Tala I Vaifanua

Pago Pago - AMERIKA SAMOA

FA’ATULAGA MAI KOVANA LEMANU - MALAGA A LE VAALELE HAWAIIAN AIR APERILA - IULAI:

O le aso tofi na te’a sa fa’ato’a fa’auia atu ai le tusi aloa’ia a Kovana Lemanu Mauga i le CEO o le Kamupani va’alele a le Hawaiian AIr, Peter Ingram, le lisi o malaga ua latou fa’atulaga mai ia Aperila seia oo ia Iulai 2022.

O lea faatulagaga o malaga e amata fuafua ma fa’atautaia agai i ai fuafuaga uma a le Kamupani Vaalele ina ia o gatusa le fuafuaga a le Malo o Amerika Samoa ma le latou Upega fesoota’i mo faigamalaga, ma le upega tafailagi fo’i a Hawaii ina ia mafai ona fa’atulaga vave ai le vasega o pasese e fia malaga atu i Hawaii e tapena ai mo malaga mai i le atunuu.

Ua iloga mai e ta’ilua malaga i masina ta’itasi ma ua amata ai fo’i ona faatulaga avanoa e malaga ai i fafo le to’atele pe a oo ina mae’a fa’au’uga i le teritori.

Ua fa’afetaia fo’i e Kovana Lemanu Mauga le aluga faifaipea a le DOH ma le Komiti Fa’afoe o le Covid-19 aua o lo ua fa’amauina, e talu mai lava le taimi na tatala ai femalaga’iga e toe fa’afo’ia mai nisi o le atunuu o opea i fafo, ua si’itia pea lava i luga le aotelega o tagata ua gasolo ane e faia o latou tui puipuia o le Covid-19. Ua iloga fo’i, ua manatu le ta’ita’iga o lenei fa’amoemoe ina ia tatala femalaga’iga, ae ia le fa’amatu’u ai se mea lelei ua tatou galulue pea e fa’atino, o le faia lea o tui puipuia o le covid -19 mo i latou e le’i faia, ma i latou fo’i ua agavaa ona tuia.

Ua fa’afetaia fo’i e Kovana Lemanu Mauga le Kamupani Va’alele a le Hawaiian Air mo le latou mau fa’atuatuaina fo’i o le tatou taumafaiga ma galulue fa’atasi ma i tatou uma mo le fa’asaogalemuina pea o le tatou atunuu mai le Covid-19.

FA’AMALOSIA LE TAUA’AOINA O LE FA’AMAONIGA O TUI PUIPUIA AUFAIGALUEGA I LE DHR:

O se tasi o poloa’iga fa’alaua’itele ua mae’a fa’alauioaina mai fa’alaua’itele i vaega uma o le Malo, ua tuusa’o mai lava i le aso Tofi na te’a nei e le afioga le Kovana Sili Lemanu P.S Mauga, o fa’amaoniga uma o tui puipuia o le Covid-19 a tagata faigaluega uma i Ofisa ma Matagaluega uma o le Malo o Amerika Samoa, e ao ina fa’aoo uma atu i le Ofisa o le Matagaluega o Tagata Faigaluega a le Malo, mo le fa’amauina.

E ao ina faia lea tulaga e tagata faigaluega uma, a’o le’i o’o atu ia Ianuari 14, 2022.

Pe afai o le a leai se fa’amaoniga ua mae’a faia tui puipuia nei i le Ofisa o tagata faigaluega a le Malo, o lona uiga ua fa’asaina le tagata faigaluega, ona toe ulufale i se nofoaga o galulue ai tagata faigaluega a le Malo, poo se nofoaga lisi fo’i o fa’atautaia mai ai tautua a tagata faigaluega a le Malo, ua le fa’atagaina fo’i i totonu o so’o se ta’avale a le Malo, ma e le toe fa’atagaina le le toe faigaluega faatasi ma isi tagata faigaluega a le Malo, se’ia oo lava ina le toe maua lea avanoa faigaluega.

Pe afai o le a le usitaia lava e so’o se tagata faigaluega a le Malo lenei poloa’iga ua fa’amalosia, o le a fa’amalosia o ia e ave uma ona livi, se’i vagana lava ua maua atu le fa’amaoniga o ona tui ua mae’a faia, pe ua mae’a fo’i le taimi atoa o lo’o fa’amalosia ai le fa’asa o le Covid-19 o lo’o fa’amalosia nei e le Malo o Amerika Samoa fa’atasi ai ma isi malo uma o le lalolagi.

Ua fa’atulaga ina ia mafai ona fa’aaogaina e le tagata faigaluega ona livi ua mae’a i ai e oo lava i livi ma’i a’o i ai i latou i lea vaitau e fa’asa ai ona ulufale ma faigaluega i so’o se ofisa o le Malo. A mae’a loa ona livi uma o i ai, ona nofo loa lea mai le galuega e le toe totogia.

O le fa’asa fou lenei mo le aufaigaluega a le Malo, ua fa’ailoa mai ai, e leai ma se vaega o le fa’asa o lo’o fa’amalosia e mafai ai ona toe taofia mai le fa’ate’aina o le tagata faigaluega ona o le le usita’ia o le fa’amalosiga o le faia o tui puipuia o le Covid-19. Ua mae’a fa’ailoa atu, e mafai ona talosaga so’o se tasi mo le fatagaga a le Matagaluega o Tagata Faigaluega pe afai o lo ua mae’a fa’atulaga mai e foma’i e le tatau ona faia ni o latou tui puipuia nei ona o nisi o vaifofo o lo’o latou inumia mo togafitiga o latou gasegase, poo le tulaga fo’i o latou fa’atuatuaga tau pe tapua’iga. O lo’o i ai lea avanoa lea e talosaga mai i ai i latou e le fia fa’agafua o latou tui puipuia nei.

Ua fa’apea fo’i ona fa’atulaga mai e le poloa’iga fa’alaua’itele lea, ua taofia fo’i ona toe fa’afaigaluegaina so’o se tasi e le Malo e le’i atoatoa o latou tui puipuia o le Covid-19 e afua mai ia Novema 01, 2021.

O sui uma lava e fia malaga mai i totonu o Amerika Samoa, o lo ua tatau ona umia pepa tui e fa’amaonia ai ua mae’a faia o latou tui o le Covid-19. O lo ua fa’amalosia lea i sui femalaga’iga e 16 tausaga e aga’i i luga le matutua. E fa’aalia uma nei mea pe afai o le a lesitala mai i le TalofaPass mo femalaga’iga a le atunuu.

Pe afai e malaga mai i latou mai se atunuu o lo’o ua aafia i le Covid-19 e tatau lava ona mua’i faia mai lona tui puipuia o le 21 aso ona fa’ato’a faia lea o le 10 aso ma le tui e 5 aso a’o le’i malaga mai i Amerika Samoa e faia uma i Hawaii.

Ua taofia pea lava pemita e fia talosagaina mo nisi e ulufale mai ai i Amerika Samoa, peita’i ua na’o tagata  ua fa’afaigaluegaina atu e Kamupani i totonu o Amerika Samoa e mafai ona fa’ataga ona ulufale mai. O le taimi nei o le to’atele o tagata fou e ulufale mai i Amerika Samoa, o i latou lava e faigaluega mo le Kamupani I’a, Star Kist Samoa ma le Call Center.

Ua fa’amauina fo’i ma toe fa’amalosia mai e aiaiga fou o le Fa’asa o lo ua fa’amalosia nei mo le Covid-19, le fa’amuta ai o le Fa’agafua o Tulafono mo Pepa Talosaga e Nonofo Mau ai nisi i Amerika Samoa ia Ianuari 13, 2022. Afai o fia talosagaina ni pepa nofomau o nisi i Amerika Samoa, o nisi foi ua ova aso e nonofo ai nai lo aso fa’atagaina, e mafai ona fa’aulu mai le talosaga ma totogia le fono a le Komiti Fa’afoe o Femalaga’iga a’o le’i pasia lea aso.

O isi uma aiaiga sa fa’amalosia i le 30 aso ua te’a, o lo’o toe fa’aauau mai lava ma o lo’o tumau pea Amerika Samoa i le Code Blue poo le Fa’amau o le Fa’asa Lanumoana.

O le fa’asa lenei ua fa’amalosia e afua mai ia Ianuari 8 se’ia oo ia Fepuari 06, 2022.

MAUA FA’AILOGA FA’AMEAALOFA - SUI TA’A’ALO LELEI & MATA’ALIA I SO’O SE TA’ALOGA

I le aso Tofi o le vaiaso ua te’a, sa taua’aoina ai fa’ailoga fa’ameaalofa mai le afioga le Kovana Sili Lemanu PS Mauga ma le Sui Kovana Talauega Eleasalo Ale i fanau nei ua maua mai a latou vala’aulia e ta’a’alo i le 2022 Polynesian Bowl, i Hawaii, fa’apea ma i latou foi ua maua tusi fa’amaonia o le a ta’a’alo mo kolisi ma Iunivesite i fafo.

O i latou nei ua lisia mai sa fa’amanuiaina i nei meaalofa: John Samia o Samoana High ma Oakland Salave’a o Leone High.

O John Marcus Samia o Samoana ua ia umia le ASHSAA 2021-2022 Football Varsity Offensive Tama Ta’alo lelei o le tausaga. Ua filifilia fo’i o le a avea ma tama ta’alo mai Amerika Samoa e ta’alo i le 10th Annual 2022 Polynesian All American Bowl. O le a fa’ataunuuina lea ta’aloga i East Los Angeles College ia Ianuari 15, 2022.

O le ali’i ta’alo lenei o Samia o se tasi o lo’o aoga pea i le vasega fa’aiuaso o lenei tausaga i Samoana, o ona matua o Susana ma Michael Samia mai Fagatogo ma Vatia.

O le alii o Oakland Salave’a ll, o se tasi o alo ua lauiloa i le ta’aloga ma o se piki numera muamua mai Amerika Samoa  ma ua mae’a sainia fo’i lana konekarate e aoga ai ma ta’alo mo le Iunivesite o Colorado, poo le Pafalo. O lo ua fa’atulaga fo’i le ulua’i asiasiga a Oakland i le malae o le Pafalo ia Ianuari 7, 2022 ma e ta’alo o ia i le 2022 Polynesian Bowl lea o le a faia i Honolulu i le Kunuiakea Stadium Kamehameha Schools ia Ianuari 22, 2022.

O ia lea o se tasi sa fa’au’u mai Tafuna High ma le o le alo e fa’asino ia Ginnie ma Oakland Salave’a Snr.