TALA I VAIFANUA

Pago Pago - AMERIKA SAMOA

15  SUI MAUA I LE COVID -19 - MAI LE PASESE I IANUARI 27

I le taeao o le aso Tofi na fa’ailoa mai ai i le sootaga a le Zoom lea sa talanoa mai ai sui o le Matagaluega o le Soifua (DoH) Maloloina ma fa’ailoa mai le maua ane o le to’a 15 o sui ua faamaonia o lo’o ua i ai verusi o le Covid-19 mai le mamalu o le aumalaga o loo nonofo i le Fatuaiga ma le ACF i le taimi nei.

I Fatuoaiga, sa fa’ato’a fa’ailoa ia i latou iuga o latou suega  i le taeao ananafi. 

“Ua tuai lava na fa’ailoa mai le iuga o matou suega, lea la ua fa’ate’ia matou aua na fai lava le fiafia e ia talanoa ma talie ananafi ae ua te’i i lenei tala ua faailoa mai i lenei aso, ma ua toe faanoanoa atu ai,” o se tala mai le a se tasi iloga o le aumalaga o lo’o fa’anofoesea i Fatuoaiga.

I le fonotaga lava lea i le Zoom, ua fa’ailoa ai e le DOH, o le a toe soso’o le fa’anofoesea lenei se’ia oo i le aso Gafua a sau nei, ona ua vave tele le to’atele o e ua maua ai verusi o le fa’ama’i.

Ua fa’asolo pea lava suega mo le aso ananafi e pei ona fa’atulagaina, ae o le a toe soso’o le fa’anofoesea mo le isi 4 aso, aua sa tu’u o le taeao po o le aso Faraile e fa’amatu’u ese ai le aumalaga e toe fo’i i aiga.

SO’OFA’ATASI MATAGALUEGA O TAGATA FAIGALUEGA & ASCC FAIA KOSI FA’APITOA

O le matagaluega o Tagata Faigaluega a le Malo ma le Kolisi Tuufa’atasi o Amerika Samoa, ua galulue nei fa’atasi ina ia mafai ona fa’atula’ia kosi e agava’a ai nisi o le aufaigaleuga a le malo e mana’omia ona fa’aleleia o latou tomai i matata tau le fa’amauina o fa’amaumauga e fa’aaogaina ai Komipiuta; Aoaoga Amata o le avea ai ma Tausima’i; Aoaoga Amata e avea ai ma Faia’oga; fa’apea fo’i ma a’oa’oga amata e fa’aleleia ai lou tomai i matata tau Sui Talatupe & Fa’amaumauga i faletupe.

O le polokalama lea ua fa’alautele ai nei le tomai o tagata faigaluega o le Workforce Innovation & Opportunity Program [WOIA] ma o le a maua le tusi pasi i le fa’aiuga o le 4 masina o tauavea kosi nei e le sui faigaluega.

O pili uma mo e o le a tauavea nei kosi o le a totogia lea e le polokalama o le WOIA ae leai se mea e totogia e le tagata faigaluega o tauavea mataupu mo latou kosi nei i le ASCC.

Ua talia nei e le Matagaluega o Tagata Faigaluega a le Malo ni talosaga a so’o se tasi o le aufaigaluega a le Malo e fia tau’avea nei kosi i le Kolisi, so’o se tasi lava o kosi ua lisia mo le polokalama fa’apitoa lenei.

Ua aofia ai i le gagana peretania kosi nei: Certified Nurse Aid; Teachers Aid; Finance Tech & Information Technology.

LE TONU ONA FAIA TOTOGI TAGATA FAIGALUEGA

Mai le fa’aiuga a le Matagaluega o le Leipa a le Malo Tele, ua latou fa’ailoa ai e ao ina totogia e se tasi o Kamupani i Amerika Samoa le aofaiga e $23,358 o tupe sa tatau ona totogia i ana tagata faigaluega ona o latou taimi sa faigaluega ai, ae le’i fa’amaumauina ma le tonu.

O taimi nei sa faigaluega ai tagata faigaluega sa talosaga mo se fesoasoani a le Leipa latou te suesueina ai le tonu ma le sa’o o latou totogi sa maua mai le Kamupani sa latou faigaluega ai. 

Ua fa’amauina fo’i e to’esea e le Kamupani totogi mo le taimi e malolo ai mo vai’aiga o le aso, ma totogi foi o mea e nonofo ai sui faigaluega nei mai o latou totogi ua maua.

Mai suesuega a le Leipa a le Malo Tele, ua maua ane ai, ua sala Solid Corp, o se kamupani e aotelega i ai nisi kamupani eseese e aofia ai le Worldwide Cash Station; Worldwide Car Rental, ma le Worldwide Tours & Travel Inc., ona ua le usita’ia e i latou aiaiga o le Fair Labor Standards Act, ina ua latou le totogia ma le tonu itula ua faigaluega ai ana aufaigaluega nei e to’avalu, ma ua latou le toesea fo’i ma le le tatau totogi mo le taimi e faia ai malologa mo ‘aiga a lana aufaigaluega ma totogi o latou nofoaga e nonofo ai ma faigaluega.

Ua fa’apena fo’i ona le tonu le Kamupani ia latou fa’amaumauga o itula e totogia mo tagata faigaluega i le tele o nofoaga e fa’atautaia ai tiute o le aufaigaluega ua fa’asea, ua le mautu lelei fa’amaumauga uma o itula i lea nofoaga ma lea nofoaga ma itula na fa’aalu e faigaluega ai nei sui. Ona o lea ua tele ai taimi ova ua le totogia sa’o e le kamupani, ua silia mamao ma le na’o le 40 itula i le vaiaso.