To’alua tagata faigaluega ASTCA ua ave aso malolo ona e mumusu e fai tui KOVITI

Pago Pago - AMERIKA SAMOA

E to’alua tagata faigaluega a le Faalapotopotoga o Fesootaiga a Amerka Samoa (ASTCA) ua fautuaina e le Komiti Faafoe e ave aso malolo ae faaauau pea ona maua totogi, ona o le mumusu e fai o la tui puipui mo le fa’ama’i oti o le KOVITI-19.

O se saunoaga lea a le Pulesili o le ASTCA, susuga Chuck Leota, i se iloiloga sa faia i luma o le Komiti o Fesootaiga a le Maota o Sui i le vaiaso na te’a nei, e talanoaina ai nisi o mataupu e faatatau i le auaunaga faaauau a le ASTCA i le atunu’u, atoa ai ma nisi o mataupu o loo fia malamalama i ai afioga i Faipule.

O le Taitai Komiti, afioga i le ali’i Faipule ia Logoitu’au Mark Tafua na faatautaia le iloiloga, ae lagolagosua i ai le afiogai le Sui Fofoga Fetalai, Fetu Fetui Jr.

Ina ua fesiligia le itu tau tupe a le ASTCA, na taua ai e le susuga a Leota le tulaga lelei o le itu tau tupe a le Pulega i le taimi nei, faatusatusa i tausaga ua mavae. Talu mai le masina o Oketopa o le tausaga na tea nei na amata ai le Tausaga Tupe fou lenei 2022, o lo o tulaga lelei pea lava le faafoeina o tupe maua ma tupe fa’aalu a le Pulega. 

“O le tala fiafia mo le ASTCA, e maualuga atu la matou tupe maua i a matou tupe fa’aalu, o lo o mulimulita’i lava fo’i le vaega o tupe i le faasoasoaina o la matou paketi ina ia mautinoa e tausisia ala o le tulafono,” o le saunoaga lea a Leota.

Na talosagaina e le afioga i le ali’i Faipule ia Vailiuama Steve Leasiolagi le susuga a Leota ina ia tapena atu ripoti o tupe maua ma tupe faaalu a le Pulega e silasila i ai le Maota, atoa ai ma faamaumauga o tupe maua ma tupe fa’aalu. Sa ia talosagaina fo’i Leota mo se ripoti o tupe ao a le Pulega, aemaise lava le ripoti ua mae’a ona faia i ai su’egatusi.

Ina ua fesiligia e le Sui Fofoga Fetalai ia Fetu tulaga o tagata faigaluega ma o latou totogi, na faamanino ai e Leota e faapea, o tagata faigaluega uma lava sa i lalo o le $15,000 o latou totogi i le tausaga ua, ua sii uma o latou totogi ma ua latou maua totogi e i luga atu o le $15,000 i le tausaga.

Na fesili Fetu poo le siitaga o totogi o tagata faigaluega, o se fuafuaga lea na ia fuafuaina, poo siitaga lava o totogi na fuafua e le malo i le tausaga na te’a nei. Na saunoa Leota, o siitaga o totogi ua faia nei, o siitaga lava na fuafua e le Pulega ina ua ulufale atu i totonu, ae fetaui loa fo’i ma le faatulaga mai o siitaga o totogi a le malo. 

I le tulaga o aia tatau o tagata faigaluega ma le mataupu i tui o le KOVITI-19, na saunoa ai Fetu e faapea, o ia le isi tagata na te lagolagoina tele le tatau lea ona faataua o aia tatau o tagata uma o le atunu’u, leaga o le galuega lea na galue ai.

Sa ia taua fo’i ia Leota lona fesiligia o le Loia Sili a le malo ia Fainu’ulelei Falefatu Ala’ilima Utu i le aso na faia ai le iloiloiga a le Komiti o le Soifua Maloloina a le Maota o Sui, ma le Komiti Faafoe o lo o gafa ma le puipuiga o le faama’i oti o le KOVITI-19, sa ia fesiligia ai le Loia Sili poo i ai se fuafuaga a le malo faasaga i tagata faigaluega e le o manana’o e faia o latou tui.

“O le tali a le Loia Sili, ua uma ona faia le faaiuga e ave ai aso malolo a tagata faigaluega e le o manana’o e usitaia le poloaiga mo le faia o tui, sei vagana ua faailoa e tagata faigaluega nei le pepa faamaonia e iloa ai ua mae’a ona faia o latou tui,” o le saunoaga lea a Fetui ia Leota.

Na fesili Fetu ia Leota poo i ai ni tagata faigaluega a le ASTCA e le o manana’o e lagolago le poloaiga a le Kovana e faatatau i le faia o tui. Na tali Leota, o lo o i ai fo’i i le Pulega a le ASTCA le faafitauli e pei ona alia’e mai i nisi o matagaluega a le malo, faasaga ia tagata faiagaluega e le manana’o e fai ni o latou tui.

Sa ia taua, e to’alua tagata faiagluega e le manana’o e fai ni o laua tui, ma ua fautuaina i laua nei e le Komiti Faafoe ina ia ave aso malolo e pei o le poloaiga a le Kovana, faatasi ma le tu’uina atu i ai o le 30 aso e faailoa mai ai so laua tali e tusa ai o tuutuuga e pei ona taua i le poloaiga a le Kovana.

Na faamanino auiliili e Leota, e le i faamalolo tumau tagata faigaluega nei e to’alua pe ua faamuta le la auaunaga ma le ASTCA, ae o lo o ave aso malo ma maua pea o laua totogi, e faatalitali ai le isi laasaga o le  a soso ai.

Na toe faamamafa e Fetu i lana saunoaga le taua tele o le amanaia o aia tatau o tagata faigaluega a le malo, ina ne’i i ai ni tagi e faia e i latou nei ua aafia galuega faasaga i le malo, ona aafia ai lea o le malo, talu ai le mataupu i le aafia fua o tagata e le i faia o latou tui o le KOVITI-19.

Na taua e Fetu e faapea, soo se taimi lava e taofi ai e le Leoleo se ta’avale a se tagatanu’u i luga o le alatele, e i ai le aia tatau o le tagata e fesiligia ai le Leoleo i le mafua’aga ua taofi ai lana ta’avale, atoa ai ma lona aia tatau e le tau faia ai sana faamatalaga i le Leoleo.

O le tautua ma le auaunaga a le ASTCA i Manu’a, o le isi lea mataupu na tele i ai fesili a afioga i Faipule mai Manu’a.

Na taua e le afioga i le ali’i Faipule ia Alumamalu Filoiali’i Ale lona faanoanoa tele i le tulaga o loo i ai tagata faigaluega a le ASTCA i Manu’a i le taimi nei, pe a faatusatusa i le tele o galuega e moomia le faatinoina.

Na taua e Alumamalu e faapea, o le tulaga o lo o maitauina i le Faletolu i Ta’u, Faleasao ma Fitiuta, tele naua le galuega e moomia le faatinoina, e pei o le faamama o lala laau o loo faalavelave i laina telefoni, ae o le faafitaiuli, e na o le to’alua lava tagata faigaluega a le ASTCA o lo o i ai i Manu’a. 

I lona talitonuga, e le taitai lava le to’alua tagata faigaluega la te faatinoina le galuega i totonu o le Faletolu.

“Ua leva tele tausaga talu ona folafola auaunaga a le Pulega o le a faaleleia mo Manu’a, ae o o mai lava i le taimi nei e leai lava ma se mea o tupu. E le gata e toa laiti tagata faigaluega ae le o lelei fo’i fesootaiga tau initanei i Manu’a,” o le saunoaga lea a le afioga i le ali’i Faipule ia Alumamalu.

Sa ia taua atili e faapea, i tausaga ua mavae, e na o le to’atasi le tagata faigaluega a le ASTCA sa i ai i le itumalo, a oo lava i taimi e mana’omia ai ni tagata e to’atele e faatinoina galuega mo le faamamaina o laau e faalavelave i uaea i luga o le alatele, ona o atu uma lea o le to’atele o le aumaga e fesoasoani i le faatinoina o le galuega, ae leai ni totogi e maua.

E mafua ona faatino e tagata o le itumalo lea auaunaga, o le naunau e fesoasoani i tagata o le nu’u o loo galulue i le Pulega, atoa ai ma le manatu ia faaleleia le tautua a le Pulega mo Manu’a.

Na faamalulu le susuga a Leota e tusa ai o faaletonu e pei ona taua i taimi ua te’a, faatasi ai ma lana saunoaga, e le mafai ona ia toe talanoa i faaletonu ua tuana’i, ona o lea faatoa ulufale atu i le galuega. Ae o lana vaai mamao mo le itumalo i Manu’a, o le faaleleia lea o auala o fesootaiga i Manu’a.

“O a’u e le o se tagata e faalele se faamatalaga ona fealualua’i lea. O lo’u taofi, o lea ua momoli mai le fanoga o le itumalo, taoto maia laia sei galulue atu i ai le aufaigaluega,” o le saunoaga lea a Leota.

Ina ua fesiligia le tulaga o aitalafu a le ASTCA i le Teugatupe a le Litaea, na taua ai e le susuga a Leota, o lo o tulaga lelei pea lava le totogiina o le aitalafu a le ASTCA i le Litaea. O le taimi nei, pe a ma le toe $9 miliona le paleni o le aitalafu o lo o totoe, ma o lo o totogi pea lava i masina taitasi.

O se tasi o mataupu na fesiligia e le afioga i le alii Faipule ia Lavea Fatulegaee Palepoi Mauga, o le tulaga i le faa faigaluegaina lea o se tagata e faauluulu i ai le Pulega (Chief Operation Officer - COO).

Na faailoa e Lavea ia Leota, e le mafai ona fai to’atasi na o ia faaiuga mo le Pulega, ae mana’omia se tagata e fesoasoani ma lagolagosua ia te ia. I le talitonuga o Lavea e pei ona ia fa’aalia ia Leota, e tatau ona faa faigaluega se COO mo le ASTCA.

Na tali Leota, o lo o la galulue ma le tagata e faauluulu i ai le Tupe Faasoasoa a le Pulega o le ASTCA (LFO), o ia fo’i o se tagata ua silia i le 30 tausaga lona tomai ma lana tautua i le Pulega.

Afai e aumai se COO, lona uiga o se tagata fou e le malamalama i le auala o loo faatautaia ai galuega a le Pulega, ae o le LFO o lo o i ai, ua tele lona agavaa ma lona iloa i le faatautaiga o le galuega. O le taimi nei e pei ona saunoa Leota, e le o mana’omia se COO.