afa miliona lona tele. O le aofa’iga tonu o le seleni mamala lea e $532,994.50, ma ua matua fa’afetaia le a’ao foa’i o le atunuu atoa i ona taliao, se’ia oo i so’o se tasi, fa’alapotopotoga, pisinisi ma Kamupani uma sa latou foa’i, ina ia au atu se toe faamalosi mo tatou uso uma ma aiga i le Malo o Tonga.

Mai lea aotelega o le foa’i ua mae’a aofia ai ma le foa’i a le malo o Amerika Samoa e $100,000. ma le isi vaega e $6,136.50 na mafai ona fa’avave atu i ala o tupe fa’amomoli a le PayPal.

O lona toega o le tupe fa’amomoli mo Tonga e $71,211.49, o le vaega tupe atoa lena sa sailia mai i le Maota o Tufele Li’amatua Tufele i le Malae o le Suigaula a le Atuvasa i Utulei, ma isi nofoaga uma sa fa’ailoa atu i le atunuu e avane i ai latou foa’i o so’o se ituaiga e oo lava i le seleni.

O le saunoaga fa’afetai ma le fa’amalo mai le ta’ita’i o le atunuu, le afioga le Kovana Sili Lemanu Peleti Sialega Mauga, sa ia fa’ailoa mai ai lona agaga me’eme’e aua ua toe fa’ailoa fo’i e Samoa uma lo latou agaga alofa e ala i le alofa tula’i ma foa’i atu mo e uma ua a’afia o latou falenofo, lutia lotoifale o latou aiga sa fa’amautu ma malutia ai, fa’aleagaina meatotino ma ua toe fa’afo’i i tua le aluga o le soifua laulelei sa soifua ai, ona o fa’alavelave fa’anatura o le Maugamu ma le Galulolo tele na afua mai ai.

“O le a se aoga e fa’ailoa ai o oe o se tagata alofa, pe afai e te le fesoasoani atu i se uso ua mafatia lona aiga ma le soifuaga mautu sa i ai ona o lu’itau le ma’alofia o le soifuaga? O le fesili lea e afua ai ona tatou foa’i ma le loto, aua ua tatou aioi i le Atua ia alofaina i tatou, ae tatau fo’i ona tatou alolofa atu i nisi ua pagatia, ina ia alofaina ai i tatou e le Atua i taimi pagatia o le soifua ma’ale’ale o tatou o ola ai.”

“O le Malo o Tonga, o le tatou usoga fa’apolenisia, o tatou usoga i le tatou nonofo fa’atasi ai i le Alamoana o le Pasefika, le vasa to’afilemu i le lalolagi atoa na foafoa ma fa’atula’ia e le Atua soifua. Ia taulamua fo’i ia i tatou ona fa’atino le agaga tonu o lo latou Atua o le nonofo fifilemu ma fealofani i le tatou atuvasa.”

“Pe lavea se tama’ima’ilima pe a’afia le ao i so’o se pagatia, o le au’uso moni latou te lagona fa’atasi le o’otia ma le tiga. O le ituaiga fealofaniga lea e tumau ia i tatou uma ma le Malo Tonga ma ona tagatanuu.”

“O le tatou tali atu i le pagatia ua lutia ai le Malo o Tonga ma ona tagatanuu, o le ituaiga tali lea fa’leuso tatou te feso’ota’i fa’atasi ai, pe’a pagatia le tasi o i tatou. Tau ina ia ia aoga lenei foa’i e fa’ailoa atu ai i o tatou Uso uma i Tonga ma le Malo o Tonga, o lo’o manatu atu Amerika Samoa, ma o lo’o alofaina i latou e i tatou i taimi fita o le folauga i lenei lalolagi le tumau o tatou o ola fa’atasi ai.”

“Ia aoga fo’i lenei fesoasoani e fa’apupula atili ai le manatu i o tatu tagata, e i ai lava lo tatou 

“UA TASI AE LASI LAVA OE, CRUMPTOM MO AMERIKA SAMOA” - WINTER OLYMPICS BEIJING

I le savali fa’aaloalo o le to’ai taunuu ai o sui uma e tauva mo Taaloga o le Olimipeka o le Tau Malulu I Beijing, I Saina, ua iloga ai ona fa’aofo e se alo o Amerika Samoa ia le toatele, ina ua ia la’eia faamanaia faatausala a Samoa, ma ua iloga lava ona tu mati’e lana tila i lea lava savaliga, ua matau fo’i o ia e le to’atele o sui ta’a’alo fa’avaomalo ua aotelega i lea a’ai tele.

E moni a le ulutala, “Ua tasi lava Oe i lo’u fa’amoemoe, Nathan Crumptom” ae a se ‘ai o Amerika Samoa i le fa’atamasoali’i fa’avaomalo ua amatalia nei.” Ua mautinoa fo’i ua matua nofo tapua’ia ou faiva e le mamalu o Samoa uma, poo fea o alaala ai, ae ua susu’e le fa’amalama ma matau pe tua ma ni faiva o lana tama fanau, i ta’aloga i luga o le ‘aisa malulu i Beijing le Laumua o Saina.

O Nathan Crumptom ua na’o le 36 tausaga o lona soifua, ae ua fuli e faia se mea uiga ese i lenei Olimipeka i le Kiona aua ua la’eia e ia la’ei o le Manaia e to’atasi mai Samoa o le a faatauva fa’atausala i lenei tausaga.

Ua na’o Nathan Crumptom lava le fa’amoemoe o Amerika Samoa mo sona ‘ai i lenei tasuaga, ma o le fa’atolu ai lea ona auina atu e Amerika Samoa na’o le to’atasi sana tama ta’alo fa’atauva i le Olimipeka i le 28 ai lenei o tausaga.