TALA I VAIFANUA

Pago Pago - AMERIKA SAMOA

FANAU FA’AU’U A’OGA MAUALULUGA FILIFLIA AOGA FA’AMILITERI

Ua mae’a faia le filifiliga a le afioga Uifa’atali Amata - faipule a Amerika Samoa i le Konekeresi -  ma ua tofia ai le to’a 12 o le fanau fa’au’u mai a’oga maualuluga o lenei tausaga i Amerika Samoa, ina ia fa’aulu atu latou talosaga i a’oga fa’amiliteri a le vaega au eseese a Amerika.

O nei talosaga o le a fa’aulu e le to’a 12 o fanau fa’au’u mai a’oga maualuluga e tatau ai ona latou fa’aulu atu talosaga ma le aotelega o latou fa’amaumauga o togi ua ausia e i latou i aoaoga, o latou tusi taualoa ai latou amio ma taumafaiga mai latou faia’oga, matua fa’aleagaga ma nisi o ta’ita’i iloga o latou afio’aga ma sosaiete o lo’o auai ai i latou. 

O nei tapenaga uma o le a fa’auia fa’atasi ma latou tusi talosaga e fa’auia i latou a’oga fa’amiliteri ua latou talosaga i ai ma ua fa’atonuina ina ia vave faia nei tusi talosaga ma lafo loa lava latou talosaga mo le isi tausaga a’oga fou.

Fa’ailoa e Uifa’atali, “Ua ou fiafia lava e toe fa’auia suafa nei e 12 o a tatou fanau a’oa’oina lelei i a’oga eseese fa’amiliteri ua latou mae’a filifili e ulufale ai i lenei vaitau o le tausaga.”

“O se va’aiga atu i ai i sui ua agava’a mo nei talosaga fa’apitoa i a’oga fa’amiliteri a vaega au eseese a le Malo tele, ua iloga ai le lelei fo’i o taumafaiga a le fanau ua filifilia i lenei tausaga. E le gata i latou togi ua ausia ae ua matua iloga mai le lelei o latou amio mai le vasega o tusi fa’apitoa e taualoa ai latou amio mai latou Matua Fa’aleagaga ma Taitai o latou afio’aga ma aiga.” 

“Malo lava le taumafai i le fanau ua filifilia nei mo nei avanoa lelei, ae maise fo’i o le galuega fesoasoani ua ofoina atu e latou faia’oga, fa’afeagaiga ma isi uma sa latou sailia mai ai tusitusiga e taualoa ma fa’amautu ai latou avanoa e ulufale ai. Poo fea lava latou te ao’oga ai i le isi tausaga a’oga fou, e mautinoa lava o le a fa’amanuiaina latou taumafaiga,” o se toe fa’aopoopo lea a Uifa’atali Amata.

(Taga’i i le lomiga a le Samoa News ia Ianuari 28 mo le lisi o fanau ua filifilia mo aoga militeri.)

TOFIA AOELUA SOLOMONA, FESOASOANI SINIA A LE KOVANA

Ua mae’a tofia nei e Kovana Lemanu P.S. Mauga e avea ma fesosaoani sinia mo ia i lona Ofisa Autu i Amerika Samoa. Ua mafua ona faia lea fa’aiuga a le Kovana sili ona ua le pasia mai e le fono faitulafono ina ia avea Aoelua Solomona Aoelua ma Fa’atonu o le Ofisa o Fa’asalalauga poo le Faletelevise o le KVZK-TV.

O lea tofiga a le kovana sili sa fa’ailoa i se fa’aaliga fa’alauaitele mai lona ofisa ia Ianuari 28. 

Ma ua fa’ailoa ai le fa’aaogaina ai o Aoelua Solomona e avea ma Fesoasoani Sinia mo le Kovana i lona Ofisa Autu, ma o le taimi nei, e va’aia pea e Aoelua Solomona Aoelua le Matagaluega o Fa’amaumauga poo le Faletelevise a le Malo se’ia toe maea faia se isi filifiliga o se fa’atonu e tula’i e tau’avea lea tofiga mo le Malo o Amerika Samoa.

Ua faailoa fo’i e le kovana sili, le fa’amoemoeina o Aoelua Solomona i le tele o lona tomai ma le tofa mamao o ia te ia fa’atasi ai ma le galuega sa tofia ai e tau’avea mo le Malo, lea ua te’ena mai ai e le fono lona lea sao.

Na pasia lelei lava le tofiga o lea tama o le atunuu i le Maota o Sui o le Fono Faitulafono, peita’i e lua lava palota na le ausia e ia le tofiga i le Senate.

I le faigamalo ua tuana’i sa avea ai lava Aoelua Solomona fesoasoani mo le Lutena Kovana Lemanu PS Mauga.